1 Peno 4 - Ese Ejja New Testament

Eyacuiñajjijo queaja'atii ba'ecapoquijji

¹ Bacue, Quito queaneenee acapoa cuaa oja eyamijo. Jamajjeya quiana oe queaca'a ba'epoquicue miquianaya pea-ai pojja'a queanee pomeecaje cuaa ojaya esohuijo. Joya onaa queaneenee acani ojaya eyamijo, comacuanaya ca queamimishitii eba'epoquijji pojjeama poani.

² Jamajjeya quiana jjeya jiquio meshijo ba'e so'o Eyacuiñajjija esohui jayojja ba'ecapoquijji. Miquianajayanei ejjashahuabaquijjicuana queamimishi epojji esapajo nequi cajaanei aca'yojji quianaja.

³ Yahuajo miquianaya queashequiajahuiso jiquio ecua Eyacuiñajjija sohuima'cuana queamimishi ba'epoquiani jama pea-aiya quiana ba'epoquiapoa ebionei. Peacojjojji epojjijo jjashahuabaquipoquiapoa quiana, ehuoomajamajajjijo pea-ai. Fiesta queahuiso ehuoojji queashajjaquijjo apoquiapoa. Majotiiya quiana jjashahuabaquipoquiapoa. Dejjaja ne eyacuiñajjinishocuana bihuiapoquiapoa quiaa yahuajo. Eyacuiñajji ca jama sapo-ajjanei dejjaja nejo, queatainee se jama epojji. Mahuisoya a'a jama ba'etiitiipoquijji.

⁴ Jjeya miquianaya fiesta ehuoojji queashajjaquijjo epojji onijje mipoqui'yani bamajje queayeno poanicuana, queatai mimiani cuana miquianajo majoya.

⁵ Quijje ca ma dejjacuaa eponacuaa Eyacuiñajji ani cojjaneijo huohuicaje yajjajje oya jama queamimishitii ba'epoquinaje. Majoya Eyacuiñajjiya apoa epotii nequiya ojjañacuanaja oja mimishi huohuicaje'yo o queaneenee pomee'yojji. Jiquio jjeya eshe ba'ecaja, emano'yocuanaja pea-ai huohuicaje'yo.

⁶ E'e, Eyacuiñajjiya quijje ojjañacuanaja oja mimishi huohuicaje'yo. E'ejojonei ma yahuajo eshe ba'ecapoacuaa Eyacuiñajjija esohui queapame shajja-ajjacapoa. Jjeya ca macuana emanojeyo'yo. Macuanaya manocapoqui'yapoa oja mimishijo. Jama pea-aiya pocaje'yo ojjaña jiquio meshijo ba'ecacuana. Jjeya ca queabihuinee ma emano'yocuanaja edojjoshahua Eyacuiñajjinijje anica'yo oja esohuijo jjashahuabaqui'yapoajjejojoya.

⁷ Jjeya oe-ejjenei epojja queachipi nequi'yo, ojjaña jiquio meshijo anica aquianacuana chama'yo poaje. Jamajjeya quiana oe jjajaahuananeiquipoquicue queamimishi epo poanijje. Queaja'atii jjashahuabaquipoquicue Eyacuiñajjinijje emimipoquijji queapame.

⁸ Jiquio esohui shajja-ajjaneicue. Miquiaaya oe miquiananijje Jesosaja epeejjicuana queajeaneetii apoquiacue. Jama pomajjeya quiaa peaja mimishicuana pajeaje'yo, eshahuabatiitiijji pojjeama poaje'yo.

⁹ Peacuanaya miquianaja equiyasijje poeajo queabihuiya jjequinobiajjequicue ojo jjaniñebaquijjimaa.

¹⁰ Eyacuiñajjiya quiana oja quiajo queaca'a pomeecanaje queapame echacochacopoquijji joya ecua dejja quea-aquianahuisohua pea chacomeecani jama. Joya ohua miquiana quiacanajejo oe queapame chacochacopoquicue Eyacuiñajjijo peacuana asahuapoquiajji.

