Macoso 15 - Ese Ejja New Testament

Emeshimese Pilatohua Jesosa a'a queamimishi poani bacapoa

¹ Majoya aje quijje mecajjeahuanei jjapojjaquiajo Eyacuiñajjija equi-aijo chacochacopoquiani etii poanicuana, pea judío etii poanicuana, Moisesja tehuehuohuijji poanicuana, judío etii oopana poanicuana Junta Suprema bajjani pea-ai jjachichaquicapoa ojee etii oopanacuana. Jesosa ejeyo dojocapoa cuaa emeshimese Pilatoque.

² O cojjaneijo nequimeemajje Pilatohua oya huohuiajjacapoa jama ba'a: —¿A'ya acuae mi so'o? ¿A'a miya judiocuanaja emeshimese poani?— —E'e, eya poani jiquio miya huohuiajjaña jama— Jesosa poa.

³ Eyacuiñajjija equi-aijo chacochacopoquiani etii poanicuaa Jesosa queamimishinee poani huohuicapoa Pilatoja eshajja-ajjajji.

⁴ Jamajojoya aje Pilatohua Jesosa huohuiajjacao'oyapoa onaja esohuijo. Jama acapoa ba'a: —¿A'a miya jjasaja-aquiajjatii nequije? De, queahuisocuaa miya queamimishi poani acani.—

⁵ Ohua jama huohuiajjame acajje Jesosa jamatii nequiapoa sohuima'. Jesosa mimima'tii nequi bamajje emeshimese jjabaneineiquiapoa ojo, yajjajje shai oya jama, mimiajja, jjanahuequiajja.

Pilatohua Jesosa manomee'yojji acui ecuiata'apeejo huohuicapoa

⁶ Ojjaña shequiajajo judiocuanaja fiesta eshahuaba'yojji ma yahuajonei Eyacuiñajjiya oja etiiquianaja bacuacuana nahuecapoa poe'yajo, Pilatohua oe dejja ejeanobia ani huoojeacuayameecapoqui'yapoa. Cua judiocuaa babacacaje dejja huoojeacuayameecapoqui'yapoa.

⁷ Oe dejja Barrabás bajjani ejeanobia aniapoa. Pea dejja queamimishicuana ejeanobia pea-ainijjeya oya aniapoa. Ohuaya oja etii o huohuijji poani cajaa amajje pea dejja quecuaca'yapoa.

⁸ Majoya aje queahuisocuana Pilatoque jjachichaquicapoa o huohuiajjajji oja oe dejja ejeanobia jaa huoojeacuayamee'yojjijo jiquio ecua ojjaña shequiajajo acapoquiani jamaya.

^9-10 Jamajjeya Pilatohua jama huohuiajjame acapoa cuana ba'a: —¿A'a miquiaaya eya miquianaja judiocuanaja emeshimese Jesosa huoojeacuayamee'yosa-aña?— Pilatoja ebanei poa yajjajo judío etii poanicuaa Jesosa iñameecanaje. Queahuisocuaa Jesosa queapame poani bacanaje, Eyacuiñajjija equi-aijo chacochacopoquiani etii poanicuana ca queapamepishana bacanaje. Jamajojoya aje oya Jesosa botiamanei acapoa etii poanicuaa.

¹¹ Majoya aje Eyacuiñajjija equi-aijo chacochacopoquiani etii poanicuaa ma ejjachichaqui nequicacuana janobajjimanei taaameecapoa jama ba'a: —Barrabás bajjani dejja, joya ejeanobia ani, huoojeacuayamee'yocue.—

¹² Majo nequica jama taaame poajo Pilatohua huohuiajjacapoa cuana jama ba'a: —¿Yajja shai eyaya Jesosa aje joya miquiaaya aña miquianaja judiocuanaja emeshimese poani?—

¹³ Jama taaasajame ponequiapoa cuana: —¡Oya acui ecuiata'apeejo me cacajeameecue emano'yojji!—

¹⁴ Pilatohua majo ejjachichaqui nequica huohuiajjacapoa jama ba'a: —¿Ache oja mimishijo shai quiaa oya quecuamee'yosa-aña?— Jamatii taaasajajeanequiapoatii cuana jama ba'a: —¡Oya acui ecuiata'apeejo me cacajeameecue emano'yojji!—

¹⁵ Jamajjeya Pilatohua Barrabás dejja ejeanobia ani huoojeacuayameeca'yapoa majo nequica onijje queaquenenee epo poanijje. Majoya aje Jesosa daasa cuiasejjajeameecapoa jjono ejeapashajjajja sa'shejjijjiya. Jama ameemajjeya ohuaya oja soldadocuana Jesosa dojomeecapoa acui ecuiata'apeejo eba'ehuanasohuajeajji emano'yojji.

