Noca 11 - Ese Ejja New Testament

Jesosaa huohuicapoa cuana achajja mimime pocajji Eyacuiñajjinijje

¹ Majoya aje oe pojjajo Jesosa Eyacuiñajjinijje mimijeyoajo oe o shajja-ajjajji poani dejjaa huohuiajjacapoa jama ba'a: —Emeshimesenei, ecuana huohuicue achajja Eyacuiñajjinijje emimijji jiquio ecua Juanya o shajja-ajjajji poanicuana huohuicanaje, jama pea-ai huohuimeya ecuana acue.—

² Jesosaa oya saja-acapoa jama ba'a: —Eyacuiñajjinijje mimisapomajje mimicue jama ba'a: Ecuanaja Chii-ai, Eyajo nequi queahuisocuaa miya queaca'aneetii nequipoquiani cabacahua. Miya ojjañacuana huoojeapoquiajjitii poecuajicue.

³ Ojjaña pojjajotii ecuana bobi quiacue queapame eba'epoquijji.

⁴ Ecuanaja mimishicuana miyaya pajea'yocue ecuana queamimishi ajji epo oja mimishi ecuaaya pajea'yañajojoya. Ecuana che nahueneicue onaa queamimishi epomeeca poanijje.— Jamaya Jesosaa huohuicapoa achajja Eyacuiñajjinijje mimime pocajji.

⁵ Jesosaa huohuitiicapoa cuana jama ba'a: —E'e pojja'a oe miquianaja epeejji enequi. O ecahui jaajo mecashononei miyaya oja equiyasijje poquimajje jama añaquije ba'a: “Epeejji, che iña tres pahui quiacue. Quijje eyaya miya quiaje'yo miya quianaje sosejje.

⁶ Jjeyanei ecuea epeejji queahuesha nequi ejeojjijje poeyanaje ecue equiyasijje. Chama'neinei ecuea bobi o bobiajji.” Jamaya miya poaje.

⁷ Ecuea ebanei miquea epeejjiya ecahui jaa shequimajje miya jama acaje ba'a: “A'a ecuana ishe'ajji. Esecue eca'a nequi. Ecuana ecahui jaa, ecuanaja bacuacuana pea-ai. Eya enequisohuajji pojjeama poaje mi pahui quiajji.”

⁸ Bacue, miquea epeejji nequisohuasapo-ajja poaje mi pahui quiajji, jamatii nequisohuaje miya huohuiajjamajamajajje. Ojjaña cua miya huohuiajjaje huiso aquianacuana quiacaje.

⁹ Jamajjeya eyaya miquiana huohuiaña jama ba'a: Eyacuiñajji oe huohuiajjaneicue cua miquiaa saña huisojotii oja quiajji. E'ejojonei oya huohuiajjaneicue jiquio ecua dejjaa oja aquiana ejjajeaqui sa-ajjanei'yomajje baca'yani jama pea-aiya oya acue. Jamajjeya Eyacuiñajji huohuiajjamajamajaneitiicue jiquio ecua dejja esecuejjanijo taaanequiani enobiquijji, jama pea-aiya pocue. Jama quiana pomajamajajo Eyacuiñajjiya equi secuejjani ca'apejocaje miquiana nobiquijji.

¹⁰ Jamajjeya joya dejjaa o huohuiajjamajamajajji poaniya Eyacuiñajjija quiacuana jjeshecaje. Joya e'ejojonei o sa-ajjaneijji poani Eyacuiñajjiya queapame ba'emeesahuacaje. Joya esecuejo nequi taaamajamajajji poani Eyacuiñajjiya equi secuejjani ca'apejocaje o nobiquijji.

¹¹ —Bacue, miquiana echiimese poani miquianaja bacuacuaa nahuoo huohuiajjacajje oja ijjiajji, ¿a'a peyo quiame? ¡Chojja de!

¹² Ohua cachinajja huohuiajjacajje oja ijjiajji, ¿a'a aji quiame? ¡Chojja de! Jama poca-ajja.

¹³ Miquiaaya jamatii queamimishi epohua aquianacuana queapame quiapoquiaña miquianaja bacuacuana ohua huohuiajjacajje. Eyacuiñajjiya miquianaja Chii Eyajo queapameneenee nequiya ca quiana ca oe oja Edojjoshahuapame quiacaje ojjaña joya o huohuiajjaneijji poanicuana.—

Beelzebuhua Jesosa queaca'a pomeecani niñebame acapoa cuaa

¹⁴ Majoya aje quijje Jesosaa dejja eshahuamase yamijji bacapoa. Eshahuamaseya ma dejja mimi'yoajjatii pomeecapoa. Jamajjeya Jesosaa ma eshahuamase cuayameequica'yajo, dejja mimi'yapoa. Majotii anicacuana Jesosaa dejja mimimeecaje'yo bamajje jjabaneineiquicapoa ojo.

