2 Peno 3 - Ese Ejja New Testament

Emeshimesenei poeo'oyajjijo huohuicapoa

¹ Jesosaja epeejjicuana ecue dohuecuana jjo'icuana, ecuea quiana queajeanee poani. Jiquio eyaya tehueaña pea miquianajaya ebapea-aijji. Ecuea esohui beca etehuejo eyaya quiana jjashahuabameequisa-aña miquiana queaja'a ba'epoquijjijo.

² Ma yahuajonei Eyacuiñajjija nequimee esohuihuohuijji poacuaa huohuicapoa Jesosa Quitojo esohuiya, a'a maya pajea'yojji quiaa. Jesosa Quitoja ese nahue'yojji poanija esohuicuana pea-aiya oe shahuabapoquiacue. Oya esohuitiiya oja babaca dejjacuaa huohuipea-aicanaje quiana, pea pojjeama.

³ Jiquio jjeya eya huohuije esohui oe quiaa shajja-ajjaneicue. Oe-ejjenei epojja beshahuanei apoa poechipianijo queahuisocuana ojayanei ejjashahuabaquijji queamimishi epojjijo ba'ecaje. Jesosaja epeejjicuanajo jjaniñebaquicaje, peajja jayojja acaje cuaa.

⁴ Jesosaja epeejjicuana soadojocaje cuaa jama ba'a: “¿Acheshono shai Quito poeje o'oya ma miquiana ohua yahuajo huohuicapoa esohui o poeo'oyajjijo? ¿Yajjajo shai oya mipoeo'oyani? Ecuanaja chiicuana manoca'yonaje jamatii o epoeo'oya pomejo. Oya jayojjayatii popoquiani ojjañacuana jiquio meshi panacajeahuajotii” jama soadojomeya acaje cuaa.

^5-6 Ma jjasoadojoquijji poajecuana jjashahuabaquiajjanei poaje yahuajoneitii Eyacuiñajjiya meshi, eyatahuatahua panacapoajo. Meshi enaquipajo ani ohuaya huosameecapoa oja esohuijo ena queaquemo chichamajje bae-aiai eanijji. Majoya jjashahuabaquiajjanei poajecuana jamatii Eyacuiñajjiya ojjaña jiquio oja pana meshi ohuajeameecapoa oja huoojea ena queaquemohua onaja mimishijo.

⁷ Jiquio jjeya ani meshi, eyatahuatahua pea-ai Eyacuiñajjiya animeecapoquianitii so'o quijje chama'yotii epomee'yojji oja esohuijo. Ojjaña ma queamimishi ba'ecapoquinajecuana huohui'yojji queaneenee o pomee'yojji epojja apoa poeajo, Eyacuiñajjiya jiquio meshi dahuajeajeyocaje'yo. Ma pojjajotiiya ohuaya dejja mimishicuana eponacuana pea-ai jeajeameecaje'yo quea-ohueshatii enequipoqui'yojji Cuaqui-aiyasijje.

⁸ Ecue dohuecuana jjo'icuana, a'a oe jiquio esohuijo jjapajea-ajjaqui'yojji. Emeshimeseneiya oe epojja bacani 1.000 shequiajame huiso jayojja poani. Ohuaya bapea-aicani 1.000 shequiajame huiso oe epojja jayojja.

⁹ Bacue, Emeshimesenei oja esohuicuana pajeapajea'yoajjanei poani. Ma ohua huohuicapoa huisotiiya esohuicuana ohuaya ajeyocaje'yo ojjañatii. Oya oja esohui eajeyo'yojjijo hueyahueya-ajjanei jamatii queahuisocuaa oya siajje poani poso acapoquiani oya mipoecuajio'oyajo. Emeshimesenei caca queahuisocuanajo jjaishoaquipoquianitii ojo ejjanahuemeequi'yojji, jamajojoya aje mipoecuajio'oyani. Quea-ohueshatii enequipoqui'yojji Cuaqui-aiyasijje Eyacuiñajji huoojeameesapo-ajjanei cuana che oema'nei cuama epoqui'yojji. Ojjañatii pea jjashahuabaquime po'yani Jesosa Quitojo, oja mimishi cajaa yajjijo pea-ai Eyacuiñajji basaya poani cuana.

