Hecho 23 - Ese Ejja New Testament

¹ Pablohua judío dejja etii poanicuana Junta Suprema bajjani cojja baneimajje jama acapoa cuana ba'a: —Enijjejaajji ecuea epeejjicuana, eya queajjashahuabaquija'anee ba'e ecue mimishi huanaquehua-ajja Eyacuiñajjiya eya bacapoquiani.—

² Pablo esohui jama poajo Ananías bajjani dejjaa Eyacuiñajjija equi-aijo chacochacopoquiani ebionei etii poaniya ma Pablopejjejo nequi dejjacuana huohuicapoa o naba cuiasejjajeajjijo.

³ Ohua jama huohuime acajo Pablohua jama acapoa ba'a: —Eyacuiñajjiya ca miya naba cuiasejjajeacaje. ¡Miya etii ojaya epeejjinisho poani, siajjepojji! Moisesja tehuecuana baneineimajje miyaya eya queanee pomeesa-aña majoya. Jamatii ma esohuicuana miquea ajjima'. Miyaya pea dejja eya cuiameeje jamatiiya oja tehue jaa jama pojjeama.—

⁴ Majo anicacuana jama poa Pablonijje ba'a: —De, ¿apiojji acuae miya mimijajiani Eyacuiñajjija equi-aijo chacochacopoquiani ebionei etii poaninijje? ¡Jama poca-ajja!—

⁵ Jamajjeya Pablo jama poa onijje ba'a: —Epeejjicuana, ecuea oya bajjimanei poanaje oya Eyacuiñajjija equi-aijo chacochacopoquiani ebionei etii poani. Eyacuiñajjija esohui Moisesja tehue jama poani ba'a: “A'a niñebajji joya minijjejaajjicuana huohuijji poani etiicuana.”—

⁶ Majoya Pablohua bacapoa judío dejja etiicuana Junta Suprema bajjani iyehuiso majo ani, saduceo dejjacuana pea-ai ejjahuaqui anica. Peacuana ca fariseo dejja poani majotii ojee anipea-aiapoa. Jamajjeya janobajjimanei Pablo miminequiapoa ma etiicuananijje jama ba'a: —Enijjejaajji judío dejjacuana shajja-ajjacue, eya fariseo dejja pea-aiya epo, fariseoja ebacuaejja pea-aiya. Eya queaquehuanee mimiani poso acani cuaa esohui emano'yo jaacuana quijje shequicaje'yo eya huohuiañajojoya— jamaya poa Pablo.

⁷ Ohua esohui jama huohuime acajje majo anica saduceocuana etii poani mimijajiapoa fariseocuananijje Pabloja esohuijo. Fariseocuana pea-ai quenequeneapoa. Ma ejjachichaqui anicacuanaya oya jayojja pea-ai jjashahuabaquime pojjeama poa Pabloja esohuijo.

⁸ Saduceo dejjacuanaja esohui etehue jama poani ba'a: “Emano'yo jaacuana eshequi'yojji pojjeamatii poaje. Angelcuana chama'. Dejjaja edojjoshahua chama' pea-ai.” Jamaya saduceoja etehue poa. Fariseocuana jama pojjeama jjashahuabaquime poani. Angelcuana e'ejojonei enequi, dejjacuana eponacuana pea-ai dojjoshahua yamijji poani, emano'yo jaacuana quijje shequicaje'yo fariseocuaa huohuicapopoquianitii.

⁹ Jamajjeya ma ojee ejjachichaqui anicacuana janobajjimanei taaaca-aniapoa. Ona jama poequijotii peacuana Moisesja tehuehuohuijji poanicuana nequisohuapoa emimijji. Macuanaya fariseocuana jayojja jjashahuabaquime pea-ai poa. Jama acapoa ma dejjacuaaya ba'a: —Jiquio dejja caca mimishi apojjima' esejaya oya ecuiameejji. E'e pojja'a oe ángel, oe eshahuamase pojja'a onijje miminaje.—

¹⁰ Jamatii majo ejjachichaqui nequicacuana queashajjaquijjotii taaame ponequiapoa queaquenetiiya Pablojo. Jamajjeya capitanya Pablo ejjequite'ajeacaje'yo poso amajje pea soldadocuana iyaameecapoa o dojo-o'oyajji soldadocuana anijji equiyasijje.

