Hecho 4 - Ese Ejja New Testament

Pedro, Juan pea-ai judío dejja etii poanicuaa iñaca'ameecapoa ehuohuiajjajji

¹ Majotiiya aje Pedrohua, Juanya pea-ai esohui huohuicaquijotii Eyacuiñajjija equi-aijo chacochacopoquianicuana poeapoa. Eyacuiñajjija equi-aijaahuanajji soldadocuanahuohuijji dejja etii poani, saduceocuana poepea-aiapoa Pedronijje mimiya, Juannijje mimiya pea-ai.

² Juanya, Pedrohua pea-ai esohui ojjaña emano'yocuana shequicaje'yo Jesosa ebionei shequi'yonajejojoya esohui jama huohuicaqui shajja-ajjamajje ma etii poanicuana queaquenenee poa onijje.

³ Jamajojoya aje sinecuanei Pedro, Juan pea-ai iñaca'ameemajje jeanobiameecapoa cuaa ejjajeanobiaquijji equiyasijje majotii jaa ejjapojjaquijji.

⁴ Jamatii queahuisocuana ma Pedroja esohui shajja-ajjajji poanajecuanaya jjashahuabaquica'yapoa Jesosajo. Jamajjeya Jesosaja nahue'yocuana queahuisonee pocapoa. Beshahuanei 5.000 huisome dejjacuana oopana sicocapoa Jesosaja epeejji eyacua.

⁵ Majoya aje pea pojjajo Jerusalén meshijotii ani judío dejjacuana etii poani, Moisesja tehuehuohuijji poanicuana, pea etii poanicuana pea-ai jjachichaquicapoa ojee.

⁶ Majotii pea-aiya aje Anás bajjani dejja nequiapoa. Oya Eyacuiñajjija equi-aijo chacochacopoquiani ebionei etii poa. Caifás, Juan, Alejandro, ojjaña ma Anasja huapa pojjeamacuana anipea-aiapoa.

⁷ Majoya etiicuaa Juan, Pedro pea-ai oya ejjachichaqui anicayiyesamaneijo nequimeecapoa jeacuayamee'yomajje. Jama huohuiajjame oya acapoa etii poanicuaa ba'a: —¿Ajea esohuijo acuae quiaa dejja jeoajjatii cuaya jeomeenaje? ¿Ache dejjaa acuae quiana jama ameecanaje?—

⁸ Majoya aje Pedro Edojjoshahuapameya queaja'anee saja-ameecapoa cuana jama ba'a: —Miquiana etii poanicuana, peacuana huohuijji poani pea-ai, shajja-ajjacue mo.

⁹ Miquiaaya huohuiajjanaje ma dejja jeoajja cuaya ecuaa jeomeenajejo ebajji ache queaca'a poanijo ecuaa oya jeomeenaje.

¹⁰ Jamajjeya ecuaa queaja'anee meteamaa huohuije jjeya miquianaja ecojjaneijo ojjaña israelitacuanaja queaja'a ebajji. Jiquio dejja jjeya esenijje nequi ese ani cojjaneijo jjeya queapame jeoani Jesosa Quito Nazaretcuiñajji queaca'anee poanijojoya. Oya dejjaaya ma miquiaaya acui ecuiata'apeejo manomee'yonajeya ma Eyacuiñajjiya shequimeeca'yonajeya queapame jeomeecanaje oya.

¹¹ Yahuajonei Eyacuiñajjija huoojea dejjajo tehuecapoa cuaa jama ba'a: “Oya mei-ai equi iyajji jama poani” jamaya tehuecapoa. Miquiaaya Jesosa mei-ai jama epojji cajaa anaje. Jamatii Jesosa ma mei-ai ebionei equi iyajji nequiacani jama pea-ai poani.

¹² Jamajjeya chama'neinei pea Jesosa jayojja poani ese nahue'yojji epojji. Jiquio meshijo nequi chama'nei pea dejja Eyacuiñajjija huoojea ese nahue'yojji epojji— jama huohuimeya Pedrohua acapoa cuana.

