2 Timoteo 1 - Ese Ejja New Testament

Pablohua ebionei esohui Timoteo queabihui pojji acapoa

¹ Eya Pablo Jesosa Quitoja huoojea, Eyacuiñajjija babaca ojaya ejjashahuabaquijjijo ona sohuihuohuiquinequijji poani. Eyaya sohuihuohuiaña ojjaña joya Jesosa Quitoja'yo poanicuana ba'etiitiipoquije'yo Eyacuiñajji aniyasijje onijje.

² Eyaya jiquio esohui tehueaña mique Timoteo, miya ecue bacuaejjanei jayojja poani queajeanee ecuea. Eyacuiñajji eseja Chii-aiya, eseja Emeshimesenei Jesosa Quitohua pea-ai miya queapamenee ca-acapoquiahuatii ojayanei ejjashahuabaquijjijo, queaquijijjijajinee capomeecahua miya.

Timoteo queaca'a nequipoquijjijo Pablohua tehuecapoa

³ Eyaya Eyacuiñajji gracias amajamajaña onijje mimianiya mijo mecajje, epojjajo pea-ai. Eya Eyacuiñajjijo queapame chacochacopoquiani. Ecuea ejjashahuabaquijji queamimishi huanaquehuajjimanei ohuaya eya bacani. Ma ecua yahuajo ecue etiiquiana queapame chacochacopoquiapoa jama pea-aiya eya chacochacopoquianitii ojo.

⁴ Eya mijo jjashahuabaquianitii enijje ani queahuesha epoquijji miya panananaje yenojo e jiñamajje. Jamajjeya eyaya miya eque poemeeneisa-aña e queabihuinee epojji mijo.

⁵ E'ejojonei miya queaja'anee Eyacuiñajjija esohuijo jjashahuabaquipoquianitii shahuabamajje eya queabihui poani majoya. Ebionei mique ano Loida bajjani jjashahuabacooqui'yapoa Quitojo. Majoya mique nae Eunice bajjani jjashahuabapea-aiqui'yapoa. Ecuea miya eba o jayojja pea-ai e'ejojonei miya jjashahuabaquipoqui'yani Quitojo.

⁶ Jamajjeya eyaya miya jiquio esohui huohuio'oyaña queaca'a oe jjapomeequicue Edojjoshahuapameja quiajo. Jiquio ecua cuaqui pecao'oyajje jijineineiani jamaya oe po-o'oyacue Eyacuiñajjija echacojji queapame eapoquiajji oja quiajo. Ecue eme eya huanajo oja quia mi queapame chacomeejji miyaya jjeshenaje.

⁷ Bacue, Eyacuiñajji ese queametetii nequimeesapo-ajja poani. Ohuaya ca se ca queaca'a nequimeecapoquiani oja echacojjicuana eajji. Peacuana se queajea ameecani pea-ai. Ohuaya eseya joya queamimishi epojjijo nahuecapoquiani.

⁸ Jamajjeya a'a queabicho pojji eseja Emeshimesenei poanija esohui peacuana huohuiquijji. A'a oe queabicho pojji ejo e jiquiojo dejjamaseja jeanobia ani Quitojo eyaya peacuana sohuihuohuiañajojoya. Chacochacotiipoquicue esohui queapame Quitojo jamatii majoya miya queacamajanee pomeecapoquije cuaa jiquio ecua eya acani cuaa jama pea-aiya. Eyacuiñajjiya miya queaca'a nequimeecapoquije jiquio ecua eya ohuaya queaca'a nequimeecani jama pea-aiya.

⁹ Eyacuiñajjiya eseya nahueca'yonaje. Majoya ohuaya eseya jama pomeesa-acani oque ejjaquiaquipoquijji ojjaña pojjajo queapame mimishiama eba'epoquijji ojo. Eseyaneitii queapame ba'epoquianijo pojjeama ohuaya eseya nahueca'yonaje. Chojja majo pojjeama, ojayanei ejjashahuabaquijjijo ca eseya nahueca'yonaje. Yahuajoneitii Eyacuiñajji esejo jjashahuabaquianiapoa ohuaya eseya quijje ojayanei ejjashahuabaquijjijo queapame acaje Jesosa Quitojo jiquio meshi oja panajjimahuajo.

