Macoso 3 - Ese Ejja New Testament

Jesosaa meshahuama'yo dejja meshahuajji pomeeca'yapoa ejomishocajji epojjajotii

¹ Majoya aje Jesosa nobiquio'oyapoa judiocuanaja equi-ai ejjachichaquijji aniyasijje. Ma equi-aijoya oe dejja meshahuama'yo poani aniapoa.

² Fariseo dejjacuaa quehuajje nequiya Jesosa bacanequiapoa a'a ohua ejomishocajji sábado epojjajotii dejja meshahuama'yo ani meshahuajji pomeecaje'yo ebajji. Jesosaa jama acajo fariseo dejjacuaa oya dojocaje dejja etii poaniyasijje enapameejji.

³ Jesosaa dejja meshahuama'yo jama acapoa ba'a: —Nequisohuacue, jiquiacua poecue ojjaña anicacuana cojjaneiyasijje enequijji.—

⁴ Majoya Jesosaa jama huohuime acapoa cuana ba'a: —¿Yajja poani Eyacuiñajjija esohui Moisesja tehue ejomishocajji epojjajo? ¿A'a pea queapame acajji, a'a oya queanee pomeecajji? ¿A'a acuae dejja queamano jaa jjeya jiquio ejomishocajji sábado epojjajotii jja-ajameequica'yojji, a'a oya manomeeca'yojji pojja'a?— Ohua jama huohuiajjame acajje mimima'nei anicapoa cuana.

⁵ Jesosa ma o chipineijo ejjachichaqui anicuanaja dejja ehuijo nequi queajea a-ajja bamajje queaquenepishana poa onijje. Majo anica queaquehuatii jjashahuabaquisapoani bamajje Jesosa queayenonee pea-ai poa comacuanajo. Majoya ohuaya meshahuama'yo dejja huohuicapoa jama ba'a: —Miquea eme jeaapihuihuicue.— Majoya dejjaa oja me jeaapihuihuicajo jjameshahuanequimeecanana'yapoa. Ojaya eme queapame po'yapoa.

⁶ Fariseo dejjacuana equi-aijo ani cuayaqui'yomajje emeshimese Herodesja epeejjicuananijje ojee quehuajje jjaquecuapanaquiapoa Jesosajo.

Queahuisoneecuana baesahuajo ejjachichaqui anicapoa

⁷ Jesosa o shajja-ajjajji poanicuananijje poquiajo baesahuahuasijje queahuisonee Galileacuiñajjicuaa Jesosa equijje acapoa.

⁸ Jesosaa dejjaja ajjima'neineicuana queahuiso acani shajja-ajjamajje peacuiñajjicuana pea-ai poquicapoa o baa. Poquicapoa queahuisocuana jama ba'a: Judeacuiñajjicuana, ma ciudad Jerusalén meshijo ba'ecacuana pea-ai, provincia Idumea meshijo ba'ecacuana, Jordán cuei ojjemijijje ba'ecacuana, Tirocuiñajjicuana, Sidoncuiñajjicuana pea-ai. Mahuiso cuana poquicapoa Jesosa baesahuajo nequi baa.

⁹ Jamajjeya Jesosaa o shajja-ajjajji poanicuana huohuicapoa bishe'ai jjequijji queahuisoneecuaa oya ecuiape'eca poanijje. Majoya Jesosaa bishe'ai baesahua enajo ba'ejo sohuihuohuicapoa cuana.

¹⁰ Jesosaa queahuisonee emano jaacacuana jja-ajameequicaje'yo bamajje pea emanocuaa Jesosa mojoiyaca'yapoa o napajji ojaya Jesosaja ejja-ajameequi'yojji.

¹¹ Ojjaña joya eshahuamase yamijji poanicuana Jesosa bamajje nequiñaquiapoa oja ecuioshajjajo Jesosa cojjaneijo eanijji. Jama taaame poa cuana ojo ba'a: —Miya Eyacuiñajjija Bacuaejja e'ejojonei poani.—

¹² Majoya Jesosaa eshahuamasecuana huoojeacuayajea'yomajje jama acapoa eshahuamasecuana ba'a: —¡A'a eya Eyacuiñajjija Bacuaejja poani peacuana huohuijji!—

Jesosaa 12 huisome dejjacuana babacacapoa ona sohuihuohuiquinequijji epojji

¹³ Majoya aje Jesosa eyiyohuasijje jaasohuaquiapoa. Ohuaya ma ohua queapame bacanaje huisotii dejjacuana iyaacapoa. Jamajjeya oque poquicapoa cuana.

¹⁴ Ojjaña oja iyaacuana jjachichaquiajo Jesosaa 12 huisome dejja babacacapoa ona sohuihuohuiquinequijji epojji.

¹⁵ Jesosaa oja babaca dejjacuana queaca'a pomeecapoa eshahuamasecuana cuayameequi'yojji epojji oja bajjanijo.

¹⁶ Mahuiso dejjacuana Jesosaa babacacapoa ba'a: Simón, oya bajjani beca poa ba'a: Pedro.

