Noca 1 - Ese Ejja New Testament

Esohui ebionei ebacoojji

¹ Ecuea epeejji Teófilo eyaya jiquio esohui mique tehueaña. Queahuisocuaa esohui tehuecanaje achajja Jesosa Quito yahuajo nequipoquinaje.

² Ma ecuaa shajja-ajjanaje oja eba'ejjijo tehuecanaje ma dejjacuaaya. Ma pea onijje nequipoquinajeja esohui tehuepea-aicanaje oya dejjacuaaya, Jesosa Quitojo chacochacoanicuaaya. E'ejojonei tehuecanaje oya o bajjitii popoquinajeyajjejojo.

^3-4 Dejja etii poani queapame Teófilo, eyaya baneineinaje ma peacuaa Jesosajo ebionei tehuecoocanaje ma quijje tehuecanaje pea-ai queaja'anee ecuea pea-ai etehuepoquiajji. Jamajjeya eya jjashahuabaquiani mi tehuejjijo ojjaña ma Jesosaa acapoquinajejo miquea queaja'anee ebajji ma e huohuicanaje cuaa oya esohuiya.

Angelya huohuicapoa Juan ona iñajeanobiajji epojji cuayaje

⁵ Ma shequiajajotiiya aje Herodes, Judea emeshimese nequijo, oe dejja Eyacuiñajjija equi-aijo echacochacopoquijji poani nequipea-aiapoa yohua bajjani ba'a: Zacarías. Oya chacochacopoquiapoa ma yahuajonei nequiapoa dejja oja baba Abías bajjanija osecuacuananijje pea-ai ojee. Oya oja osecua pea-ai poa. Oja huanase ma bajjani poa ba'a: Isabel. Oya Aaronja osecua poa.

⁶ Zacarías, oja huanase pea-ai queapamenee ba'epoquiapoa. Emeshimesenei Eyacuiñajjija esohui jayojja ma ohua yahuajonei Moisés quiacapoa esohuijoya oya jjashajja-ajjatiiquipoquiapoa.

⁷ Oya bacuama'tii nequipoquiapoa ehuanase Isabel jjamejoquiajjanei poajojoya. Zacarías oja huanase pea-ai etiinojinoji ba'epoquiapoa.

⁸ Majoya aje quijje oe epojjajo Zacarías, ma pea Abiasja osecuacuananijje ma onijje Eyacuiñajjija equi-aijo echacochacopoquijji poanicuana, poquiapoa Eyacuiñajjija equi-aiyasijje chacohua.

⁹ Eyacuiñajjija equi-aijo echacochacopoquijji etii poanicuaa ojee jjachichaquimajje bacapoa ache nobiquije. Majoya bacapoa cuaa oya Zacarías nobiquije Eyacuiñajjija equi-ai equecuayijjiyasijje. Ohuaya nobiquimajje incienso dahuashiyecaje queahuichachashiye epojji Eyacuiñajjija ebajji.

¹⁰ Ohua eyiyedojjojotii nequiya dahuashiyecaquijotii queahuisocuana esecuejo nequi mimicapoa Eyacuiñajjinijje manei eshequi nequijo.

¹¹ Zacarías incienso dahuashiyepoequijotii oe Emeshimeseneija ángel jjanequija'aquiapoa oque altar equecua incienso dahuashiyejji ebañeimijijje nequijo.

¹² Majoya ángel oque jjanequija'aquije bamajje Zacarías queametenee ponanapoa. Ojaya equijijji nequisohuananapoa metejo.

¹³ Jamajojoya aje ma angelya Zacarías jama huohuime acapoa ba'a: —Zacarías, ¡a'a queamete pojji! Eyacuiñajjiya mique mimi shajja-ajjacanaje. Mique huanase Isabel jjamejoquije, miya bacuaejjajji poaje. Miyaya oya Juan bajjani aje.

¹⁴ Miya queabihuinee poaje mique bacua dejjasho'i cuayajo. Queahuiso peacuana queabihuinee poaje o cuayajo.

¹⁵ Emeshimeseneiya mique bacuaejja queapamenee ojo echacochacopoquijji bacaje. Jamajjeya mique bacuaejjaja tiimajje uvajjajjana' queasese eishijji pojjeamatii poaje, cachasa cuana. Oya cuayajjima ba'etii Edojjoshahuapame yamijjitii poaje. Majoya Edojjoshahuapameya oya cuayajo queaca'anee nequimeecapoquije.

