1 Timoteo 1 - Ese Ejja New Testament

Pablohua ebionei esohui Timoteo queabihui pojji acapoa

¹ Eya Pablo Jesosa Quitoja huoojea. Eseja Emeshimesenei Jesosa Quitohua queaja'a huohuicani eseya quijje e'ejojonei Eyahuasijje queapamenee ba'epoquije'yotii. Ese nahue'yojji poani Eyacuiñajjiya eya babacacapoa ona sohuihuohuiquinequijji epojji.

² Eyaya jiquio esohui tehueaña mique Timoteo, miquea ebajji. Miya ecue bacuaejjanei jayojja poani miya Quitojo jjashahuabaqui'yonajejojoya. Eyacuiñajji eseja Chii-aiya, Emeshimesenei Jesosa Quitohua pea-ai miya queapamenee ca-acapoquiahuatii ojayanei ejjashahuabaquijjijo, miya queaquijijjijajinee capomeecahua pea-ai ohuaya.

Eyacuiñajjija esohui peaa huohuitaicanijo Pablohua tehuecapoa

³ Eyaya provincia Macedonia meshiyasijje poquijeya huohuineinananaje mi Éfeso meshijotii enequijji so'o. Majo nequica dejjacuaa ojayanei ejjashahuabaquijji huohuicanequinaje cuana, Eyacuiñajjija esohui huohuitaipea-aicanaje. Jamajjeya eyaya miya majo nequimeenaje miquea ma dejjacuana esohui queaquehua huohuimeejjima yajji.

⁴ Coma dejjacuaaya etiiquianaja esohuinei huohuicani, mahuisoneitiiya. Ache etiiquiana yahuajonei cuayapoa, ae bajjani oya poa, ae ponequiapoa oya, majotiiya jjashahuabaquiani. Ojjaña joya ma esohuicuanajo jjashahuabaquipoquijjitii poanicuana ma esohuicuanajotii mimijeapoquiani peanijje equenequenejji. Coma esohuicuana ese asahua-ajjanei Eyacuiñajjija echacojji yajji. Eyacuiñajjija esohuijo queaja'a jjashahuabaquimajje ca se ca oe queapame chacochacoje.

⁵ Ecuanaja huohui esohuicuana ca eseja peacuana esenijje ba'e queajea acapoquijji ecuaa huohuiaña. Bacue, eseya queaquijijjibojea, mimishi huanaquehuajjimanei ba'ecapoquijji peacuana queajea apoquiajji. Eseya Eyacuiñajjija esohuijo jjashahuabaquibeca ba'eca-ajja peacuana queajea eapoquiajji.

⁶ Becacuana ca jama ba'epoquiajja, Eyacuiñajjija esohui cajaa aca'yani. Jama po'yomajje esohui queaquehuajo jamatii mimijeapoquiani cuana emimijajijji peanijje.

⁷ Coma dejjacuaaya Eyacuiñajjija esohui Moisesja tehuecuana huohuisaneiacani cuana jamatii yajja poanijje comaya esohui ojaya bajjima. Oya jama poani ba'a: “E'ejojonei caca jiquio esohui” jamatii yajja poanijje shai ojaya bajjima.

⁸ Esejaya eba Eyacuiñajjija esohui Moisesja tehuecuana queapamenee jaa. Jamajjeya ebionei baneineicajji yajja poani coma esohuicuana, ajeo tehuemeecapoa pea-ai queaja'a ehuohuijji baneineicajji.

⁹ Ma esohuicuana Eyacuiñajjiya Moisés tehuemeecapoa joya queaja'anee ba'epoquianicuana huohuijji pojjeama. Ohuaya ca oja esohui tehuemeecapoa joya shajjama' jayojjatii poanicuana queanee pomeecaje jjabaquijji oja mimishijo. Joya Eyacuiñajji sapo-ajjanei poanicuana, joya emeshimese etii poanija esohuijo jjashajja-ajjaquiajjatii poanicuana, joya queamimishitii popoquianicuana, joya oja chii quecua'yojji poaje, oja nae quecua'yojji poaje, ojjaña joya pea quecua'yojji poajecuana pea-ai oja esohui etehuemeeya o queaneenee po'yojji oja mimishi huohuijeyocaje'yo.

¹⁰ Joya peaja ehuanasenijje, peaja yahuenijje jaaani cuana, joya onijje dejjanijje jaaanicuana, onijje eponanijje jaaanicuana pea-ai, joya dejja, epona quiajji poanicuana bejjo sosejje peajo echacochacopoquijjitii, joya siajje pojjicuana, joya Eyacuiñajjija bajjanijo e'ejojonei ojaya esohui ajeyocaje nisho poanicuana, joya Eyacuiñajjija esohui pea huohuime a'yojji poanicuana pea-ai oja esohui etehuemeeya o queanee po'yojji oja mimishi huohuijeyocaje'yo.

