HEBREOS 3 - Ese Ejja New Testament

¹ Ecue dohuecuana, jjo'icuana, Eyacuiñajjiya quiana bacani ojaya'yo quijje queapamenee eba'etiitii'yojji onijje Eyahuasijje. Miquianaya jama epojjiya iyaacanaje ohuaya, jamajjeya quiana oe Jesosa Quitojo queaja'anee jjashahuabaneiquipoquicuetii. Oya Eyacuiñajjija huoojea poa ese oja esohui e'ejojonei sohuihuohuipoquiajji. Eyacuiñajjiya oya onijje emimipoquijji ebionei etii nequimeepea-aicani ese queaja'a ba'emeesahuapoquiajji ma ese jjashahuabaquipoquiani esohui jayojja eba'epoquijji.

² Jesosaa Eyacuiñajjija echacojji queapamenee acapoquiapoa, ojjaña ajeyocapoquiapoa. Jama epopoquijjiya Eyacuiñajjiya oya nequimeecapoa. Oya jayojja pea-ai Moisés queapamenee chacochacopoquiapoa Eyacuiñajjija babacacuana asahuapoquiajji yahuajonei.

³ Jesosaa caca oe Eyacuiñajjija echacojji queapamenee ajeyocapoquiapoa, jamajojoya Eyacuiñajjiya oya queapamenee bacani, esohui queapame mimipoquiani ojo pea-ai, ma ecua ohuaya Moisés queapamepishana bacapoa esohui queapame mimiapoa ojo jama pojjeama. Jiquio ecua equi queabame ani bamajje equi iyajji poanicuanajo esohui queapame acani cuaa, equineijo pojjeama, jama pea-aiya Jesosajo esohui queapame Eyacuiñajji mimipoquiani, Moisesjo ca queapamepishana mimiapoa.

⁴ Bacue, equicuana dejjacuanaja iya anica, oyatii jjapanaqui pojjeama aniani. Ojjaña aquianacuana meshijo ani, eyajo nequi pea-ai oyatii jjapanaqui pojjeama, Eyacuiñajjija pana poani oja nequimee.

⁵ Moisés queapame chacochacopoquiapoa Eyacuiñajjijo joya ecua dejja queapame chacochacoani dejja quea-aquianahuisoja equi-aijo jama. Jamaya Moisés chacochacopoquiapoa Eyacuiñajjija babaca israelitacuana asahuapoquiajji. Ma quijje Eyacuiñajjiya acaje ohuaya queaja'a huohuicapoquiapoa cuana.

⁶ Eyacuiñajjija Bacuaejja Quito joya ecua dejja quea-aquianahuisoja equi-aijo chacochacoanicuana jama pojjeama poani. Oya caca equi-aimeseja bacuaejja poani jayojja, ma equi-aijo chacochacoanicuana huoojeajji poani. Eseya ca Eyacuiñajjija'yo poani ojaya'yo. Jamajjeya Quitohua jaahuanacapoquiani ojjaña joya ojo jjashahuabapajeaqui'yoajja poanicuana, joya e'ejojonei ma quijje ohua queapame quiacajejo queabihui jjaishoaquipoquianitiicuana.

Oja esohuijo queaca'atii ba'ecapoquijji tehuecapoa

^7-8 Eyacuiñajjija esohui yahuajonei etehue jaa Edojjoshahuapame jama poani ba'a: “Jiquio jjeya eya Eyacuiñajjiya huohuimeecani esohui shajja-ajjaje jjabaquimajje a'a quiana oe shajjama' jayojja pojji majoya. A'a queamimishica'a pojji ma ecua yahuajonei israelita queahuisocuana ecuea esohuijo jjashajja-ajjaquisapo-ajjanei pocapoa jama pea-aiya. Ecue quia esohui ecuea eajeyo'yojji pojjeama poso jjashahuabaquimajje macuaaya eya niñebacapoa se-ejjama' meshijabojo aniya.

⁹ Ma meshijotii aniya miquianaja etiiquiaa ecue jaahuanajjima poso jjabaquimajje niñebacapoa eya, jamatii eyaya 40 shequiajahuisome jaahuanapoquiapoa cuana.

