Epesio 5 - Ese Ejja New Testament

Achajja Eyacuiñajjija epeejjicuana ba'ecapoquijji

¹ Miquianaya Eyacuiñajjija bacuacuana poani ojaya queajeanee. Jamajjeya oe Eyacuiñajji poani jayojja pea-ai posaoepocue.

² Jiquio ecua se Quitohua queajeaneetii acapoquiani jama pea-aiya oe peacuana queajea apoquiacue. Oya Quito esejo jjaquiaquiapoa emano'yojji ese nahue'yojjijo. Ma ecua yahuajonei ovejaja bacua naa jehuica'yapoa Eyacuiñajji quiajji, jama pea-aiya oya jjapomeequiapoa. Quito manoje'yo onaja quia edahuashiye jama Eyacuiñajjiya queabihuiya oya bacapoa.

³ Jjeya ca miquianaya Eyacuiñajjija'yo poani oja bacua. Jamajje a'a peaja yahueja yamijo, peaja huanaseja yamijo jjashahuabaqui'yojji, majotii mimica'yoajja pea-ai. A'a oe iñahuehua jayojja pojji. Jiquio meshijo ani ca aquiana queahuiso ejjeshejjijo jjashahuabatiitiiquica-ajja pea-ai.

⁴ A'a queatai pea eponaja eyamijo, pea dejjaja eyamijo jjamimihue'equijji. Joya ecua Eyacuiñajjima' jayojja poanicuaa esohui queatainee jeacuayacani jama pea-aiya oe a'a jjamimihue'equijji. Eyacuiñajji caca oe bihuiacapoquijji eseja enabaa.

⁵ E'e, shajja-ajjacue mo. Joya peacojjojji poanicuana, iñahuehua jama ba'epoquianicuanaya, joya quea-aquianahuisotii posapojjicuana pea-ai ma Eyacuiñajjiya, Quitohua pea-ai ojjaña huoojeacapoquianitii meshi Eyahuasijje epoqui'yojjitii pojjeama poaje comacuanaya. Joya quea-aquianahuisonee posapojjicuaa aquiana queajeanee acani, Eyacuiñajji ca queajeapishana acani.

⁶ Jamajjeya quiana oe a'a joya dejjacuana jama ba'epoquianijo jjadasiameequijji. Onaja esohui jamatii queamimishi ba'ecajji huohuicani. Chojja, jama pojjeama. Bacue, Eyacuiñajjiya ojjaña joya jama ba'epoquianicuana queaneenee pomeecaje'yo.

⁷ Jamajjeya quiana oe joya queamimishi jama ba'epoquianinijje a'a jjapeequijjitii, a'a onijje anipoquijjitii.

⁸ Miquianaya yahuajo meca quea-aapo jayojja ba'epoquiapoa. Jjeya ca quiana ca Emeshimeseneinijje ojee nequi'yo bacani Eyacuiñajjiya ojaya'yo. Miquianaya queaja'a po'yonaje ojo. Jamajjeya joya ecua dejja epojjajo queaja'a jjabaquiani jama pea-aiya ba'epoquicue epojja jama queaja'atii.

⁹ Ojjañaa joya queaja'a epojja jayojja ba'epoquianicuaa esohui e'ejojonei acapoquiani, onijje ba'ecacuana queapame asahuacani pea-ai. Comacuanaya queaja'a jjashahuabaquipoquiani.

¹⁰ Jamajjeya oe jjabahuejjaquicue quiana cua Emeshimeseneiya miquiana chacomeesa-acani chacojjijo o queabihui pomeejji.

¹¹ Joya ecua dejjacuana meca quea-aapo jayojjatii ba'e jama pea-aiya a'a ba'esapea-aipojji. Jiquio ohua quehuajje queamimishi epojji acani ja'anei huohuica'yojji oja mimishi.

¹² Oja mimishicuana queataineenee poanijojoya beshahuanei mimisapoca-ajja ma ohua quehuajje queamimishi epojji acanajejo.

¹³ Eyacuiñajjija esohui queajeaja'anee poani jayojjaa onaja mimishi ma quehuajje acapoquinaje queaja'anee bameecani epojja jamaa ojjañaja ebajji oya queamimishi poani. Chama'neinei oja mimishi ehuanaquehuatii epojji.

¹⁴ Ma queajeaja'anee poaniya ojjañatii queaja'a pomeecani. Jamajjeya Eyacuiñajjija esohui yahuajonei etehue jaa jama poani ba'a: “Joya queacahuinee jayojja ba'e quiana, shequi'yocue. Joya emano'yo jayojja ba'e nequisohua'yocue. Majoya Quitohua quiana queaja'anee jjashahuabameequicaje epojja jama” jamaya poa.

¹⁵ Jamajjeya quiana oe jjajaahuananeiquipoquicue ojjañajo. A'a jamatii ba'ejeapoquijji queasapaquehua jama. Queaja'a oe ba'epoquicue.

¹⁶ Jjeya quiana ca chacochaconeicapoquijji Eyacuiñajjijo miquiananijje ba'ecacuana queamimishica'atii popoquianijojoya.

¹⁷ A'a jamatii ba'epoquijji sapadojjoma' jayojja. Baneicue cua Emeshimeseneiya quiana ameesa-acani echacojji queaja'a miquianaja eajji.

¹⁸ A'a quiana oe huoojji. Coma cachasaaya quiana queamimishihuisonee pomeecaje. Eyacuiñajjija Edojjoshahuapamejo ca oe queaca'a jjapomeequipoquicue.

