Jode 1 - Ese Ejja New Testament

Jesosaja epeejjicuana queabihui pojji esohui acapoa Judasya

¹ Eya Judas bajjani Santiagoja chahua Jesosa Quitojo chacochacopoquiani. Jiquio esohui eyaya tehueaña joya Eyacuiñajji Echii-aiya queajeanee acapoquianicuanaja ebajji oja iyaacuanaja. Jesosa Quitohua quiana jaahuanacapoquianitii.

² Eyacuiñajjiya quiana queapamenee ca-acapoquiahuatii jamatii queacamajanee ba'e, queaquijijjijajinee capomeecahua quiana pea-ai ohuaya. Majoya ohua jama pomeecajje peacuana queajea apoquiajetii quiaa.

Esohuihuohuijji siajjepojjijo tehuecapoa

³ Ecue dohuecuana jjo'icuana, ecuea quiana queajeanee poani. Eya queahuiso jjashahuabaquinaje miquianajo esohui queaja'a etehuejji Eyacuiñajjija esohuijo ese jjanahuemeequi'yojji. Ohuaya quiana nahueca'yonaje eya jayojja pea-aiya. Jjeya ca eyaya pea esohui tehueaña miquianaja ebapea-aijji. Jamajjeya quiaa oe esohui queapame nahuepoquiacue. A'a Eyacuiñajjija esohui pea amee'yojji cuana. Bacue, ohuaya oenei esohui quiacapoa oja babacacuana ese ma esohuijo ejjanahuemeequi'yojji. Jamajjeya oja esohui pea aca'yoajja.

⁴ Jjeya Eyacuiñajjija epeejjinishocuana miquiana dasiamajje nobiquinaje esohuiyasijje, e'ejojonei jayojja poani. Ojjaña macuana ca e'ejojonei jjashahuabaquiajjanei poani Eyacuiñajjijo. Esohui huohuitaicani cuaa jama ba'a: “Eyacuiñajjiya eseya queapamenee acani ojayanei ejjashahuabaquijjijo jjabaquimajje jamatii queamimishi ba'ecapoquijji. Oya eseja mimishijo jjashahuabaquiajjanei popoquiani.” Jama huohuitaimeya acani cuana. Eseja Emeshimesenei Jesosa Quito oenei e-esemese poani cajaa acani macuaaya, Eyacuiñajjija esohui sapo-ajjanei ba'yani. Yahuajonei Eyacuiñajjija esohui tehuecapoa cuaa ma dejjacuanajoya jama ba'a: “Ma dejja esohuihuohuijji siajjepojjicuana quijje queaneenee pomeecaje'yo Eyacuiñajjiya.”

⁵ Jamatii miquianaja ebajotii eyaya jiquio esohui huohuije eshahuaba'yojji ma yahuajonei Eyacuiñajjiya israelitacuana Egipto meshijo anica faraonjo chacochacopoquianitii huoojeacuayameeca'yapoa. Jamatii quijje israelitacuana ma oja esohuijo jjashahuabaquiajjanei poacuana ohuaya manomeecapoqui'yapoa meshijabojotii ani.

⁶ Angelcuana queahuisohua pea-ai Eyacuiñajjija quia oja echacojji cajaa acapoa yahuajoneinei. Eyahuasijje Eyacuiñajjinijje eanitiipoquijji cajaa acapoa. Jamajjeya ma angelcuana oja jeyomee anipoquiani quea-aaponeeneeyasijje o queaneenee huohui'yojji epojja apoa poajo. Majoya Eyacuiñajjiya ma angelcuana queaneenee pomeecaje'yo oja mimishijo.

⁷ Sodoma meshicuiñajjicuana, Gomorra meshicuiñajjicuana, o chipineijo ba'ecapoacuana pea-ai peaja eyamijo queamimishinee ba'ecapoquiapoa. Peacojjojjinei nequicapoquiapoa, onijje dejjanijje jaacapoquiapoa cuana, oja huanase jayojja acapoa macuaaya. Eyacuiñajjija ejjashahuabaquijji cajaa amajje oyaneitii queatainee pocapoa cuana peaja yamijo. Quijje macuana oja mimishijo Cuaqui-aiyasijje huoojeacaje'yo ohuaya, ecuayaqui'yojjitii pojjeama poaje cuana. Jamajjeya aje quiana oe majoya jjashahuabaquicajji Eyacuiñajjiya ojjaña queamimishitii popoquianicuana queaneenee pomeecaje'yo.