¹⁶ Majoya aje soldadocuaa Jesosa dojocapoa emeshimeseja equi-aiquiquibohuasijje. Jesosa majo nequijoya aje emeshimeseja soldadocuana jjachichaquicapoa o nequipejjeyasijje.

¹⁷ Majotii nequiya soldadocuaa soadojoneineicanequiapoa Jesosa. Oya daqui-aohuo'o huoshomeecapoa ojaya emeshimese nisho yajji. Esapajo eiyajji acuisha oja sipiya Jesosaja sapahuasijje iyape'ejeacapoa janobajjimanei.

¹⁸ Jama bihuianishome acapoa soldadocuaa ba'a: —Canequitiitiiquiahua judiocuanaja emeshimese epojji.—

¹⁹ Majoya soldadocuaa Jesosa sapa cuiacapoa acuiya. Cojja cuichojeacapoa pea-ai. Majo nequiya soldadocuaa oja ecuioshajjajo nequimajje Jesosa bihuianishocao'oyapoa.

²⁰ Majoya aje oya soadojoneineimajje, bihuianishojeyomajje pea-ai daqui-aohuo'o oja yamijo ba'e huijjiajeaca'yapoa cuaa. Oja daquinei huoshomee'yomajje soldadocuaa Jesosa dojocuayaquicapoa esecueyasijje edojojji acui ecuiata'apeejo ba'ehuanasohuajeaa emano'yojji.

Jesosa acui ecuiata'apeejo ba'ehuanasohuajeacapoa cuaa emano'yojji

²¹ Oe dejja Simón bajjani Cirenecuiñajji dejja pea meshiyasijje poqui poe'yapoa Jerusalén meshiyasijje. Oja bacuaejja beca poa Alejandro bajjani, pea Rufo bajjani. Majoya aje Simón majo nequi bamajjeya soldadocuaa oya Jesosa ba'ejji acui abomeecapoa.

²² Majoya aje soldadocuaa Jesosa dojosohuaquicapoa eyiyoiyeao Gólgota bajjani nequiyasijje. Gólgota bajjani jama poanijje ba'a: “Sapajjii anijji” bajjani.

²³ Majoya aje eyiyohuasijje jaasohuaquimajje soldadocuaa Jesosa uvajjajjana', mirra, eshicuijji o neeamapishana pojji quia-ajjacapoa. Jesosaa cajaa acapoa, ishijjima.

²⁴ Majoya Jesosa me cacajeacapoa cuaa oja jeojjijje pea-ai acui ecuiata'apeejo. Jesosa acui ecuiata'apeejo ecaca jaa jjequisohuacapoa soldadocuaa emano'yojji. Oya Jesosa acuijo ba'e majo nequi soldadocuaa hue'ecapoa ebajji acheya shai oja daqui eiyachicha'yo ani jjeshecaje'yo.

²⁵ Eshequi ejaasohuapishanajo a las nueve Jesosa acui ecuiata'apeejo jjequisohuacapoa cuaa.

²⁶ Jesosa sapa ba'e biacuapishana acuisisijo tehuecapoa ebajji ajeo oya manomeeca'yani cuaa. Jama tehueme acapoa cuaa ba'a: —Jesosa bajjani judiocuanaja emeshimese poani.—

²⁷ Jesosa ba'epejjeneijo ojee beca dejja siipojjinei queamimishinee ba'ehuanasohuapea-aijeacapoa. Oe oja bañeimijijje, pea ca oja shanimijijje ba'yapoa acui ecuiata'apeejo pea-ai.

²⁸ Yahuajonei Eyacuiñajjija esohuihuohuijjiya tehuecapoa jama ba'a: —Eyacuiñajjija huoojea dejja queamimishinee jayojja quecuameecaje'yo cuaa.—

²⁹ Majoya Jesosa ba'epejjeneijje jjayejjequijeya esohui Jesosajo soadojocapoa cuaa. Oja sapa jeacajjacanequiacuaapoa Jesosa soadojomajje. Jama soadojome acapoa cuaa ba'a: —Miya jama poanaje Eyacuiñajjija equi-ai quecuajeabichajea'yomajje tres cahui huiso poajo ojaya equi-ai iyacuajije'yo miyayenei.

³⁰ Miyatii jjanahuequi'yocue jjeya. Nequioque'yocue acui ecuiata'apeejo ba'e.—

³¹ Oya jayojja Eyacuiñajjija equi-aijo chacochacopoquiani etii poanicuaa, Moisesja tehuehuohuijji poanicuaa pea-ai Jesosa soadojopea-aicapoa. Jama soadojome etiicuaa oya acapoa ba'a: —Ohuaya peacuana nahuecapoquinaje, jamatii oyaneitii jjanahuequi'yoajja.

