Epesio 4 - Ese Ejja New Testament

Edojjoshahuapameya eseya Jesosaja epeejjicuana Quitoja eyami jayojja pomeecanaje

¹ E'e, eya Pablo, dejjamasecuanaja jeanobia ani Emeshimesenei Jesosa Quitojo. E'ejojonei Eyacuiñajjiya quiana nahueca'yonaje queaja'a ojo eba'epoquijji. Jamajjeya eyaya quiana huohuineiaña miquiana Jesosaja epeejji queaja'a eba'epoquijjijo Eyacuiñajjija nahue'yo.

² A'a oe miquianayanei queaca'a poani poso jjabaquijji. Peacuana quiaa oe queapame apoquiacue pea-ai. A'a oe quenequenecuajijji peacuananijje. Miquiananijje ba'eca Jesosaja epeejji queapame poani bapoquiacue.

³ Eyacuiñajjija Edojjoshahuapameya miquiana oe eyami jayojja pomeecanaje. Jamajjeya quiana oe oya jayojja pea-ai jjashahuabaquime ba'epoquicue ma Edojjoshahuapameya miquianaja sapajo nequimeecani jamaya. Majoya miquiana queaquijijjijajinee ojee ba'epoquije oja esohuijo.

⁴ E'e, ojjaña eseya joya Jesosajo jjashahuabaqui'yonajecuana Quitoja eyami jayojja poani. Eyacuiñajjija Edojjoshahuapame oenei nequi eseja yamidojjojo. Yani pea-ai oenei ese queabihui jjaishoaquipoquijji acheshono ohuaya eseya oja nahue'yocuana quiajeyocaje.

⁵ Enequi pea-ai oenei eseja Emeshimesenei poani eojjañacuanamese. Oenei jjashahuabaqui'yome ese pojji ojo enequi. Oenei Eyacuiñajjija esohui Quitojo eseya jjaiñajeanobiameequiani.

⁶ Enequi pea-ai oenei Eyacuiñajji e'ejojonei poani e-esemese. Ohuaya eseya oja bacua pomeecanaje. Oya ojjañacuana huoojeapoquiajjitii poani. Eyacuiñajjiya ojjañatii eshe nequimeecani. Oya ojjaña oja bacuacuanaja eyamiquipajje, equijijjijje pea-ai chacochacopoquiani ojayanei ejjashahuabaquijjijo oya jama sapomajje esejo.

⁷ Bacue, Eyacuiñajjiya ojjaña eseya oja epeejjicuana queaca'a pomeecani ojo queapame echacochacopoquijji cua Quitohua ese chacomeesa-acaje cuanajo. Oya echacojji pea-ai pojjeama ohuaya se pomeecaje.

⁸ Jamajjeya Eyacuiñajjija esohui yahuajonei etehue jama poani ba'a: “Oya ba'esohuaqui'yapoa Eyahuasijje. Majo ejeanobia anica dojosohuaquica'yapoa onijjetii. Dejjacuana ohuaya queaca'a pomeecapoa ojo queapame echacochacojji” jamaya poani oja esohui.

⁹ ¿Yajja poanijje jiquio esohui oya ba'esohuaqui'yapoa Eyahuasijje? Jama poanijje ba'a: Oya ebionei jiquio meshiyasijje poeapoa. Mahuisojotii pojjeama, oya meshidojjohuasijje nobipea-aiquiapoa.

¹⁰ Ma jiquio meshiyasijje poeapoaya, oyatiiya ba'esohuaqui'yapoa Eyahuasijje quea-aoneeyasijje ojjaña majo anicajo jjabameequiya oya queapameneetii nequipoquiani, ojjaña quijje queapame pomeecaje'yo pea-ai.

