Noca 5 - Ese Ejja New Testament

Nahuoo queahuisoneenee shojeacapoa cuaa

¹ Majoya oe pojjajo Jesosa Genesaret baesahuajo esohui huohuipoequijo queahuisoneeneecuana poecapoa oque Eyacuiñajjija esohui shajja-ajjaa. Jamajjeya Jesosa cuiajeashiñajeacanequiapoa cuaa queahuisoneeneeyajjejojo o chipineijo enequijji.

² Nahuooshojeajji poanija beca bishe' baesahua ba'yapoa. Nahuooshojeajji poanicuana ca enequisohuaqui'yo poa oja nahuooshojeajji red shacua'yojji.

³ Oe bishe' Simonja ba'yapoa. Majoya ma bishe' bamajje Jesosa anisohuaquiapoa Simonja bishe'yasijje. Majoya ohuaya huohuiajjacapoa Simón oja bishe' equecuayiyejeapishanajji bae enahuasijje. Jesosaa anioquemajje majotii aniya sohuihuohuica-aniapoa cuana.

⁴ Majo aniya Jesosaa esohui huohuijeyomajje Simón jama acapoa ba'a: —Joma doedoeyasijje bishe' dojocue. Cuamaya nahuoo queahuiso nequi shojeacue.—

⁵ Simonya oya saja-acapoa jama ba'a: —Esohuihuohuijji, ecuaa queahuiso ojjaña jiquio mecajjetii nahuoo shojea-ajjachichanaje. Chama'neinei poanaje, nobiquijjima. Jamatii miya jama ajje eyaya shojeaje o'oya.—

⁶ Majoya aje cuamaya ohua shojeacajo queahuisoneenee nahuoocuana nobiquiapoa, jamajjeya ojaya nahuooshojeajji quecuaisajea-ajjacapoa queahuisohuajjejojo.

⁷ Jamajjeya pea bishejo ani onijje nahuoo shojeajji beca dejja oja emeya ohuaya iyaacapoa o poejji o jjequishojeasahuaa. Bishe' besajebechipiajo nahuoo queahuisoneenee jjequijeasohuacapoa beca bishe' ba'eyasijje. Majoya oja bishe' nahuoohua cuatajeacajo jaanobiquiajja'yapoa.

⁸ Simón Pedro nahuoo queahuisoneenee jjequishojeacanaje bamajje oja ecuioshajjajo nequiapoa Jesosa huohuijji jama ba'a: —Emeshimesenei, jjanequishiñaquicue enijje nequi, eya queamimishi poanijojoya.—

⁹ Ojjaña majo anica Jesosaa nahuoo queahuisoneenee shojeameecani bamajje jjabaneineiquicapoa ojo.

¹⁰ Majotii ani Zebedeoja bacuaejja beca, Santiago, Juan pea-ai Simonnijje nahuooshojeajji popea-aiapoa. Jesosaa nahuoo queahuisonee jama shojeameecani bamajje jjabaneineiquiapoa pea-ai ojo. Majoya Jesosaa Simón jama acapoa ba'a: —¡A'a queamete pojji! Jjeyahua ca miyaya nahuoo shojeapajeaje'yo. Jiquio ecua miyaya nahuoo sa-ajjaneinequinaje jama pea-aiya jjeya miyaya dejjacuana sa-ajjaje ecuea epeejji epo'yojji.—

¹¹ Majoya beca bishe' jjequisohuajeaca'yapoa cuaa etajahuasijje majotii jaa ejeajeana'yojji. Ojjaña nahuoo shojeajji aquianacuana pea-ai jeajeana'yomajje Jesosanijje poqui'yapoa Pedro, Juan, Santiago pea-ai.

Jesosaa oe dejja queamanonee leprajo jjajeameequica'yapoa

¹² Majoya oe pojjajo Jesosa oe pueblojo nequi oe dejja oque poeapoa queamanonee leprajo. Jesosa bamajje oya ecuioshajjajo anioquemajje bahua jaaoqueapoa meshiyasijje. Majoya ohuaya Jesosa huohuiajjaneineicapoa jama ba'a: —Emeshimesenei, miyaya eya jjajeameequi'yosa-amajje eya jjajeameequije'yo.—

¹³ Jesosaa oja emeya yami napamajje dejja emano jama acapoa ba'a: —E'e, eyaya miya jjajeameequi'yosa-aña. Jjeyanei mi jjajeaquije'yo, leprama' poaje'yo.— Jesosaa esohui jama acajeahuajotii dejja queamanonee leprajo jjajeananaqui'yapoa, leprama'yo poa.