¹⁵ Pea becacuana ca majo ani jama poa Jesosajo ba'a: —Beelzebuhua, eshahuamasecuanamese poaniya, Jesosa queaca'a pomeecani eshahuamasecuana cuayameequi'yojji dejjacuanaja yamijo nequi.—

¹⁶ Peacuaa majotii aniya a'a Jesosa e'ejojonei Eyacuiñajjija huoojeanei poani ebajji huohuiajjacapoa ojaya pea dejjaja ajjima'neinei oja eajjijo, a'a Eyacuiñajjiya oya queaca'aneetii pomeecani ebajji pea-ai.

¹⁷ Jesosaja ma dejjacuanaja ejjashahuabaquijji queaquehuanee ebatii poa, jamajjeya ohuaya huohuicapoa cuana jama ba'a: —Bacue, oecuiñajjicuana onijjejaajjineinijje jjaquecuaquimajje, chama'yo poaje. Oya jayojja pea-ai poaje oopana huapa pojjeamacuana ojee jjaquecuaquimajje, chama'yo pea-ai poaje.

¹⁸ Ebionei eshahua Satanás ojayanei eshahuamasecuana huoojeacuayajea'yojji poanijjemo, oya queaca'a ojjañacuana huoojeapoquiajji pojjeama pome. E'ejojonei miquianaya ejo jjaniñebaquiani jama ba'a: “Beelzebuhua oya Jesosa queaca'anee pomeecani eshahuamasecuana huoojeacuaya'yojji epojji” jamaya quiana mimiani ejo queaquehuaneenee.

¹⁹ Miquiaaya eya jama aña Beelzebuhua eya queaca'a pomeecani. Jamajjeya, ¿aya shai mi shajja-ajjajji poanicuana queaca'a pomeecani eshahuamasecuana cuayameequi'yojji epojji? Mi shajja-ajjajji poanicuanaja eba miquianaya caca oe queaquehuatii jjashahuabaquiani ejo.

²⁰ Eyacuiñajjija Edojjoshahuapameya caca oe eya queaca'a pomeecani eshahuamasecuana huoojeacuayajea'yojji epojji, Beelzebuhua pojjeama. Ohuaya eya queaca'a pomeecani bamajje queaja'a bapea-aije quiaa Eyacuiñajji ojjañacuana huoojeapoquiatiisapoani jjeya.

²¹ —Shajja-ajjacue pea esohui ebameesahuajji. Dejja queaca'aneeya baase'beca mejjiya, cohuijjijjiya pea-ai equi cuiñacani siipojjicuana enobiqui poanijje aquiana siiya. Jamajjeya aquiana queapamenee equijotii aniani, ecuiña.

²² Majoya quijje pea dejja queaca'aneenee poeje pojja'a oja equiyasijje ma ecua ebionei dejja iyeca'a jama pojjeama. Ma ebionei dejja equi cuiña-ajja poequi cuiacaje'yo. Oja baase'beca, ecohuijji pea-ai oja equicuiñajji nisho jjeshejeacaje'yo. Majoya equiyasijje nobiquimajje aquiana siicaje, dojocaje'yo.

²³ —Ojjaña joya ecuea ejjashahuabaquijji asapo-ajjanei poanicuaa ecuea echacojji pea-ai ameejjima acani. Joya peacuana eque poemeesapo-ajja poanicuaa comaaya peacuana quea-ehuesha nequimeecani pea-ai.— Jamaya Jesosaa esohui huohuicapoa.

Eshahuamase dejjaja yamijo ecuayaqui'yo nequi, huacuaya nobiquio'oyapoa

²⁴ Jesosaa huohuitiicapoa cuana jama ba'a: —Oe eshahuamase dejjaja yamijo nequi ehuoojeacuayajea'yo poquiani meshi queajabohuasijje majotii ani'yohua nisho. Majoya o ani'yojji epojji meshi chama' bamajje oya jjashahuabaquiani jama ba'a: “Eya huacuaya poquije'yo dejjaja eyamiyasijje, ma e anicoojji poanajeyasijje.”