¹¹ Eya ca iña Eyacuiñajjija esohui pea huohuime a'yoajja. Jiquio esohui eyaya huohuiaña Eyacuiñajjija esohui e'ejojonei poani Quitojo ejjanahuemeequi'yojji. Oja esohui queapame huohuiquijji epojji ohuaya eya nequimeecapoa. Jamajjeya seja Eyacuiñajji bihuiacapoquijji.

Pablohua Eyacuiñajji bihuiacapoa oya queapamenee nequipoquianijojoya

¹² Eyaya eseja Emeshimesenei Jesosa Quito gracias apoquiaña ohua e queaca'a pomeecanajeyajjejojo ojo echacochacopoquijji. Eya queapame chacochacopoquije oja esohuijo ohuaya bacapoa. Jamajjeya oja esohui huohuiquiya epoquinequijji eya nequimeecapoa.

¹³ Yahuajo eyaya oja epeejji pojjima' nequiya Jesosa Quito siajjepojji poso huohuiapoa cuana. Ma oja epeejjicuana ba'eca eyaya jeanobiameepoquiapoa eya queamase poajjejojo. Oja epeejjicuana eyaya peajja poso apoa. Eya jamatii queamimishihuiso nequi Eyacuiñajjiya queanee pomee'yojjima acapoa eya ojo jjashahuabaqui'yojjima poajojoya. Eya Jesosa sa-ajjanei poani pomajje queamimishi poani jjabaquijjimanei poa yahuajo.

¹⁴ Jamaya eseja Emeshimeseneiya eya queapamenee acapoquiapoa queahuiso ojayanei ejjashahuabaquijjijo. Ohuaya eya queaja'a jjashahuabameequicanaje oja esohuijo, peacuana queajea ameesahuacanaje pea-ai. Eseya Jesosa Quitoja'yo poanijojoya jamaya eseya ohuaya pomeecani.

¹⁵ Jiquio esohui e'ejojonei poani, jamajjeya oe quiojoya jjashahuabaneiquica'yojji. Jama poani ba'a: “Jesosa Quito jiquio meshiyasijje poeapoa ojjaña dejjacuana, eponacuana pea-ai queamimishi poani nahue'yohua.” Eya caca oe ebionei queamimishineenee poa peacuana jama pojjeama jjabaquiani.

¹⁶ Jamatii eya Jesosa sapo-ajjanei nequi ohuaya eya queapamenee acapoa ojayanei ejjashahuabaquijjijo ojjañaja ebajji Jesosa Quitohua queaneenee pomeecuaji'yojjima acani cuana oja mimishijo. Eya queaneenee pomeecuaji'yojjima acapoa. Ecue mimishi ohuaya pajeaca'yonaje, chama'yo acanaje. Peacuanaja mimishi pea-ai ohuaya pajeacaje'yo, chama'yo apea-aicaje joya ojo jjashahuabaquije'yocuanaja onijje eba'etiitii'yojji.

¹⁷ ¡Eyacuiñajji Emeshimesenei ejjabihuiatiiquipoqui oya yahuajoneitii enequiapoa ojjañacuana huoojeapoquiajjitii poani! Oya eseja ecojjajo jjabameequiajjatii nequipoquiani. Oya oe po'yoajjanei nequitiitiipoquiani. Oya oenei jamaya nequipoquianitii. ¡Jamajjeya oe oya ejjabihuiatiiquipoqui ojjaña pojjajo!

^18-19 Timoteo, miya ecue bacuaejjanei jayojja poani. Jamajjeya eyaya miya jiquio esohui huohuiaña oya jayojja eba'epoquijji. Queaca'a oe nequipoquicue jiquio ecua soldadocuana ejjaquecuaquijji queaca'a apoa epo nequiani jama pea-aiya. Queaja'a jjashahuabaquipoquicue oja esohuijo, a'a oe mique mimishi huanaquehuajji pea-ai. Jjashahuabaquicue, yahuajopishana Eyacuiñajjiya beca oja epeejji oja sohuihuohuijji poani huohuimeecapoajo achajja miya quijje queapame chacochacopoquije oja babaca. Jamaya oe ba'epoquicue. Becacuana Jesosaja epeejji ca queaquehua jjashahuabaquio'oyani oja mimishi ehuanaquehua jaajojoya. Jamajojoya Eyacuiñajjija esohui cajaa acuajica'yani cuaa.

²⁰ Jamaya poanaje Himeneo bajjani dejja, Alejandro pea-ai queaquehua jjashahuabaquio'oyamajje. Eyaya ma beca dejja quianaje ebionei eshahua Satanás bajjanija queanee epomeejji. Jama epojjiya eyaya oya quianaje o Eyacuiñajjijo queatai emimipoquitii poanijje.