1 Timoteo 6 - Ese Ejja New Testament

¹ Joya ejjeshe peajo chacochacopoquianitiicuanaja o chacomeejji poani dejja queapame eomese poani bacajji. Oja esohuijo jjashajja-ajjaquicapoquijji. Miquiana shajjama' jayojja poajo oja esohuijo queamimishi poani quiana bacaje cuaa. Majoya Eyacuiñajjija esohui cajaa acaje cuaa miquiana shajjama' jayojja poani bamajje. Jamajjeya oe a'a shajjama' jayojja ba'ejji ecuanaja huohui esohui onaa queaquehua poani eaca poanijje.

² Pea quiana ca Jesosaja epeejjijo chacochacopoquiani, jamajjeya miquiana chacomeejji poani dejja Jesosaja epeejji. A'a quiana oe oja esohuijo jjashajja-ajjaquisapo-ajja pojji oya miquianaja dohue poanijojoya Jesosajo. Chojja, onijje jama poca-ajja. Jamajjeya oe chacochaconeipoquicue ojo hueya-amanei oya Jesosaja epeejji pea-ai poanijojoya. Oya queajea acajji quianaja. Oya Jesosaja epeejji poanijojoya queapamenee quiana ojo chacochacocajji.

³ Jiquio esohui ecue tehue oe huohuineicue cuana jama ba'a: Enequi dejjacuana pea esohui queaquehua huohuijji poani. Coma dejjacuaaya esohui huohuicani eseja Emeshimesenei Jesosa Quitoja esohui e'ejojonei jama pojjeama, pea. Oja huohui esohui ecuanaja ebanei queapame pojjeama poani ese queaja'a ba'emeepoquiajji.

⁴ Coma dejjacuana esohuihuohuijjinisho poanicuana oyaneitii queasapaja'a poani jjabaquiani. Chojja de, oya oja sapadojjojje queaquehuanee poani. Ojaya ca bajjima poani achajja shai Eyacuiñajjija esohui poani. Oya mimijajipoquianitii, jjasohuicuiajeanobiajeaquiani peanijje Eyacuiñajjija esohuijo. Jamaya ojaya queabotinee. Jamajjeya oja esohui shajja-ajjajji poajecuana queaquene ba'yani, onijje ba'e dejjacuanajo queaquehua jjashahuabaquiani, peaja aquianacuana ohuaya jeabacani, esohui queatai jeacuayacani peajo pea-ai.

⁵ Joya esohui queaquehua shajja-ajjajji poajecuana onijje nequica dejjanijje jjabeiqui'yoajja ba'yani, queaquenetii poani. Oya oja sapadojjojje queaquehuaneetii jjashahuabaquipoquiani. Eyacuiñajjija esohui huohuijo oya queabejjohuiso epoaje poso jjabaquiani pea-ai.

⁶ Eseya ca Eyacuiñajjija esohui jayojja queabihui ba'epoquianijo jamatii aema'pishana. Quea-aquianahuiso posapo-ajja nequi Eyacuiñajjiya eseya queabihui pomeecaje quea-aquianahuiso ba'e jayojja.

⁷ Bacue, eseya jamatii aema'nei cuayapoa jiquio meshijo. Oya jayojjaya se quijje mano'yomajje aema'nei poquije'yo, aquianacuana esejaya edojo'yojji pojjeama poaje.

⁸ Jamajjeya eseja bobicuana yanijo daquicuana pea-ai yanijo queabihui se ba'ecapoquijji mahuisoya pea aquianacuana queahuiso sapoca-ajja.

⁹ Joya jiquio meshijo ani aquianacuana queahuiso jjeshesapojji poanicuana ebionei eshahuaa oya queamimishi pomeecapoquije majoneitiiya. Eshahuaa oya siajje acajje aquianacuana queahuiso jjeshesa-acaje ohuaya majo queabihuitii epojji nisho. Majoya quijje oya manoje'yo Eyacuiñajjima' jayojjatii nequi queaneetii enequi'yojji Cuaqui-aiyasijje.

¹⁰ Joya queabejjojeaneetii poanicuana queamimishihuiso poaje bejjo queahuiso jjeshepoquiajjijo. Becacuaa bejjo queahuiso chichajjijo jjashahuabatiiquimajje Eyacuiñajjija esohui pajeaca'yani, cajaa aca'yani. Jjeya becacuana queayeno ba'yani majoya queabejjohuisonee posapomajje.