¹⁷ Beca Zebedeoja bacuaejja Santiago, Juan pea-ai babacacapoa. Santiago, Juan pea-ai pea bajjani acapoa ba'a: Boanerges bajjani. Boanerges jama poanijje ba'a: “Cueji jayojja poani.”

¹⁸ Jesosaa Andrés, Felipe, Bartolomé, Mateo, Tomás, Santiago Alfeoja bacuaejja, Tadeo, pea Simón pea-ai babacacapoa. Simón romano dejjacuana botiamaneinei poa.

¹⁹ Jesosaa Judas Iscariote babacacapoa pea-ai, ma quijje Jesosa iñameesahuajji bejjo sosejje poaje dejja. Mahuisoya cuana poa oja babaca ona sohuihuohuiquinequijji epojji.

Jesosa niñebacapoa cuaa oya ebionei eshahua Satanás bajjanijo queaca'a poani poso

²⁰ Majoya aje Jesosa oe equiyasijje nobiquiapoa o shajja-ajjajji poanicuananijje. Ma equijo o ani bamajjeya queahuisocuana jjachichaquicao'oyapoa Jesosaque. Equi cuiocapoa cuaa, jamajjeya Jesosa o shajja-ajjajji poanicuana pea-ai ijjiaijjiameejjima acapoa cuaa.

²¹ Becacuana ca jjaniñebaquiapoa Jesosajo. Jama mimime poa ba'a: —Jesosa oya eniñepoqui jayojja mimime poani.— Queaquehua mimiani Jesosajo shajja-ajjamajje oja huapa pojjeamacuana poeapoa Jesosa jjehuaa nisho.

²² Moisesja tehuehuohuijji poanicuana Jerusalén meshijo nequipea-aiapoa Jesosa aniyasijje. Jama acañapoa ba'a: —Beelzebuhua, eshahuamasecuanamese poaniya, Jesosa queaca'a pomeecani eshahuamasecuana cuayameequi'yojji dejjacuanaja yamijo nequi.—

²³ Etiicuana jama poani shajja-ajjamajje Jesosaa iyaacapoa cuana pea esohui ehuohuijji jama ba'a: —Bacue, ¿a'a acuae oyatii ebionei eshahua Satanás bajjaniya jjahuoojeacuayameequi'yome? Chojja.

²⁴ Oecuiñajjicuana onijjejaajjineinijje jjaquecuaquimajje jjachamaquipoquije'yo cuana. Enequitiijji pojjeama oya pea jjashahuabaquime poanijjejojo.

²⁵ Oya jayojja pea-aiya dejja oja huapa pojjeamacuananijje jjaquecuaquimajje jjachamaquipoquije'yo.

²⁶ Ebionei eshahua Satanás bajjani ojayanei eshahuamasecuana huoojeacuaya'yojji poanijjemo, oya queaca'a ojjañacuana huoojeapoquiajji pojjeama pome, chama'yotii pea-ai pome.

²⁷ Bacue, ¿yajja pomajje dejja queaca'a poanija equiyasijje nobiquicajji oja aquiana siiya? Ebionei dejja queaca'a poani jeyocajji. Majoya oja aquianacuana siicajji. Jamatii jeyojjima nequiya ohuaya oja aquiana siimeejjima acaje.

²⁸ Eyaya quiana e'ejojonei esohui huohuiaña Eyacuiñajjiya dejjaja mimishicuana ojjañatii cuijeaca'yojji. Ojjaña oja esohuitai, siajjecuana, cuijeaca'yojji pea-ai.

²⁹ Joya queatai mimiani Eyacuiñajjija Edojjoshahuapamejo caca oe coma mimishi ecuijea'yojjitii pojjeama poaje jjeya, quijjenei pea-ai.—

³⁰ Jamaya Jesosaa huohuicapoa cuana majo anicacuaa queatainee huohuicapoajojoya ojo. Ebionei eshahua Satanás bajjaniya Jesosa queaca'anee pomeecani poso acapoa cuaa.

Jesosaja enaese, oja chahuacuana pea-ai poeapoa o baa

³¹ Jesosaa esohui huohuicaquijotii oja nae oja chahuacuana pea-ai poeapoa o baa. Ohuaya esecuejotii nequiñamajje Jesosa iyaameecapoa onijje emimijji.

³² Jesosapejjejo ejjachichaqui anicacuaa jama acapoa ba'a: —Jesosa, mique nae, mique chahuacuana, jjo'i pea-ai esecuejo nequi. Mi basapoani.—

³³ Jesosaa saja-acapoa cuana jama ba'a: —¿Ache acuae comaya ecue nae, ecue chahuacuana pea-ai poani?—

^34-35 Majoya Jesosaa ma o nequijo ejjachichaqui anicacuana baneimajje jama acapoa ba'a: —Jiquio ecue nae, ecue chahuacuana, ecue jjo'icuana pea-ai jayojja poani ba'a: ojjaña joya Eyacuiñajjija ejjashahuabaquijji jayojja ba'epoquiani cuana. Comaya ecue nae, ecue chahua, ecue jjo'i pea-ai jayojja poani— jamaya Jesosa poa.