¹⁰ Jjeya ca se ca Eyacuiñajjiya queaja'a bameecanaje achajja ohuaya eseya nahuecaje'yo ese nahue'yojji Jesosa Quito jiquio meshiyasijje poeapoajo. Oya eseja mimishijo mano'yomajje queaja'a ebajji ojjaña joya ojo ejjashahuabaqui'yocuana mano'yomajje shequipea-aije'yo o jayojjaya. Eyacuiñajjija esohui queapame Quitojo jamaya poani, eseya ba'etiitiipoquije'yo onijje Eyahuasijje. Emanobeca'yojjitii pojjeama se poaje Quito mano'yomajje shequi'yapoajojoya.

¹¹ Eyacuiñajjiya eya nequimeecapoa oja esohui queapame Quitojo ona sohuihuohuiquinequijji epojji. Eya huoojeacapoa queahuisojaajjicuanahuasijje oja esohui huohuiquiya epoquijji.

¹² Majoneitiiya eya queacamajanee pomeecani cuaa oja esohuijonei. Eya queabicho po-ajja oja esohuijo jamatii eya queacamajanee nequipoquiani. Chojja, majo eya yenoyenoajja. Bacue, ecuea ebanei ajeo eya jjashahuabaqui'yapoa Jesosa Quitojo. Ecuea ebaneinei Eyacuiñajji queaca'aneetii nequipoquianiya oja quia esohui Quitojo ohuaya ajeyocaje'yo oe-ejjenei epojja apoa poajo. Ojaya epajea'yojjitii pojjeama poaje oja esohui Quitojo.

¹³ Jamajjeya ma ecua eyaya miya sohuihuohuipoquianaje jama pea-ai sohuihuohuimeya oe aquicue cuana queaja'a, oya esohuiya, pea pojjeama. A'a Eyacuiñajjija esohuijo jjashahuabapajeaqui'yojji. Jesosaja epeejjicuanaya oe queajea apoquiacuetii. Jamaya Eyacuiñajjiya eseya ba'emeepoquisa-acani eseya Jesosa Quitoja'yo poanijojoya.

¹⁴ Eyacuiñajjija esohui e'ejojonei oe shahuabapoquiacuetii ma queanahuenee mi ohua quiacanaje esohuitiiya. Edojjoshahuapameya miquea eyamidojjojo nequiya oja esohui nahuemeesahuacapoquije oja esohui pea miya ea'yo poanijje.

¹⁵ Miquea ebatii Jesosaja epeejji queahuisocuana provincia Asia meshijo ba'eca e ejeanobia ani baa poepajeaca'yonaje. Jamaya po'yonaje Figelo bajjani, pea Hermógenes bajjani pea-ai.

¹⁶ Onesíforo bajjani dejja ca peacuana jama pea-ai pojjeama poani. Ohuaya eya asahuacanajetii, yenoama pomeesahuacanaje pea-ai. Oya jamatii e ejeanobia anijo queabicho pojjeama poeyanaje eque e baa, e asahuaa. Jamajjeya eya Emeshimeseneinijje mimiani ojaya Onesíforo oja equijotii anicuana pea-ai queapame eba'emeesahuapoquiajjijo.

¹⁷ Ohuaya jomishocajjimaneiya eya sa-ajjacañaquinaje Roma meshi bañaquimajje. Majo nequiya ohuaya eya baca'yonaje.

¹⁸ Ojjañacuanaja oja mimishi huohui'yojji oe-ejjenei epojja poeajo Emeshimeseneiya oya queapamenee ca-acahua. Miquea ebanei yahuajo Onesiforohua eseya queahuiso asahuacanaje Éfeso meshijo nequi.