1 Peno 5 - Ese Ejja New Testament

Jesosaja epeejjicuana ae pocajji achajja ba'ecajji tehuecapoa

¹ Jjeya eyaya jiquio esohui queaja'a huohuije joya miquiana etii poani Jesosaja epeejjicuanajaahuanapoquiajji poanicuanaya. Eya pea-ai aje jiquio etii poani ebabaca oja epeejjicuanajaahuanapoquiajji poani. Ecuea ecojjaa eyaya Jesosa Quito onaa queaneenee acaje'yo bapoa. Quijje Quito queaca'aneetii queasajajanee poaninijjetii eya nequije'yo.

² Jamajjeya oe Jesosaja epeejjicuana oveja jayojja poani jaahuananeipoquiacue joya miquiananijje esohuijo jjachichaquipoquianicuanaya. Jama epojjiya Eyacuiñajjiya quiana nequimeecanaje. Jamajjeya miquianaja echacojji queapame apoquiacue jamatii eajeajji pojjeama. Peaja esohuijo pojjeama quiana jama chacochacopoquije. Bejjo queahuiso chichapoquiajjijo pojjeama quiana jama chacochacopoquije.

³ A'a queabishaa eomese jayojjaa esohui huohuipoquiajji cuana joya miquiananijje jjachichaquipoquianicuanaya. Miquiana ca ebionei queaja'a ba'ecapoquijji ojjañacuananijje. Majoya miquiana jayojja pea-ai ba'esapoaje cuana jama poani bamajje.

⁴ Jesosa Quito ese jaahuanapoquiajji poani queaca'anee nequi poeo'oyajo miquianaya oja quia queapamenee corona esapajo eiyajji jjesheje oja epeejjicuanajaahuanapoquiajji queapame chacochacopoquinaje sosejje. Oja quia oe po'yoajjanei, chiichii'yoajjanei.

⁵ Dejjasho'icuaa shacuima' nequiya, ahuema' anicuaa pea-ai miquiana sohuihuohuijji poani etiija esohui shajja-ajjacue. Ojjaña miquiananijje Jesosaja epeejjicuanaja esohui shajja-ajjapoquiacue miquianayanei queaca'a poani jjabaquijjimaa miquianayanei queapame jjabaquiani pojjeamaa. Eyacuiñajjija esohui yahuajonei tehue jama poani ba'a: “Joya oyanei queaca'a poani poso jjabaquijjicuana Eyacuiñajji comacuana asahua-ajjanei. Joya oyaneitii queaca'a poani jjabaquiajjacuana caca oe Eyacuiñajjiya queapamenee acapoquiani ojayanei ejjashahuabaquijjijo” jamaya oja esohui poani.

⁶ Jamajjeya miquianayanei ca'a-ama poani jjabaquimajje Eyacuiñajji queaca'aneetii poani miquiana asahuajjijo jjashahuabaquicue. Majoya ohuaya quiana queapame ba'epoquinaje huohuicaje quijje epojja miquiana jama huohuijji poeajo.

⁷ Miquiana queayenonee pomeejji poeanijo jjashahuabaquimajje Eyacuiñajjinijje mimicue. Ohuaya quiana jaahuanacapoquianitii jjabaquicue.

⁸ Queajjashahuabaquija'atii ba'epoquicue. A'a ecahui jayojjatii ba'ejji. Miquiana sapo-ajjanei poani edosiquiana queamasetii nequipoquiani ebiocuiñajji ibiacuana mimiani jama ona queamete pomeejji. Ohuaya sa-ajjacanitii ache Jesosaja epeejji queamimishi pomeecaje joya ecua ibiacuaa pea sa-ajjacani eijjia'yojji jamaya.

⁹ Jamajjeya oe queaca'atii ba'epoquicue Eyacuiñajjija esohuijo. A'a oe queamete pojji edosiquianajo, a'a oya shajja-ajjajji. Miquianaja bacajji ojjaña Jesosaja epeejjicuana ojjaña meshijo ba'eca ohuaya edosiquiaa jamaya a-ajjacani, queamimishi pomeesa-acani cuana.

¹⁰ E'ejojonei quiana jiquio meshijo nequi dejjamimishicuaa queanee acapoquije so'o Eyacuiñajjija esohuijo. Majoya quijje Eyacuiñajjiya miquiana queajeanee ajji poaniya queapamenee mimishiamanei pomeecaje'yo Eyahuasijje epoqui'yojji. Onijjetii ani'yohua ojjañacuana huoojeapoquiajetii quiaa Quitoja'yo poaniyajjejojo. Dejjamimishicuaa queanee pomeecajo Eyacuiñajjiya quiana queaca'a tiimeecaje majoya. Ohua jama pomeecajje quiana meteama ba'eje onajo.

¹¹ Eyacuiñajjiya queaca'aneetii poaniya ojjaña huoojeacapoquijetii, ojaya jama eapajea'yojji pojjeamatii poaje.

Oe-ejjenei esohui Pedrohua acapoa cuana

¹² Jesosaja epeejji queaja'atii ba'epoquiani Silvano bajjani jiquio ecuea esohui iyehuiso eyaya tehuemeenaje miquianaja ebajji, miquiana huohuineijji pea-ai. Eyaya huohuinaje Eyacuiñajjiya quiana queahuiso ba'emeesahuacapoquiani ojaya miquiana queajeanee poanijojoya. Ojaya quiana queajeanee poanitiijo oe jjabaquipoquicue. Majoya queaca'atii ba'epoquicue.

¹³ Jesosaja epeejjicuaa joya jjachichaquipoquiani Babilonia meshijo ba'ecacuaaya esohui miquiana queabihui pojji huoojeacanaje. Macuanaya Eyacuiñajjija babaca poani miquiana jayojja pea-aiya. Ecue bacuaejja jayojjaa Marcosya esohui huoojeapea-aicanaje.

¹⁴ Miquiananijje ba'eca Jesosaja epeejjicuana shemo tojjojjequicue oya poeajo jjachichaquiya o queajea ajji. Ojjaña joya Quitoja'yo poani quiana queaquijijjijajinee capomeecahua ohuaya.