Janata 5 - Ese Ejja New Testament

Queaca'a tiicapoquijji Jesosaja epeejjicuana

¹ Jesosaja epeejjicuana, e'ejojonei Quitohua eseya nahueca'yonaje jiquio ecua dejja ejeyo ejeanobia ani jama epotii poanijje eseja mimishijo. Jiquio ecua dejja ejeanobia ani majoya jeacuayaca'yajje queabihuinee po'yani jama pea-aiya ba'epoquicuetii. ¡A'a Moisesja tehuecuana jayojja ba'esatiipopoqui'yojji miquiana mimishima'yo ebajjijo! Ma etehuecuanajoya Quitohua eseya nahuepea-aica'yonaje ese huohuipoquiajjitii epo poanijje.

² Eyaya Pablohua jiquio esohui huohuineisa-aña shajja-ajjacue. Miquianaya jjacuiishashajehuisejjameequisapoani oja nahue'yo epojjijo queaquehua majo jjashahuabaquiani. Oja nahue'yojji jama epojjijojjemo Quito jamatii mano'yoquiae.

³ Eyaya quiana oya esohuiya huohuije o'oya. Ojjaña joya dejjacuana jjacuiishashajehuisejjameequiani majo ejjanahuemeequi'yojji ma dejja ojjañatii Moisesja tehuecuana jayojja ba'ecapoquijjitii che oema' pajeaca-ajja oya oja mimishima'yo poani Eyacuiñajjija ebajji.

⁴ Miquianaya joya ojjañatii Moisesja tehuecuana jayojja ba'esapoquijjitii poanicuana majoya ejjanahuemeequi'yojji Quitojo ca jjasejjaquiani. Ojayanei ejjashahuabaquijjijo Eyacuiñajjija miquiana queapamenee eajjijo jjapomeequiajja ba'e.

⁵ Ecuana ca Jesosa Quitojonei jjashahuabaqui'yani Eyacuiñajjija ecuana enahue'yojji. Edojjoshahuapameya ecuana jama jjashahuabaquimeeca'yani, ecuananeitii pojjeama.

⁶ Jamajjeya eseya e'ejojonei Jesosaja epeejji poanijo Eyacuiñajjiya eseya joya ejjacuiishashajehuisejjameequi pea joya jjacuiishashajehuisejjameequijjima poanicuana oya jayojja pea-ai bacani ojaya'yo. Mahuisojotiiya Jesosa Quitojoneiya jjashahuabaquica'yojji. Majoya se jama jjashahuabaquime pomajje eseya queaja'a ba'epoquije, peacuana queajeanee apoquiaje.

⁷ Ebionei quiana queaja'a ba'epoquinaje so'o Quitonijje. Majoya quiana, ¿ache dejjaa shai queaquehua jjashahuabaquimeeca'yonaje jjeya miquiana esohui e'ejojonei poanijo ejjashajja-ajjaquipajea'yojji?

⁸ Eyacuiñajjiya quiana iyaacanaje oja bacua epojji, jamajjeya jama queaquehua epo'yojji ojaya ejjashahuabaquijji pojjeama.

⁹ Iyehuisocuaa esohui queaquehuanee huohuicani, jamatii coma dejjacuaa queahuisoneecuana dasiacani oja esohuijo. Joya ecua pahui shejjeemeejjiya oepojjineiya ojjañatii harina eiñahuahuo shejjeemeejeyocani jama pea-aiya coma iyehuiso dejjacuaaya queahuiso dasiacani oja esohui queaquehuajo.

¹⁰ Ojjaña eseya Eyacuiñajji Emeshimeseneija poani oja nahue'yo. Jamajjeya ecuea ebaneinei Eyacuiñajjiya quiana queaja'anee jjashahuabameequicapoquije ojaya esohuijo. Ohuaya quiana joya queaquehua esohuihuohuijji poanicuanajo nahuecaje. Cua esohui queaquehua huohuijji poanicuana queanee pomeecaje Eyacuiñajjiya.

¹¹ Becacuana jama poani ejo ba'a: “Ohuaya Pablohua sohuihuohuicani jjacuiishashajehuisejjameequicajji ejjanahuemeequi'yojji” jamaya poani. Jama sohuihuohuime pojjeama ca eyaya aña cuana. Eyaya jama sohuihuohuime añajojjemo esohui Quito mano'yapoa acui ecuiata'apeejo ecuea jama huohuime ajjima' poquiae. Majoya judiocuana enijje queamasetii pojjeama pome.

¹² Eya queaquene poani joya queaquehua sohuihuohuijji poanicuananijje. Oya ejjacuiishashajehuisejjaquijjijotii mimiani. Jamajje cajjacuiijehuisejjaquiahua ojjañatii.

¹³ Miquiana Jesosaja epeejjicuanaya, Eyacuiñajjiya quiana nahueca'yonaje jiquio ecua dejja ejeyo ejeanobia ani jama epopoqui poanijje. Ma ca Moisesja tehuecuana jayojja ba'epoquijjitii poanicuana ejeanobia jayojjatii ba'e. Ojjañatii Moisesja tehuecuana jayojja se ba'eajja jjeya jamatii eseya queamimishi ba'eca-ajja esejayanei ejjashahuabaquijjijo. Miquiaaya ca oe peacuana queajeanee apoquiacue, ba'emeesahuacue pea-ai.

