HEBREOS 10 - Ese Ejja New Testament

Ma Moisesja tehue jayojja ehuone equia onaja mimishi cuijea'yoajja poa

¹ Ma ebionei esohui Eyacuiñajjija quia Moisesja etehueya bameecapoa cuana pea esohui eyacua yajja ohuaya queapamenee acaje quijje. Jamajjeya ma ebionei oja esohui Moisesja tehuecuana quiacapoa dejjacuanaja eponacuanaja mimishi cuijea'yojji epojji pojjeama. Oja ebionei tehue esohui jama poa ojjaña shequiajajo ehuonecuanaja na' quiacapoquijji. Jamatii ehuoneja ena' oja mimishi cuijea'yoajja poa ma queaboejea oja mimishima'yo jjabaquisapoacuanaja Eyacuiñajji bihuiajji.

² Bacue, Moisesja tehue jayojja ehuoneja ena' oja quiaa onaja mimishicuana cuijeajeyoca'yapoajojjemo quiamajamajajjima acaquiae cuaa oe quiame acaquiae cuaa oja mimishima'yo poani ejjabaquijji.

³ Ma ohua ojjaña shequiajajo quiacapoquiapoa ehuoneja enajo jjabaquicapoquiapoa cuana oya mimishijjitii poani. Ma enajoya mimishijjitii jjabaquicapoquiapoa cuana.

⁴ Bacue, ehuone ovejaja ena', macayahueja pea-ai mimishicuana cuijea'yoajja.

⁵ Jamajojoya aje yahuajo Quito jiquio meshiyasijje epoe nequi Eyacuiñajjinijje jama poa ba'a: “Miya jjeya ehuone enaa jehui'yo, esejja'yo iyehuiso pea-ai quiacaje cuaa bamajamajasapo'yoajja poani. Onaa quiacani jama cajaa anaje miyaya eya yamijji pomeenajejojoya.

⁶ Ehuoneja yami equiyotehuejeamee ohua quiacajje miya queabihui pojjeama'yo poani. Ehuone enaa jehui'yo quiacaje onaja mimishijo miya basapo'yoajja poani.

⁷ Majoya eya Eyacuiñajjinijje jama popea-aiapoa ba'a: ‘Quioya eya epoe miquea ejjashahuabaquijjicuana ajeyojji poani. Jamaya eya poaje miquea esohuijo’ tehuecapoa cuaa yahuajonei.”

⁸ Jiquio esohui jama poani jjeya Eyacuiñajji ehuone enaa jehui'yo dejjacuanaja mimishicuanajo, oja sejja'yo iyehuiso equia, eyami equiyotehuejeamee pea-ai basapo'yoajja. Oya majo queabihui pojjeama'yo, cajaa acani jamatii yahuajonei Moisesja etehuecuanajo jamaya acapoquijji Eyacuiñajjiya ebionei huohuicapoa.

⁹ Quito jama popea-aiapoa Eyacuiñajjinijje ba'a: “Quioya eya epoe miquea ejjashahuabaquijjicuana ajeyojji poani” jamaya poa. Oja esohui jama poanijje ehuone enaa jehui'yo onaja mimishijo quiamajamajaca-ajja, mahuisotii. Eyacuiñajjiya Quito ojjaña esejo emano'yojji huoojeacapoa bacajji seja.

¹⁰ Jjeya eseya eseja mimishima'yo Eyacuiñajjiya bacani ojaya'yo Jesosa Quito oja esohuijo jjashajja-ajjaquijji poajojoya. Ohuaya oja yami oenei quiame acapoa emano'yojji eseja mimishijo. Jamajjeya oya emanobeca'yojji pojjeamatii poaje.

¹¹ Judío dejja ma Eyacuiñajjija equi-aijo chacochacopoquianicuaa ojjaña pojjajo oya echacojjitiiya acapoquiani. Ehuone enaa jehui'yo quiacapoquianitii onaja mimishicuanajo Eyacuiñajjija ebajji. Jamatii ehuoneja ena' mimishi cuijea'yoajja poani.

¹² Jesosa Quito caca oenei jjaquiaquime poa emano'yojji ojjañacuanaja mimishicuanajo. Oya emanobeca'yojji pojjeamatii poaje. Majoya oya shequi'yomajje Eyacuiñajjija ebañeimijijje aniñaqui'yonaje.

¹³ Jjeya pea-ai oya majotii jjaishoaquipoquiani acheshono Eyacuiñajjiya ojjaña joya o sapo-ajjaneitii poanajecuana queahueshanee huoojeacaje'yo bajji chama'yo acaje bajji.