¹⁴ Majoya Jesosaa oya huohuipea-aicapoa jama ba'a: —Shajja-ajjacue mo. A'a peacuana che oema'nei huohuiquijji jiquio eya mi jjajeameequi'yonajejo. Poquicue so'o Eyacuiñajjija equi-aijo chacochacopoquiani dejjaque jjabameequi'yohua miya apoa po'yonaje. Oe ehuone enaa jehui'yojji dojocue jiquio ecua Moisesja tehue poani jama ea'yojjiya. Miya jama ajo bacaje cuaa miya jjajeaqui'yonaje, lepra'ma'yo.— Jama huohuimeya acapoa oya Jesosaa.

¹⁵ Jamatii Jesosaa dejja huohuicanaje ojaya peacuana huohuijjima yajji nisho queahuisocuaa ohua dejjaja ajjima'neinei amajamajacani shajja-ajjacapoquiapoa queahuesha. Jamajjeya queahuisocuana jjachichaquicapoa oque oja esohui shajja-ajjaa, emanocuana pea-ai yecapoa oja ejja-ajameequi'yojji.

¹⁶ Jesosa ca se-ejjama' meshiyasijje poquimajamajanequiapoa oenei ani Eyacuiñajjinijje mimiya.

Jesosaa dejja jeojjishahuama' jeyo'yoajja jaa jeomeeca'yapoa

¹⁷ Majoya oe pojjajo Jesosaa esohui huohuicaquijo beca fariseocuana, Moisesja tehuehuohuijjicuana pea-ai aniapoa oja esohui shajja-ajjajji. Ma dejjacuana poeapoa provincia Galilea meshijo nequi, provincia Judea meshijo nequi, ciudad Jerusalén meshijo nequi pea-ai. Eyacuiñajji queaca'aneetii poaniya Jesosa queahuisonee emanocuana ma meshijo jaaca jja-ajameequica'yapoa.

¹⁸ Majo nequi pea dejjacuaa oe jeojjishahuama'yo jeo'yoajja dejja daqui equecuaquinijo jaa yecapoa Jesosa equijo nequi cojjaneiyasijje dojonobiaquiya nisho.

¹⁹ Ma equi ecuio poajojoya chama' o dojonobiaquijji poa. Jamajjeya dejja daqui equecuaquinijo jaatii dojosohuaquicapoa o yejji dejjacuaa equijamacoohuasijje. Majoya equijamacoo cajjamajje dejja daqui equecuaquinijo jaa jeaoqueacapoa cuaa jjonojo ojjañacuana nequicajotii Jesosa nequi cojjaneiyasijje.

²⁰ Jesosaa o yejji poanaje dejjacuana e'ejojonei ojo jjashahuabaqui'yani bamajje dejja jeo'yoajja jaa huohuicapoa jama ba'a: —Ecuea epeejji, eyaya mique mimishicuana cuijea'yonaje, chama'yo.—

²¹ Majotii ani Moisesja tehuehuohuijji poanicuana, fariseocuana jjashahuabaquiapoa oja esohuiquipajjetii jama ba'a: —Jiquio nequi dejja queatainee mimiani. Oya Eyacuiñajji jayojja pea-ai poani poso jjabaquiani. Eyacuiñajji oeneiya caca oe mimishicuana cuijeaca'yani.—

²² Jesosaja ca ebatii poa macuanaja ejjashahuabaquijji, jamajjeya oya jama poa onijje ba'a: —¿Yajjajje acuae quiana ejo queaquehuanee jjashahuabaquiani?

²³ Queacamajaneenee dejjaja mimishi cuijea'yojji. Queacamajaneenee dejja jeojjishahuama' poani ejeomee'yojji pea-ai.

²⁴ Jamajjeya quiana jjeya eyaya queaja'a bameeje Eyacuiñajjiya eya Dejjapojji epo queaca'anee pomeecani dejjacuanaja mimishicuana cuijea'yojji epojji jiquio meshijo nequi— jamaya poa.Majo aniya jeo'yoajja dejja Jesosaa jama acapoa ba'a: —Nequisohua'yocue. Mique daqui equecuaquini dojo'yocue, mique equiyasijje poqui'yocue.—

²⁵ Jesosa jama pojeahuajotiiya aje jeo'yoajja dejja nequisohuanana'yapoa ojjaña majo anicacuanaja cojjaneijo. Oja daqui equecuaquini jjequisohua'yomajje poqui'yapoa ojaya equiyasijje Eyacuiñajji bihuiapoequitii.