²⁵ Ma o anicoojji poanaje dejja ojaya equi jayojja bacani. Jamajjeya oya huacuaya epoqui'yojji o anicoojji poanaje dejja shahuaba'yomajje poquije'yo. Jiquio ecua equi ecuiashaba'yo queaboejea ani jayojja eshahuamaseya dejjaja yami se-ejjama'yo ani bacañaje'yo.

²⁶ Jamajjeya ma eshahuamaseya pea onijje eshahuamasecuana, siete huisome queamasenee, ma dejjaja yamiyasijje ojee onijje enobipea-aiquijji dojocaje. Majoya dejjaja eyamiyasijje nobiqui'yomajje queacamajanee, queanee pea-ai dejja acaje eshahuamasecuaa, ma ecua ebionei oya oenei eshahuamase yamijji poanaje jama pojjeama oya acaje— huohuicapoa Jesosaa.

Ojjaña joya Eyacuiñajjija esohui jayojja ba'epoquianicuana queabihuinee poani

²⁷ Jesosaa esohui huohuicanijotii, oe epona, majo ona ejjachichaqui nequicajo, jama taaame poa ba'a: —Queabihuinee poani ma epona mi mejojji, mi tojjoajji poa.—

²⁸ Jesosaa oya saja-acapoa jama ba'a: —E'e, oya queabihuinee. Joya ecuea esohui shajja-ajjamajje oya jayojja ba'epoquianicuana caca oe queabihuineenee poani.—

Jesosa pea dejjaja ajjima'neinei ameesa-acapoa cuaa

²⁹ Queahuisoneeneecuana jjachichaquipoquiapoa Jesosaque. Jamajjeya ohuaya huohuicapoa cuana jama ba'a: —Miquianaya caca oe jjeya jiquio meshijo ba'eca queamimishica'anee poani. Miquiaaya huohuiajjamajamajaña ecuea dejjaja ajjima'neinei eao'oyajji miquianaja a'a eya e'ejojonei Eyacuiñajjija huoojea poani ebajji. Chojja, Eyacuiñajjiya eya jama ameejjima acaje. Oenei caca oe eyaya aje. Ma ecua yahuajonei esohuihuohuijji Jonás acapoa jama pea-aiya eya poaje.

³⁰ Eyacuiñajjiya dejjaja ajjima'neinei acapoa Jonasjo oja esohui Ninivecuiñajjicuanaja queaja'a ebajji. Oya jayojja Eyacuiñajjiya oenei dejjaja ajjima'neinei acaje ejo Dejjapojji epojo jjeya ojjaña eshe ba'ecacuanaja queaja'a ebajji eya oja huoojea poani ojjaña nahue'yojji epojji.

³¹ Quijje epojja ojjaña meshijo ba'ecacuanaja oja mimishicuana ja'anei Eyacuiñajjija ehuohui'yojji poeje. Ma pojjajo emeshimese eponaa ma yahuajonei ba'yapoa shequi'yomajjeya, jiquio jjeya eshe queamimishitii ba'ecapoquianicuana huohuicaje'yo ja'anei oja mimishi. Oya ma epona yahuajonei eshe aniahua queahueshaneenee eeno poeanimijijje poeapoa emeshimese Salomonya esohui queaja'anee huohuicaje shajja-ajjaa. Jiquio jjeya eya huohuiaña esohui ca queaja'anee poani ma ecua yahuajonei Salomonya emeshimese epona huohuicapoa esohui jama pojjeama, queaja'apishana.

³² Oya jayojja pea-ai quijje epojja ojjaña meshijo ba'ecacuanaja oja mimishi ja'anei Eyacuiñajjija ehuohui'yojji poeajo Ninivecuiñajjicuaa ma yahuajonei Jonasja esohui shajja-ajjacapoa cuaaya shequi'yomajje jiquio jjeya eshe queamimishitii ba'ecapoquianicuana huohuicaje'yo ja'anei oja mimishi. Jonasya sohuihuohuicajje ojjañacuana pea jjashahuabaquime poca'yapoa oja mimishijo. Jiquio jjeya eya huohuiaña esohui ca queaja'anee ma ecua yahuajonei Jonasya huohuicapoa jama pojjeama, queaja'apishana. Jamatii quiana ecuea esohui shajja-ajjasapo-ajjanei poani. Jamajojoya aje quiana macuaaya miquianaja mimishicuana ja'anei huohuicaje'yo.— Jama huohuimeya acapoquiapoa cuana Jesosaa.

