Macoso 1 - Ese Ejja New Testament

Juan, ma ona iñajeanobiajji poani enaojjohuasijje, se-ejjama' meshijo nequiapoa

¹ Jiquio esohui queapamenee tehuecoocapoa Jesosa Quitojo, Eyacuiñajjija Bacuaejjajo.

² Esohuihuohuijjiya Isaías bajjaniya yahuajonei tehuecapoa ma Eyacuiñajji mimiapoa oja Bacuaejjanijje. Jama mimime Eyacuiñajji poa ba'a: —Eyaya oe esohuihuohuijji ebionei huoojeaje mi huoojeajjimahuajo. Jiquio ecua dejjacuaa ejeojji chacocani epijajinei queapojjenee pea poejji, jama pea-aiya ohuaya mi poejjijo huohuicaje cuana mijo ejjashahuabaqui'yojji.

³ Oya se-ejjama' meshijo nequi taaamajamajanequije ojjañacuanaja eshajja-ajjajji. Jama ponequije ba'a: “Jjashahuabaquicue quiana oe Emeshimesenei poejjijo. Apoa pocue jiquio ecua ejeojji queapojjenee epijajinei chacome acani cuaa pea poejji, jamaya oe pocue ojo queaja'a ejjashahuabaqui'yojji” jamaya tehuecapoa.—

⁴ Juanya se-ejjama' meshijo nequiya iñajeanobiacapoa cuana enaojjohuasijje. Ohuaya huohuicanequiapoa cuana pea-ai jama ba'a: —Pea jjashahuabaquime po'yocue quiana miquianaja mimishijo. Majoya quiana oe jjaiñajeanobiameequicue enaojjohuasijje Eyacuiñajjija miquianaja mimishicuana ecuijea'yojji.—

⁵ Queahuisonee provincia Judeacuiñajjicuana Jerusalén meshijo ba'ecacuana pea-ai poquicapoa o shajja-ajjaa. Majoya aje Juanya esohui huohuicaje shajja-ajjamajje queahuisocuaa oja mimishi huohuica'yapoa ja'anee Eyacuiñajjija oja mimishi ecuijea'yojji. Majoya Juanya iñajeanobiacapoa cuana Jordán bajjani cueiyasijje.

⁶ Juanya camelloja ña daqui huoshocapoa. Oya jjayica'aquiapoa ejeejo. Ohuaya satejjee ijjiacapoquiapoa. Meshidojjojo nequi huini pea-ai ishicapoquiapoa.

⁷ Ohuaya huohuicapoa cuana jama ba'a: —Quijjepishana equiquishijji poeje pea dejja queaca'aneenee jiquio ecua eya nequi quiajja pojjeama. Jamajjeya eya jjabaquiani queapame pojjeama ojo echacochacopoquijji oya queapameneeneejojoya.

⁸ Eyaya quiana e'ejojonei iñajeanobiaña enaojjoneiyasijje. Pea dejjaa ma quijje equishishi poejeya ca quiana ca oe Dojjoshahuapame yamijji pomeecaje— jamaya ohuaya huohuicapoa cuana.

Juanya Jesosa iñajeanobiacapoa enaojjohuasijje

⁹ Pueblo Nazaret meshi provincia Galilea meshimijijje jaa. Majoya aje quijjepishana Jesosa Nazaret meshijo ani poquiapoa ma Juanya ona iñajeanobiacaqui cueiyasijje. Jesosa cuei Jordán bajjaniyasijje poeajo Juanya oya iñajeanobiapea-aicapoa enaojjohuasijje.

¹⁰ Majoya Jesosaa enaojjojo nequiya cojjacuaya'yomajje bajeasohuacapoa eyatahuatahua ejjaca'apejoqui nequi. Edojjoshahuapame huia' jayojja cuabesaoqueapoa oja yamibiajje aniñaa bapea-aicapoa.

¹¹ Majoya esohui Eyajo mimije jama shajja-ajjacapoa cuaa jama ba'a: —Miya ecue Bacuaejja ecuea queajeanee, eya mijo queabihuinee poani.—

Edosiquiaa Jesosa queamimishi epomeejjinisho a-ajjacapoa

¹² Majoya aje Edojjoshahuapameya Jesosa dojocapoa meshi queajabo se-ejjamahuasijje.

¹³ Majotii Jesosa oenei nequiapoa 40 cahuime huiso. Ebiocuiñajjicuana queamase jaacajo oya aniapoa. Ma meshijoya ebionei eshahua Satanasya Jesosa queamimishi epomeejjinisho a-ajjacapoa. Majoya ohua jiñacajo Eyacuiñajjija angelcuana poeapoa Jesosa asahuaa.

