HEBREOS 11 - Ese Ejja New Testament

Eyacuiñajjija esohuijo e'ejojonei jjashahuabaquica'yojji

¹ Eyacuiñajjiija esohuijo e'ejojonei jjashahuabaquipoquimajje esejaya ebanei poani ma Eyacuiñajjiya huohuicanaje huisotii eseya quiacaje quijje. Ma jjeshejjijoya eseya queabihui jjaishoaquipoquianitii. Ma ohua huohuicanaje esohui queahuiso esejaya bajjima so'o eseja ecojjaja, jamatii eseya jjashahuabaquipoquianitii oja esohui e'ejojonei poani.

² Ma yahuajonei ba'ecapoacuana e'ejojonei Eyacuiñajjija esohuijo jjashahuabaquipoquiapoa, jamajjeya Eyacuiñajjiya queabihuiya bacapoa macuana.

³ Eyacuiñajjija esohuijo e'ejojonei jjashahuabaquipoquimajje eseyaya banaje Eyacuiñajjiya meshi panacapoa oja esohuijotii, mahuisojotiiya. Jamajojoya aje ojjaña aquianacuana jiquio jjeya eseya baña huisotii eseja ecojjaa, ohuaya panacapoa yahuajoneinei ma jjabameequiajja poacuanajo.

⁴ Abelya Eyacuiñajjija esohuijo e'ejojonei jjashahuabaquipoquimajje ehuone enaa jehui'yo quiacapoa. Eyacuiñajjiya oja quia queapame bacapoa ma ecua ohuaya oja o'ija Cainja quia queapame pojjeama bacapoa jama pojjeama. Oya jama jjashahuabaquime poani oja esohuijo bamajje Eyacuiñajjiya Abel oja mimishima'yo bacapoa. Jamatii oya emano'yo eseyaya shahuabapoquiañatii oya e'ejojonei jjashahuabaquipoquiapoa Eyacuiñajjija esohuijo.

⁵ Enoc Eyacuiñajjija esohuijo e'ejojonei jjashahuabaquipoquiapoajojoya Eyacuiñajjiya oya dojosohuaquica'yapoa Eyahuasijje eshetii nequi mano'yojjima. Oya sa-ajjaca'yapoa cuaa jamatii ba'yojjima poa cuanaja Eyacuiñajjiya oya yamiñatii dojosohuaquica'yapoajojoya. Jamajjeya oya jiquio meshijo chama' poa. Eyacuiñajjija esohui jama poani ojo ba'a: “Oja dojosohuaqui'yojjimahua Eyacuiñajjiya queabihuiya Enoc bacapoquiapoa.”

⁶ Bacue, ese e'ejojonei oja esohuijo mijjashahuabaquipoquiajo Eyacuiñajji queabihui po-ajja esejo. Jamajjeya se Eyacuiñajjijo ejjanequichipiquijji onijje ejjapeequipoquijji. Ebionei jjashahuabaquicajji ojo oya e'ejojonei enequi. Ojjaña joya oque jjanequichipiquisapoanicuanajo Eyacuiñajji queaja'a jjabameequije. Ohuaya ojjaña macuanaya queabihui ba'emeesahuacapoquije.

⁷ Noeya Eyacuiñajjija esohuijo e'ejojonei jjashahuabaquipoquimajje ma Eyacuiñajjiya o huohuicapoa esohui ma quijje acajejo ohuaya shajja-ajjacapoa jamatii oja ecojjaja bajjimajotii. Ma Eyacuiñajjija ehuohuijoya ohuaya bishe'ai quecuacapoa oja huapa pojjeamacuana anijji jamatii ena queaquemonee oja oquemeejjimahuajo. Noé oja esohuijo e'ejojonei jjashahuabaquipoquiani bamajje Eyacuiñajjiya oja mimishima'yo oya bacapoa. Eyacuiñajjija esohuijo Noé e'ejojonei jjashahuabaquipoquiani bamajje queahuisoneecuana shajjama' jayojja poani jjabaquicapoa. Jamajjeya majoya ojjañacuana hui'ijeaca'yapoa.

⁸ Abraham Eyacuiñajjija esohuijo e'ejojonei jjashahuabaquipoquimajje jjashajja-ajjaquiapoa epoqui'yojji pea meshiyasijje ma Eyacuiñajjiya o quiacajeyasijje ohua cuamaya epoqui'yojji huohuicajje. Jamajjeya Abraham oja meshijo nequi jamatii poqui'yapoa oja bajjimajotii achacua shai, ache meshiyasijje oya poquije'yo.