³² Oya e'ejojonei Eyacuiñajjija huoojea ojjaña nahue'yojji epojji, Israelcuiñajjicuanaja emeshimese poanijo nequioqueje'yo. Oya jama po'yajo eseya e'ejojonei jjashahuabaquije'yo ojo.— Ma opejjejo acui ecuiata'apeejo ba'e dejjaa oya esohuiya Jesosa soadojopea-aicapoa.

Jesosa mano'yapoa

³³ Majoya aje eshequi biacojjajjanei nequijo quea-aaponee ponanapoa ojjaña meshiyasijje. Tres horas huisome eshequi chama'yotii poa.

³⁴ Ma sinecuanei quea-aapotii nequijo, a las tres, Jesosa jama taaame poa ba'a: —Eloi, Eloi, ¿lama sabactani?— Jama poanijje ba'a: —Ecue Chii, ecue Chii, ¿yajjajo acuae moya cajaa anaje?—

³⁵ Becacuaa majotii nequiya Jesosa taaani shajja-ajjamajje jama acapoa ba'a: —Bacue, ohuaya iyaacani esohuihuohuijji poa Elías bajjani.— Jama poani posoya acapoa cuaa.

³⁶ Majoya aje oe dejja majotii nequi cuajicuajinanapoa uvajjajjana' queasesepase jjequiya. Ohuaya uvajjajjana' shamajje taposisi cuiabebocapoa acui quea-aojo ejeasohuajji Jesosaja ejjequibibijji nisho. Oya jama poa ba'a: —Ishoasocue, a'a Elías poeje baa o nequiaoquea'yohua acui ecuiata'apeejo ba'e.—

³⁷ Jesosa ca acui ecuiata'apeejo ba'e taaasajeamajje mano'yapoa. Chama'yotii poa.

³⁸ O mano'yojeahuajotii daquimoo, equecuayijjijji'ya Eyacuiñajjija equi-aijo ba'e, oyatii becaneijji pea-ai epojji ejamacoojje ebionei jjaisajeananaquiapoa meshiyasijjeyee.

³⁹ Romano soldadohuohuijji poani capitanya Jesosa cojjaneijo nequiya oya mano'yonaje bamajje jama acapoa ba'a: —E'ejojonei jiquio dejja Eyacuiñajjija Bacuaejjanei poanaje.—

⁴⁰ Eponacuana pea-ai majotii aniapoa. Queahueshapishana aniya Jesosa manoje'yo baca-aniapoa cuaa. Jama aniapoa ba'a: María Magdalena, pea María ma Santiagoja etiipishanaja enaese poa Joseja pea-ai, pea Salomé bajjani pea-ai aniapoa.

⁴¹ Yahuajo Jesosa Galilea meshijo nequi ma eponacuaa Jesosa asahuacapoquiapoa. Onijje anipoquiapoa. Pea eponacuana ma Jesosanijje Jerusalén meshiyasijje poecuana Galilea meshijje aniapoa majotii pea-aiya.

Jesosa huananobiacapoa cuaa meijjaniyasijje

⁴² Ma pojjajotii sinecuanei judiocuana epojja sábado ejomishocajji mecahuajje epojjijo jja-aquicapoa.

⁴³ José Arimateacuiñajji dejja judío etii oopana poanicuana Junta Suprema bajjanicuananijje nequiapoa. Ohuaya ishoacanequiapoa Eyacuiñajji ojjañacuana huoojeapoquiajjitii poani acheshono poeje. Ma dejja Joseya meteamaa Pilatoque poquimajje Jesosaja eyami huohuiajjacapoa ehuananobiajji meijjaniyasijje.

⁴⁴ Ohua jama huohuiajjame acajje Jesosaja eyamijo Pilatohua Jesosa mano'yojjima poso acapoa. Jamajojoya aje ohuaya soldadocuanahuohuijji capitán iyaacapoa a'a e'ejojonei oya Jesosa mano'yonaje ebajji.

⁴⁵ Majoya aje soldadocuanahuohuijji capitanya Pilato huohuicaña'yapoa oya Jesosa chama'yotii ba'e, mano'yonaje. Ohua jama huohuime acañajje Pilatohua José Jesosaja eyami dojomeeca'yapoa.

⁴⁶ Majoya aje Joseya daquiosheai queapame jjeshecapoa bejjo sosejje Jesosaja eyami bebojji. Ohuaya Jesosaja eyami acui ecuiata'apeejo ba'e huanaoquea'yomajje bebocapoa daquiosheaiya. Majoya oja yami ebebo jaa huananobiacapoa meijjaniyasijje. Joseya mei queaquemo jeacajjajjameecapoa cuana meijjani naba cuiaca'ajji.

⁴⁷ María Magdalenaa pea María Joseja enaeseya pea-ai Jesosa huananobiacaje meijjaniyasijje bacapoa. Achacua oya jaaje bacapoa cuaa.