¹⁶ Ohuaya queahuiso Israelcuiñajjicuana jjashahuabameequicaje o'oya queaja'a eba'epoquio'oyajji ojaya Emeshimesenei Eyacuiñajjijo.

¹⁷ Ebionei ohuaya esohui queaja'a huohuicapoquije eseja Emeshimesenei poejjimahuajo. Ma ecua yahuajonei Eliasya sohuihuohuicapoquiapoa cuana meteamaneiya, jama pea-ai sohuihuohuimeya ohuaya acapoquije cuana meteamaneiya. Echiimesecuana, enaesecuana pea-ai jjabeiquicaje'yo oja bacuacuananijje ohua esohui queaja'a jama quijje huohuicajo. Joya shajjama' jayojjanei poanicuana pea jjashahuabaquime poaje ohua huohuicajje. Eyacuiñajjija esohui queapame Emeshimesenei poeje huohuicaje ohuaya israelitacuana apoa epojji o ja'ajjequijji— jamaya huohuicapoa.

¹⁸ Majoya aje Zacariasya ángel huohuiajjacapoa jama ba'a: —¿Achajjajo eyaya miya e'ejojonei poani baje? Eya edejjatiinojinoji nequi bacuajji epojji, ecue huanase pea-ai eponatii ani ejjamejoquijji.—

¹⁹ Ma angelya oya saja-acapoa jama ba'a: —Eya ca iña Gabriel bajjani, Eyacuiñajjija echacojji ajji poani. Jamajjeya ohuaya eya huoojeacanaje jiquiacua minijje mimiya jiquio esohui queapame mi bacuajji epojjijo huohuiya.

²⁰ ¡De! jjabaquicue, miyaya eya e'ejojonei pojjeama poani poso aña. Jamajjeya miya jjeya mimiajjanei poaje so'o. Ojjaña jiquio eya mi huohuinaje esohui apoa poajo, ebacua cuayajo mimije'yo.—

²¹ Zacarías Eyacuiñajjija equi-aiyiyedojjojotii nequi mimiquijo angelnijje ma esecuejo nequicacuana jjaishoaquicanequiapoa Zacariasjo. Yajjajje oya queashono nequi micuayacuaji'yani Eyacuiñajjija equi-aiyiyedojjojo nequi jjashahuabaquicapoa ojo.

²² Majoya aje quijjepishana queashono cuaya'yomajje oya mimi'yoajja poa ma esecuejo nequica dejjacuananijje. Oja eme huocani mimi'yoajja nequiya bamajje ma esecuejo nequicacuana jjashahuabaquicapoa Zacarías jjacahuibaquiani jayojja majo nequi Eyacuiñajjiya bameecanaje. Jamajjeya oya mimi'yoajja poanaje.

²³ Zacarías Eyacuiñajjija equi-aijo nequi oja echacojji ajeyomajje quijjepishana poqui'yapoa oja equiyasije.

²⁴ Majoya aje quijje oja huanase Isabel jjamejoquiapoa. Oejji pomajje oya cinco ba'ime huiso anipoquiapoa oja equiyiyedojjojotii, cuayaquijjimanei esecueyasijje.

²⁵ Oya jjashahuabaquiapoa jama ba'a: —Yahuajo eya jjamejoquiajjanei anipoquinajejojoya eya peajja jayojja bacapoquinaje cuaa. Emeshimeseneiya eya jjamejomeesahuaquicanaje, jamajjeya jjeya eya queabicho pojjeama ani'yo.—

Oe angelya huohuicapoa Jesosa cuayajjijo

²⁶ Majoya aje quijje seis ba'ime huiso Isabel oejji anijo Eyacuiñajjiya oja ángel Gabriel bajjani huoojeacapoa provincia Galilea pueblo Nazaret meshiyasijje.

²⁷ Ma meshijoya aje oe eponasho'i ahuema' ani dejja bapojjima', bii ba'yapoa María bajjani. Oya emesenatii aniapoa quijje ejjahueaquijji José bajjani dejjajo. José emeshimese Davidja osecua poa.

