Apocanisi 1 - Ese Ejja New Testament

Jiquio esohui Eyacuiñajjiya Juan bameecapoa

¹ Eyaya Juan bajjaniya jiquio esohui tehueaña ma Jesosa Quitohua e bameecanaje huisotii. Ojjaña Jesosaja epeejjicuanaja ebajji ae poaje quijje, jjeya jiquio esohui eyaya tehueaña majoya. Eyacuiñajjiya ebionei Jesosa Quito ae poaje quijje queaja'a huohuicanaje. Majoya Jesosa Quitohua huoojeacanaje oja ángel eque, eya ojo chacochacopoquiani dejjaque, ma ohua shonoshonojjima acajejo e bameeya.

² Eyaya e'ejojonei jiquio esohui tehueaña ma eya banaje huisotiiya, ma eya shajja-ajjanaje huisotii pea-aiya jjacahuibaquiani jayojja aniya. Jiquio Eyacuiñajjija esohui e'ejojonei poani ma Jesosa Quitohua huohuicanaje esohuiya.

³ E'ejojonei queabihui poaje cuana ojjaña joya Eyacuiñajjija esohui ajji poanicuana ma quijje ohua acajejo. E'ejojonei queabihui pea-ai poaje cuana ojjaña jiquio esohui shajja-ajjajji poani. Macuanaya oja esohuijo jjashajja-ajjaquipoquiani queaja'a eba'epoquijji ma oe-ejjenei epojja queachipi poeanijojoya. Ma pojjajo achajja acaje majoya tehueaña.

Juanya esohui tehuecapoa Jesosaja epeejji siete huisome meshicuanajo jjachichaquipoquianicuanaja ebajji

⁴ Eyaya Juanya jiquio esohui tehueaña Jesosaja epeejjicuana ma siete huisome meshicuanajo jjachichaquipoquianicuanaque provincia Asia meshijo ba'ecacuanaja ebajji. Eyacuiñajjiya, Jesosa Quitohua, Edojjoshahuapameya pea-ai miquianaya queaquijijjijajinee capomeecapoquiahua, miquianaya queapame ca-acapoquiahuatii pea-ai ojayanei ejjashahuabaquijjijo. Eyacuiñajji oya yahuajonei eanitiiapoa, jjeya oya eanitii, quijje pea-ai anitiitiipoquije. Eyacuiñajjija Edojjoshahuapame siete huisome jayojja oya queaca'aneetii jjabameequiani. Edojjoshahuapame Eyacuiñajji quii-anijjiai cojjaneijo nequipoquiani ojo echacochacopoquijji.

⁵ Jesosa Quitohua Eyacuiñajjija esohui e'ejojonei huohuicapoquiapoa queahuisocuanaja ebajji. Oya ebionei dejja emano'yo jaa Eyacuiñajjiya shequimeeca'yapoa. Oya ojjaña meshijo nequica etii poani emeshimesecuana huoojeapoquiajjitii poani, eomese. Jesosa Quitoja eseya queajeaneetii popoquiani. Oja ena' sosejje eseya nahueca'yonaje ese queaneeneetii epo'yo poanijje eseja mimishicuanajo.

⁶ Majoya Jesosa Quitohua eseya nequimeecanaje ese peacuanajo Eyacuiñajjinijje emimipoquijji. Jamaya se Jesosa Quitoja Chiijo chacochacopoquiani. Jamajjeya oe ejjabihuiatiitiiquipoqui Jesosa Quito, oya queaca'aneetii, queasajajaneetii nequipoquianijojoya. Ojjañacuana huoojeapoquiajjitii oya nequipoquiani. Jamaya capoahua.

⁷ Bacue, Jesosa Quito poeje o'oya bocuanatejjee, queashono epojji pojjeama. Ojjaña meshijo ba'ecacuaa oya bacaje. Ma o manomee'yojji poacuaa oya bapea-aicaje'yo. Ojjañajaajjicuana joya Jesosaja epeejji pojjeama poanajecuana queayenonee pocaje'yo o poeje o'oya bamajje. Majoya paneineicaje. E'e, jamaya capoahua.

⁸ Emeshimesenei jama poani ba'a: “Eya yahuajoneinei eanitiiapoa ojjaña aquianacuana chamahuajo. Eya anitiitiipoquije pea-ai ojjaña aquianacuana oe po'yajo.” Jamaya poani Emeshimesenei. Eyacuiñajji queaca'aneetii nequi ma yahuajonei eanitiiapoaya, jjeyanei eanitii, ma quijje anitiitiipoquije pea-ai.

