Hecho 6 - Ese Ejja New Testament

Dejjacuana pea onijje Jesosaja epeejjicuana ba'emeesahuajji epojji babacacapoa cuaa

¹ Ma shequiajajotiiya aje Jesosaja epeejji epojjicuana queahuiso pocapoquiapoa. Majoya judiocuana ma griego esohuijo mimianicuanaya mimijajicapoa pea judiocuananijje hebreo esohuijo mimianicuananijje. Jama acapoa griego dejjacuaa ba'a: —Bacue, ecuananijjejaajji griego epona eahuemano'yocuana oepojjinei quiaa bobi quiaña joya ecua minijjejaajji eahuemano'yocuana jama pea-ai pojjeama— jama mimijajimeapoa cuana.

² Jamajojoya aje Jesosaja babaca 12 huisome dejjacuaa ojjaña Jesosaja epeejjicuana jjachichaquimeecapoa onijje emimijji. Jama acapoa ojjañacuana ba'a: —Bacue, queapame pojjeama ecuanaja Eyacuiñajjija esohui ehuohuipajeajji eahuemano'yocuana bobi quiameepoquiajjijo.

³ Jamajjeya esenijje Jesosaja epeejjicuana siete huisome dejjacuana queapamenee ba'e baneicue. Joya queajjashahuabaquija'anee dejjacuana Edojjoshahuapameja esohuijo jjashajja-ajjaquipoquiani comaya oe baneicue. Majoya ecuaaya miquianaja babaca dejjacuana eahuemano'yocuana bobi quiapoquiajji epojji bajjanije.

⁴ Ecuanaya caca oe Eyacuiñajjinijjetii mimipoquije. Oja esohui huohuipoquiajjitii poaje pea-ai— jamaya poa cuana.

⁵ Majoya aje ojjaña Jesosaja epeejjicuaa Jesosaja babacacuanaja esohui queapame poani shajja-ajjacapoa. Jamajjeya Esteban bajjani dejja babacacapoa cuaa eahuemano'yocuana bobi quiapoquiajji epojji. Esteban jjashahuabaneiquipoquiapoa Eyacuiñajjija esohuijo. Edojjoshahuapameja esohuijo jjashajja-ajjaquipoquipea-aiapoa. Pea dejjacuana babacacapoa cuaa ba'a: Felipe, Prócoro, Nicanor, Timón, Pármenas, Nicolás pea-ai. Oya Nicolás Antioquiacuiñajji poa. Oya judío dejja jayojja epojji jjashahuabaquiapoa. Mahuisoya babacacapoa cuaa.

⁶ Majoya aje ma dejjacuana eahuemano'yocuana bobi quiapoquiajji epojji dojocapoa cuaa Jesosaja babaca dejjacuana nequiyasijje. Ma dejjacuanaya poeajo Jesosaja babaca dejjacuaa ojaya eme oja sapabiajje huanacapoa emimijji Eyacuiñajjinijje ojo.

⁷ Jesosaja babaca dejjacuaa Eyacuiñajjija esohui huohuimajamajacanequiapoa cuana. Jamajjeya aje Jesosaja epeejji epojjicuana queahuisonee pocapoquiapoa Jerusalén meshijotii ba'eca. Eyacuiñajjija equi-aijo chacochacopoquianicuana, judío dejjacuana pea-ai queahuiso jjashahuabaqui'yapoa Jesosajo.

Esteban iñaca'ajeacapoa cuaa

⁸ Eyacuiñajjiya Esteban queaca'a queajjashahuabaquija'a pea-ai nequimeecapoquiapoa. Jamajjeya ohuaya dejjaja ajjima'neineicuana acapoquiapoa Jerusalén meshijotii nequiya majo ba'ecaja queaja'a ebajji.

⁹ Majoya judiocuanaja equi-ai ejjachichaquijjijo anicuana, ma “O chacomeepoquiajjitii chama'yo” bajjanicuanaja equi-aijo anicuanaya, mimijajicapoa Estebannijje. Cirenecuiñajjicuana, Alejandriacuiñajjicuana, Ciliciacuiñajjicuana, Asia meshijo nequicacuana pea-ai Estebannijje mimijajicapoa. Jamajjeya ma queahuisocuaa Esteban esohui huohuiajjamajamajacapoa a'a ojaya Eyacuiñajjija esohui ebanei ebajji o queaquehua huohuimeejji nisho.

¹⁰ Edojjoshahuapameya ca Esteban queaja'anee esohui huohuimeesahuacapoa. Jamajjeya ma ejjachichaqui anicacuaa yajja saja-ame yajji acapoa oya Esteban queaja'anee mimianijojoya.

¹¹ Majoya ma dejjacuaa pea dejjacuana quehuajje iyaacapoa Esteban queaquehuanee mimiani huohuime eajji. Jama anishocapoa cuaa ba'a: —Oya Esteban Moisesja tehuecuanajo, Eyacuiñajjijo pea-ai queatai mimiani— jama nishoya acacuaapoa ojo bejjo sosejje.

¹² Jamajojoya aje queahuisocuana quenequenecuajicananapoa Estebannijje oya queaquehua mimiani peaa jama huohuime anishocajje. Judío etii poanicuana, Moisesja tehuecuana huohuipoquiajji poanicuana pea-ai quenequenecuajinanapoa. Jamajjeya Esteban iñaca'ajeameecapoa cuaa edojojji judío etii poani oopanacuana nequiyasijje oja bajji.

¹³ Majoya o dojojji epocuaa peacuana o siajje ajji bacapoa. Jama siajje ame acapoa macuaaya ba'a: —Ohuaya bacani jiquio Eyacuiñajjija equi-ai queapame pojjeama. Moisesja tehuecuana ohuaya huohuicani queapame pojjeama'yo, shahuabamajaca-ajja.

¹⁴ Ecuaaya oya shajja-ajjanaje ohua esohui huohuicani. Jama huohuime acani ba'a: “Jesosaa ma Nazaretcuiñajji dejjaa jiquio Eyacuiñajjija equi-ai quecuajeabichajeacaje'yo. Ohuaya Moisesja etehuecuana pea acaje'yo ma yahuajonei quiacapoa esohuicuana”— jama siajje ameya acapoa cuaa.

¹⁵ Ojjaña etii poanicuaa, peacuaa pea-ai majotii aniya Estebanja ecojja bacapoa ángel jayojja cojjame poani.