⁹ Eyacuiñajjija esohuijo e'ejojonei jjashahuabaquipoquianitii Abraham ma Eyacuiñajjija quia meshijo ba'epoquiapoa jaajji pea jama. Oya daquiequi esoco ejjequiquinijo ba'epoquiapoa. Oja bacuaejja Isaac, oja osecua Jacob pea-ai oya jayojja ba'epoquiapoa daquiequi ejjequiquinijo jamatii Eyacuiñajjiya oya esohuiya oja bacua, oja osecua pea-ai huohuicapoa meshi ohuaya quiacaje.

¹⁰ Ma oja quia meshijotii nequi Abraham jjashahuabaquiapoa pea meshijo eba'epoqui'yojji ma Eyacuiñajjiya queapamenee acanajejo. Ma meshijoya ba'etiitiipoquije'yo.

¹¹ Majoya quijje Abraham e'ejojonei jjashahuabaquitiipoquiapoa Eyacuiñajjija esohuijo jamatii oja huanase Sara jjamejoquiajjatii ani ponatiipoquiapoa. Jamajjeya Abraham jama poani bamajje Eyacuiñajjiya oya ebacua jeameecapoa oja huanasejo jamatii oya edejjatiinojinoji nequi. Abraham jjashahuabaquipoquiapoa Eyacuiñajjiya ma o ohua huohuicapoa esohui huisotii ajeyocaje ojo.

¹² Jamatii etiinojinoji nequi ejjabacuajeaquijji Abrahamya ebacua jeacapoa. Majoya quijje oja osecuacuana queahuisoneenee pocapoa joya ecua majametacuana eyajo nequica huisoajjaya joya ecua meshijajisisi bisonei anica jamaya mahuisoya pocapoa cuana, yajja sicome yajji queahuisoneeneejojoya.

¹³ Bacue, ojjaña ma ebionei Eyacuiñajjija esohuijo e'ejojonei jjashahuabaquipoquiapoacuana manocapoqui'yapoa jamatii ma o ohua huohuicapoa huisotii jjeshejeyopojjima'tii ba'e. Macuanaya queabihui jjaishoaquipoquiapoa quijje ma ohua quiacaje ejjeshejeyojjijo. E'ejojonei Eyacuiñajjiya maya quiacaje quijje ma oja esohuijoya jjashahuabaquipoquiapoa cuana. Jamajjeya ojjaña macuanaya jjabaquipoquiapoa jiquio meshijotii eba'epoquijjitii pojjeama, jaajji pea jayojja ba'epoquiapoa jiquio meshijo.

¹⁴ Ojjaña joya jama jjashahuabaquime poanicuana pea meshijo queabihui eba'epoqui'yojjijo jjaishoaquipoquiani quijje cuamaya epoqui'yojji. Jamaya macuanaya jjabameequiani peacuanajo.

¹⁵ Jiquio meshijotii ma o ebionei ba'yapoa meshijo jjashahuabatiiquipoquiapoajjemo macuana huacuaya poqui'yoquiae oja meshiyasijjetii.

¹⁶ Chojja, pea meshi queapamenee Eyahuasijje quijje cuama epoqui'yojjijo ca jjashahuabaquipoquiapoa cuana. Jamajjeya Eyacuiñajji queabihui jama poa ba'a: “Eya oja Eyacuiñajji poani.” Majoya Eyacuiñajjiya quijje macuana ani'yojjiya Eyahuasijje apoa acapoa.

^17-18 Majoya quijje Abrahamya Eyacuiñajjija esohuijo e'ejojonei jjashahuabaquitiipoquimajje oja bacuaejja oenei Isaac quiacapoa ma ecua ehuone enaa jehui'yo Eyacuiñajji quiacapoquiapoa cuaa jamaya. A'a oya Eyacuiñajjiija esohuijo jjashajja-ajjaquije ebajji huohuiajjacajje Abrahamya oja bacua quiacapoa jamatii Eyacuiñajjiya Abraham huohuicapoa coma ebacuaejjajo oya quea-osecuahuisonee poaje quijje. Oya jama poa ba'a: “Abraham miya quea-osecuahuisonee poaje Isaacjo.” Abrahamaya jamatii ma oja huohuijotiiya oja bacuaejja quiacapoa.

¹⁹ Abraham jjashahuabaquipoquiapoa Eyacuiñajjijo oya queaca'aneetii nequiani emano'yo jaacuana shequimee'yojji. Jamajjeya ohuaya oja bacuaejja enaa jehui'yojji nisho a-ajjacapoa Eyacuiñajji quiajji. Emano'yo jayojja jaa oya bacapoa. Majoya Eyacuiñajjiya Abraham oja bacuaejja quiaca'yapoa nahuemajje.

²⁰ Oya jayojja pea-ai Isaacya Eyacuiñajjija esohuijo e'ejojonei jjashahuabaquipoquimajje oja bacuaejja Jacob, Esaú pea-ai esohui huohuicapoa Eyacuiñajjija o queapame pomeejjijo quijje.