¹⁴ E'e, Jesosa Quito oenei jjaquiaquime poa emano'yojji ojjañacuanaja mimishijo. Jamajjeya ojjaña joya Eyacuiñajjija'yo poanicuana oja mimishicuanama'yotii pomeecanaje Quitohua o mano'yapoa sosejje.

^15-16 Edojjoshahuapameya oya esohui pea-aiya acani. Oya jama poani yahuajonei tehuecapoa ba'a: “Quijje pea esohui Eyacuiñajjija'yo epojji eyacua eyaya quiaje.” Majoya esohui eyacua ojaya'yo epojji quiacajo Emeshimesenei jama poa ba'a: “Ecuea esohui eyacua huanameeje queahuisocuanaja eyamiquipahuasijje, oja sapadojjohuasijje pea-ai.

¹⁷ Macuanajaya oja mimishicuana, ma ohua queatainee acanaje pea-ai eyaya pajeaje'yo, ecuea eshahuababeca'yojji pojjeamatii poaje” jamaya poa.

¹⁸ Jamajjeya Eyacuiñajjiya oja mimishicuana cuijeaca'yajo, chama'yo acajo, ¿ajeo ehuonecuana enaa jehui'yo quiamajamajaca'yojji oja mimishi cuijeapoquiajji sosejje? Ajeopishana, apoa aca'yonaje.

¹⁹ Ecue dohuecuana jjo'icuana, jamajjeya eseya ejjanequichipiqui Eyacuiñajjijo, enobiqui o aniyasijje o anijji equi quecuayijjidojjohuasijje onijje emimijji meteama Jesosaja enajo.

²⁰ Yahuajonei Eyacuiñajji aniyasijje nobiquica-ajjanei poa cuana. Oja equi-aijo o anijji equecuayijjijo daqui queaquemo ba'yapoa cuama ona enobiqui poanijje. Jesosa eseja mimishijo jjaquiaquimajje oya esecuejjani eyacua jayojja nequipoquianitii Eyacuiñajji aniyasijje ese nobimeequijji poani.

²¹ Jesosa ca Eyacuiñajjinijje emimipoquijji ebionei etii poani Eyacuiñajjiija equi-ai Eyajo anijo. Ojjaña esecuanajo Eyacuiñajjinijje oya mimipoquianitii.

²² Jesosa Eyacuiñajjinijje mimipoquianitii esejo bamajje Eyacuiñajjique ejjanequichipiqui e'ejojonei, siajje pojjeama. Oja esohuijo queaja'atii jjashahuabaquipoquicue. Eseya mimishima'yo poani jjabaquiani eseja sapajo. Jjeya eseya queaboejea jayojja ba'e'yo eseja mimishima'yo ena queapameneejo besa jama.

²³ Eyacuiñajjija esohuijo queaja'atii jjashahuabaquipoquiani queabihui oe jjaishoaquipoquicue ma Eyacuiñajjiya ese huohuicanaje huisotii esohuijo quijje maya ajeyocaje'yo. A'a ojaya eajeyo'yojji pojjeama poso ajji.

²⁴ Pea Jesosaja epeejjicuana miquiananijje ba'eca huohuineicue oja peacuana queajea eapoquiajji, ojaya pea Jesosaja epeejji easahuapoquiajji pea-ai. Jamaya se queaja'a ba'ecapoquijji.

²⁵ A'a oe esohuijo jjachichapajeaqui'yojji. Ma ecua pea Jesosaja epeejjicuana po'yonaje jama oe a'a popea-ai'yojji quiana. Esejaya ca oe pea esenijje Jesosaja epeejjicuana huohuicapoquijjitii o queaca'a ba'epoquijji Eyacuiñajjija esohuijo. Jamaya se pocajji Emeshimesenei poeo'oyajji epojja poechipi'yanijojoya.

Jesosaja epeejjicuanaja Jesosa cajaa aca'yoajja

²⁶ Esejaya ebatii poani Eyacuiñajjija esohui e'ejojonei poani. Majoya ebajotii eseya queamimishineetii ba'epoquianijo chama'nei pea poaje equiajji eseja mimishicuana cuijea'yojji sosejje.

²⁷ Jama queamimishitii ba'eme pomajje queametenee jjabaquipoquije acheshono Eyacuiñajjiya eseya queaneenee pomeecaje'yo Cuaqui-ai jijiquitiiyasijje eseja mimishijo. Ojjaña ma o cajaa ajjitii poanajecuana majotii nequicaje'yo.

