Epesio 6 - Ese Ejja New Testament

¹ Esho'iquiana, miquianaja chiicuanaja esohuijo, miquianaja naecuanaja esohuijo pea-ai oe jjashajja-ajjaquipoquicue Emeshimesenei Jesosa Quitoja'yo poanijjejojoya. Jamaya caca queapame eba'epoquijji.

^2-3 Eyacuiñajjija esohui yahuajonei etehue jaa jama poani ba'a: “Mique chii, mique nae queapame mi huoojeajji poani bapoquiacue. Jama pomajjeya queabihuinee ba'epoquije jiquio meshijo queashequiajahuiso.” Jiquio esohuiya Eyacuiñajjiya yahuajonei Moisés quiacoocapoa ojjaña joya ma esohuijo jjashajja-ajjaquipoquijecuana Eyacuiñajjiya queabihui ba'emeecapoquije.

⁴ Echiimesecuaa, enaesecuaa pea-ai, a'a miquianaja bacuacuana queaquene pomeejji miquianaja esohuijo. Oya oe queapame tiimeepoquiacue. Oya shajjama' jayojja poanijo cuiapishanacue ejjabahuejjaquijji oja mimishijo. Eyacuiñajjija esohui pea-ai oya huohuipoquiacue.

⁵ Joya peajo chacochacoanicuana ejjeshe, mi chacomeejji poanija esohuijo oe jjashajja-ajjaquicue. Mi chacomeejji poani dejja jiquio meshijo nequi queapame poani bacue. Ojo queapame chacochacocue hueya-ama e'ejojonei, siajje pojjeama. Jiquio ecua Quitojo e'ejojonei chacochacoani jama pea-aiya oe ojo chacochacocue queapame.

⁶ Jamatii o queahuesha nequijo, ojaya miquiana bajjimajo pea-ai queapametii chacochacocue. Becacuana jamatii chacochacoani mahuisojotii oja o queapame poani ebajjijo. Ma dejjacuana Eyacuiñajjijo jjashahuabaquiajja. Miquianaya ca Quitojo chacochacopoquiani. Jamajjeya e'ejojonei miquianaja eyamiquipajje mi chacomeejji poanija esohuijo jjashajja-ajjaquicue. Jamaya Eyacuiñajjiya quiana chacomeesa-acani.

⁷ Miquianaja echacojji queabihuiya apoquiacue Emeshimeseneijo chacochacoaniyajjejojoya. Mahuisojonei peacuanaja miquiana hueya-ama poani ebajjijo pojjeama. Emeshimeseneija queabihui miquiana bajjijo pea-ai oe queapame chacochacopoquicue.

⁸ Miquianaja eba, ojjañaja joya ejjeshe peajo chacochacoanija echacojji, joya ojotii chacochacoanija pea-ai Emeshimeseneiya bacapoquianitii a'a queapame, a'a queapame pojjeama chacochacopoquiani ojaya quijje esosequiajji. Cua Eyacuiñajjiya queapame chacochacopoquiani bacani dejjaa o queabihui pojji jjeshecaje queahuiso ma ohua chacocapoquinaje sosejjeya.

⁹ Miquiaaya joya peacuana chacomeeaña queapame poani bacue joya miquianajo chacochacoanicuana. ¡A'a joya chacochacoyaja-amacuana esohui o cuiameejjijo queatai ajji! Miquianaja eba emiquianamese nequipoquianitii Eyajo. Ohuaya ojjañatii jiquio meshijo ba'eca oya jayojja pea-ai poani bacani, achajja miquiana ba'epoquiani bapea-aicani ohuaya.

Yajja pomajje Eyacuiñajjijo queaca'a ba'ecapoquijji

¹⁰ Jesosaja epeejji ecue dohuecuana ecue jjo'icuana pea-ai, mahuiso huohuimeya quiana jiquio esohui aña queaca'a oe jjapomeequicue Emeshimesenei queaca'aneetii poanijo miquiana ojaya'yo poani jjabaquimajje.

¹¹ Jiquio ecua soldadocuaa baajee daqui queamoo huoshocani jama Eyacuiñajjija quia queaca'a eba'ejji oe huoshocue. Jama huoshomajjeya quiana queaca'a ba'epoquije edosiquianaja esohui siajje mi queamimishi pomeejji eyamidojjohuasijje enobiqui poanijje.

¹² Bacue, eseya soldadocuana jama pea-ai poani eshahuamasecuananijje ejjaquecuaquijji. Ohuaya eseya queamimishi pomeesa-acani. Esenijje ba'eca oopananei pojjeama eseya queamimishi pomeesa-acani. Jiquio eyatahuatahuajo nequica eshahuamase queaca'acuaa eseya queamimishi pomeesa-acani pea-ai. Ma eshahuamase queaca'a poanicuaa jiquio meshi quea-aapotii jayojja pomeesa-acapoquiani. Jamajjeya eseya eshahuamasecuananijje jjaquecuaquiani jayojja ba'epoquije jiquio meshijo.