¹¹ Maaya beca dejjacuana ona sohuihuohuiquinequijji epojji babacacapoa. Peacuana ca oja quia esohui ona sohuihuohuijji epojji queaca'a pomeecanaje. Peacuana ca esohui queapame Quitojo huohuiquijji epojji queaca'a pomeecanaje. Peacuana ca Jesosaja epeejjicuana queaja'a esohui bameesahuajji epojji, o jaahuanapoquiajji epojji pea-ai queaca'a pomeecanaje.

¹² Jamaya ohuaya nequimeecanaje cuana Jesosaja epeejjicuana echacochacopoquijji ojo. Majoya oja epeejjicuana Quitoja eyami jayojja poani queaca'a tiipoquije ojee chacochacomajje.

¹³ Ma Eyacuiñajjija babaca dejjacuaa oja nequimeeya Jesosaja epeejjicuana queaja'a jjashahuabameequicaje oja esohuijo oya jayojja pea-ai jjashahuabaquime eba'epoquijji ojee. Ma dejjacuaaya sohuihuohuicaje achajja Eyacuiñajjija Bacuaejja nequi Jesosaja epeejjicuanaja queaja'a ebajji, ache ojaya ejjashahuabaquijji poani ebajji sohuihuohuicaje pea-ai. Jamaya eseya Jesosaja epeejjicuana queaca'a tiipoquije Quitojo joya ecua ebacua esho'i tiisohuaquiani dejja epojji jama pea-ai. Majoya eseya oja epeejjicuana Quito jayojja pea-ai jjashahuabaquime ba'epoquije.

¹⁴ Jama pomajje eseya jiquio ecua esho'i pea jjashahuabaquime pocuajiani jama pojjeama ba'epoquije'yo. Esho'iya onaa esohui siajje yecajo e'ejojonei poani poso acuajicani. Oya jiquio ecua bishe' niñequiajjima dojojeacani beniya cua ohua dojosa-acajeyasijje jama pea-aiya oya ba'epoquiani. Dejja queasapaja'a poanija esohui siajjejo oya jjadasiameequiani joya queaca'a tiipoquijjima poanicuana.

¹⁵ Eseyaya ca esohui e'ejojonei huohuipoquiaña cuana. Esenijje Jesosaja epeejjicuana queajea apoquiaña pea-ai. Majoya se jama pomajje queaca'a tiipoquije Quito jayojja pea-ai epojji. Eseya Quitoja eyami jayojja pea-ai poani. Quito ca oja yamija sapa jayojja poani Eyacuiñajjija nequimee ojjaña oja epeejjicuana huoojeapoquiajji poani.

¹⁶ Eseya Jesosa Quitoja epeejjicuanaya oja yami jayojja poani oe ojoneitii ejjashajja-ajjaquipoquijji. Esejaya Jesosaja epeejjicuana asahuacapoquijji. Cua Eyacuiñajjiya ese quiacaje echacojjicuana queapame esejaya acapoquijji ojjañacuanaja. Pea esenijje Jesosaja epeejjicuanaja queajea acapoquijji pea-ai. Majoya eseya jama pomajje queapame ojee tiipoquije queaca'a eba'epoquijji.

Eseya pea jjashahuabaquime eyacua ba'epoqui'yani Quitoja'yo poanijjejojoya

¹⁷ Jamajjeya quiana eyaya huohuineineiaña Emeshimeseneijo a'a joya ecua Eyacuiñajjima'cuana jayojja pea-ai ba'esapojji. Comacuana ca queaquehuatii ba'epoquiani ojayanei ejjashahuabaquijjijo.

¹⁸ Comacuanaya meca quea-aapo jayojjatii ba'epoquiani oja sapadojjojo. Oya quea-Eyacuiñajjihueshatii ejjasejjaqui ba'epoquiani edojjoshahua mano'yotii. Eyacuiñajjija esohui ojaya bajjimaneitii poani, oya jjashajja-ajjaquisapo-ajjanei poani oja esohuijo, cajaanei ohuaya acani.