²⁸ Bacue, Eyacuiñajjija quia Moisesja tehue esohuicuanajo dejja jjashajja-ajjaquiajja poajo, o shajjama' jayojja poani bajji poanajecuaa, tres dejjacuaa huohuicaje coma dejja manomeeca'yojji oja mimishijo yenoamaa.

²⁹ Jjeya ca becacuana ojaya ebajotiiya jamatii queamimishitii ba'epoquiani jama oya sapomajje. Macuanaya Eyacuiñajjija Bacuaejja peajja jayojja ajji poani. Eyacuiñajjija Edojjoshahuapame niñebapea-aicani macuaaya, peajja jayojja acani ese queapamenee apoquiajji poani Edojjoshahuapame. Ojjaña joya ojo jama jjaniñebaquime poanicuana Eyacuiñajjiya queaneenee pomeecaje'yo ma ecua Moisesja tehuejo shajjama' jayojja poacuana jama pojjeama Jesosaja enaa macuanaja mimishi cuijeaca'yonajejojoya. Oya enaaya Eyacuiñajjija esohui queaca'a pomeecanaje ma ohua quiacapoa ojaya'yo epojji esohuiya.

³⁰ Esejaya eba Eyacuiñajjija esohui yahuajonei etehue jaajo Emeshimesenei jama poani ba'a: “Eya ca iña ojjaña joya queamimishi poanajecuana queaneenee pomee'yojji poaje. Oja mimishi sosejje eyaya oya queaneenee pomeeje'yo.” Emeshimesenei jama pea-ai poani ba'a: “Ecuea'yo poanicuanaja ojaya eba'ejji eyaya huohuije'yo.”

³¹ Queameteneenee pocajji cuana joya Eyacuiñajji eshetii ani cojjaneijo nequije oja mimishijjitii.

³² Jjashahuabaquicue quiana yahuajopishana queacamajanee ba'enaje oja esohuijo jjashahuabaqui'yojeahua. Onaa queacamajaneetii pomeecani quiana jjabaquimajje jamatii queaca'atii nequipoquinaje oja esohuijo o cajaa ajjima'nei.

³³ Beca quiana oja esohuijo jjashahuabaqui'yojeahua queatainee niñebame acanaje queaneenee pea-ai pomeecanaje quiana cuaa ona ejjachichaqui anicajo, jamatii queaca'atii nequinaje quiana. Majoya pea pojjajo peacuana queacamajanee apea-aicajo miquiana onijje nequinaje o yenoama pomee'yojji.

³⁴ Miquiaaya macuanajo queayenonee pomajje joya Eyacuiñajjija esohuijo ejeanobia anicacuana asahuanaje. Miquianaja aquianacuana onaa jjeshejeaca'yajo yenoama poanaje, nahuejjimanei jjeshemee'yome quiaa anaje. Miquianaya ca jjashahuabaquinaje ma quijje Eyacuiñajjiya queapame quiacajejo Eyahuasijje. Maya queapamenee anitiitiije, oe po-ajjanei.

³⁵ Jamajjeya a'a queamete ba'epoquijji joya miquiana queacamajanee pomeejji poanicuanajo. Eyacuiñajjija esohuijo oe queaca'atii ba'epoquicue. Majoya quiaa jama pomajje Eyacuiñajjija quia queahuiso jjesheje Eyahuasijje miquiana queapame ba'epoquinaje sosejje.

³⁶ Jamatii onaa queacamajaneetii acani Eyacuiñajjija esohuijo jjabaquimajje queaca'atii ba'ecapoquijji hueyahueyacuajijjima, esohui cajaa ajjima'nei. Eyacuiñajjija esohuijo jjashajja-ajjaquipoquicue. Jama pomajjeya Eyacuiñajjija quia queapame jjesheje Eyahuasijje quijje ma ohua quiana huohuicanaje huisotiiya.

³⁷ Oja esohui etehue jaa jama poani ba'a: “Jjeyahuanei poeje o'oya ma yahuajo o poeo'oyajjijo huohuijji poaya. Shonoshonojjimanei poeje oya.

³⁸ Joya Eyacuiñajjiya bacani ojaya'yocuana queapame ba'epoquije oja esohuijotii jjashahuabaquipoquiani. Joya huacuaya po'yanicuana eoquequi'yo, o cajaa a'yojji poanicuanaya ca Eyacuiñajjiya queayenoneeya bacani.”

³⁹ Eseya ca joya ecua peacuana huacuaya oquequi'yani o cajaa a'yojji poani jama pea-ai pojjeama poani. Macuana ca queaneenee pocaje'yo oja mimishijo quijje. Eseya e'ejojonei Jesosajo jjashahuabaqui'yomajje oja nahue'yo poani.