Jesosaa esohui huohuipea-aicapoa cuaquijijijo

³³ Jesosaa esohui huohuipea-aicapoa cuana jama ba'a: —Chama'nei ojjañacuanaja cuaquijiji edahuahuojje jijiqui enequiaquehuajji cajondojjohuasijje. Eyahuasijje caca oe nequiacajji ejeaja'anequijji joya equiyiyedojjohuasijje nobiquije cuanaja ebajji queaja'a.

³⁴ Miquianajaya ecojjacuana eyami queaja'a pomeejji poani jiquio ecua cuaquijijiya jeaja'acani jama. Jamajjeya ecojjacuana queapame poanijo miquianaya queaja'a ba'epoquije. Miquianajaya ecojjacuana queapame pojjeama poanijo ca quea-aapo jayojja quiana ba'epoquije.

³⁵ Jjajaahuananeineiquicue miquianaja ecojja queapametii epojjijo quea-aaponee jayojja eba'epoqui poanijje.

³⁶ Miquianaja ecojja queapame poanijo queaja'anee ba'epoquije, quea-aapo jayojja jama pojjeama. Jiquio ecua cuaquijijiya ojjaña jeaja'acani queaja'a ebajji jama pea-aiya quiana queaja'anee ba'epoquije.—

Jesosaa fariseocuana, Moisesja tehuehuohuijji poanicuana pea-ai huohuicapoa queamimishi nequica

³⁷ Jesosaa majo ani esohui huohuipajeacajo, oe fariseo dejjaa oya iyaacapoa oja equiyasijje onijje eijjiaijjiajji. Jamajjeya Jesosa oja equiyasijje nobiquimajje mesapejjejo jaaoqueñaquiapoa.

³⁸ Judío etiiquianaja esohui etehue jaa achajja eme shacuaneicajji bobi ijjiajji queapame. Jamajjeya Jesosaa oya jayojja eme mishacuacani bamajje fariseo dejja jjabaneineiquiapoa Jesosa queamimishi poani posojo.

³⁹ Jamajjeya Emeshimeseneiya Jesosaa oya huohuicapoa jama ba'a: —Miquiana fariseo dejjacuana eyamibiajjetii jjabaquiani queapame poani. Miquianaja eyamiquipajje eyiyedojjojje ca queamimishitii poani. Quea-aquianajeaneenee ba'epoquiani. Miquianaya jiquio ecua plato, caneco pea-ai ebiajjejjetii shacuacani cuaa queaboejea epojji jamatii eyiyedojjojje shacuajjima queajehuetii poani, jama jayojja quiana queamimishinee ba'e.

⁴⁰ Sapadojjoma' jayojja quiana poani. ¿A'a acuae quianaja eba Eyacuiñajjiya eyami panacapoa, joya eyamiquipajo nequi panapea-aicapoa?

⁴¹ Ebionei eyamiquipajje sapadojjojje queajjashahuabaquija'a pocue. Majoya miquiana aema'cuana aquiana o ba'emeesahuajji quiajo, miquiana queapame poani bacaje cuaa. Miquianaja yamidojjojo nequi ejjashahuabaquijji queapame poaje, queaboejea jayojja.

⁴² —E'ejojonei miquianaya fariseocuana queaneenee poaje'yo quijje. Miquiaa aquiana bejjocuanaya oepojji décima parte Eyacuiñajjija esohui jama iyashiñaña o quiajji. Bobi shicuijji, bobi huajji pea-ai nahueamanei iyashiñaña bisonei décima parte Eyacuiñajji quiajji pea-ai. Jamaya miquianaya ba'epoquiani Moisesja tehuecuana jayojja. Ma pea Eyacuiñajjija esohuicuana etehue jaa peacuana queapame ba'emeesahuacajji, Eyacuiñajji queajeaneenee acajji pea-ai. Jamaya miquiana ba'eajja. Ojjañatii Eyacuiñajjija esohui jayojja ba'ecapoquijji oepojjinei jayojja pojjeama.

⁴³ —E'ejojonei miquiana fariseo dejjacuana queaneenee poaje'yo quijje. Miquiana judiocuanaja equi-ai ejjachichaquijji aniyasijje nobiquimajje ehuiyasijje anioqueñani equii-anijji queapamenee nequijo ojjaña majo anicaja miquiana ebajji. Miquiana ejeojjijo nequi pea dejja jjacuianohuequiñani mi esohui queapame ajjequijji bamajje queabihuinee poani.