¹³ Pedrohua, Juanya pea-ai esohui queaja'anee meteamaneiya huohuicani bamajje ma etii poanicuana jjashahuabaquiapoa ma beca dejjajo oya etii epojji peaja sohuihuohuijjimanei poanaje. Judío dejja etiiquianaja esohuicuana bapojjima'nei nequi oya. Jamajojoya aje jjabaneineiquicapoa cuana ojo. Ojaya eba poa Pedro, Juan pea-ai Jesosa shajja-ajjajji popoquinaje.

¹⁴ Oja jeomee dejja majotii pea-aiya nequiapoa onijjetii. Jamajjeya etii poanicuaa Pedro queaquehuanee mimiani niñebajjima poa.

¹⁵ Majoya Pedro, Juan pea-ai huoojeacuayacapoa cuaa oya ejjachichaqui anijo esecueyasijje ejjaishoaquinequijji so'o. Majotii ani jama mimime ponequiapoa ma etii poanicuana oopana ba'a:

¹⁶ —¿Yajja acuae seya aje jiquio beca dejja Jesosaja epeejji? Ojjaña Jerusalén meshijo ba'ecacuanaja eba ohuaya dejjaja ajjima'neinei oe jjeya acanaje. Jamajjeya esejaya ojaya ajjima' eajji pojjeama.

¹⁷ Jesosaa dejja jeomeecanajejo oya huohuimajamajapoquisapoaje. Jamajjeya eseyaya oya huohuije ojaya Jesosaja bajjani ehuohuipajea'yojji jjeyanei, quijje pea-ai— jama mimimeya ponequiapoa etii oopanacuana.

¹⁸ Majoya aje etii poanicuaa Pedro, Juan pea-ai iyaameecao'oyapoa o cojjaneijo enequijji. Jama huohuime aneineicapoa cuaa ba'a: —¡A'a esohui Jesosajo huohuibeca'yojji! ¡A'a ojaya bajjani ajji!—

¹⁹ Etiicuaa esohui jama acajje Pedrohua, Juanya pea-ai jama acapoa cuana ba'a: —Miquianaya jjashahuabaneiquicue. ¿Ajea esohui Eyacuiñajjiya ecuana ameesa-acani queapame eba'epoquijji? ¿A'a ecuana miquianaja etii poanija esohuineijo jjashajja-ajjaquicajji, a'a Eyacuiñajjija esohuijo pojja'a? ¿Ache esohuijo?

²⁰ Bacue, ecuanaja ehuohuipajea-ajja-ajjajji pojjeama poaje quio ecuaa banaje huisotii, quio ecuaa shajja-ajjanaje huisotii esohui pea-aiya— jamaya poa.

²¹ Majoya aje ma etii poanicuaa Juan, Pedro pea-ai huohuineimajje Jesosajo ehuohuipajea'yojji nisho oya huoojeameeca'yapoa. Dejja jeoajja cuaya jeomeecanaje bamajje queahuisocuaa Eyacuiñajji bihuiacapoa. Jamajjeya oya napameejjimatii poquimeeca'yapoa queahuisocuaa Pedrojo, Juanjo pea-ai Eyacuiñajji bihuiacani shajja-ajjamajje.

²² Ma ohua jeomeecapoa dejja etiipishana poa. Ojaya 40 shequiajame huiso ejjayejjequi poa.

Jesosaja epeejjicuana mimicapoa Eyacuiñajjinijje

²³ Majoya aje Pedro, Juan pea-ai etiicuaa huoojeacuayameeca'yajje poquiapoa Jesosaja epeejjicuana jjachichaquimeeya ojee. Ohuaya huohuicañaqui'yapoa cuana ojjaña ma Eyacuiñajjija equi-aijo chacochacopoquiani etii poanicuaa, ma pea etii poanicuaa pea-ai o huohuineicanaje esohui huisotii.

²⁴ Oja esohui shajja-ajjamajje ojee mimicapoa cuana Eyacuiñajjinijje ma ejjachichaqui anicacuana. Jama mimime pocapoa cuana ba'a: —Emeshimesenei, miya ojjañacuana, meshi, ena, eyatahuatahua pea-ai panajji epo. Ojjaña jiquio meshijo anica, bae-aijo jaacacuana pea-ai mique pana.

²⁵ Yahuajonei miyaya queaja'anee Edojjoshahuapame huohuiapoa ojaya David bajjani eseja etiiquiana etehuemeejji jama ba'a: “¿Yajjajje shai queahuisojaajjicuana quenequenecani Eyacuiñajjinijje? ¿Yajjajje shai queahuisocuana jjashahuabaquicani queaquehuanee oma' jayojja poani?