¹⁰ Majoya jama queahuisocuana queaquehuanee jjaniñebaquiani bamajje eya queaquenenee poa ma yahuajonei ba'ecapoa etiiquiananijje. Eya jama poa macuanajo yahuajonei ba'a: ‘Jiquio ba'ecacuanaja ejjashahuabaquijji queaquehuanee nequipoquianitii oja sapajo. Ecuea ejjashahuabaquijjicuana queapame ca basapo-ajjanei ba'ecapoquiani cuana’ jamaya eya poa.

¹¹ Jamajjeya eyaya queaqueneneeya huohuiapoa cuana ecue quia meshiyasijje queabihuinee eba'epoquijji cuamaya nobiquijjimatii pomeeje ojjaña macuana.” Jamaya Eyacuiñajji poa eseja etiiquianacuanajo.

¹² Ecue dohuecuana jjo'icuana, jjabaneiquicue quiana oe queaquehuanee ejjashahuabaqui'yo poanijje oja esohuijo queamimishica'a epo'yo poanijje. Jama po'yomajje quiana ca quea-Eyacuiñajjihuesha ba'epoquije o'oya. Oya eshetii nequipoquiani.

¹³ Ojjaña pojjajo miquianaja meshijo ba'eca Jesosaja epeejjicuana esohui o queaja'a ba'epoquijjijo apoquiacue quiaa. Oya jayojja miquiana ojaya apea-aicajji cuanaja. Jamaya miquianaja jiquio meshijo eshe ba'eya acapoquijji cuana mimishi miquianaja eyamijo nequiya edasiacapoqui poanijje. Mimishijo jama jjapomeequi'yomajje shajjama'nei jayojja poaje'yo quiana.

¹⁴ Bacue, eseya Quitonijjetii nequipoquiani ojaya'yo poani oe jjabaquipoquicue. Jama ojaya'yo poani jjabaquimajje eseya queaca'atii ba'epoquije jama manoje'yo se. Ma ecua se jjashahuabaqui'yojeahua e'ejojonei poanaje, jama pea-aiya se queaca'a ba'ecapoquijjitii.

¹⁵ Eyacuiñajjija esohui yahuajonei etehue jaa jama poani ba'a: “Jiquio jjeya eya Eyacuiñajjiya huohuimeecani esohui shajja-ajjaje jjabaquimajje a'a quiana oe shajjama'nei jayojja pojji majoya. A'a queamimishica'a pojji ma ecua yahuajonei israelita queahuisocuana ecuea esohuijo jjashajja-ajjaquisapo-ajjanei pocapoa jama pea-aiya.”

¹⁶ ¿Ache dejjacuana, eponacuana pea-ai shajjama'nei jayojja pocapoa yahuajonei Eyacuiñajjija esohui shajja-ajjamajje? Ma Moisesya cuayameesahuaquica'yapoacuana, Egipto meshijo queashequiajahuiso ba'ecapoacuanaya shajjama'nei jayojja pocapoa.

¹⁷ ¿Ache dejjacuananijje, eponacuananijje pea-ai Eyacuiñajji queaquenetii nequipoquiapoa 40 shequiajame huiso? Ma queamimishi pocapoquiapoacuananijje queaquenetii poa. Macuanaya manocapoqui'yapoa se-ejjama' meshijotii ba'e.

¹⁸ ¿Ache dejjacuana, eponacuana pea-ai Eyacuiñajjiya queaca'aneetii poaniya huohuicapoa oja quia meshiyasijje ejomishocajji queabihuinee eba'epoquijji nobiquijjimatii pomeecaje? Ma oja esohuijo jjashajja-ajjaquiajjaneipoacuanaya.

¹⁹ Majoya eseya jjabahuejjaquicajji. Eyacuiñajjija esohuijo jjashahuabaqui'yoajjapoajjejojoya ojjaña macuanaya nobiquijjimatii pocapoa oja quia queabihui eba'epoquijji meshiyasijje.