⁴⁴ —Miquiana fariseo dejjacuana queaneenee poaje'yo quijje. Miquiana ebiajjejje queapame poani jamatii miquianaja eyamiquipajje queamimishinee poani. Miquiana joya ecua emano'yocuana jaajji meshi jama. Peacuanaja ma meshi emano'yocuana jaa bajjimajo cuamaya poaequiani. Oya jayojja joya miquiananijje mimiani dejjaja bajjima poani miquiana eyamiquipajje queamimishinee.— Jamaya huohuicapoa fariseo dejjacuana.

⁴⁵ Majoya oe Moisesja tehuehuohuijji poani dejjaa Jesosa huohuicapoa jama ba'a: —Esohuihuohuijji, jiquio esohui miyaya fariseocuana añajo ecuana pea-ai niñebaña.—

⁴⁶ Jamajjeya Jesosaa oya huohuipea-aicapoa jama ba'a: —Miquianaya Moisesja tehuehuohuijjicuana pea-ai queaneenee poaje'yo quijje. Jiquio ecua aquiana queabiquieneenee abomeeajjacani cuaa jamatii oya asahuajjimanei oya jayojja miquiaaya queahuisonee esohui huohuineineipoquiaña cuana o jjashajja-ajjaquipoquijji nisho.

⁴⁷ —Miquianaya Moisesja tehuehuohuijjicuana queaneenee poaje'yo quijje miquianaja etiiquiana jayojja queamimishitii popoquianijjejojoya. Eyacuiñajjija esohuihuohuijjicuana ma yahuajonei nequiapoa miquianaja etiiquiaa quecuaca'yapoa. Jjeya miquiaaya ojaya esa'biajje mei queapame nequianaje o shahuabapoquia'yojji.

⁴⁸ Miquianaja etiiquianacuaa Eyacuiñajjija esohuihuohuijjicuana quecuaca'yapoa. Jjeya miquiaaya ojaya esa'biajje mei queapame nequiacanaje o shahuabapoquia'yojji. Jamajjeya miquiana jjabameequiani onajo miquianaja etiiquiana jayojja queamimishinee poani quiana. Jjashahuabaquiani quiana miquianaja etiiquianacuaa queapame acapoquiapoa.

⁴⁹ —Jamajjeya Eyacuiñajjiya queaja'anee jjashahuabaquianitiiyajjejojoya jama huohuime acapoa cuana ba'a: “Eyaya judiocuanaja meshiyasijje huoojeaje esohuihuohuijjicuana, ecue babaca dejjacuana pea-ai majo ba'ecacuana sohuihuohuiajjaa. Judiocuaa ecue huoojeacuana cajaa acaje. Becacuana queacamajanee pomeecaje, peacuana ca quecuacaje'yo” jamaya Eyacuiñajjiya huohuicapoa.

⁵⁰ Jamajjeya quiana jiquio eshe ba'ecacuana Eyacuiñajjiya queaneenee pomeecaje'yo ma queahuiso oja esohuihuohuijji poacuana quecuaca'yapoa cuaa sosejje. Oja ena' cuayameequica'yapoa jiquio meshi ohua panacajeahuajo, jjeya pea-ai.

⁵¹ Ebionei Abel cuiaca'yapoa. Majoya oe-ejjenei Zacarías quecuaca'yapoa oya Eyacuiñajjija equi-aiquiquibojo nequi altar Eyacuiñajji bihuiajjipejjejo nequi. Queahuisoneenee Eyacuiñajjija esohuihuohuijji poacuana quecuacapoqui'yapoa cuaa. Jamajjeya Eyacuiñajjiya jjeya jiquio eshe ba'ecacuana queaneenee pomeecaje'yo oja esohuihuohuijji poacuana miquianaja etiiquiaa quecuacapoqui'yapoa sosejje.

⁵² —E'ejojonei miquianaya Moisesja tehuehuohuijji poanicuana queaneenee poaje'yo quijje. Ojjaña Eyacuiñajjija esohui Moisesja tehuecuana jaa miquianaja queanahuenee peacuanaja ebajji. Jamatii miquianaja queaquehuatii poani, oja esohui etehue jayojja ba'eajja, peacuana oja esohui etehue jayojja ba'emeesapo-ajja aña pea-ai.—

^53-54 Jesosaa esohui jama huohuijeyocajo, fariseo dejjacuana, Moisesja tehuehuohuijjicuana pea-ai queaquenenee onijje mimiapoa. Jesosa queahuisonee esohui huohuiajjacapoa cuaa a'a ohua queaquehua saja-acaje ebajji nisho o napameejji nisho.