Epesio 1 - Ese Ejja New Testament

¹ Eya Pablo Jesosa Quitoja huoojea ona sohuihuohuiquinequijji poani Eyacuiñajjija ejjashahuabaquijjijo, oja babaca. Jiquio esohui eyaya tehueaña miquianaque ciudad Éfeso bajjani meshijo ba'ecaja ma Eyacuiñajji bihuiapoquiajji poanicuanaja ebajji. Miquianaya queapame mimishiama Jesosa Quitojo ba'epoquiani ojaya'yo.

² Eyacuiñajji eseja Chii-aiya Emeshimesenei Jesosa Quitohua pea-ai miquianaya queapamenee ca-acapoquiahuatii ojayanei ejjashahuabaquijjijo, queaquijijjijajinee quiana capomeecahua pea-ai ohuaya.

Eyacuiñajjiya ese queapame pomee'yojji quiacanaje Quitojo

³ Eyacuiñajji ejjabihuiatiiquipoqui oya eseja Emeshimesenei Jesosa Quitoja Chii poani. Jjeya ohuaya eseya Quitonijje ojee nequi bacapoquiani ojaya'yo. Jamajojoya aje se ese queapametii pomee'yojji Eyajo queahuiso ani ohuaya quiacanaje eseya Quitoja'yo poanijojoya.

⁴ Yahuajoneinei jiquio meshi panajjimahuajo Eyacuiñajji jjashahuabaquianiapoa esejo, ese mimishima'yo oja ebajjijo eseya quijje Quitoja'yo poajejojoya.

⁵ Eyacuiñajjiya eseya queajeaneetii acapoquiani. Jamajjeya yahuajoneitii oya jjashahuabaquianiapoa ese oja bacua epomeejjijo Jesosa Quitojo. Jamaya oya yahuajoneitii queabihui jjashahuabaquianiapoa ese oja jama epomeejjijo.

⁶ Jamajjeya eseyaya oya majoya bihuiapoquiajetii Eyacuiñajjiya eseya queapamenee acapoquianitiijojoya ojayanei ejjashahuabaquijjijo. Oja Bacuaejja queajeaneejo eseya queapamenee acapoquianitii ohuaya.

⁷ Eseya Quitoja'yo poanijojoya Eyacuiñajjiya oja Bacuaejjaja Quitoja ena' sosejje eseya jjesheca'yonaje queaneeneetii epo'yo poanijje eseja mimishicuanajo. Eseja mimishicuana ojjañatii cuijeajeyoca'yonaje ohuaya, chama'yo acanaje. Jamaya Eyacuiñajjiya eseya queapamenee acapoquianitii ojayanei ejjashahuabaquijjijo.

⁸ Eyacuiñajjiya eseya queajeaneetii acapoquiani. Jamajjeya ohuaya eseya queajjashahuabaquija'a pomeecanaje oja esohui queaja'anee eseja bapoquiajji.

⁹ Eyacuiñajjija ejjashahuabaquijjicuana ma ohua acapoquianitii yahuajo esejaya bajjimanei poanaje. Jjeya se ca ohuaya queaja'a bameecanaje ojaya ejjashahuabaquijji ma ohua quijje acaje'yo Quitojo.

¹⁰ Ojaya ejjashahuabaquijji ma ohua quijje acaje'yo Quitojo e'ejojonei Eyacuiñajjiya ajeyocaje'yo epojja o ajeyo'yojji apoa poajo. Ohuaya Quito Emeshimesenei eojjañamese pomeecaje ojjaña eyahuasijje, jiquio meshiyasijje pea-ai oja huoojeapoquiajjitii epojji.

¹¹ Eseya Quitoja'yo poaniyajjejojoya ojjaña Eyacuiñajjija quiacuana quijje jjeshejeyoje ojayanei ejjashahuabaquijjijo ma yahuajoneitii ohua huohuicapoa huisotii. Cua ese ohua quiasa-acaje huisotii quiacaje oya esejo jama sapomajje.

¹² Ecuanaya judiocuana ebionei jjashahuabacooqui'yapoa Quitojo. Eyacuiñajji yahuajotii ecuanajo jjashahuabaquianiapoa ecuana ojaya'yo epomeejjijo. Ecuanaya jama poaje'yo bamajje queahuisocuaa Eyacuiñajji queaca'aneetii queasajajanee nequi bihuiacaje.

¹³ Miquianaya pea-ai esohui e'ejojonei ese nahue'yojji epojjijo peaa huohuicajje jjashahuabapea-aiqui'yonaje Quitojo. Miquianaya Quitoja'yo poanijojoya Eyacuiñajjiya oja Edojjoshahuapame yamijji pomeecanaje ojjañacuanaja ebajji miquianaya ojaya'yo poani. Ma ohua huohuicapoa quijje poeje maya quiana quiacanaje ohuaya.