¹¹ Joya ohua queaca'a pomeecanajeya peacuana queaja'a sohuihuohuijji epojji, comacuaaya queaja'a cahuohuicahua Eyacuiñajjija esohui. Joya ohua queaca'a pomeecanajeya peacuana asahuapoquiajji epojji, comacuaaya ca-asahuacahua peacuana Eyacuiñajji queaca'a nequipoquianijo. Jamaya queapamenee quiana chacochacocapoquijji ojjañacuanaja Eyacuiñajji ebihuiapoquiajji Jesosa Quitoja bajjanijo. Queaca'aneetii oya nequipoquiani ojjañacuana huoojeapoquiajji poani cabacahua ojjañacuaa.

Jesosaja epeejjicuana queanee pomeecapoa cuaa esohuijo

¹² Ecue dohuecuana jjo'icuana, ecuea quiana queajeanee poani, jamajjeya jiquio esohui shajja-ajjacue. A'a yenoyenojji onaa queacamajanee acani jjabaquimajje oja esohuijo. Jamaya miquiana queacamaja pomeejji poeje. Jamajjeya a'a jama jjashahuabaquime pojji ba'a: “¿Yajjajo shai eseya jama queaneenee pomeecani cuaa?” Chojja, jama quiana poca-ajja.

¹³ Miquianaya ca queabihui pocajji dejjamimishicuaa quiana queanee pomeecani Eyacuiñajjija esohuijo jjabaquimajje. Ma ecua Quito queaneenee acapoa cuaa jama pea-aiya quiana acanijjejojoya queabihui pocue. Majoya quiana quijje queabihuineenee poaje Quito ojjañacuana huoojeapoquiajji poani queaca'aneetii poeo'oyajo.

¹⁴ Queabihui pocue quiana peacuaa niñebacajje miquiana Jesosaja epeejji poanijojoya. Miquianajo esohui jama queatai acajo queahuisocuaa bacaje e'ejojonei Eyacuiñajjija Edojjoshahuapame miquianaja eyamijo nequipoquiani queaca'anee.

¹⁵ Beca quiana oe jjabaneiquicue a'a queamimishi ba'ejji. Bacue, joya peacuana quecua'yojji poani, joya siipojjicuana, joya peaja eba'ejjijo mimimajamajajji poanicuana etiicuaa napameecani oja mimishijo. Jamajjeya quiana oe a'a jama pea-ai ba'ejji etii poanicuanaja queanee pomeejjima yajji.

¹⁶ Miquianaya Jesosaja epeejji poani jamatii queacamajanee acani cuaa jjabaquimajje a'a majo bichobichojji. Miquianajaya ca Eyacuiñajji bihuiacajji Quitoja'yo poaniyajjejojoya.

¹⁷ Jjeya epojja poechipinaje, beshahuanei apoa achajja eseya ojjañacuana ba'epoquinaje Eyacuiñajjija ehuohui'yojji. Ebionei ohuaya bacaje ojjaña oja epeejjicuana achajja ba'ecapoquinaje. Eseya ebionei huohuicaje'yo eseja eba'ejjijo. Majoya quijje ¿yajja huohuime acaje'yo Eyacuiñajjiya joya oja esohui queapame cajaa ajji poanajecuana? Queaneenee ca macuana ohuaya pomeecaje'yo.

¹⁸ Eyacuiñajjija esohui yahuajonei tehue jama poani ba'a: “Joya oja mimishima'yo Eyacuiñajjiya bacani cuana queacamajanee ba'epoquije so'o jiquio meshijo. Majoya quijje Eyacuiñajjiya macuanaya nahuecaje'yo onijje enequipoqui'yojji. Joya oja mimishima'yo poanicuana jiquio meshijo queacamajanee poanijo, ¿yajja acaje'yo Eyacuiñajjiya joya oma' jayojjatii ba'ecapoquinaje cuana? Queaneenee ca macuana pomeecaje'yo ohuaya” jamaya tehuecapoa.

¹⁹ Jamajjeya joya Jesosaja epeejjicuana queacamajanee ba'epoquiani Eyacuiñajjija ejjashahuabaquijjijo, comacuanaya Eyacuiñajjija esohuijo queaja'atii ba'ecapoquijji. Oya jjabaquicajji Eyacuiñajjiiya oya jaahuanacapoquijetii. Coma Eyacuiñajjitiiya eseya panacapoa. Ohuayaneitiiya eseya nahuecapoquije. Oja esohui ojjañatii ohuaya ajeyocapoquiani.