2 Peno 2 - Ese Ejja New Testament

Esohuihuohuijji poani becacuaa siajje huohuicani

¹ Yahuajonei Israel meshijo esohuihuohuijji siajjepojjicuana enequiapoa. Oya jayojjaya miquianaja meshijo esohuihuohuijji siajjepojjicuana enequi jjeya. Esohui queapame jayojja yecaje cuaa jamatii siajje poaje oja esohuijo. Ojayanei ejjashahuabaquijji yecaje peacuana queaquehua jjashahuabameequi'yojji Eyacuiñajjija esohuijo. Ese jjeshe'yojji poani e-esemese Jesosa Quito cajaa aca'yani ma dejjacuaaya pea jjashahuabaquime queaquehua po'yomajje. Jama sohuihuohuime aca'yajo Eyacuiñajjiya macuanaya queaneenee pomeecuajicaje'yo oja mimishijo.

² Queahuiso Jesosaja epeejjicuana quijje o jayojja pea-aiya queamimishi peanijje ba'ecaje o'oya oja huohui esohuicuana siajje shajja-ajjamajje. Majoya oja epeejjicuana queamimishi ba'eo'oyani bamajje queatainee mimije cuana Eyacuiñajjija esohui e'ejojoneijo. Peajja jayojja acaje cuaa.

³ Miquianaja bejjo queahuiso equia jjeshejjijo esohui queapame jayojja acaje esohuihuohuijji siajjepojjicuaa, e'ejojonei pojjeamaa huohuicaje. Yahuajoneitii Eyacuiñajji jjashahuabaquiapoa ache o queaneenee pomee'yojji ohuaya quiacaje ma dejjacuana quijje. Chama'neinei Eyacuiñajjija neeama epomee'yojji poajecuana ohuaya queaneenee pomeecaje'yojojoya. Oya pea jjashahuabaquime po'yoajja ma dejja siajjepojjicuanajo.

⁴ Yahuajoneinei Eyacuiñajjiya angelcuanaja ma queaquehuanee jjashahuabaquicapoaja mimishi pajea'yojjimatii acapoa. Ohuaya macuanaya jeajeacapoa queamisineetii jaahuasijje. Ma queamisineejotiiya ojjaña equibojeyo anica, jjeyanei pea-ai. Eyacuiñajjiya majotiiya animeecapoquiani cuana quijje queaneenee epomee'yojji oja mimishi huohui'yomajje.

⁵ Oya jayojja yahuajonei pea-ai Eyacuiñajjiya jiquio meshijo ba'ecapoaja oja mimishicuana pajea'yojjimatii acapoquiapoa. Majoya quijje ohuaya ena queaquemonee oquemeecapoa ojjaña ma o sapo-ajjanei ba'ecapoacuana hui'ijeamee'yojji. Noeneiya caca oe che oenei Eyacuiñajjiya nahuecapoa, oja huapa pojjeamaneicuana siete huisome nahuepea-aicapoa, mahuisoneiya. Noeya Eyacuiñajjija esohui queashequiajahuiso huohuiajjacapoquiapoa cuana queapame oja esohui jayojja ona ba'epoquijji nisho.

⁶ Oya jayojja Eyacuiñajjiya Sodomacuiñajjicuana, Gomorracuiñajjicuana quiyojeameejeyoca'yapoa oja mimishijo. Oja meshi chama'yotii pojeameeca'yapoa, cuaquipohui ani'yapoa. Jamajjeya ma Eyacuiñajjiya ajeaca'yapoa cuana oja mimishijo bamajje shahuabacapoquijjitii joya jjeya o sapo-ajjanei ba'ecacuana queaneenee pomeepea-aicaje'yo oja mimishijo.

⁷ Eyacuiñajjiya ca che dejja oenei majo ba'e nahuecapoa Lot bajjaninei. Oya queapame mimishiama ba'epoquiapoa Eyacuiñajjija esohui jayojja. Onijje ba'ecacuana queamimishineetii ba'epoquiani bamajje Lot queayenonee poa macuanajoya.

