Hecho 1 - Ese Ejja New Testament

Edojjoshahuapame poejjijo Jesosaa huohuicapoa cuana

¹ Ecuea epeejji Teófilo eyaya miya tehueo'oyaña. Ebionei eyaya miya tehuenaje ma Jesosaa huohuicapoquiapoa esohuicuana miquea queaja'a ebajji. Ma ebionei ohua acapoquiapoa echacojjicuana pea-ai eyaya tehuenaje.

² Jesosaa Eyahuasijje ba'esohuaqui'yojjimahuaa Edojjoshahuapamenijjeya oja babaca dejjacuana oja esohuihuohuiquinequijji poani huohuicapoa ae quijje ojaya echacojji poaje.

³ Ma dejjacuanajoya Jesosa shequi'yomajje jjabameequi'yapoa ojaya oya queaja'a eshequi'yo nequi eba'yojji. Cuarenta cahuime huiso Jesosa jjabameequinequiapoa oja babaca dejjacuanajo. Jesosaa huohuicanequiapoa ma dejjacuanaya Eyacuiñajji ojjañacuana huoojeapoquiajjitii poanijo eojjañacuanamese.

⁴ Jesosaa oja babaca dejjacuananijje eshequi'yo anitiiya huohuicapoa cuana Jerusalén meshijo o majotii anijji so'o. Jama huohuime acapoa cuana ba'a: —Jjaishoaquianisocue quiana oe jiquio meshijotii ani Edojjoshahuapame poejjijo. Eyacuiñajjiya ajeyocaje'yo ma ohua miquiana huohuicanaje esohui huisotiiya. Oya esohuiya eyaya quiana huohuinaje.

⁵ E'ejojonei Juanya iñajeanobiacapoquiapoa cuana enaojjohuasijje. Quijjepishana ca Edojjoshahuapame miquianaja eyamidojjohuasijje nobiquije miquiananijjetii enequipoqui'yojji— jamaya Jesosaa acapoa cuana. Majoya eyaya miya ebionei tehuenaje pea-ai.

Jesosa ba'esohuaqui'yapoa Eyahuasijje

⁶ Majoya aje ma Jesosanijje ejjachichaqui anicacuaa Jesosa huohuiajjacapoa jama ba'a: —Emeshimesenei, ¿a'a miyaya jjeyanei israelitacuana queaca'a pomeeje o'oya peajaajjicuana huoojeapoquiajji epo-o'oyajji?—

⁷ Jesosaa saja-acapoa cuana jama ba'a: —Miquianajaya ebajji pojjeama ache pojjajo, ache ba'ijo shai Eyacuiñajjiya jama pomeecaje'yo cuana. Ojayanei ejjashahuabaquijjijo ohuaya israelitacuana queaca'a pomeecaje'yo.

⁸ Edojjoshahuapameya quijjepishana miquianaque nobiquimajje queaca'a ohuaya quiana pomeecaje. Majoya aje quiana oe peacuana sohuihuohuiya poquije ejo. Ohuaya miquiana Jerusalén meshijo ba'ecacuana sohuihuohuimeesahuacapoquije. Judeacuiñajjicuana, Samariacuiñajjicuana, ma queahueshanee ba'ecacuanahuasijje huohuimeesahuapea-aiquicapoquije quiana Edojjoshahuapameya.—

⁹ Majoya aje Jesosaa o shajja-ajjajji poanicuana huohuijeyocajo Eyacuiñajjiya oya dojosohuaquica'yapoa Eyahuasijje o shajja-ajjajji poanicuaa oya bacaquitii. Majoya Jesosa bohua queyaca'yapoa, jamajjeya oya bapajeaca'yapoa cuaa.

¹⁰ Jesosa Eyahuasijje ba'esohuaquije'yo o shajja-ajjajji poanicuaa bacaquijotii beca dejja daquiosheneijji jjanequija'acuajiquiapoa oya nequicapejjejotii.

¹¹ Ma dejjacuana daquiosheneijji jama mimime poa ba'a: —Galileacuiñajji dejjacuana, ¿yajjajje acuae quiana eyahuasijjetii jjabajeasohuaquiequi? ¡Ajeo! Jiquio miquiananijje nequipoquinaje Eyacuiñajjija dojosohuaqui'yo Jesosaya poeje o'oya oyatiiya. Jiquio ecua quiaa oya ba'esohuaquije'yo banequinaje jamaya oya poeje o'oya jiquiacua.—

Matías bajjani dejja babacacapoa cuaa Judasja ejjocojo enequi'yojji

¹² Majoya aje Olivos bajjani eyiyoiyeaojo nequi Jesosa shajja-ajjajji poanajecuana poe'yapoa Jerusalén meshiyasijje. Iyehuesha oe kilómetro hueshame poe'yapoa cuana ma ejomishocajji sábado epojjajo poquiani huesha jama.