²⁶ Jiquio emeshimesecuana jjashajja-ajjaquiajjanei poani Eyacuiñajjijo. Pea etii poanicuana o sapo-ajjanei pea-ai poani. Jamajjeya oya jayojja jjashahuabaquime pomajje oja huoojea ecuana nahue'yojji epojji Emeshimesenei sa-ajjanei pea-ai poani.” Jamaya Davidya esohui yahuajonei tehuecapoa.

²⁷ —Jesosa e'ejojonei mique huoojea poanaje ecuana nahue'yojji epojji. Jamatii jiquio meshijotii nequi emeshimese Herodes, Pilato, onijjejaajji judío pojjeamacuana pea-ai oya jayojja jjashahuabaquime poanaje ma Jesosa queapamenee mimishima'nei cajaa ajji. O manomee'yojjijo jjashahuabaquinaje cuana pea-ai.—

²⁸ Jama mimiapoatii cuana Eyacuiñajjinijje ba'a: —Jamaya Jesosa manomeeca'yonaje cuaa miquea ejjashahuabaquijji yahuajoneitii jama poajojoya. Ma ecua miya jjashahuabaquiapoa jamaya Jesosa aca'yonaje cuaa oya jayojjaya.

²⁹ Jjeya miyaya bacue ecuana. Dejja etiicuaa ecuana Jesosajo mimimeejjimatii asa-acani. Jamajjeya ecuana mijo echacochacopoquijji poani esohui queapame meteamanei huohuimeesahuacue ojjañacuanahuasijje.

³⁰ Miyaya queaca'aneeyajjejojoya ecuana emano jaacuana jja-ajameesahuaqui'yocue, dejjaja ajjima'neineicuana ecuana ameesahuacue pea-ai Jesosa queapameneeja bajjanijo. Maya oya mique huoojea ecuana nahue'yojji poani. Jama poajoya queahuisocuaa Jesosa e'ejojonei mique huoojea queaja'a bacaje— jama mimimeya pocapoa Eyacuiñajjinijje.

³¹ Majoya aje ona ejjachichaqui anijo mimijeyoajo equi huehuahuehuapoa. Edojjoshahuapameya ojjaña ma ejjachichaqui anicacuana queaca'a pomeecapoa. Jamajjeya aje ja'anei meteamaneiya huohuicanequiapoa macuaaya Eyacuiñajjija esohui.

Eyacuiñajjija epeejjicuaa pea onijje ba'e Eyacuiñajjija epeejjicuana oja aquianacuana quiacapoa oja huapa pojjeamanei jama

³² Jamajjeya ojjaña Eyacuiñajjija epeejjicuana jamatii queahuisonee poani oya jayojja pea-ai jjashahuabaquime pocapoa Jerusalén meshijo ba'eca. Oja aquianacuana ojayanei epojji pojjeama acapoa cuaa, peacuanaja epojji pea-ai acapoa.

³³ Jesosaja babaca dejjacuaa queaja'anee meteamaneiya huohuicanequiapoa cuana esohui Emeshimesenei Jesosa shequi'yonajejo. Eyacuiñajjiya queapamenee acapoquiapoa cuana ojayanei ejjashahuabaquijjijo.

^34-35 Eyacuiñajjija epeejjicuaa oja equicuana, meshicuana pea-ai quiacapoquiapoa bejjo sosejje peacuana asahuajji. Jamajjeya chama'nei bobima' epojji poacuana. Oja meshi quiamajje bejjo jeaquicapoa cuaa Jesosaja babaca dejjacuanaja pea quiaquijji. Cua aema' poanicuana quiacapoa oja bobicuana jjeshepoquiajji.

³⁶ Jamaya acapoa oe dejjaa José bajjaniya Levija osecuaa. Oya Chipre nasijo cuayapoa. Jesosaja babacacuaa oya bajjani pea acapoa ba'a: Bernabé bajjani. Ma bajjani ca jama poanijje ba'a: Pea yenoama pomeesahua'yojji poani.

³⁷ Ohuaya oja meshi quiamajje bejjo jeaquicapoa Jesosaja babaca dejjacuanaja pea onijje Jesosaja epeejjicuana quiajji.