2 Conitio 1 - Ese Ejja New Testament

Ebionei esohui queapame ehuohuijji

¹ Eya Pablo bajjani Eyacuiñajjija ejjashahuabaquijjijo ona sohuihuohuiquinequijji poani Jesosa Quitoja huoojea. Eyaya, eseja dohue Jesosajo, Timoteonijje aniya jiquio esohui tehueaña miquianaya ciudad Corinto meshijo ba'eca joya esohuijo jjachichaquipoquianicuanaja ebajji. Miquianajaya, joya Eyacuiñajjija'yo poanicuana provincia Acaya meshijo ba'ecaja ebajji pea-ai tehueaña.

² Eyacuiñajji eseja Chii-aiya, Emeshimesenei Jesosa Quitohua pea-ai miquianaya queapamenee ca-acapoquiahuatii ojayanei ejjashahuabaquijjijo, queaquijijjijajinee capomeecahua quiana pea-ai ohuaya.

Eyacuiñajji bihuiacapoquijjitii

³ Eyacuiñajji esejaya Emeshimesenei Jesosa Quitoja Chii cabihuiacapoquiahua ojjañacuaa. Oya esejaya Chii-ai ese queanee pomeecuaji'yoajja poani eseja mimishijo. Oya Eyacuiñajjiya ese yenoama pomee'yojji poani pea-ai.

⁴ Ecuana queayenonee poanijo, peaa queacamajanee pomeecanijo pea-ai ecuana yenoama pomeesahuacapoqui'yanitii Eyacuiñajjiya. Jamajjeya ecuananijje ba'ecacuana Jesosaja epeejji peacuaa queacamajanee pomeecajo, ecuaa oya yenoama pea-ai pomeesahuaje'yo ohuaya jayojjaya. Jiquio ecua ecuana Eyacuiñajjiya acani jayojjaya ecuaa peacuana yenoama pomeesahuapea-aije'yo.

⁵ Ma ecua dejjamasecuaa Quito queacamajanee, queaneenee pomeecapoa jayojja ecuana queacamajanee pomeepea-aicapoquiani queahuisocuaa oja epeejji poanijojoya. Majoya Eyacuiñajjiya ecuana yenoama pomeesahuaca'yani ecuana Quitonijjetii ojee nequi ojaya'yo jjabaquiajo.

⁶ Jamajjeya ecuana queacamajanee, queaneenee pomeecajo miquianaya yenoama poaje'yo. Miquianaya queaca'a etiipoquijjijo ecuana queacamajanee pomeecani baña quiaa. Bacue, Eyacuiñajjiya ecuana yenoama pomeesahuacapoqui'yani. Ecuana jama pomeeca'yani bamajje miquiana queaca'a ba'epoquije oja esohuijo jamatii onaa queacamajanee pomeepea-aicani quiana jiquio ecua ecuana queacamajanee pomeecani jama pea-aiya.

⁷ Ecuana ca jjashahuabaquipoquianitii miquianaya queaca'a eba'epoquijjijo. Ecuanaja ebanei miquianaya queacamajanee pomeecapoquiani cuaa Eyacuiñajjija esohuijo ecuana jayojja pea-aiya. Ecuanaja ebanei pea-ai Eyacuiñajjiya quiana yenoama pomeesahuacapoquije'yo jiquio ecua ecuana yenoama pomeesahuaca'yani jama pea-aiya.

⁸ Jesosaja epeejji ecue dohuecuana, ecue jjo'icuana pea-ai, ecuaa jiquio esohui tehueaña miquianajaya ebajji ecuana queaneenee pomeecanaje cuaa provincia Asia meshijo nequi. Majo nequi ecuana queayenonee ani jjabaquinaje. Onaa queacamajanee acajje ecuana ma meshijotii nequi emanoje'yo poso jjabaquinaje.

⁹ Jiquio ecua dejja soldado etiicuaa pea manomee'yojji huohuicani jamaya ecuana jjabaquinaje, e'ejojonei onaa emanomeecaje'yo poso. E'e majo jama queacamajanee acajje ecuananei ca'a-ama poani jjabaquinaje. Jamajje Eyacuiñajjijonei jjashahuabaquinaje oja ecuana enahuejji, ojaya ecuana queaca'a epomeejjijo pea-ai. Eyacuiñajji e'ejojonei queaca'aneetii nequipoquiani, emano'yo jaacuana shequimee'yojji poani oya.

¹⁰ Majoya aje Eyacuiñajjiya ecuana nahuecanaje dejjamasecuanaja emanomee'yojji pojjeamajo. Quijje pea-ai ohuaya ecuana nahuepea-aicaje ma dejjamasecuanajoya macuaa queacamajanee acajo. Ecuana jjashahuabaquipoquianitii Eyacuiñajjiyanei ecuana nahuecapoquije, macuanaja emanomee'yojji pojjeama poaje.

¹¹ Jamaya ecuana dejjamasecuanajo nahuecapoquije miquianaya Corintocuiñajjicuana Eyacuiñajjinijje mimipoquiajo ecuanajo. Queahuiso pea Jesosaja epeejjicuaa Eyacuiñajji bihuiacaje miquianaja mimijo ecuana nahuecanaje shajja-ajjamajje.