⁸ Lotya queajjashahuabaquija'a nequiya onijje ba'ecaja mimishicuana ojjaña pojjajo bamajamajacapoquiapoa queayenoneeya. Onijje ba'ecacuana Eyacuiñajjija esohuijo shajjama'nei jayojja popoquianitii bamajje Lot queacojjayenonee nequipoquiapoa.

⁹ E'ejojonei jamaya Emeshimeseneiya nahuecaje cuana queacamajaneetii eba'epoqui poanijje, joya oja epeejjicuana ojo jjaquiaqui ba'eca. Joya jjeya queamimishitii ba'epoquianicuana ca Eyacuiñajjiya nequimeecani so'o quijje ojaya queaneenee epomee'yojji oja mimishi huohuijeyo'yomajje. Ohuaya ojjaña joya queamimishitii ba'epoquianicuana oopana chichacaje'yo quijje oja mimishi huohui'yojji epojja poeajo o queaneenee pomee'yojji.

¹⁰ Jamajjeya joya peanijje queamimishitii popoquianicuana oja yamijo, joya Emeshimesenei eomese epojji sa-ajjanei poanicuana pea-ai Eyacuiñajjiya queaneeneetii pomeecaje'yo. Joya esohui siajje huohuijji poanicuana queamimishica'a poani, shajjama'nei jayojja ba'epoquiani. Oja mimishijo yenoyenoajjanei oya. Eyacuiñajjija angelcuana etii poani Eyajo nequicajo queatainee mimiani ma dejjacuanaya, oja esohuijo jjashajja-ajjaquiajjanei pea-ai.

¹¹ Eyacuiñajjija angelcuana joya esohui siajje huohuijji poanicuana jama pea-ai pojjeama. Oja angelcuana ca queaca'anee nequiani ona huoojeapoquiajji poani. Jamatii queaca'anee nequi oya esohui pea angeljo queatai mimiajja, peacuana queamimishi poani huohuiajja Emeshimesenei ani cojjaneijo.

¹² Joya esohuihuohuijji siajjepojjicuana ca joya ecua ijjiacajjicuana jjashahuabaquiajjanei jamaya poani. Coma dejjacuana jamatii ba'ejeapoquiani, ojayanei ejjashahuabaquijjijo queamimishi popoquiani. Joya ecua ijjiacajjicuana dejjaja quijje equecua'yojji cuayapoquiani jama pea-aiya comacuanaya nequipoquiani. Ojaya bajjimajo jamatii esohui queatainee mimijeani majoya. Joya ecua ijjiacajjicuana quecuaca'yani cuaa jama pea-aiya comacuanaya acaje'yo Eyacuiñajjiya quijje oja mimishijo.

¹³ E'ejojonei coma dejjacuanaya quijje queaneenee pomeecaje'yo Eyacuiñajjiya ohua pea queaneenee pomeeca'yonaje sosejje. Jjeya ca queabihuinee jayojja jjabaquipoquiani so'o oja mimishijo. Peanijje queamimishi epojjijo jjashahuabaquipoquianitii. Coma dejjacuanaya o jama pojjijo bichoamanei poani. Epojjacuanajoya ja'anei queamimishi popoquiani. Jamatiiya queamimishinee poani coma dejjacuanaya miquiananijje ijjiaijjiani ojee fiestajo. Jamajjeya majoya queabihuinee poani cuana.

¹⁴ Coma dejjacuanaya cua ohua bacani huisotii eponacuananijje jaasapoani. Oja mimishijo peanijje ejaajji hueyahueya-ajjanei, oja mimishicuana cajaa asapo-ajjanei. Joya Jesosaja epeejjicuana ca'a-ama poani esohui siajje acani comacuaaya onijje queamimishi epojjijo. Acuichaa equehuahuana jaa jamaya oya poani pea queamimishi pomeejji. Comacuanaya queabejjojeanee poani, jamajjeya majotii oya jjashahuabaquipoquiani. Ojjaña joya jama queamimishinee ba'epoquianicuana Eyacuiñajjiya quijje queaneenee capomeeca'yahua.

¹⁵ Coma dejjacuaaya Eyacuiñajjija esohui cajaa aca'yonaje queaquehua jjashahuabaqui'yomajje. Ecuaquisho jayojja ba'epoquiani, ajeo oya eshe nequipoquiani jjabaquiajja. Yahuajonei ma ecua esohuihuohuijji poa Balaamya, Beorja bacuaejjaa, queaquehuanee acapoa jama pea-aiya acapoquianitii cuaa. Balaamya bejjo queahuiso iñasa-acapoa ma Eyacuiñajji sapo-ajjanei poa sosejje.