²⁸ Ma angelya María o aniyasijje jjaja'aquimajje esohui queapame yecapoa jama ba'a: —Eyacuiñajji queabihui poani mi oja babacajo. Emeshimesenei minijjetii nequiani.—

²⁹ Ohua jama acajje María meteapoa oja esohuijo, ojaya equijijji nequisohuananapoa. Oya jjashahuabaquiapoa jama ba'a: —¿Yajja poanijje shai ojaya esohui ejo?—

³⁰ Majoya angelya jama apea-aicapoa oya ba'a: —¡A'a queamete pojji ecuea esohuijo! Eyacuiñajji queabihui poani mi oja babacajo.

³¹ Quijjepishana mi jjamejoquije, bacuaejjajji mi poaje. Majoya oya cuayajo Jesosa bajjani miyaya aje.

³² Oya queaca'aneetii nequipoquije. Oya acaje cuaa Eyacuiñajji Eyajo queaca'aneetii nequija Bacuaejja. Emeshimesenei Eyacuiñajjiya oya emeshimese epojji nequimeecaje ma ecua yahuajonei oja etiiquiana oja baba David nequiapoa jama pea-ai epojjiya.

³³ Ohuaya Jacobja osecuacuana Israelcuiñajjicuanaya huoojeacapoquijetii queaja'a. Oya Emeshimesenei epopajea'yojji pojjeamatii nequije.—

³⁴ O jama poani shajja-ajjamajje Mariaa ángel huohuiajjacapoa jama ba'a: —¿Achajjajo acuae iña dejja bapojjima' bii ani jjamejoquime, yajja pomajje?—

³⁵ Angelya oya jama saja-ame acapoa ba'a: —Eyacuiñajjija Edojjoshahuapame mique poeje. Eyacuiñajji Eyajo queaca'aneetii nequiya ebacua ba'emeecaje mique onejo. E'ejojonei mique bacuaejja cuayajo oya jama acaje cuaa ba'a: “Eyacuiñajjija Bacuaejja queapamenee mimishima'nei.”

³⁶ Bacue, mique huapa pojjeama Isabel pea-ai bacuaejjajji poaje. Oya jamatii eponatiinojinoji ani jjamejoquinaje. Ma onaa niñebaca-aninaje jjamejoquiajjatii poaje eponaya jjeya oya oejji ani, seis ba'ime huiso jjeya ojaya ebacua yonejo ba'e.

³⁷ Eyacuiñajjija camaja-amanei poani o bacua quiajji o jjamejomeequijji. Chama'nei ojaya queacamaja yajji— jama huohuimeya acapoa angelya.

³⁸ Majotii aniya Mariaa jama acapoa oya ba'a: —Jiquio miya e huohuiaña esohui jamaya mo ca-acahua. Eya ca iña apoa epo ani Emeshimeseneijo echacochacopoquijji.— Mariaa jama saja-ame acajje ángel poqui'yapoa.

María poquiapoa Isabelque anicuaa

³⁹ Majoya aje pea pojjajo María poquicuajiapoa provincia Judea queayiyohuiso nequiyasijje ma eyiyoquibojo ba'ecacuanaja meshiyasijje.

⁴⁰ Ma meshi bañaquimajje María Zacariasja equiyasijje nobiquiñaquiapoa. Ohuaya esohui queapame acañaquiapoa Isabel queabihui pojji.

⁴¹ Isabelya oja esohui queapame shajja-ajjacajo ebacua oja onejo ba'e moquimoquiapoa. Oja bacua yonejo ba'e nequisohuajeahuajotii Isabel Edojjoshahuapame yamijji ponanapoa.

⁴² Majoya Isabelya María queabihuiya huohuicapoa janobajjimanei jama ba'a: —Eyacuiñajjiya miya queapamenee acanaje pea eponacuana jama epojji pojjeama. Ebacua mique onejo ba'e joya quijje cuayaje queapamenee apea-aicaje Eyacuiñajjiya.

⁴³ Eya jjashahuabaquijjimanei aninaje ecuea Emeshimesenei mejojji poaje epona eque epoejjijo. Jamajjeya eya queabihuinee poani.

⁴⁴ Miya esohui e queabihui pojji añanajejo ebacua ecue onejo ba'e queabihuinee moquimoquinaje.

⁴⁵ Eyacuiñajjiya miya queapamenee acaje miya Emeshimeseneija esohuijo e'ejojonei jjashahuabaqui'yonajejojoya ma mi ohua acanaje esohuijoya— jamaya poa.

⁴⁶ Majoya María jama sohuicuayame poa ba'a: —Emeshimesenei bihuiapoquiaje.