Jesosaa oja echacojji acoocapoa provincia Galilea meshijo nequiya

¹⁴ Majoya aje Juan ma ona iñajeanobiajji poani dejja ejjajeanobiaquijji equiyasijje jeanobiacapoa cuaa. Juan ejeanobia anijo Jesosa Galilea meshiyasijje poquiapoa Eyacuiñajjija esohui queapame ona huohuiya.

¹⁵ Jesosaa jama sohuihuohuime acapoa cuana ba'a: —Jjeya apoa. Eyacuiñajji, ojjañacuana huoojeapoquiajjitii poani, jjeyahuanei poeje. Jamajjeya quiana oe pea jjashahuabaquime po'yocue miquianaja mimishijo. E'ejojonei jjashahuabaqui'yocue quiana Eyacuiñajjija esohui queapameneejo majoya ejjanahuemeequi'yojji.—

Jesosaa dejjacuana nahuooshojeajji poani iyaacapoa

¹⁶ Majoya aje Jesosaa Galilea bae-aisahuajje poquijeya Simón, oja chahua Andrés pea-ai bacañaquiapoa nahuoo shojeapoequi. Oya nahuooshojeajjinei poa.

¹⁷ Jesosaa ma beca dejja huohuicapoa jama ba'a: —Enijje po'yocue. Jjeya miquiaa nahuoo shojeapajeaje'yo. Jiquio ecua miquiaa nahuoo sa-ajjaneinequinaje jama pea-aiya miquiaa dejjacuana sa-ajjaje ecuea epeejji epo'yojji.—

¹⁸ Jamajjeya maneitiiya ojaya nahuooshojeajjicuana jeacana'yapoa Jesosanijje epo'yojji. Majoya oya poqui'yapoa onijjetii.

¹⁹ Jesosaa poquipishananiya pea dejja Santiago bacapoa Juannijje, o dohue pea-ainijje nequi. Oya Zebedeoja bacuaejja poa. Oya bishe'aijotii ani nahuooshojeajji sipi'yo po-aniapoa.

²⁰ Maneitiiya Jesosaa oya iyaacapoa o dohue pea-ai. Jamajjeya ma beca dejjaa oja chii Zebedeo, o chacosahuajji poani dejjacuananijje bishe'aijo ani, jeacana'yapoa Jesosanijjetii epo'yojji.

Dejja eshahuamase yamijji poa

²¹ Majoya aje Jesosa o shajja-ajjajji poani dejjacuananijje pueblo Capernaúm meshi bañaquimajje judiocuanaja equi-ai ejjachichaquijji aniyasijje nobiquiñaquiapoa ejomishocajji sábado epojjajo. Majoya Jesosaa sohuihuohuicapoa cuana.

²² Jesosaa sohuihuohuicani shajja-ajjamajje ma anicacuana jama poa ba'a: —Jesosaa queaja'aneenee esohui huohuicani pea esohuihuohuijji poanicuaa jama pojjeama. Ohuaya ca queaja'aneenee huohuicani, ojaya ebaneinei.—

²³ Majoya aje oe dejja eshahuamase yamijji poani nobiquiapoa equi-aiyasijje ma judiocuanaja ejjachichaqui anicahuasijje. Oya taaapoa janobajjimanei jama ba'a:

²⁴ —Jesosa Nazaretcuiñajji dejja, ¿ajeo acuae mi ecuananijje ani? ¿A'a mi ecuana chama'yotii pojeamee'yohua poeyanaje? ¡Ecuea miya ebanei! Miya Eyacuiñajjija huoojea e'ejojonei queapamenee poani mimishima'nei.—

²⁵ Majoya Jesosaa eshahuamase tecueacapoa jama ba'a: —¡A'a mimijji! ¡Cuayaqui'yocue miya coma dejjaja eyamijo nequi!—

²⁶ Jesosa jama pojeahuajotii eshahuamaseya ma dejja niñepoquimeecuajicao'oyapoa. Majoya o taaasajasajameemajje eshahuamase cuayaqui'yapoa.

²⁷ Jesosaa jama acaje bamajje queahuisocuana jjabaneineiquiapoa ojo. Jama mimime poa cuana ba'a: —¿Yajja shai oya acanaje, de? Ohuaya pea esohui eyacua huohuicani. Ojaya ebaneinei, emeshimese jamaa huohuime acani. Ohuaya eshahuamasecuana huoojeacuayajeaca'yani. Ojaya esohuijo jjashajja-ajjaquiani eshahuamasecuana.—

²⁸ Majoya queahuiso provincia Galilea meshijo ba'ecacuaa shajja-ajjacuajicapoa Jesosajo ma ohua dejjaja ajjima'neineicuana acapoquianijo.

Jesosaa Simonja eanomese huoecameeca'yapoa

²⁹ Jesosa judiocuanaja equi-ai ejjachichaquijjijo nequi cuayaqui'yomajje poquiapoa ojee Santiagonijje, Juannijje pea-ai Simonja equiyasijje, o dohue pea-aija Andresja equiyasijje.