¹⁶ Jamajjeya Eyacuiñajjiya Balaam yacapoa oja mimishijo. Oe oja mapichi mimiajja Eyacuiñajjiya mimimeecapoa onijje queaja'a oya majo queamimishi epo poanijje. Jamajjeya oya queamimishi pomeejjima acapoa oja mapichiya oya queaquehuanee jjashahuabaquiani bamajje.

¹⁷ Coma esohuihuohuijji siajjepojjicuana joya ecua enanequijji eteo enama'yo nequi jamaya oya poani, peajja. Joya ecua bocuana becacuana nama' beniya dojocani jama pea-aiya oya poani, peajja. Jamajjeya Eyacuiñajjiya apoa acapoa ma dejjacuana nequitiitiipoqui'yojji queamisineenee.

¹⁸ Coma dejjacuaaya oyanei queapame jjabaquianiya esohui peajja ojayanei ejjashahuabaquijji huohuicani cuana janobajjimanei. Joya jjeyanei pea jjashahuabaqui'yome epocuana oja mimishijo coma siajjepojjicuaaya esohui huohuitaicani. Ojayanei ejjashahuabaquijji peanijje jaacapoquijji jamatii coma dejjacuaaya huohuitaicani. Ojayanei esohui siajje ehuohuijo jamaya queaquehuanee pomeeca'yani cuana. Majoya Jesosaja epeejjicuana eyacua huacuaya poquimeeca'yani, esohui oja siajjejo oquequimeeca'yani cuana queamimishi epo-o'oyajji peanijje.

¹⁹ Jama siajje sohuihuohuime acani cuaa ba'a: “Ecuanaja huohui esohuineijo jjashajja-ajjaquimajje Eyacuiñajjija esohuicuana miquianaja eshajja-ajjajjitii pojjeama poaje. Eyacuiñajjija esohui jayojja miquianaya eba'epoqui'yojji pojjeama poaje” jamaya comacuana poani. Jamatiiya ma esohuihuohuijji siajjepojji poanicuaa mimishi eomesetii pomeecani. Ojayanei ejjashahuabaquijjicuaa oja yamijo nequiya oya queamimishitii pomeecapoquiani. Jama jjapomeequimajje queayenoneetii poaje. Bacue, joya o jjashahuabameequipoquijji poani, comaya eomese poani oya majo jjashajja-ajjaquipoquianitiijjejojoya.

²⁰ E'ejojonei ojjaña joya eseja Emeshimesenei Jesosa Quitojo jjashahuabaqui'yojji poanicuana Eyacuiñajjiya nahueca'yonaje jiquio meshi nequica dejja queamimishi jayojja pea-ai eba'epoquitii poanijje. E'e pojja'a beca Jesosaja epeejjicuana queamimishi eba'eo'oyajjijo jjapomeequije, mimishi eomese epojji pomeecaje o'oya. Comacuanaya queamimishinee ba'eje'yo, ma ecua oya ebionei sohuima' jayojja ba'e queamimishipishana poa jama pojjeama poaje'yo.

²¹ Joya mimishi eomese pomeeo'oyajji poanicuanaja ojaya Eyacuiñajjija esohui queapamenee eba'epoquijji ebionei shajja-ajjaca-ajja poanaje. Bacue, joya Eyacuiñajjija esohui queapame cajaa a'yojji poanicuana queamimishinee ba'eje'yo joya ecua oma' jayojja poanicuana jama pojjeama.

²² Eyacuiñajjija esohui yahuajonei tehue jama poani macuanajoya ba'a: “Joya ecua iñahuehuacuaa bohuimajje oja bohui huacuaya ijjiajeaca'yani jamaya poani cuana, oja mimishi eomese pomeeo'oyajji poanicuana. Joya ecua cuichicuana enajo besa huacuaya oja meshihuahua jjopiyasijje jaaquio'oyani jamaya po'yani cuana oja mimishijo, eomese pomeecao'oyani.”