⁸ Jjeya pea-ai joya esohuihuohuijji siajjepojjicuana ojayanei ejjashahuabaquijjijo queamimishi popoquiani. Queatainee jjacahuibaquimajje queamimishi poani peanijje ojaya eyamijo. Emeshimesenei eomese epojji cajaanei acani ma dejjacuaaya. Pea oja etii poani angelcuana niñebacani pea-ai ma dejjacuaaya, queatainee mimiani ojo.

⁹ Eyacuiñajjiija nequimee etii poani ángel Miguel bajjani jamatii queaca'atii nequiani edosiquiananijje o queanee po'yojjijo mimijjima poa. Edosiquiana ángel Miguelnijje queaquene mimijajiapoa Moisesja eyami emano'yojo, yajja poa ojaya eyami. Mahuisoya ohuaya esohui acapoa edosiquiana jama ba'a: “Emeshimeseneiya mi queaneenee pomee'yojji huohuicaje'yo.”

¹⁰ Joya jjeya siajje sohuihuohuicanicuaa jiquio oja bajjimanei Eyacuiñajjija esohui peajjanei acani quenequenemajje. Ma dejjacuana ca ijjiacajjicuana jayojja ba'epoquiani jjashahuabaquiajjanei. Oya queamimishi poani jjabaquiajja. Ojayanei ejjashahuabaquijji queamimishi epojjijo peanijje ba'epoquiani, mahuisojoneiya. Majoya quijje ojjaña macuana queaneenee poaje'yo oja mimishijo queaja'a jjabaquije'yo.

¹¹ Esohuihuohuijji siajjepojjicuana Eyacuiñajjiya queaneenee pomeecaje'yo oja mimishijo. Ma ecua Caín yahuajonei queaquehuanee jjashahuabaquiapoa jama pea-aiya ma dejjacuana nequipoquiani. Ma ecua yahuajonei Balaamya queabejjohuiso epojjijo esohui queatai eajji nisho a-ajjacapoa, cuana jama pea-aiya ma dejjacuaaya queabejjohuiso epojjijo sohuihuohuicuajinishocani cuana. Ma ecua yahuajonei Coreya Eyacuiñajjija babaca cajaa acapoajo Eyacuiñajjiya manomeeca'yapoa cuana, jama pea-ai joya esohuihuohuijji siajjepojjicuana pomeepea-aicaje'yo Eyacuiñajjiya.

¹² Miquianaya Jesosaja epeejji ojee ejjachichaqui eijjiaijjiajji anijo ma dejjacuana siajjepojji poepea-aiani ojee miquiananijje ijjiaijjiaa. Macuana ca anica-ajja miquiananijje. Oya joya ecua aquiana queajehue shacuajjima ani jamaya poani. Miquiananijjetii ani ijjiaijjiajeyomajje queatai mimiani, esohui queaquehuajo jjamimihue'equiani pea-ai. Ma dejjacuana pea asahuajjijo jjashahuabaquiajjanei poani. Oya joya ecua bo nama' beniya dojojeacani jamaya poani. Oya joya ecua acuicuana jjajja-ajja esajja jjequichiyojea emano'yo nequi jama pea-aiya poani, peajja.

¹³ Ma siajjepojji dejjacuana jiquio ecua enashajohua huapa queahuiso acani jama oya nequiani queamase. Ojaya ejjashahuabaquijji queamimishijo esohui queatainee oopana jeacuayacani bichoamaneiya. Oya ecuaquisho'yo jama ba'epoquiani joya ecua majametacuana oquequiani jama. Ojjaña ma dejjacuana ca quijje quea-aaponeeyasijje jeajeacaje'yo cuamaya queaneenee eponequi'yojji oja mimishijo.

¹⁴ Yahuajoneitii oe dejja Enoc bajjani Eyacuiñajjiya huohuimeecapoa jiquio jjeya dejja siajjepojjicuanajo yajja Eyacuiñajjiya oya acaje'yo quijje. Enoc siete huisome etiiquiana poa Adanjo. Jama huohuime acapoa ohuaya yahuajonei ba'a: “Emeshimesenei queahuisoneenee oja angelcuananijjetii poeje o'oya eyaya banaje.

¹⁵ Ohuaya ojjañacuana huohuicaje'yo achajja ba'ecapoquianinaje. Ojjaña joya oma' jayojja queamimishitii ba'epoquinajecuana ohuaya huohuicaje'yo queaneenee ona pomee'yojji. Ojjaña ma onaa esohui queatainee Emeshimeseneijo acapoquinaje sosejje queaneenee pomeecaje'yo cuana” jamaya Enocya esohui huohuicapoa cuana yahuajoneitii.