¹⁰ Eseja Emeshimesenei o poeo'oyajji epojja apoa poajo e'ejojonei oya poeje o'oya. Jiquio ecua siipojjicuana huohuipojjima' quehuajje poecuajiani jamaya oya poeje o'oya queahuisocuana ojo jjashahuabaquiajjatii ba'ejo. Majoya eyatahuatahuajo nequica aquianacuana jjapojojeananaquicaje, queashajjaquijjonee poaje. Ojjaña majo nequica quiyojeajeyoje'yo. Ojjaña jiquio meshijo anica aquianacuana quiyojeajeyopea-aije'yo. Chama'yotii pomeecaje.

¹¹ Miquianajaya ebatii ojjaña jiquio meshijo anica aquianacuana quiyojeajeyocaje'yo, jamajjeya quiana oe jjeya queaja'a ba'epoquicue mimishiama Eyacuiñajjija esohui jayojjaya.

¹² Oe-ejjenei epojja Eyacuiñajjiya Jesosa Quito poeo'oyajji acapoajo jjaishoaquipoquicuetii. Jamajjeya chacochacopoquicuetii quiana ma epojja miquianaja epoemeecuajijjijo. Ma pojjajotiiya aje eyatahuatahua Eyacuiñajjiya quiyojeajeyomeecaje'yo. Cuaquijiji queaquiyoneeneeya ojjañatii aquianacuana majo nequica chama'yotii acaje'yo.

¹³ Eseyaya caca pea eyatahuatahua eyacua, meshi pea-ai eyacua ishoaña ma Eyacuiñajjiya huohuicapoaya quijje ohuaya panacaje'yo. Ma meshi pea eyacuajo ojjaña queapamenee popoquije'yo. Chama' poaje'yo queamimishi epojji, ojjañatiicuana queapamenee ba'ecapoquije'yo.

¹⁴ Ecue dohuecuana jjo'icuana, ecuea quiana queajeanee. Ojjaña jiquio queapamenee quijje poejejo jjaishoaquipoquiani quiana oe jjeya queaja'atii ba'epoquisapocue. Peanijje queamimishi pojjima'nei queabei queneama ba'e jjaishoaquipoquicue.

¹⁵ Miquianajaya queaja'a bacajji eseja Emeshimesenei queashequiajahuiso esejo jjaishoaquipoquianitii acheshono ohuaya eseya Eyahuasijje dojocaje'yo. Epojjacuana enequi so'o ojaya peacuana nahuepoquia'yojji. Eseja dohue esejaya queajeaneeya Pablohua jiquio esohui tehuepea-aicanaje quiana ma o Eyacuiñajjiya jjashahuabameequicanajejoya.

¹⁶ Queahuiso oja tehuecuanajo Pablohua huohuicanaje jiquio Jesosa Quito poeo'oyajjijo esohui. Beca oja tehuecuana queacamaja poani queahuisocuanaja ebajeyojji yajja poanijje shai. Jamajjeya joya esohui bapojjima'cuaa oja huohui shajja-ajjataimajje huohuitaicani. Eyacuiñajjija esohuicuana pea aca'yani pea-ai coma dejjacuaaya. Oja esohui jama a'yomajjeya oyatii Eyacuiñajjijo queaneenee jjapomeequije'yo ma dejjacuana quijje.

¹⁷ Ecue dohuecuana jjo'icuana, ecuea quiana queajeanee. Miquianajaya ebatii poani quijje esohui siajje ajji poanicuana poeje. Jamajjeya quiana oe jjajaahuananeiquicue macuanajoya, oya Eyacuiñajjija esohuijo jjashajja-ajjaquiajjanei. Queaca'a eba'epoquijjijo quiana oe jjajaahuananeiquipoquicue onaa edasiaca poanijje.

¹⁸ Miquianaya ca oe queaca'a tiipoquicue Emeshimesenei Jesosa Quitojo oja esohui baneipoquiamajje onijje jjapeequipoquimajje. Eyacuiñajjiya quiana queajeanee acapoquiani jjabaquicue. Quito bihuiacapoquijjitii jjeyanei, quijje pea-aiya. Jamaya capoahua.