¹¹ Majoya aje pea mecajje Emeshimesenei jjaja'aquiapoa Pablojo onijje emimijji. Jama poa ba'a: —Pablo, meteamanei pocue. Jiquio ecua jjeya miyaya Jerusalén meshijo nequiya esohui ejo huohuinequinaje cuana, jama pea-aiya Roma meshijo nequiya esohui ejo huohuipea-aiquije quijje.—

Pablojo jjaquecuapanaquiapoa judiocuana

¹² Majoya aje pea pojjajo judío dejjacuana jjaquecuapanaquiapoa Pablojo. Esohui e'ejojonei oya jayojja eajeyojji huohuicapoa ojeeya jama ba'a: —Pablo eshe nequijotii eseya eijjiaijjiajji pojjeama poaje so'o, ena ishi pojjima' pea-ai poaje o eseja cuia'yojjimahuajo.—

¹³ Cuarenta huisome dejjacuaa esohui jama acapoa ojeeya Pablo cuia'yojjijo.

¹⁴ Eyacuiñajjija equi-aijo chacochacopoquiani etii poanicuana, pea judío etiicuana pea-ai esohui jamaya huohuiquicapoa ma 40 huisome dejjacuaa Pablojo. Macuaaya jama aquicapoa ba'a: —Ecuaaya esohui e'ejojonei oya jayojja eajeyojji huohuinaje ojeeya. Pablo eshetii nequijo so'o ecuana eijjiaijjia-ajja-ajjajji pojjeama poaje o esejaya cuia'yojjimahuajo.

¹⁵ Jamajjeya miquiaaya pea judío etiicuana Junta Suprema pea-ai mecahuajje comandante huohuiajjaquicue jiquiacua oja Pablo yemeejjijo miquianaja oya ebaneijji nisho ajeo oya iñaca'acanaje cuaa. Ecuana ca quehuanequije o jiquiacua yecajo ecuia'yojji— jama jjaquecuapanaquimeya poa cuana Pablojo.

¹⁶ Pabloja jjo'ija bacuaejjaa shajja-ajjacapoa dejjacuaa Pablo cuiacaje'yo. Jamajjeya oya poquicuajiapoa soldadocuana anijji equiyasijje Pablo huohuiya onaja esohui o cuia'yojjijo.

¹⁷ Ma dejjamasecuaa oya jama acaje'yo shajja-ajjamajje Pablohua oe capitán iyaacapoa onijje emimijji. Jama poa ba'a: —Jiquio dejjasho'i dojocue so'o comandante etii poani nequiyasijje. Oya esohui huohuiquisapoani comandanteja ebajji.—

¹⁸ Majoya aje capitanya dejjasho'i dojocapoa comandante nequiyasijje. Jama acañaquiapoa capitanya ba'a: —Pablohua ejeanobia aniya eya huohuicanaje jiquio dejjasho'i jiquiacua ecuea eyejjijo. Oya minijje mimisapoani jjeya.—

¹⁹ Majoya aje comandanteya dejjasho'i emejo dojoshiñacapoa onijjenei emimijji. Jama huohuiajjame acapoa oya ba'a: —¿Ae shai eya miyaya huohuisa-aña?—

²⁰ Jamajjeya dejjasho'iya jama acapoa ba'a: —Judío dejjacuana oopana mimimimica-aninaje mi huohuiajjajji mecahuajje Pablojo. O judío etii poani oopanacuanajo enequijji miya huohuiajjacaje cuaa. Jama miya acaje cuaa ba'a: “¿Ajeo shai Pablo iñaca'acanaje cuaa? Ecuana oya basapoani” jama nisho mi acaje cuaa.

²¹ ¡A'a oya e'ejojonei poani poso ajji! Queahuiso onijjejaajji oja epeejjicuana pea-ai jjaishoaquicaje quehuajje Pablo cuia'yojji. Cuarenta huisome dejjacuaa ishoacani oya. Esohui oya jayojja eajeyojji huohuicanaje cuaa ojeeya ba'a: “Pablo eshe nequijo eseya eijjiaijjiajji pojjeamanei poaje, ena ishi pojjima'nei pea-ai poaje Pablo cuia'yojjimahuajo.” Jjeya apoa acanaje cuaa o cuia'yojji. Miya ishoacani macuaaya jjeya ache esohui miyaya saja-aje cuana Pablojo— jamaya poa dejjasho'i.