¹³ Majoya Jerusalén meshi bañaqui'yomajje equi equecuayijjijamacoohuasijje jaasohuaquiñaquiapoa cuana ma oya cahuinaje equijamacohuasijje. Mahuiso cuana aje poa ba'a: Pedro, Juan, Santiago, Andrés, Felipe, Tomás, Bartolomé, Mateo, Santiago Alfeoja bacuaejja, Simón Celote, Judas Santiagoja bacuaejja pea-ai. Mahuisoya poa cuana.

¹⁴ Mahuisotiiya aje cuana jjachichaquipoquiapoa Jesosaja chahuacuananijje, oja naenijje Marianijje, pea eponacuananijje pea-ai emimipoquijji Eyacuiñajjinijje ojee.

¹⁵ Majoya aje quijje oe pojjajo Jesosaja epeejjicuana oopana 120 huisome ma meshijo ejjachichaqui anicajo Pedrohua nequisohuamajje huohuicapoa cuana jama ba'a:

^16-17 —Jesosaja epeejji ecue dohuecuana, jjo'icuana, shajja-ajjacue mo. Ma yahuajonei Edojjoshahuapameya David tehuemeecapoa esohui jjeya apoa acanaje. Oja tehue jayojjaya ajeyocanaje Judasjo. Oya Judas esenijje nequipoquipea-ainaje. Oya esenijje chacochacopoquipea-ainaje. Majoya ohuaya Jesosa iñameesahuacanaje dejjamasenijje bejjo sosejje.

¹⁸ Ohuaya meshi jjeshecanaje ma o etiicuaa quiacanaje bejjojo Jesosa iñameesahua sosejje. Ma meshijotiiya oya oque'yonaje oja sapajje. Jjamajjiicuiapojojeaqui'yonaje pea-ai majotiiya. Oja seecuana cuayajeananaquinaje oque'yomajje— jamaya acapoa.

¹⁹ Jerusalencuiñajjicuaa Judas jama po'yonaje shajja-ajjamajje ma meshiya oja jjeshe bajjanicanaje ba'a: —Acéldama bajjani ohua ma meshi jjeshecanajejojoya Jesosa iñameesahua bejjo sosejje.

²⁰ —Yahuajonei esohui tehuecapoa Salmos bajjani papenijo Judasjo jama ba'a: “Oja meshi, equicuana se-ejjama'nei meshi jayojja capo'yahua. Oja meshijotii eba'ejji pojjeama cuana poaje'yo.” Jama tehueme apea-aicapoa ba'a: “Pea dejja ojaya ejjocojo echacochacopoqui'yojji canequi'yahua.”—

²¹ Majoya Pedrohua jama huohuime apea-aicacuanapoa ba'a: —Jiquiojo dejjacuana pea enequi. Oya esenijjetii pea-ai ponequinaje Jesosa esenijje o enequiahuajo. Jamajjeya eseyaya pea dejja baje'yo oja ejjocojo echacochacopoqui'yojji.

²² Yahuajo Juanya Jesosa iñajeanobiacapoajo jiquio dejjacuana esenijje enequitiipea-aiapoa. Jjeya Jesosa ba'esohuaqui'yonajejo oya enequitii pea-ai poanaje esenijje. Jamajjeya oe jiquiojo nequi dejjacuana esenijjetii echacochacopoqui'yojji baca'yojji joya Jesosa shequimeeca'yonaje bajji epo ma huohuipoquia'yojji epojjiya.—

²³ Majoya aje beca dejjacuana huohuicapoa cuaa oe Judasja ejjocojo echacochacopoqui'yojji onijje. Oe dejja ma bajjani poa ba'a: José. Oya bajjani pea poa ba'a: Barsabás bajjani, Justo pea-aiya. Ma pea dejja ca ma bajjani poa ba'a: Matías.

²⁴ Majoya aje ma ejjachichaqui anica mimiapoa Eyacuiñajjinijje ma beca dejjacuanajoya jama ba'a: —Emeshimesenei, miquea ebanei ojjañacuanaja ejjashahuabaquijji. Jamajjeya ecuana jjeya bameecue ache dejja jiquiojo nequi miyaya babacaje.

²⁵ Oya peacuana sohuihuohuiquinequijji poaje'yo. Oya Judasja ejjocojo nequije'yo. Judas queamimishinee poanajeyajjejojoya miquea echacojji cajaa acanaje. Jamajjeya Judas poqui'yonaje ma o queaneeneetii acaje'yohuasijje.—

²⁶ Majoya aje oja bajjanicuana etehue meshiyasijje jeaacapoa cuaa ebajji ache nequije'yo Judasja ejjocojo. Jamajojoya aje Matías bajjani Eyacuiñajjija babaca poani bacapoa cuaa ona sohuihuohuiquinequijji epojji ma pea 11 huisome dejjacuananijjetii echacochacopoqui'yojji.