¹⁴ Edojjoshahuapame oja quiacoo eseya. Jamajjeya oja Edojjoshahuapame yamijji poaniyajjejojoya ojjaña ma ohua huohuicapoa quiacaje huisotii maya eseyaya jjeshejeyoje quijje. Ese jjeshe'yojji ohua ajeyoca'yajo oja quiacuana eseyaya jjeshejeyoje. Eyacuiñajjija quiacuana eseyaya jjeshejeyoje bamajje queahuisocuaa oya bihuiacaje. Eyacuiñajji queaca'anee queasajajanee nequipoquianitii bacaje cuaa.

Pablo Eyacuiñajjinijje mimiapoa Jesosaja epeejjicuana queasapaja'a eba'epoquijjijo oja esohui jayojja

¹⁵ Jamaya Eyacuiñajjiya quiana queapamenee acapoquianitii miquianaya Quitoja'yo poani bamajje. Jjeya ecuea eba, eshajja-ajja, Emeshimesenei Jesosajo queaja'a jjashahuabaquipoquianitii quiana. Jesosaja epeejjicuana queajeanee aña quiaa eyaya shajja-ajjaña.

¹⁶ Jamajjeya miquianaya queaja'a ba'epoquiani shajja-ajjamajje eyaya gracias amajamajaña Eyacuiñajji ohua miquiana queaja'a ba'emeesahuacapoquianijojoya. Eyaya quiana shahuabapoquiañatii Eyacuiñajjinijje emimipoquijji miquianajo.

¹⁷ Eya eseja Emeshimesenei Jesosa Quitoja Eyacuiñajjinijje mimipoquiani. Oya eseja Chii-ai queaca'aneetii queasajajanee poani. Jamajjeya eya onijje mimipoquiani acheca'anee Eyacuiñajji nequipoquiani Edojjoshahuapameja miquiana queaja'a bameejjijo. Majoya miquiaaya queaja'anee oya baje oja esohuicuanajo acheca'anee oya nequi. Oepojjinei miquianajaya oya ebacuajijjijo pojjeama eya mimipoquiani onijje.

¹⁸ Eya mimipoquipea-aiani onijje miquianaja esapadojjojje queaja'a epojjijo Eyacuiñajjija ejjashahuabaquijji jama. Jamaya eya mimipoquianitii miquianaja queaja'a ebajjijo achepamenee miquiana ba'epoquije oja nahue'yo poanijjejojo. Eya mimipoquipea-aiani onijje miquianaja ebajjijo achepamenee miquiana queabihui pojji quiacaje ohuaya, ojjaña Jesosaja epeejjicuana quiapea-aicaje.

¹⁹ Acheca'aneenee Eyacuiñajji nequiani, miquianajaya oya jama ebajjijo eya majoya mimipoquipea-aiani onijje. Eyacuiñajjiya eseya oja epeejjicuana queaca'a pomeecapoquiani oya queaca'aneetiiyajjejojoya. Yahuajonei oya queaca'aneetii nequi jjabameequiapoa. Jjeya huohuije acheca'aneetii oya nequipoquiani ese queapamenee apoquiajji.

²⁰ Bacue, oya queaca'aneetii poaniyajjejojoya Quito emano'yo jaa shequimeeca'yapoa. Majoya ohuaya Quito oja ebañeimijijje animeeca'yapoa Eyahuasijje onijje. Jamaya oya queaca'aneetii nequiani.

²¹ Eyacuiñajjiya Jesosa Quito majotiiya onijje animeeca'yapoa ojjaña joya queaca'a eyajo nequi etii poanicuana, joya meshijo nequi etii poanicuana pea-ai huoojeapoquiajji epojji. Ojjaña jiquio eshe nequica eshahuamasecuana, angelcuana eyajo, meshijo pea-ai huoojeapoquiajji epojji nequimeecapoa oya. Jama epojjiya Jesosa Quito nequipoquianitii jjeya, quijjenei pea-ai nequipoquijetii.

²² Eyacuiñajjiya Quito queaca'aneetii pomeecapoa oya eojjañamesetii enequipoquijji Emeshimesenei. Ojjaña meshijo jjachichaquipoquiani Jesosaja epeejjicuana huoojeapoquiajji epojji Quito nequimeepea-aicapoa Eyacuiñajjiya oja sapa jama epojji.

²³ Bacue, ojjaña oja epeejjicuana Quitoja eyami jayojja poani. Jamajjeya ojjaña Jesosaja epeejjicuana ojee onijje nequi ojaya'yo poani bamajje ojjaña apoa epojeyo queapamenee bacaje cuaa majoya. Quitohua ojjaña aquianacuana, dejjacuana, eponacuana pea-ai apoa pomeejeyocaje.