²² Majoya comandanteya oya huohuimajje epoqui'yojji dejjasho'i jama acapoa ba'a: —Jiquio miya e huohuinaje esohui Pablojo a'a peacuana huohuiñaqui'yojji.—

Pablo dojocapoa cuaa Félix bajjani emeshimeseyasijje oja bajji

²³ Majoya aje comandanteya beca capitán iyaacapoa. Ma beca capitán huohuicapoa 200 soldadocuana jja-aquijjijo ejeojjijje epoquijji. Setenta soldadocuana mona daasabiajje eanisohuaqui ani huohuicapoa epoquijji pea-ai. Pea 200 huisome emeje mejji pea-ai huohuicapoa epoquijji. Ojjaña ojee poquicaje Cesarea meshiyasijje mecajjetii a las nueve jjajjeshequicaje huohuicapoa comandanteya.

²⁴ Ohuaya huohuipea-aicapoa cuana Pablo anijji monacuana apoa yajjijo soldadocuananijjetii o poquijji. Pablo queapame poquijjijo camaja-ama emeshimese Félix nequiyasijje jamaya huohuicapoa cuana comandanteya.

²⁵ Ohuaya papeni tehuecapoa ehuoojeajji soldadocuananijje emeshimeseja yajji.

²⁶ Jama tehueme acapoa ba'a: Eyaya Claudio Lisiasya tehueaña jiquio papeni miquea yajji emeshimese queapamenee Félix bajjani. Esohui mi queapame pojji tehueaña.

²⁷ Judío dejjacuaa jiquio dejja Pablo bajjani iñaca'acanaje ecuia'yojji nisho. Oya romano dejja e'ejojonei poani bamajje eya ecuea soldadocuananijje poquicuajinaje o nahueya.

²⁸ Eya basapoanaje ajeo shai oya iñaca'acanaje cuaa ecuia'yojji. Jamajjeya eyaya oya dojomeenaje judío oopana etii poanicuanaja ebaneijji.

²⁹ Etiicuaa Pablojo esohui acanaje jiquio dejjaa huohuitaicani cuana oja etiiquianaja esohui etehuecuana. Jamatii chama'nei poanaje oja mimishi o manomee'yojji, o jeanobiameejji pea-ai chama' poanaje, oya mimishiama.

³⁰ Judiocuana ojo jjaquecuapanaquiani shajja-ajjamajje eyaya oya huoojeacuajinaje mique. Jamajjeya eyaya huohuinaje joya o napameesapojjicuana epoquijji mi nequiyasijje minijje mimiya ojo. Ajeo Pablo queamimishi poani bacani cuaa miyaya shajja-ajjaje.— Jama tehuemeya acapoa ohuaya.

³¹ Jamajjeya mecajjetiiya aje soldadocuaa Pablo dojocapoa Antípatris meshiyasijje ma comandanteya esohui acapoa jayojjaya.

³² Majoya aje pea pojjajo soldadocuana ma Pablonijje poqui ejeojjijje poeca'yapoa oja equi-aiyasijje. Pea soldadocuana ma monabiajje eanisohuaqui anicacuana ca poquitiiapoa Pablonijje.

³³ Majoya aje Cesarea meshi bañaquimajje papeni comandanteja tehue quiacañaquiapoa oja huoojea soldadocuaa emeshimeseja yajji. Pablo pea-ai jeaquicapoa cuaa emeshimeseja ebajji.

³⁴ Majoya aje oja tehue papeni bamajje emeshimese Félix bajjani etiiya Pablo huohuiajjacapoa ache meshijo oya cuayapoa. Pablohua oya saja-acapoa Cilicia meshijo cuayapoa.

³⁵ Emeshimeseya Pablo jama apea-aicapoa ba'a: —Eyaya miya shajja-ajjaneije jiquio mi napameesapojjicuana poeajo.— Majoya ohuaya huohuicapoa soldadocuana Pablo ejaahuananeijjijo Herodesja equi-aijo ani.