¹³ Jamajjeya Eyacuiñajjija quia queaca'a eba'ejji baajee daqui queamoo jayojja huoshocue. Ma huoshomajjeya queaca'a ba'epoquije miquiana queacamajanee pojji epojja poeyajo. Eshahuamase miquiana queamimishi pomeejji poeyajo queaca'a ba'eje onijje ejjaquecuaquijji ma huoshomajjeya.

¹⁴ Jamajjeya quiana oe apoa epotii ba'epoquicue. Eyacuiñajjija esohui e'ejojonei poani esapajo huananeicue jiquio ecua soldadocuaa ejjayica'aquijji iyacani queaca'a enequijji jama jayojja esohui e'ejojonei huanacue quiaa. Queaja'anee ese ba'epoquijjijo jjashahuabaquipoquicue pea-ai. Soldadocuaa baajee daquimoo ese'o queyajji huoshocani oya peaa equecuaca'yo poanijje. Oya jayojja queaja'anee ba'epoquicue eshahuamasecuaa miquiana queamimishi epomeeca poanijje.

¹⁵ Apoa epotii nequicue esohui queapame Eyacuiñajji esenijje jjabeiqui'yosapoani esohui peacuana huohuiquijji. Jiquio ecua soldadocuana jeojjishejeeca'ajjitii nequiani jama apoa epotii nequicue oja esohui huohuiquiya epoquijji.

¹⁶ E'ejojonei jjashahuabaquipoquicuetii Eyacuiñajjija esohuijo. Jiquio ecua soldadocuaa baajeeca'a oja yami queyajji iñacani ejja-amiqueyaquijji emejejo, jama pea-aiya oe jjashahuabaquipoquicue Eyacuiñajjija esohuijo. Eshahuaja esohui siajjecuana emeje cuaquijijijji jama poani. Jamajjeya Eyacuiñajjija esohui e'ejojoneijo jjashahuabaquipoquimajje oja esohui siajjecuanajo jjajaahuanaquipoquije.

¹⁷ Esohui Quitojo ejjanahuemeequi'yojji jiquio ecua ejahuojja queaca'a soldadocuaa iyacani esapa queyajji jamaya. Eyacuiñajjija esohui pea-ai baase'beca queashejjinee jama ma Eyacuiñajjiya miquiana peacuana huohuimeesahuacani esohuiya Edojjoshahuapameja quia.

¹⁸ A'a oe Eyacuiñajjinijje mimipajeapoquiajjajji ojaya miquiana queaca'a eba'emeepoquiajjijo. Joya Edojjoshahuapameya miquiana mimimeesa-acanicuanajo mimipoquicue. Apoa epotii queaja'a mimipoquicue onijje eshahuaa miquiana edasiaca poanijje. Ojjaña Jesosaja epeejjicuanajo pea-ai mimipoquicuetii o queaca'a ba'epoquijjijo.

¹⁹ Ejo pea-ai mimicue Eyacuiñajjija eya queaja'a oja esohui peacuana ehuohuimeepoquiajjijo. Ma onaja bajjimaneinei esohui queapame Quitojo ecuea meteamaneija ehuohuipoquiajjijo oe mimicue Eyacuiñajjinijje.

²⁰ Majoya Eyacuiñajjiya eya oja esohui huohuiya huoojeacanaje. Jjeya ca eya ma esohuijoya onaja ejeanobia ani. Jamatii mimicue ejo ecuea oja esohui meteamaneija ehuohuipoquiajjijo. Jamaya ecuea acajji.

Esohui oe-ejjenei huohuicapoa

²¹ Jesosaja epeejji eseja dohue queajea Tíquico bajjaniya miquiana huohuiquicaje ejo achajja eya jiquiojo ani. Tíquico e chacosahuajji queapame nequiani, ohuaya Emeshimeseneija echacojji acapoquiani hueya-amaneiya.

²² Jamajjeya eyaya oya huoojeaña miquiana huohuiquiya achajja eya jiquiojo ani miquiana majo queabihui epojjiya.

²³ Eyacuiñajji Echii-aiya Emeshimesenei Jesosa Quitohua pea-ai quiana, ecue dohuecuana, jjo'icuana pea-ai queaquijijjijajinee capomeecapoquiahua pea Jesosaja epeejjicuana queajea ca-ameesahuacapoquiahua pea-ai. Miquianaya queaca'a etiipoquijji pea-ai capomeecahua Emeshimeseneiya Eyacuiñajji Echii-aiya.

²⁴ Ojjaña joya eseja Emeshimesenei Jesosa Quito queajeaneetii ajji poanicuana Eyacuiñajjiya queapamenee ca-acapoquiahua ojayanei ejjashahuabaquijjijo.