Pablohua tehuecapoa yajjajo oya mipoquinaje Corinto meshiyasijje

¹² Ecuana queapame chacochacopoquinaje miquianaja meshijo nequi jjabaquiani. Ecuanaja esapadojjojje queaja'a jjashahuabaquipoquinaje jjabaquiani pea-ai, mimishi huanaquehuajjimanei nequinaje. Jamajjeya ecuana mimishiama, queaja'a pea-ai ba'epoquiani jiquiojo, miquianaja meshijo nequi pea-ai. Jamaya Eyacuiñajjiya ecuana ba'emeesahuacapoquiani. Ecuana jiquio meshijo nequica dejjaja ejjashahuabaquijjijo pojjeama queaja'a ba'epoquiani. Ecuana ca jjashahuabaquipoquianitii Eyacuiñajjiya ojayanei ejjashahuabaquijjijo ecuana queapamenee acapoquijetii.

¹³ Jamajjeya jiquio ecuaa tehueaña esohuicuana queaja'a bacajji quianaja. Ecuana jjashahuabaquiani miquiaaya queaja'a baje yajja poanijje jiquio esohui ecuanaja tehue.

¹⁴ Jamatiiya miquianaja jjeya pojja'a queaja'apishana poani ache echacojji ecuaa apoquiaña, achajja ecuana ba'epoquiani pea-ai. Jamajjeya ecuaa majoya tehueaña miquianaja queaja'a ebaneijji. Majoya quijje eseja Emeshimesenei Jesosa Quito poeo'oyajo miquianaya queabihui peacuananijje mimije ecuanaja eba'ejjijo. Oya jayojja ecuana peacuananijje queabihui mimipea-aije miquianaja eba'ejjijo.

¹⁵ Miquianajaya eba ecuana queapamenee chacochacopoquiani, jamajojoya eya ebionei cuama miquianaja meshiyasijje epoquijjinisho po-ajjanaje. Eya jama epoquinei poanajejjemo beca anime pohua poquiquiae miquianaja meshiyasijje anicuaa.

¹⁶ Eya jjashahuabaquinaje provincia Macedonia meshiyasijje poquimajje eyaya miquianaja meshi ebionei bañaquije miquiananijje aninanaa so'o. Majoya Macedonia meshijo ani poeje'yo eya miquianaja meshijo aniñaje o'oya, eya jama poaje jjashahuabaquinaje. Miquianaja meshijo ani miquiaaya eya poquimeesahuaje provincia Judea meshiyasijje eya jjashahuabapea-aiquinaje.

¹⁷ Eya cuamaya epoquijjijo miquiana baa, ¿a'a eya e'ejojonei pojjeama jjashahuabaquime poanaje baña quiaa? ¿A'a miquiaaya eya baña beca jjashahuabaquime poani? ¿A'a eya joya dejja ebionei mimiani e'e majoya chojja pocuaji'yani jamaya eya baña quiaa?

¹⁸ Eyacuiñajjiya ecuana bacapoquianitii ecuana beca jjashahuabaquime po-ajja. Ecuana e'e majoya chojja pocuaji'yani jama po-ajja.

¹⁹ Bacue, Jesosa Quito Eyacuiñajjija Bacuaejja jiquio ecuaa Silvanohua, Timoteohua, eyaya pea-ai esohui queapame ojo huohuipoquiaña miquianaja meshijo nequiya beca jjashahuabaquime pojjima'tii poanaje. Ecuana e'e majoya chojja pocuaji'yoajja poani. Jiquio ecuaa huohuiaña esohui oya esohui jayojjaya ba'epoquiani ma ecua Quitohua Eyacuiñajjija esohui e'ejojonei ajeyoca'yapoa jama pea-aiya.

²⁰ Ojjañatii Eyacuiñajjija esohui Quitohua ajeyocapoqui'yani ma ohua yahuajonei tehuemeecapoa jayojjaya. Jamajjeya ecuaa Eyacuiñajji bihuiamajje amén aña Jesosa Quitoja bajjanijo. Amén esohui jama poanijje ba'a: “Jamaya capomeecahua Eyacuiñajjiya.”

²¹ Eyacuiñajjiya eseya queaca'a ba'emeecapoquiani Jesosa Quitojo. Eyacuiñajjiya eseya Quito jayojja pea-ai bacani ojee nequi ojaya'yo. Ohuaya eseya ojo queapame echacochacopoquijji bacapoquiani pea-ai.

²² Jiquio ecua dejjaa oja huo ehuone jeasiicani ojjañaja ebajji ojaya poani, oya jayojjaya Eyacuiñajjiya oja Edojjoshahuapame eseya quiacanaje ojjañacuanaja ebajji eseya ojaya'yo poani. Jamajje Edojjoshahuapame eseja yamidojjojo nequiani eseja bajji ojjaña ma Eyacuiñajjiya huohuicapoa huisotii e'ejojonei quijje quiajeyocaje.

²³ Bacue, Eyacuiñajjiya eya bacapoquianitii eya esohui siajje a-ajja. Eya cuamaya miquianajaya meshiyasijje poquijjima poani so'o, miquiana queayeno pomeeya poquisapo-ajja.

²⁴ Ecuanaja eba miquianaya queaja'a jjashahuabaqui'yonaje Quitojo, jamajjeya ecuana emiquianamese jama pojjeama poani. Ecuaa ca quiana ca oe queaja'a oja esohui bameesa-aña miquiana queabihui ba'epoquijji majoya.