¹⁹ Ma dejjacuana, eponacuana pea-ai oja mimishijo queabicho, queayeno pea-ai o pojjijo jjabaquiajjanei, queamimishica'a ba'epoquiani. Oya jjaquiaquiani peanijje ejaajji, ehuoojji, o queamimishihuiso popoquijjijo. Majoneitiiya ba'ecapoquiani oja epeejji pojjeamacuana.

²⁰ Miquianajaya ca esohui eshajja-ajja Quitojo jama ba'eca-ajjanei queamimishihuiso epojji.

²¹ E'ejojonei yahuajopishana esohui Jesosa Quitojo shajja-ajjanaje quiaa. Majoya queaja'a huohuicanaje cuaa Eyacuiñajjija esohui jayojja ba'ecapoquijji. Jiquio esohui Jesosa Quitojo e'ejojonei poani, siajje pojjeama.

²² Jamajjeya ma esohui eshajja-ajja miquianaja ejjashahuabaquijji queamimishi poani echii cajaanei apoquia'yocue. Joya ecua seya daquichii cajaa jeajeaña jamaya oe acue. Yahuajo miquianaja ejjashahuabaquijjicuaa quiana queamimishitii pomeecapoquinaje. Ma ejjashahuabaquijjicuaaya quiana dasiacapoquinaje ebionei.

²³ Jjeya ca pea ejjashahuabaquijji eyacua miquianaja sapadojjojo nequimee'yocue queaja'a miquiana ba'epoquijji.

²⁴ Eyacuiñajjija ejjashahuabaquijji queapame, mimishiama eseja sapadojjojo nequimee'yocue. Jiquio ecua seya daquichii jeajeaña pea daqui eyacua ehuosho'yojji jamaya oe pocue. Majoya eseya jama pomajje oja esohui jayojja queapame ba'epoquije.

²⁵ Jamajjeya oe a'a siajjetii popoquijji. Esenijje Jesosaja epeejjicuana ba'ecanijje ca oe esohui e'ejojonei apoquiacue eseya oe eyami jayojja poaniyajjejojoya Quitojo.

²⁶ Quenequenemajje a'a queamimishi pojji. A'a queaquenetii ani cahuijji.

²⁷ A'a edosiquiana jjadasiameequijji queamimishi epojjijo.

²⁸ Joya Jesosaja epeejji siitiipopoquiani oya siipopajeaca'yojji. Jjeya ca oya chacochacocapoqui'yojji hueya-amanei. Majoya ohuaya ojaya emejo chacochacomajje bobi jjeshecapoquije oja bacuacuanaja eijjiajji, aema'cuana asahuajji pea-ai.

²⁹ A'a esohui queatai jeacuayajji. Esohui queapame oe apoquiacue peacuana queaca'a tiipoquijjijo Jesosa Quitojo. O queabihui pojjijo pea-ai esohui queapame acue.

³⁰ A'a Eyacuiñajjija Edojjoshahuapame queayeno pomeejji. Oya Eyacuiñajjija quia eseja yamijo nequiani ojjañaja ese bajji Eyacuiñajjija'yo poani. Quijje oe-ejjenei epojja ese jjeshe'yojji apoa poajo oya esenijjetii nequipoquije.

³¹ Ese quenequenemeejji poani ehuanaquehua jaa jeajeacue. A'a queaquenetii ba'epoquijji. A'a queaquene taaasajasajajji. A'a miquiananijje ba'ecacuana mata-ajji, a'a ojo jjaniñebaquijji. Ojjaña miquiananijje ba'eca a'a botiama ajji.

³² Miquiananijje ba'ecacuana oe queapame apoquiacue queabihui onijje eba'epoquijji. O queayeno poani bamajje queayeno popea-aicue. Onaja mimishi miquianajo oe pajea'yocue, a'a shahuabapoquiajjitii. Jiquio ecua Eyacuiñajjiya eseja mimishicuana cuijeaca'yani Quitoja'yo poanijojoya, jama pea-aiya oe oja mimishi pajeapea-ai'yocue.