²⁶ Majo anicacuana o nequisohuanana'yonaje o jeo'yonaje bamajje jjabaneineiquiapoa Jesosajo. Jesosa queaca'aneenee poani bacapoa, jamajojoya aje Eyacuiñajji bihuiacapoa cuaa. Ojotii jjashahuabaquiani mimiapoa cuana jama ba'a: —Jjeyanei eseyaya bacooaña ma dejjaja ajjima'neinei ohua queapamenee acanaje. Jiquio jayojja peacuanaja ajjima'neinei.—

Jesosaa dejja Leví bajjani iyaacapoa onijje epo'yojji

²⁷ Majoya aje quijje Jesosaa equijo nequi cuayaqui'yomajje oe dejja Leví bajjani bacañaquiapoa. Leví israelitacuanaja bejjo Roma emeshimeseja yajji chichapoquiajji equisisijo aniapoa. Jesosaa oya jama acapoa ba'a: —Enijje po'yocue.—

²⁸ Jamajjeya Leviya nequisohua'yomajje ojaya echacojji bejjo chichapoquiajji poanaje jeacana'yapoa Jesosanijjetii epo'yojji.

²⁹ Majoya pea pojjajo Leviya bobicuana queahuiso cuacuameecapoa fiesta yajji oja equijotii. Queahuiso Roma emeshimeseja bejjo yajji chichapoquiajji poani dejjacuana, pea dejjacuana pea-ai poemajje ojee Jesosanijje mesajo eanioque ani ijjiaijjiaca-aniapoa.

³⁰ Majoya Moisesja tehuehuohuijji poanicuaa, fariseocuaa pea-ai Jesosa shajja-ajjajji poanicuana tecueacapoa jama ba'a: —¿Apiojji acuae quiana ijjiaijjiani, ishi-ishiani ejjapeequijji bejjo chichapoquiajji poani dejjacuananijje, pea dejjacuana queamimishi poaninijje pea-ai ojee?—

³¹ Jesosaa saja-acapoa cuana jama ba'a: —Joya yajayaja poani, manojjima eshicuijjibajji poani dejjajo jjashicuimeequica-ajja. Emanocuana caca oe jjashicuimeequicajji ojo.

³² Eya poeyanaje jiquio oyaneitii queapame ba'yani jjabaquijjicuana sa-ajjaa pojjeama. Eya caca poeyanaje mimishicuana sa-ajjaa oya pea jjashahuabaquime o pomee'yohua oja mimishicuanajo.—

Jesosaa huohuicapoa cuana Eyacuiñajjijo bobi ijjiapojjima' eanijjijo so'o

³³ Majoya aje Moisesja tehuehuohuijjicuaa, fariseocuaa Jesosa huohuicapoa jama ba'a: —Juan shajja-ajjajji poanicuana, fariseocuana pea-ai queacahuihuiso bobi ijjiapojjima' aniani so'o Eyacuiñajjinijje emimijji. ¿Yajjajje shai mi shajja-ajji poanicuana jama pea-ai po-ajja? Oya ca ijjiaijjiapoquianitii.—

³⁴ Jesosaa saja-acapoa cuana jama ba'a: —Bacue, fiesta ejjahuanaquijjijo joya poquije eiyaacuana queabihui poani dejja ejjahuanaquijji yanijo. Ma pojjajotii queabihui pomajje bobi ijjiapojjima' anica-ajja so'o.

³⁵ Majoya quijje dejja ejjahuanaquijji dojocaje cuaa. O chama' bamajje Eyacuiñajjinijje emimijji ojaya epeejjicuana bobi ijjiapojjima' anije so'o queayeno poani ejjabameequijji.—

³⁶ Jesosaa huohuitiicapoa cuana jama ba'a: —Jiquiajjaya ba'a: Daquichii huiñajo daqui eyacua isaca-ajja o jaca'yojji. Jama aca'yajje daqui eyacua peajja poaje'yo. Ejaca'yo daquichii jama pojjeama pea-ai poaje'yo, hua-ama.

³⁷ Oya jayojjaya uvajjajjana' eyacua shoca-ajja ejeechii esocojo. Majo shocajo ejeechii cuiapojojeacaje sesena'majje. Majoya uvajjajjana' jjashojeajeajeyoquije, ejeechii pea-ai jeajeacaje cuaa.

³⁸ Jamajjeya uvajjajjana' eyacua shocajji ejee eyacuaneijo pea-ai. Majotiiya oya queapame nequipoquije majo sho.—

³⁹ Jesosaa jama apea-aicapoa cuana ba'a: —Uvajjajjasesena' echii ishimajje uvajjajjasesena' jjeyanei quecuapasha cajaa acani cuaa. Jama acani ba'a: “Maya uvajjajjasesena' echii queapameneenee.”—