¹⁴ Ojjañatii Moisesja tehuecuana jiquio oe esohui queapamenee jayojja jama poani ba'a: Ojjaña joya minijje ba'ecacuana queajeanee apoquiacuetii jiquio ecua miya jjanahuebaquiani jama pea-aiya oya acue.

¹⁵ Jjajaahuananeineiquicue quiana oe. Miquianaya queamasenee queaquenenee pomajamajani pea minijje ba'e Jesosaja epeejjinijje jiquio ecua ijjiacajjicuana jjaijjiaquiani jama pomajje botiamanei quiaa pea apoquiaje'yo jjachichaquipajeaje'yo, esohuijo pea-ai.

Esejayanei ejjashahuabaquijjicuana Edojjoshahuapameja jama pojjeama

¹⁶ Jamajjeya quiana oe jiquio esohui huohuiaña. Edojjoshahuapamejo oe jjashajja-ajjaquipoquicue. Jama pomajje miquianajayanei ejjashahuabaquijji queamimishi epojji a-ajja poaje.

¹⁷ Bacue, esejayanei ejjashahuabaquijjicuana queamimishi epojji ca Edojjoshahuapameja jama pojjeama poani, o sapo-ajjanei poani. Edojjoshahuapame esejayanei ejjashahuabaquijjicuana queamimishi epojji sa-ajjanei pea-ai poani. Esejayanei Edojjoshahuapameja jama pojjeama. Jamajjeya cua miquiaa asa-aña miquianajanei ejjashahuabaquijjijo aca-ajja.

¹⁸ Jamajjeya Eyacuiñajjija Edojjoshahuapamejo eseya jjashajja-ajjaquiajo Moisesja tehuecuana ca ese huohuipoquiajjitii pojjeama poani.

¹⁹ Ojjaña joya ojayanei ejjashahuabaquijjijo ba'epoquianicuanaja oja mimishi queaja'a ojjaña bacajji jama ba'a: Oya pea dejjajo, pea eponajo pea-ai quehuajje jjacojjoquiani. Queaquehuanee oya jjashahuabaquiani peaja huanaseja eyamijo, peaja yahueja eyamijo pea-ai, peacojjojjinei epojji. Oja mimishi peajo ejjacojjoquijji queajeanee acani, bichoamaa.

²⁰ Ohuaya dejjaja ne epana bihuiacani, Eyacuiñajji poso. Esohui ataicani pea-ai pea manomee'yojji nisho. Oya queaqueneneetii nequipoquiani jjacojjabeiqui'yoajja peacuananijje. Ohuaya peaja aquianacuana jeabacanitii. Oya queahuiso mimijajiani. Oya queaquene pocuajiani. Oya queadejjatai, queanishehui pea-ai poani peajo. Peacuana ohuaya queaquene pomeecani pea-ai. Oya peacuananijje jjapeequisapo-ajjanei cua oya jayojja jjashahuabaquime pojjima'cuananijjeya.

²¹ Oya ojayanei aquianajo queabihui po-ajja, peaja aquiana ohuaya sapea-aicani. Oya huoomajamajapoquiani. Ohuaya fiesta queatai amajamajacapoquiani queamimishi epojji peaja huanasenijje, peaja yahuenijje. Jiquio ecua eyaya queahuiso jjeya tehuenaje jayojja pea mimishicuana pea-ai ohuaya queahuiso acapoquianitii. Eyaya quiana yahuajo queaja'a huohuinaje, jjeya oya esohuiya huohuije o'oya quiana. Ojjaña joya jiquio ecua eyaya tehuenaje jama ba'epoquijjitii poanicuana ma Eyacuiñajjiya queapamenee huoojeacapoquianitii meshi Eyahuasijje epoqui'yojjitii pojjeama poaje macuanaya.

²² Edojjoshahuapameya ca se ca oe jama ba'emeesahuacapoquiani ba'a: Ohuaya eseya peacuana queajea ameecapoquiani esenijje ba'ecacuana. Ohuaya eseya queabihui pea-ai pomeecani, queaquijijjijajinee pomeecani pea-ai ohuaya. Eseya quenequenecuajiajja pomeecani peacuananijje. Ohuaya eseya peacuanajo queapame jjashahuabameequicani, o asahuajji epojji. Ohuaya eseya queaja'a pomeecani esejaya echacojjicuana eajeyojjijo.

²³ Ohuaya eseya maseama pomeecani peacuananijje. Esejayanei ejjashahuabaquijji queamimishi epojji ohuaya cajaa ameesahuacani ese jama eba'epoquitii poanijje. Jamaya Edojjoshahuapameya eseya ba'emeesahuacani. Moisesja tehuecuana ca ese jama ba'emeesahua-ajja.

²⁴ Ojjaña joya Jesosa Quitoja epeejji poanicuaa ojayanei ejjashahuabaquijjicuana cajaa acapoqui'yani. Oya jjabaquiani emano'yo jayojja queamimishitii epo poanijje. Jamajjeya ojayanei ejjashahuabaquijji queamimishi epojji peanijje ohuaya cajaa aca'yani.

²⁵ E'ejojonei Edojjoshahuapame eseja eyamidojjojo nequiya eseya ba'etiitiimeecani. Jamajjeya oe Edojjoshahuapamejo jjashajja-ajjaquipoquicue.

²⁶ Jamajjeya ¡a'a eseyanei queaca'a poani poso jjabaquijji! ¡A'a peaja aquiana jeabajji! ¡A'a peacuana ca'a-ama, peajja poso ajji pea-ai! Jamaya ba'epoquicue Edojjoshahuapame queaca'aneejo.