1 Tesanonisese 1 - Ese Ejja New Testament

¹ Eyaya Pablohua, Silvanonijje, Timoteonijje pea-ai aniya jiquio esohui tehueaña miquianajaya ciudad Tesalonicajo ba'eca Jesosaja epeejji jjachichaquipoquianicuanaja ebajji. Miquianaya Eyacuiñajji Echii-aija, Emeshimesenei Jesosa Quitoja pea-ai'yo poani ojee nequi'yo onijje. Eyacuiñajjiya miquianaya queapamenee ca-acapoquiahua ojayanei ejjashahuabaquijjijo, queaquijijjijajinee capomeecahua quiana pea-ai ohuaya.

Tesalónica meshijo ba'eca queaja'a jjashahuabaquicapoquiapoa

² Ecuaa Eyacuiñajji gracias apoquiañatii miquianajo Eyacuiñajjinijje mimianiya.

³ Eyacuiñajjinijje mimimajje ecuana jjashahuabaquiani queahuiso achajja quiana ba'e. E'ejojonei miquianaya oja esohuijo queaja'a jjashahuabaquimajje chacochacopoquianitii Eyacuiñajjijo. Eyacuiñajji queajeajojoya peacuana asahuapoquiaña quiaa. Miquianajaya eba e'ejojonei Jesosa Quito poeje o'oya jamajjeya quiana queaca'atii ba'epoquiani. Jama ba'eya ecuaa miquianaya shahuabaña.

⁴ Jesosaja epeejji ecuanaja dohuecuana, jjo'icuana pea-ai ecuanaja eba Eyacuiñajjiya quiana queajeanee acapoquiani, jamajojoya ohuaya quiana babacacanaje ojayatii epo'yojji.

⁵ Yahuajopishana ecuaa miquianaja meshijo miquiananijje aniya Eyacuiñajjija esohui queapame Quitojo huohuipoquianaje queaca'a nequiya, ecuanaja enabaneiya pojjeama. Edojjoshahuapameya ecuana dejjaja ajjima'neineicuana ameecanaje miquianaja queaja'a ebajji oja esohui e'ejojonei poani. Ecuana jjabameequinaje miquianajo Eyacuiñajjija esohui queapamejo ecuana e'ejojonei jjashahuabaqui'yonaje. Miquiaaya ecuana baneinaje achajja ecuana ba'enaje miquianaja meshijo ani.

⁶ Miquianaya ecuana jayojja pea-ai jjashahuabaqui'yome poanaje Eyacuiñajjija esohuijo. Ma ecua Emeshimesenei Jesosa jiquio meshijo queaja'a nequiapoa, jama pea-aiya quiana queaja'a ba'epoquiani. Jamatii queacamajanee ba'eya queanee onaa acaniya Eyacuiñajjija esohui shajja-ajjaneinaje quiaa. Jamaya Edojjoshahuapameya quiana queabihui esohui shajja-ajjameesahuacanaje.

⁷ Jamajjeya queahuiso Jesosaja epeejjicuaa Macedonia meshijo ba'ecaa, Acaya meshijo ba'ecaa pea-ai shajja-ajjacanaje miquianaya queaja'a ba'epoquiani Eyacuiñajjija esohuijo. Miquianaya jama poani shajja-ajjamajje oya jayojja pea-ai ba'esapoani macuiñajjicuanaya.

⁸ Mahuisonei ba'ecaa pojjeama esohui shajja-ajjacanaje. Queameshihuisojo ba'ecacuaa pea-ai shajja-ajjacanaje miquianajo queaja'anee ba'epoquiani Eyacuiñajjija esohui jayojja. Jamajjeya ca ecuana majo emimijji pojjeama ma meshicuanajo ba'ecanijje onaja eshajja-ajjajojoya miquiana queaja'atii ba'epoquiani.

⁹ Ma meshicuanajo ba'ecacuaa ecuana huohuicanaje queahuiso esohui shajja-ajjacanaje miquianajo. Achajja quiaa ecuana queabihuiya ja'ajjequinaje Eyacuiñajjija esohui miquianaque ehuohuijji eshajja-ajja. Majo ba'ecacuaa shajja-ajjapea-aicanaje miquiaaya miquianaja eyacuiñajjinisho dejjaja ne jeajeanaje, cajaa ajea'yonaje Eyacuiñajji oenei eshe nequi bihuiapoquia'yojji.

¹⁰ Ecuana huohuipea-aicanaje cuaa miquianaya e'ejojonei jjaishoaquipoquiani Jesosa Eyajo nequi o poeo'oyajjijo Eyacuiñajjija Bacuaejja. Ma Eyacuiñajjiya shequimeeca'yapoaya poeje o'oya, oyaya. Jesosaa eseya nahueca'yonaje ma quijje Eyacuiñajjiya queaneenee pomeecaje'yo cuana oja mimishijo jama pea-ai ese epo'yo poanijje.