⁴⁷ Ecuea edojjoshahua queabihuinee poani Eyacuiñajjijo, oya caca e nahue'yojji poanitii.

⁴⁸ Eyanei queapame poani jjabaquiajja ojo echacochacojji jamatii Eyacuiñajjiya eya babacacanaje oja Bacuaejja mejojji epojji. Jamajjeya eya queabihuinee poani. Jjeya, quijje pea-ai esohui acapoquijetii queahuisocuaa ejo jama ba'a: “Eyacuiñajjiya María queapamenee acanaje.”

⁴⁹ Eyacuiñajji queaca'aneetii nequiya eya queapamenee acanaje. Oja bajjani queapamenee, oya mimishima'nei.

⁵⁰ Ojjaña joya Eyacuiñajji queaca'aneetii nequiani bajji poanicuana Eyacuiñajjiya queapame acaje'yotii comacuanaya. Jamaya ohuaya acapoquianitii.

⁵¹ Eyacuiñajji queaca'aneetii nequi, jamajjeya joya oyaneitii queaca'a poani poso jjabaquijjicuanaja ojayanei ejjashahuabaquijji ameejjima acapoquiani Eyacuiñajjiya.

⁵² Dejjacuana emeshimese etii ona huoojeajji queaca'a poani nequimeepajeaca'yani Eyacuiñajjiya ojayanei ejjashahuabaquijjijo. Joya dejjacuana oyaneitii queaca'a poani jjabaquiajjacuana ca ohuaya ona huoojeapoquiajji epojji nequimeeca'yani.

⁵³ Joya bobima'nei queashoe ba'ecacuana ohuaya bobi queahuiso quiacani. Joya quea-aquianahuiso poanicuana ca aema'nei ohuaya pomeeca'yani emejjeeneitii.

⁵⁴ Israelcuiñajjicuana oja echacojji ajji poanicuanaya ohuaya ba'emeesahuacapoquiani, jaahuanacapoquiani. Eyacuiñajjiya Israelcuiñajjicuana shahuabacapoquianitii ojaya queapamenee acapoquijji jamatii queacamajanee ba'ecapoquianicuana.

⁵⁵ Yahuajonei Eyacuiñajjiya eseja etiiquianacuana Abraham oja osecuacuana pea-ai huohuicapoa ohuaya queapame acapoquijetii cuana. Jamaya oja esohui jayojjaya acapoquianitii jjeya.— Jama sohuicuayameya María poa.

⁵⁶ María oja nene Isabeljotii tres ba'imehuiso onijjetii aniapoa so'o. Majoya aje quijje oja equiyasijje poqui'yapoa.

Juan ona iñajeanobiajji epojji cuayapoa

⁵⁷ Majoya aje quijje Isabelja bacua apoa pomajje queapame cuayapoa dejjasho'i.

⁵⁸ Oja huapa pojjeamacuana, opejjejo ba'eca pea-ai Emeshimeseneiya oja bacua queapame cuayameesahuacanaje shajja-ajjamajje esohui o queabihui pojji huohuiquicapoa cuaa oque.

⁵⁹ Majoya aje oja bacua ocho cahuime huiso ecuaya jaa echiimeseya, enaeseya cuiishasha jehuisejjameecapoa. Majo queahuisocuana jjachichaquicapoa. Oya oja chiija bajjani Zacarías yajji nisho a-ajjacapoa macuaaya.

⁶⁰ Majo nequicacuaa jama a-ajjacajo oja nae jama poa ba'a: —Chojja, oya ca Juan bajjani poaje.—

⁶¹ Majoya aje oya jama acapoa cuaa ba'a: —Chama'nei mique huapa pojjeama ma bajjani, Juan.—

⁶² Majoya oja chii huohuiajjacapoa cuaa oja emejotii ae bajjani shai oja bacuaejja ejeajjiya asa-acani ebajji.

⁶³ Majo nequicacuaa jama huohuiajjame acajje oja chiiya papenijo etehuejji huohuiajjacapoa emeya. Majoya jama tehueme acapoa ejeajjiya ba'a: —Oja bajjani poaje Juan.— Ohua jama tehueme acajo jjabaneineiquiapoa cuana oja tehuejo.

⁶⁴ Manei eshequi nequijotiiya aje Zacarías mimi'yapoa. Jamajjeya majotii nequiya ohuaya Eyacuiñajji bihuiacapoa.

