Apocanisi 15 - Ese Ejja New Testament

Mimishicuana jiquio meshijo ba'eca siete huisome queaneenee pomeejji huoojeacanaje angelcuaa

¹ Majoya ojjañacuanaja ma yahuajo bajjimanei poa eyaya eyajo ani jjaja'acuajiquije banaje. Eya ma bamajjeya queametepishana poanaje. Eyaya banaje eyajo siete angelcuaa mimishicuana jiquio meshijo ba'eca siete huisome queaneenee pomeejji huoojeacaje. Ma siete huisome mimishicuana queaneenee pomeejji oe poajo mahuisotiiya Eyacuiñajjiya mimishicuana jiquio meshijo ba'eca queaneenee pomeecaje. Majoya queaquenenee popajeaje'yo.

² Eyaya jjacahuibaquiani jayojja aniya bapea-ainaje oe bae-aiai ena queanaja'anee ani ejjacojjabaquijji jayojja cuaquijijitejjee ani. Ma bae-aiai queanaja'anee anisahuajo nequicanaje queahuisonee Eyacuiñajjija nahue'yocuana. Ojjaña majo nequica eiñaqueyajji arpa mejji poanaje Eyacuiñajjija quia. Ma oja nahue'yocuaaya enaojjojjo ani nequisohua eyami queaquemonee bihuiajjimatii acapoquinaje, o jayojja epojji onaja ne pea-ai bihuiajjimatii acapoquinaje. Oja bajjani numerojo jjajeasiimeequijjimatii poanaje pea-ai.

³ Ojjaña bae-aiai queanaja'aneesahuajo nequica sohuicuayanequinaje ma yahuajonei Eyacuiñajjijo chacochacopoquiapoa dejja Moisés bajjaniya tehuecapoa esohuicuayajjijo, joya Ovejaja Bacuaejja jayojja poaniya tehuecanaje esohuicuayajjijo pea-ai. Jama sohuicuayame poanaje queahuisoneecuana ba'a: “Emeshimesenei, Eyacuiñajji, miya queaca'aneetii nequipoquiani. Achepameneenee ojjaña jiquio miyaya chacopoquiaña cuana, ojjaña mique panacuana pea-ai. Jama poani bamajje ojjaña meshijo ba'ecacuana cajjashahuabaneiquiahua mijo. Miquea ejjashahuabaquijjicuana queapamenee queaja'anee e'ejojonei poani. Miyaya ojjaña peajaajjicuana huoojeapoquiañatii.

⁴ ¿Ache meteama poani mijo? Achepishana. ¿Acheya miya queaca'anee nequi bihuiajjima acaje? Acheyapishana, che oema'cuaa. Miya caca oe oenei queapameneenee mimishima'nei poani. Ojjaña peajaajjicuana ojjaña meshijo ba'eca mique poemajje ojaya ecuioshajjajo anioqueñaje mi bihuiajji. Ojjañacuaa miya bihuiacaje quijje miya queapameneetii nequipoquiani bamajje. Miya queajjashahuabaquija'aneetii poani bapea-aicaje” jama sohuicuayameya ponequinaje cuana.

⁵ Majoya jjabajeasohuaquimajje eyaya Eyacuiñajjija equi-ai Eyajo ani jjaca'apejoquije banaje. Eyacuiñajji anijji equecuayijjidojjo queapameneenee ani bapea-ainaje.

⁶ Majjeya Eyacuiñajjija equi-aijo ani siete angelcuana cuayanaje. Ojjaña daqui quea-osheneejji, queajeaja'anee poanaje, o jjase'oyica'aquijji oro poanaje. Ma siete angelcuaa ojjaña mimishicuana jiquio meshijo ba'eca siete huisome queaneenee pomeejji oja mimishijo huoojeacaje banaje.

⁷ Majoya aje oe yamijji Eyacuiñajji bihuiajji poaniya, ma pea tres yamijjinijje aniya, ma siete angelcuana siete oro edahuapejja quiacanaje. Ojjaña oja quia edahuapejjacuana uvajjajjana' queacuataneejji nequinaje ona queaneenee pomee'yojji jayojja. Jama poanijje maya ba'a: Eyacuiñajji queaqueneneeya queaneenee pomeecaje queahuisoneecuana oja mimishijo. Yahuajoneinei oya eanitiiapoa, quijje anitiitiipoquije pea-ai.

⁸ Majoya Eyacuiñajjija equi-ai queahuichachahuojamoohua cuiocanaje Eyacuiñajji queaca'aneetii queasajajanee poaniyajjejojoya. Jamajjeya chama' che oema' Eyacuiñajjija equi-aiyasijje nobiquije ma siete angelcuanaja huoojea ona queaneenee pomee'yojjicuana oja ajeyojjimahuajo.