²¹ Majoya quijje Jacobya beshahuanei manopoqui'yaniya Eyacuiñajjija esohuijo jjashahuabaquipoquimajje esohui huohuicapoa Joseja bacuacuana oja osecuacuana Eyacuiñajjija o queapame pomeejjijo quijje. Ohuaya oja ejjaquecuaca'aquijjijo jjaquecuaca'aquinequiya Eyacuiñajji bihuiacapoa.

²² Majoya quijje Joseya manopoqui'yaniya Eyacuiñajjiija esohuijo e'ejojonei jjashahuabaquipoquimajje huohuicapoa israelitacuana Egiptomeshijo ba'eca quijje cuayaquicaje'yo pea meshiyasijje epoqui'yojji. Ohuaya eshe nequiahua huohuipea-aicapoa cuana oja sa' Egipto meshijo jaa oja meshiyasijje quijje edojo'yojjijo.

²³ Majoya quijje Moisesja chiiya oja nae pea-aiya Eyacuiñajjija esohuijo e'ejojonei jjashahuabaquipoquimajje oja bacua Moisés cuayajo huanaquehuacapoa tres ba'ime huiso. Egipto emeshimese etiija esohui ebacuasho'i cuia'yojjijo jjashajja-ajjaquiajja poani jjabaquimajje meteama poa. Oja bacua queabamenee jaa bacapoa.

²⁴ Quijje Moisés Eyacuiñajjija esohuijo e'ejojonei jjashahuabaquipoquimajje Egiptocuiñajjicuanaja etii epojji oya cajaa poa. Oya tiimajje Egipto emeshimeseja osecua poani jjabameequisapo-ajjapoa ojjañajo.

²⁵ Oya ca jjabaquiapoa Eyacuiñajjija babaca israelitacuananijje enequipoquijji jamatii Egiptocuiñajjicuaa queacamajanee pomeecapoquiapoa. Egiptoja etii poani queamimishi epojjijo ca Moisés jjashahuabaquisapo-ajjanei poa. Egiptoja etii poani oja mimishijo queabihui jayojja pocuajiani jjabaquimajje oya etii epojji cajaa poa.

²⁶ Moisés jjabaquiapoa queapame Quitojo queanee ejjapomeequijjijo. Oya Egipto meshijo ani aquianacuana queahuiso jjeshejjijo ca queapamepishana jjabaquiapoa. Oya caca jjashahuabaquipoquiapoa ma quijje Eyacuiñajjiya quiacajecuanajo, Egipto meshijo aquiana queasosehuiso anicacuanajo pojjeama.

²⁷ Moisés Eyacuiñajjija esohuijo e'ejojonei jjashahuabaquitiipoquimajje Egipto meshijo nequi poqui'yapoa meteama jamatii Egipto emeshimese queaquenenee nequijo. Oya queaca'atii nequipoquiapoa Eyacuiñajjijo jjashahuabaquipoquimajje jamatii ojaya ecojjaja bajjimajo.

²⁸ Majoya quijje Moisesya e'ejojonei jjashahuabaquipoquianiya Eyacuiñajjija huohui esohui shajja-ajjacapoa. Jamajjeya ohuaya huohuicapoa israelitacuana ovejaja bacuaejjaja enaa jehui'yoja enaja esecuejjani cuiapepajjijo Eyacuiñajjija huoojea ángel oja equiyasijje enobiqui poanijje, majo ba'ecaja oja bacuaejja cojjasobo cuia'yojjima yajji.

²⁹ Majoya quijje israelitacuana Eyacuiñajjija esohuijo e'ejojonei jjashahuabaquipoquimajje bae-ai Huo'o bajjani yiyesamanei anijje jjayejjequicapoa Eyacuiñajjija jocamee meshi ejeojji jayojja queaca'ajje. Majoya quijjepishana Egipto soldadocuana oya jayojja ejjayejjequijji nisho poquiajjacapoa oya ejeojjijjeya. Majoya ojjañatii hui'ijeaca'yapoa bae-ai Huo'ojo, israelitacuana bañaquijjimatii.

³⁰ Yahuajonei israelitacuana Eyacuiñajjija esohuijo jjashahuabaquipoquiani Jericó bajjani meshi mei epeei nequisahuajje ojee jjanequiyiyoqui poquinequiapoa siete cahuime huiso. Israelitacuana jama jjashahuabaquime poani oja esohuijo bamajje Eyacuiñajjiya mei epeei quea-aonee nequi oquecuajimeequica'yapoa.