¹⁶ Esohuihuohuijji siajjepojjicuana ojjañacuanajo jjaniñebaquiani. Ma dejjacuaaya peacuana niñebacani, peajja acani oyaneitii queaca'a poso jjabaquianiyajjejojo. Ojayanei ejjashahuabaquijji queamimishi epojjijo oya ba'epoquiani, mahuisojotiiya. Pea asahuajjijo ca jjashahuabaquiajjanei. Ma dejjacuaaya peacuana bihuianishocani quijje ohua quiacaje aquiana jjeshejjijo.

Achajja pocaje cuana quijje tehuecapoa

¹⁷ Ecue dohuecuana jjo'icuana, ecuea quiana queajeanee. A'a pajea'yojji shahuabapoquiacuetii ma eseja Emeshimesenei Jesosa Quitoja huoojea dejjacuaa esohui miquiana huohuicapoquinaje.

¹⁸ Jama huohuime quiana acanaje ba'a: “Quijje oe-ejjenei epojja beshahuanei apoa poechipianijo queahuiso meshicuiñajjicuaa Eyacuiñajjija esohui peajja jayojja acaje, siajje poani poso acaje pea-ai. Oja esohuijo soadojocaje cuaa. Ojayanei ejjashahuabaquijji queamimishitii epojjijo ba'epoquijetii.”

¹⁹ Jesosaja epeejjicuana oya jayojja pea-ai jjashahuabaquime pojjeama epo'yojji ma dejja queamimishicuaaya esohui acani. Ma dejjacuana oja Edojjoshahuapame yamima' poani. Jiquio meshijo nequicaja ejjashahuabaquijji jayojja popoquiani.

²⁰ Miquianaya ca jama pea-ai pojjeama'yo. Queaca'a oe tiipoquicue Eyacuiñajjija esohui queapamejo. Cua Edojjoshahuapameya miquiana jjashahuabameequicanijo Eyacuiñajjinijje mimipoquicue jamatii pojjeama.

²¹ Eyacuiñajjijo queaja'a ba'epoquianiya miquiananijje ba'ecacuana queajeanee apoquiacuetii e'ejojonei, siajje pojjeamaa. Eseja Emeshimesenei Jesosa Quito poeo'oyajjijo oe jjaishoaquipoquicuetii. Jamajjeya ohuaya eseya ba'etiitiimeecaje'yo onijje Eyahuasijje ojaya eseya queajeanee poanijojoya.

²² Joya queajjashahuabaquiquehuapishana poanicuana Eyacuiñajjija esohuijo jamatiiya oya queajea apoquiacue.

²³ Becacuana miquiananijje ba'eca oe sohuihuohuineicuajicue Cuaqui-aiyasijje epoqui'yo cuahuajo, nahuecue oya. Peacuanaya ca joya queamimishitii ba'epoquiani ojayanei ejjashahuabaquijjijo jamatii queajea apoquiacue. Oya jayojja pea-ai queamimishi eba'e poanijje oe jjajaahuanaquicue quiana. Onaja mimishi botiamanei acajji joya ecua seja daqui queajehuenee ejjahui ma'ija quecua ma'i botiamanei aña, jamaya acajji mimishi.

Esohui oe-ejjenei acapoa

²⁴ Eyacuiñajji ese nahue'yojji poani ejjabihuiatiiquipoqui. Ohuaya oenei queaca'aneetii nequipoquianiya quiana jaahuanacapoquiani queamimishi epo-o'oya poanijje. Ohuaya quiana mimishima'yonei nequimeecaje o ani cojjaneijo queaca'aneetii poaniyajjejojoya. Majotiiya quiana ma o queasajajanee anijo queabihuineetii nequipoquije'yo onijje.

²⁵ Eseja Emeshimesenei Jesosa Quitoja bajjanijo Eyacuiñajji ese nahue'yojji poani bihuiacapoquijjitii quianaja. Eyacuiñajji queaca'aneetii queacojjasajajanee nequipoquianitii. Ohuaya eojjañacuanamese poaniya ojjañajaajjicuana huoojeacapoquianitii. Chama'neinei pea oya jayojja queaca'aneetii poani. Oya Eyacuiñajji ojjaña eseja etii nequipoquiani. Jamaya oya yahuajoneitii poa. Jjeya pea-ai oya jamaya nequipoquiani queaca'aneetii. Quijje pea-aiya oya jamaya nequipoquijetii. Eyacuiñajji jamaya bihuiacapoquijjitii ojjañacuanaja.