³⁰ Simonja eanomese queaquiyoneenee jaapoa. Jamajjeya Jesosa huohuicapoa cuaa.

³¹ Jesosa o jaahuasijje poquimajje me iñacañaquiapoa o anisohuamee'yojji. Ohua me iñacajeahua Simonja eanomese huoecanana'yapoa, yejjecananapoa quiyohua. Majoya nequisohuanana'yomajje eanomeseya bobiacapoa cuana.

Jesosaa queahuiso emanojaacacuana jja-ajameequica'yapoa

³² Majoya aje sinecuanei, eshequi eoquequijo Jesosaque queahuisocuaa emanojaacacuana yecapoa. Eshahuamase yamijjicuana queahuiso pea-ai yecapoa Jesosaja huoojeacuayajea'yojji.

³³ Jamajjeya ojjañacuana jjachichaquicapoa esecuepejjejotii.

³⁴ Jesosaa pea pea emanomeejjijo emanocuana jja-ajameequica'yapoa. Eshahuamasecuana dejjacuanaja yamijo nequi Jesosaa huoojeacuayajeaca'yapoa pea-ai. Ohuaya eshahuamasecuana oja huoojeacuayajea'yo mimimeejjima pomeecapoa eshahuacuanaja ebajojoya oya e'ejojonei Eyacuiñajjija huoojea poani.

Jesosaa sohuihuohuicanequiapoa cuana judiocuanaja equi-ai ejjachichaquijji queahuiso aniyasijje

³⁵ Majoya aje quijje jjapojjaquiyasijje quea-aapojotii Jesosa shequiapoa emimijji oja Chiinijje. Jamajjeya Jesosa equijo ani cuayaquimajje oenei poquiapoa se-ejjama' meshiyasijje Eyacuiñajjinijje mimiya.

³⁶ Majoya aje Simón Jesosa chama' bamajje poquiapoa oja epeejjicuananijje Jesosa sa-ajja'yohua.

³⁷ Oya Jesosa ba'yomajje jama acapoa cuaa ba'a: —Ojjañacuaa mi sa-ajjaca'yoqui.—

³⁸ Jesosaa saja-acapoa cuana jama ba'a: —Cua'a epoqui pea meshicuanachipineiyasijje macuiñajjicuana sohuihuohuiya. Majoya eya poeyanaje jiquiacua ojjañaque esohui huohuiya.—

³⁹ Jamajjeya Jesosa ojjaña provincia Galilea meshiyasijjeyee poquinequiapoa majo ba'ecacuana sohuihuohuiquinequiya judiocuanaja equi-ai ejjachichaquijji anicuanahuasijje. Jesosaa eshahuamasecuana dejjaja yamijo nequi huoojeacuayajeacapoqui'yapoa pea-ai.

Jesosaa oe dejja queamanonee leprajo jjajeameequica'yapoa

⁴⁰ Majoya aje oe dejja queamanonee leprajo poquiapoa Jesosaque. Ohuaya ecuioshajjajo nequiñaquimajje jama acapoa ba'a: —Miyaya che eya jjajeameequi'yosa-amajje eya jjajeameequije'yo.—

⁴¹ Jesosaa dejja queamanonee leprajo bamajje queayeno jjashahuabaquiapoa ojo. Majoya dejja emanoja eyami napamajje oja emeya oya jama acapoa ba'a: —E'e eyaya miya jjajeameequi'yosa-aña. Jjeyanei mi jjajeameequije'yo, lepra yamima' mi poaje'yo.—

⁴² Jesosaa oya jama huohuime acajeahua dejja leprajo queamanonee jjajeananaqui'yapoa.

⁴³ Majoya Jesosaa ma dejja queamano poanaje huoojea'yojjimahua jama acapoa ba'a:

⁴⁴ —Shajja-ajjacue. A'a peacuana che oema'nei huohuijji jiquio eya mi jjajeameequi'yonajejo. Poquicue so'o Eyacuiñajjija equi-aijo chacochacopoquiani dejjaque jjabameequi'yohua mi apoa epo'yo. Oe ehuone enaa jehui'yojji dojocue jiquio ecua Moisesja tehuecuana poani jama ya'yojji equiajji. Miya jama quiajo bacaje cuaa miya jjajeaqui'yonaje, leprama'yo.—

⁴⁵ Jamatii ma queamanonee poanaje dejjaa huohuicapoqui'yapoa queahuisocuana Jesosaa o jjajeameequica'yonajejo. Jamajojoya aje Jesosa ja'anei epoquinequijji pojjeama poa pea pueblocuanahuasijje dejjacuana queahuisoneenee ojo jjachichaquipoquiapoajojoya. Jamajjeya oya se-ejjama' meshiyasijje nequiapoa. O se-ejjama' meshijo nequijo peajaajjicuana poenequiapoa o baa.