³¹ Rahab epona peacojjojji poa bejjo sosejje. Eyacuiñajjija esohuijo e'ejojonei jjashahuabaquimajje ohuaya Israel dejja etiicuanaja huoojeacuana oja meshi jaadojohua poe jjequinobiacajjequiapoa queapame soldadocuaa oya ebaca poanijje. Jamajjeya oya onijjejaajjicuana shajjama' jayojja poacuananijje mano'yojjima poa.

³² ¿Yajja acuae quiana eyaya huohuije? Chama' queahuiso epojja poaje miquianaque tehuejeyojji Gedeonjo, Baracjo, Sansonjo, Jeftejo, Davidjo, Samueljo, ma pea Eyacuiñajjija esohuihuohuijji poacuanajo pea-ai.

³³ Ma dejja becacuaaya Eyacuiñajjija esohuijo e'ejojonei jjashahuabaquipoquianiya peajaajjinijje jjaquecuaquimajje meshi jjesheca'yapoa. Peacuaa oja esohuijo e'ejojonei jjashahuabaquipoquianiya ca queapamenee acapoquiapoa cuana Eyacuiñajjija esohuijo. Peacuaa ca ma Eyacuiñajjiya o huohuicapoa huisotii quiacaje jjeshecapoa. Peacuana ca Eyacuiñajjija esohuijo jjashahuabaquipoquiani bamajje Eyacuiñajjiya docuei ibia' ijjiameejjima acapoa.

³⁴ Ma dejjacuanaya becacuana oja esohuijo e'ejojonei jjashahuabaquipoquiani cuaqui queajijinee poequijo quiyo'yojjima poa, peacuana ca poquiquehuajeananapoa onaa baase'becaa ejajaca'yo poanijje. Peacuana ca'a-ama poani bamajje Eyacuiñajjiya queaca'a pomeecapoa peanijje ejjaquecuaquijji. Eyacuiñajjija esohuijo e'ejojonei jjashahuabaquipoquianiya peajaajji soldadocuana quecuaca'yapoa cuaa ma o botiamanei ajji poacuanaya.

³⁵ Beca eponacuana oja esohuijo e'ejojonei jjashahuabaquipoquiani bamajje Eyacuiñajjiya oja huapa pojjeamacuana emano'yo jaa shequimeeca'yapoa. Peacuana ca oja esohui cajaa apojjima'nei nequi manoca'yapoa Eyacuiñajjija esohuijo jjashahuabaquipoquianitii dejjamasecuaa quecuaca'yajje. Macuanaya jjashahuabaquipoquiapoa pea meshi Eyahuasijje anijo queapameneeneeyasijje epoqui'yojji quijje shequi'yomajje.

³⁶ Peacuana ca oja esohuijo e'ejojonei jjashahuabaquipoquianitii niñebacapoa cuaa, peacuana ca cuiasejjajeacapoa jjonohua. Peacuana ca jeyocapoa dejjamasecuaa cadenaa ejeanobiameejji.

³⁷ Peacuana ca oja esohuijo e'ejojonei jjashahuabaquipoquianitii jajahuejjajeaca'yapoa dejjamasecuaa meiya. Peacuana ca jajate'ajeaca'yapoa cuaa, jajaca'yapoa cuaa pea-aiya baa queashejjiya. Ma dejjacuana eponacuana pea-ai queacamajanee ba'e poaequinequiapoa quima' aema'nei. Ehuoneja jee huoshocapoquiapoa. Queahuisocuaa macuana peajja jayojja bacapoa, queaneenee pomeecapoa.

³⁸ Ma dejjacuana eponacuana pea-ai botiamanei acapoa cuaa, jamajjeya aje queahuesha huoojeaca'yapoa se-ejjama' meshiyasijje. Cuamaya ba'ecapoquiapoa cuana jjanihuejjajo, eyiyoquibohuejjajo pea-ai. Eyacuiñajjiya bacapoa macuanaya queapamenee poani onijje eba'etiitii'yojji, jiquio meshijo dejjamimishicuananijjetii pojjeama.

³⁹ Ojjaña jiquio eya tehueañacuanaja ojaya jjeshejeyojjima poa eshe nequiahuaja ma Eyacuiñajjiya o huohuicapoa huisotii quiacaje quijje. Jamatii Eyacuiñajjiya queabihuineeya ojjaña macuana e'ejojonei oja esohuijo ejjashahuabaquipoqui bacapoa.

⁴⁰ Eyacuiñajjija ejjashahuabaquijji ma quijje ohua quiacaje queapamenee poani jamatii jjeshejeyojjima poa cuanaja, esejaya pea-ai. Ojaya ejjashahuabaquijji queapamenee eseya macuananijjetii ojee queapamenee apea-aicaje quijje Eyacuiñajjiya oja nahue'yo apoa epo ojaya'yo bacaje.