⁶⁵ Opejjejo ba'ecacuana jjabaneineiquicapoa Eyacuiñajjiya o mimimeeca'yonaje bamajje. Ojjaña eyiyo queahuiso nequijo ba'eca, Judeacuiñajjicuanaya queahuiso mimimimicapoa ma Eyacuiñajjiya Zacarías Isabel pea-ai acanaje huisotiijo.

⁶⁶ Ojjaña ma esohui shajja-ajjajji poanajecuana ojee oya oopana jama mimime poa ba'a: —¿Ae shai poaje maya ebacua quijje tiimajje?— Jamajjeya jama mimime poa cuana ojo e'ejojonei Emeshimeseneiya oya queapame acanajejojoya.

Zacariasya huohuicapoa ma quijje poajejo

⁶⁷ Zacariasya Juanja chii Edojjoshahuapame yamijji queaca'anee nequiya huohuicapoa ma quijje poajejo. Jama huohuime acapoa ba'a:

⁶⁸ —Emeshimesenei Israelcuiñajjicuanaja Eyacuiñajji poani ejjabihuiaqui. Oya eseque poeyanaje ese jjeshe'yohua ojaya'yo epojji.

⁶⁹ Yahuajonei David Eyacuiñajjijo queapamenee chacochacopoquiapoa. Jjeya Eyacuiñajjiya huoojeacanaje oe queaca'aneetii ese nahue'yojji epojji. Oya Davidja osecua poani.

⁷⁰ Jiquio ese nahue'yojji poejejo yahuajoneitii esohui huohuicapoa Eyacuiñajjija babaca esohuihuohuijji poa dejjacuaa.

⁷¹ Oja huoojeaa eseya nahuecapoquije ese quecua'yosapojjicuanajo, joya ese botiamanei ajji poanicuanajo pea-ai.

⁷² Eseja etiiquiana ma yahuajonei ba'ecapoacuana ohuaya huohuicapoa queapamenee acaje jamatii queacamajanee ba'ecapoquiani. Oja esohui queapame o nahue'yojjijo pajeapajea'yoajjanei.

⁷³ Yahuajonei esohui eseja etiiquiana Abraham huohuicapoa Eyacuiñajjiya. Ojaya ma esohui epajea'yojjitii pojjeama poaje, ajeyocaje'yo.

⁷⁴ Ese quecua'yosapojjicuanajo nahuecapoquinaje. Jamajjeya eseya meteamanei chacochacopoquije ojo.

⁷⁵ Maya Eyacuiñajjija echacojji eseyaya apoquiaje queapamenee mimishiama ba'yaniya. Onijjetii jjapeequipoquije ojjaña pojjajo eseya eshe ba'e.—

⁷⁶ Zacariasya esohui huohuitiicapoa jama ba'a: —Ecue bacuaejja, miya caca oe Eyacuiñajji Eyajo queaca'aneetii nequija esohuihuohuijji poaje. Miyaya ebionei esohui huohuicooje Emeshimesenei poejjimahuajo queahuisocuanaja ojaya esohui quijje apoa epojjijo eshajja-ajjajji. Jiquio ecua ejeojji chacocani cuaa queapojje epoquijji jama pea-aiya ona pojjijo miyaya esohui ebionei huohuije Emeshimesenei poejjimahuajo.

⁷⁷ Miyaya sohuihuohuije cuana jama ba'a: “Eyacuiñajjiya miquianaja mimishicuana cuijeacaje'yo, chama'yo acaje. Ohuaya eseya nahuecaje'yo,” jama huohuimeya miyaya aje cuana quijje.

⁷⁸ Eseja Eyacuiñajjiya eseya queajeaneetii acapoquiani, jamajojoya aje oja huoojea Eyajo nequi poeje jiquio ecua eshequi queajeaja'a jjapojjaquiani jamaya.

⁷⁹ Oja huoojeaa joya queamete poani emano'yojjijo jeaja'acaje, queaja'a jjashahuabaquimeecaje meteama epo'yojji. Eseya ba'emeesahuacapoquije queabei queneama peacuananijje— jama huohuime acapoa Zacariasya oja bacuaejjajo.

⁸⁰ Majoya aje oja bacuasho'i queapame tiisohuaquiapoa. Oya Eyacuiñajjija esohuijo queaca'a tiipoquiapoa pea-ai. Oya tiimajje ba'epoquiapoa se-ejjama' meshijabohuasijje Israelcuiñajjicuana esohui oja huohuijjimahuajo.