¹⁹ Majoya miquiananijje ba'eca Jesosaja epeejjicuananijje mimipoquicue Eyacuiñajjija esohui Salmos bajjanijo. Sohuicuayapoquicue ojee dejjaja tehue Eyacuiñajjija esohuijo. Emeshimesenei e'ejojonei bihuiapoquiacue queaquijijjibihuiya.

²⁰ Eyacuiñajji Echii-ai bihuiacapoquijjitii, gracias acapoquijji ojjaña aquianacuanajo. Eseja Emeshimesenei Jesosa Quitoja bajjanijo onijje mimipoquicue.

Achajja ba'ecajji queapame ehuanasenijje, yahuenijje pea-ai tehuecapoa

²¹ Bacue, miquiananijje ba'eca Jesosaja epeejjicuanaja esohuijo jjashajja-ajjaquipoquicue. Majoya miquea esohuijo pea-ai oya jjashajja-ajjaquipoquije. Jamaya se ba'ecapoquijji Quito eseja Emeshimesenei poanijojoya.

²² Ehuanasecuana, miquianaja yahuecuanaja esohuijo oe jjashajja-ajjaquipoquicue jiquio ecua Emeshimeseneija esohuijo jjashajja-ajjaquipoquiani jama pea-aiya.

²³ Quitohua oja epeejjicuana ojjaña meshijo ejjachichaquipoqui anica oja nahue'yo poanijojoya huoojeacapoquiani oja sapa jamaa. Oja epeejjicuana ca Quitoja eyami jayojja poani. Oya jayojjaya yahuecuaa oja huanasecuana huoojeacapoquiani.

²⁴ Jiquio ecua oja epeejjicuana ojjaña meshijo ejjachichaquipoqui anica ojjañatii Quitoja esohuijo jjashajja-ajjaquipoquiani jama pea-aiya ehuanasecuana ojahueja esohuijo ojjañatii jjashajja-ajjaquicapoquijji oya jayojja.

²⁵ Yahuecuaa, miquianaja huanasecuana queajeanee apoquiacue. Jiquio ecua Quitohua oja epeejjicuana ojjaña meshijo ba'eca ejjachichaquipoqui queajeanee acapoquiani jama pea-aiya oya queajeanee apoquiacue. Bacue, oya Quito jjaquiaquiapoa emano'yojji ese nahue'yojjijo.

²⁶ Jamaya Quito esejo mano'yapoa eseya majoya Eyacuiñajjija bacua epojjijo, ese mimishima'yo poani oja ebajjijo pea-ai. Eseya oja esohuijo jjashahuabaqui'yajo eseja mimishicuana chama'yo acani jiquio ecua enaa ma queajehue shacuajeaca'yani jamaya.

²⁷ Jamaya Quitohua acapoa ojjaña Jesosaja epeejjicuana ojjaña meshijo ejjachichaquipoqui anica ojayaneitii epojji. Jiquio ecua dejjaa epona huanacani ojayanei epojji jamaya Quitohua eseya acanaje. Ojjaña Jesosaja epeejjicuana queapame eba'epoquijji oja mimishima'yo poani oja cojjaneijo quijje enequimee'yojji ohuaya nahueca'yapoa cuana. Joya ecua epona ahuema' ani cojja majima'nei queacojjabame, jama ojjaña oja epeejjicuana Quitohua nequimee'yosa-acani o cojjaneijo oja mimishima'yo.

²⁸ Bacue, jiquio ecua dejjacuaa oja eyaminei nahuebacani queajea acani, jama pea-aiya oja huanasecuana queajeanee acapoquijji yahuecuanaja. Joya oja huanase queajeanee ajji poani dejja, comaya queanahue jjabaquiani oja eyamijo.

²⁹ Chama'neinei dejja enequi oja eyaminei botiama ajji poani. Oya caca jjajaahuananeiquipoquiani, jjabobiaquipoquiani pea-ai queaca'a eba'epoquijji. Oya jayojjaya Quitohua eseya oja epeejji poanicuana ojjaña meshijo ejjachichaquipoqui anica nahuecapoquiani, jaahuanacapoquiani, queaca'a pomeecani pea-ai.

³⁰ Eseya ojjaña oja epeejjicuana Quitoja eyami jayojja poani. Jamaya eseya poani ohuaya bacapoquianitii.

³¹ Eyacuiñajjija esohui yahuajonei etehue jaa jama poani ba'a: “Jamajjeya dejjaa oja chii, oja nae pea-ai jiñacaje jjahuanaquimajje oja huanasenijjenei eba'epoquijji. Oya oja huanasenijje oe eyami jayojja ba'epoquije, beca pojjeama.”

³² Jiquio eya huohuiaña esohui queapamenee ma yahuajo ojjañaja bajjimanei poa. Quito ojaya epeejjicuana ojjaña meshijo ejjachichaquipoqui anicanijje nequiani ojee. Oja huanase jama poani ohuaya bacani ojjaña oja epeejjicuana. Miquianajaya bajjima poanaje jamaya epojji.

³³ Jamajjeya ecuea esohui shajja-ajjacue. Ojjaña miquiaaya Jesosaja epeejji poaniya miquianaja huanasecuana queajeanee apoquiacue. Jiquio ecua miquianaja eyaminei quiaa nahuebapoquiaña jama pea-aiya oya queajeanee apoquiacue. Ehuanasecuaa, miquianaja yahuecuana queapame nequi mi huoojeajji poani bapoquiacuetii.