Juanya jjacahuibaquiani jayojja aniya Jesosa eshe nequi'yo baca'yapoa

⁹ Eya Juan miquianaja dohue Jesosajo poani. Miquianaya, eya pea-ai Jesosajo queaca'a ba'epoquiani jamatii queacamajanee pomeecani cuaa. Oya jayojja miquianaya, eya pea-ai queabihui poaje'yo quijje Eyacuiñajjiya ojjañacuana huoojeacapoquianitii meshi Eyahuasijje poqui'yomajje. Bacue, eya Eyacuiñajjija esohuihuohuijji poanijojoya Jesosa Quitojo eya huoojeacanaje cuaa queahueshatii nequipoqui'yohua nasisisi bae-aiai aniyasijje ejeanobia jayojja cuama eani'yojji. Jiquio meshi nasisisi Patmos bajjani.

¹⁰ Majoya aje quijjepishana Emeshimeseneija epojja domingo poajo Eyacuiñajjija Edojjoshahuapameya eya queaca'a pomeecanaje ma ohua e huohuicaje huisotii bajji. Eyaya shajja-ajjanaje e ani jacajjajje janobajjimanei oe mimije baasa' queasajeanee miacani jama.

¹¹ Eyaya shajja-ajjanaje jama poaje ba'a: “Ojjaña jiquio eya mi bameeje huisotii tehuecue. Majoya mique tehue huoojeacue Jesosaja epeejjicuana joya jjachichaquipoquiani esohuijo siete meshicuanahuasijje provincia Asia meshijo ba'ecacuanaja ebajji. Ma siete huisome meshicuana ma bajjani ba'a: Éfeso, Esmirna, Pérgamo, Tiatira, Sardis, Filadelfia, Laodicea pea-ai” jama mimime poanaje enijje.

¹² Majotii nequiya jjajeapajjaquimajje ae enijje mimiani ebajji, eyaya banaje siete huisome cuaquijijisisi nequiajjicuana jijiqui oopana oro.

¹³ Ma cuaquijijisisi nequiajjicuana jijiquipejjejo ojee nequi banaje oe dejja jayojja yamijji. Oya daqui-aojji oja ejeojjiyasijjeyee ba'ejji nequinaje. O jjayica'aquijji epo oro poanaje ese'ohuasijjeyee jaa banaje.

¹⁴ Ojaya ehuojjaña quea-oshenee banaje bo quea-oshenee jama. Ojaya ecojja queasajajanee poanaje cuaquijiji jama.

¹⁵ Ojaya ejeojji queasiyoja'anee poanaje baajee bronce queanahue equecuasiyonee, edahuasiyonei pea-ai jama. Ojaya esohui shajja-ajjanaje janobajjimanei mimiani jiquio ecua ena queaquemonee queahuesha oquequinequiani queashajjaquijjo poani jama.

¹⁶ Siete majametacuana oja ebañei emejje eiñanequia nequi banaje. Baase'beca queashejjinee oja enabajje cuaya nequinaje. Ojaya ecojja queasajajanee poanaje eshequi biacojjajja nequi queasajajanee poani jama.

¹⁷ Ma dejja jayojja bamajje eya mimima' jaabichajeananaquinaje emano'yo jayojja o nequi jeojjipejjejo. Ojaya eme ebañei ecuea eyamibiajje huanamajje eya huohuicanaje jama ba'a: “¡A'a ejo queamete pojji! Eya yahuajonei eanitiiapoa ojjaña aquianacuana chamahuajo, quijje eya anitiitiipoquije pea-ai ojjaña aquianacuana oe po'yajo.

¹⁸ Eya ojjañacuana eshe pomeejji poani. Yahuajo eya emano'yo jaa shequi'yapoa enequitiitiipoqui'yojji. Eyaya ellavemese poaniya emano'yo jaacuana o ba'epoqui'yojji poaje meshiyasijje huoojeanobiaña, huoojeacuaya'yaña pea-ai queaca'aneetii nequiya.

¹⁹ Jamajjeya miyaya tehuecue jiquio miya baña huisotii. Ma quijje ae poaje miya huohuicaje pea-ai tehuecue.

²⁰ Bacue, eyaya miya huohuije yajja poanijje ma siete majametacuana ecuea ebañei mejje eiñanequia nequi, yajja poanijje ma siete cuaquijijisisi nequiajjicuana pea-ai. Maya ojjaña peacuanaja bajjimaneinei. Ma siete majametacuana ma ecua siete meshicuanajo ecuea epeejjicuana jjachichaquipoanianicuanaja angelcuana o jaahuanapoquiajji poani jama. Ma siete cuaquijijisisi nequiajjicuana ma ecua siete meshicuanajo ecuea epeejjicuana jjachichaquipoquianicuana jama.” Jamaya eya Jesosaa huohuicanaje.