Queaja'atii ba'ecapoquijji esohuijo

¹¹ Miya Timoteo Eyacuiñajjija babaca, jamajjeya oe a'a jama pea-aiya queamimishi posapojji. Queaja'atii oe ba'epoquisapocue mimishiama. Eyacuiñajjija esohuijotii jjashajja-ajjaquipoquicue. A'a ojaya esohui cajaa a'yojji. Queaja'a jjashahuabaquipoquicue. Peacuana queajeatii apoquiacue. Queaca'a oe nequipoquicue ojjaña pojjajo. Peacuana oe asahuapoquiacue miquea meshijo minijje ba'ecacuana.

¹² Joya ecua soldadocuana queaca'a nequiani peaja oya quecua'yojjima yajji jama pea-aiya oja esohuijo queaca'a jjapomeequicue. Queaca'a oe nequipoquicue, majoya quijje Eyacuiñajjiya mi queabihui pojjicuana quiacaje quijje onijje Eyajo nequi'yajo. Eyacuiñajjiya miya iyaacapoa ojaya epo'yojji. Jamajjeya miyaya queahuisocuana anicajo ojo jjashahuabaqui'yomajje esohui ja'anei huohuiapoa cuana miya ojaya'yo poani.

¹³ Eyacuiñajji ojjañacuana eshe pomeejji poanijo jjashahuabaquicue. Jesosa Quitohua Pilato ani cojjaneijo nequiya esohui e'ejojonei huohuicapoajo jjashahuabapea-aiquicue. Maya eseya bacani.

¹⁴ Jamajjeya eyaya miya huohuineiaña ojaya esohuijo ejjashajja-ajjaquipoquijji ma eya mi huohuipoquianaje huisotii esohuijo. A'a pea jjashahuabaquime po'yojji. Queaja'atii ba'epoquicue, mimishiama onaja bajji Jesosa Quito eseja Emeshimesenei poeo'oyajo.

¹⁵ Eyacuiñajji oya oenei queaca'aneetii ojjañacuana huoojeapoquiajji poani. Oya ojjaña dejjacuana etii poani, emeshimesecuana pea-ai huoojeapoquiajji poani. Oya eojjañacuanamese popoquianitii, chama'nei pea oya jayojja. Jamajjeya oya cabihuiacapoquiahua cuaa ojjañaa. O poeo'oyajji epojja apoa poajo ohuaya Quito huoojeacaje o'oya jiquio meshiyasijje.

¹⁶ E'e, Eyacuiñajji oyaneitii nequipoquiani mano'yoajjaneinei. Oya queasajajaneejo nequi, jamajjeya ojjaña dejjacuana eponacuana chama'nei cuamaya ejjanequichipiquijji oque. Che oema'neicuanaja oya Eyacuiñajji eba oja ecojjaja. Oya jjabameequiajjanei esejo. Jamajjeya oya ejjabihuiatiiquipoqui. Eyacuiñajji queaca'anee poanitii bihuiapajeaca-ajja. Jamaya capoahua.

¹⁷ Joya jiquio meshijo quea-aquianahuiso ba'yanicuana niñesheacue oya majoneitii queaca'a poani ejjabaqui poanijje. Oja aquianacuana queahuisojo queabihuitii ba'epoquije ejjabaqui poanijje oya queaja'a huohuicue. Aquianacuana caca anitiitiipoquiajja, oe poani. Jamajjeya Eyacuiñajjijo jjashahuabaquicapoquijjitii. Coma Eyacuiñajjiya eseya ese queabihui pojji aquianacuana quiacapoquijetii queahuiso.

¹⁸ Huohuipea-aicue dejja quea-aquianahuisocuana onijje ba'eca ojaya easahuajjijo. Oja bobicuana quiacajji cuana joya aema'pishana ba'epoquiani. Jamajjeya queahuiso yanijo ojaya peacuana nahuejjima quiacuajime acajji.

¹⁹ Dejjacuana joya quea-aquianahuiso poani peacuana asahuajji jama ba'epoquianiya quijje Eyacuiñajjija quia queahuisonee jjeshecaje Eyahuasijje nequi'yohua. Oja quiajji apoa ani queahuisonee Eyajo ejjesheñaquijji cua cuama poquije'yo cuanaja.

Pablohua oe-ejjenei esohui acapoa Timoteo

²⁰ Timoteo, Eyacuiñajjija esohui nahueneicue ma eya mi huohuinajeya miquea quijje peacuana huohuiquijji. A'a esohui queaquehuajo dejjaja huohuijo jjashahuabaquijji ma onaa anishocani queasapaja'a epojji esohuicuanajo. Peajja ca coma.

²¹ Becacuanaja pa coma esohuicuana eshajja-ajja, ebaya. Majoya ma esohui jama poani shajja-ajjamajje Eyacuiñajjija esohui cajaa aca'yonaje beca oja epeejjicuaa. Emeshimeseneiya quiana queapamenee ca-acapoquiahua ojayanei ejjashahuabaquijjijo.