HEBREOS 1 - Ese Ejja New Testament

¹ Yahuajoneinei Eyacuiñajjiya oja ejjashahuabaquijjicuana oja sohuihuohuijji poa dejjacuana bameecapoquiapoa queahuiso esohuicuana. Maya ma esohuicuanaya eseja etiiquiana queashequiajahuiso huohuimajamajacapoquiapoa oja esohuihuohuijji poa dejjacuaa.

² Jjeya ca Eyacuiñajjiya oja Bacuaejjajo Quitojoya oja ejjashahuabaquijjicuana queaja'a huohuicani eseja queaja'a bajji. Eyacuiñajjiya ojee oja Bacuaejjanijje nequiya ojjañajaajjicuana ba'ejji meshi queaquemo panacapoa. Jamajjeya ojjaña oja panacuana meshijo ani, eyatahuatahuajo nequi pea-ai Quitojatiiya poaje quijje huohuicapoa Eyacuiñajjiya.

³ Oja Bacuaejja jjabameequipoquianitii esejo oya Eyacuiñajji jayojja pea-aiya queaca'aneetii nequipoquiani. Oya queapameneetii queasajajanee pea-ai popoquiani. Ohuaya oja esohui queaca'aneejo ojjaña oja panacuana eyatahuatahuajo nequi jiquio meshijo ani pea-ai queapame nequimeecapoquiani, oyatii pojjeama. Ojjaña eseja mimishicuanajo oya mano'yapoa Eyacuiñajjija ese mimishi cuijea'yojjijo. Jama apoa ajeyomajje oya anioque'yapoa joya queaca'aneetii poanija ebañeimijijje Eyahuasijje.

⁴ Eyacuiñajjiya oja Bacuaejja queaca'aneetii nequimeecapoquiani eojjañacuanamese epopoquijjitii. Eyacuiñajjiya oja angelcuana iyeca'a epojji nequimeecani. Oja Bacuaejja ca queaca'aneetii nequimeecapoquiani oja Bacuaejja poanijojoya.

⁵ Bacue, Eyacuiñajji jama pojjima'nei poa oe angelnijje ba'a: “Miya ecue Bacuaejja, e'ejojonei jiquio pojjajo jamaya eyaya miya baña.” Chojja, onijje jama pojjima'nei poa. Jama pojjima'nei pea-ai poa oe angeljo: “Eya oja Chii poaje. Oya ecue bacuaejja poaje.” Chojja, jama pojjima'nei poa oe angeljo.

⁶ Bacue, Eyacuiñajjiya oja Bacuaejja oenei jiquio meshiyasijje ehuoojeajji jama acapoa ojo ba'a: “Ojjaña ecue angelcuaa oya cabihuiacahua.”

⁷ Eyacuiñajji oja angelcuanajo jama poa ba'a: “Angelcuana ejo echacochacopoquijji nequiani. Queahuesha poquicaje beni jama. Queaja'atii nequipoquije angelcuana cuaquijiji jama.”

⁸ Oja Bacuaejja ca Eyacuiñajjiya pea esohui huohuicapoa jama ba'a: “Miya ojjañacuana huoojeapoquiajjitii popoquiani eya jama pea-aiya. Queasapaja'aneetii poaniya mimishima'nei nequiya huoojeapoquiajetii ojjaña joya miquea'yo poanicuana.

⁹ Joya queaja'a queapame poani miquea queajeanee, joya queatai queamimishi ca miquea botiamanei. Jamajjeya eyaya miya babacanaje Emeshimesenei epojji. Miya queabihuineetii nequipoquiani joya ecua pea miquea epeejjicuana jiquio meshijo ba'eca jama pojjeama.”

¹⁰ Eyacuiñajji jama pea-ai poa oja Bacuaejjanijje ba'a: “Yahuajonei miyaya Emeshimesenei nequiya meshi queaquemo eyatahuatahua pea-ai panapoa.

¹¹ Majoya quijje ojjaña mique panacuana oe poaje'yo, eanitiitiipoquijji pojjeama. Miya caca oe nequitiitiipoquije, oe epo'yojjitii pojjeama. Mique panacuana jiquio ecua daqui chiichiipoqui'yani jama pea-aiya poaje'yo ojjañacuana.

¹² Joya ecua dejjacuaa daqui chiichii'yajo iyachichaca'yani ejeajeajji jama pea-aiya miyaya meshi chama'yo aje. Ebionei mique pana meshi chama'yo amajje meshi queapamenee eyacua miquea epanao'oyajji quijje camaja-ama poaje joya ecua dejjacuaa oja cama bebocuajicani jama pea-aiya aje'yo. Miya caca oe miyatii nequipoquije, emano'yojjitii pojjeama.”

¹³ Eyacuiñajji jama pojjima'nei poa oe oja angelnijje jama ba'a: “Anioquecue jiquio e ani ecue bañeimijijje. Miyaya enijjetii aniya ojjañacuana huoojeapoquiaje. Ojjaña joya mi sapo-ajjanei poanajecuana eyaya meshiyasijje iñajeaoqueajeaje” jamaya pojjima'nei poa angelnijje.

¹⁴ Bacue, ojjaña angelcuana yamima' poani Eyacuiñajjijo chacochacopoquiani. Ojjaña joya oja bacuacuana oja nahue'yo poani huisotii asahuaa Eyacuiñajjiya oja angelcuana huoojeacani majoya.