1 Peno 3 - Ese Ejja New Testament

Yahuecuana oja huanasenijje ojee queapame ba'ecapoquijji

¹ Miquiana pea-aiya ehuanasecuana miquianajahuecuanaja esohuijo jjashajja-ajjaquicapoquijji. Majoya miquiana jama poani bamajje miquianajahuecuaa joya sohuima' jayojja ba'yanicuaaya Eyacuiñajjija esohui shajja-ajjasa-acaje. Oya miquianaja esohui huohuimajamajajjima nequi jjashahuabaquije Eyacuiñajjija esohuijo miquiana jama queapame ba'yani bamajje.

² Miquiana beca jjashahuabaquime pojjeama queaja'a mimishiama ba'epoquiani ohuaya bacaje. Majoya miquianajahuecuana Eyacuiñajjija esohui shajja-ajjapea-aisapoaje.

³ Ehuanasecuana, a'a miquianaja eyami ebiajjejje queapame ejjabaquijjijo jjashahuabamajamajaquijjitii. Oro eyijji queahuisojo, eshajjajo eba'ehuanajjicuanajo, esao-ao pashajjajjajjijo, daquisiyo queanahueneejo pea-ai a'a oe majoneiya jjashahuabaquipoquijji.

⁴ Miquianaja eyamiquipajje oe queajjashahuabaquija'a pocue. Majjeya queapame ba'ecapoquijji queaquijijjijajinee, queabei, miminaa-ama. Miquiana jama epojjiya Eyacuiñajjiya ba'emeesa-acani.

⁵ Yahuajonei eponacuana jamaya queapame ba'epoquiapoa ma e'ejojonei Eyacuiñajjija esohuijo jjashahuabaquipoquiapoa eponacuana. Ojahuecuanaja esohuijo jjashajja-ajjaquipoquiapoa. Jama queapame epojjiya oya jjabaquiapoa, aquianacuananeijo pojjeama.

⁶ Jama pea-aiya ma epona Sara bajjani poa yahuajonei. Oya ojahue Abrahamja esohuijo jjashajja-ajjaquipoquiapoa. Ohuaya eponaa ojahue oja etii poani acapoa. Miquianaya queapame Sara jayojja jjashahuabaquime pomajje o jayojja pea-ai poaje. Majoya miquiana meteama ba'eje.

⁷ Miquianaya yahuecuana queapame quenequenecuajiajja ba'epoquicue miquianaja huanasecuananijje. Queasapaja'a nequiya quiaa ehuanasecuana queanahue bapoquiacue oja yami ca'a-amapishana miquianaja dejjaja jama pojjeamajojoya. Oya miquiana jayojja pea-ai poquije'yo Eyahuasijje eba'etiitii'yojji. Jamajjeya miquianaya yahuecuana miquianaja ehuanasecuananijje queapame ba'epoquiajo Eyacuiñajjiya miquianaja mimi shajja-ajjacaje. Chama' poaje o shajja-ajjameejjima epojji jama poajo.

Queaja'a oja esohui jayojja ba'epoquiajo queanee pomeecaje cuaa

⁸ Miquianaya Jesosaja epeejji poani oya jayojja pea-ai jjashahuabaquime ba'epoquicue. Pea Jesosaja epeejji queayenonee poani bamajje miquiana queayeno popea-aicue ojo. Miquiananijje ba'ejji Jesosaja epeejjicuana queajeanee apoquiacue oya dohue pea-ai poaniyajjejojo. Peacuana queapame asahuapoquiacue. A'a miquianayanei queapame poani poso jjabaquijji, peacuana queapame pojjeama a'a ajji oya.

⁹ Onaa quiana queamimishi acajje queatai mata-acajje a'a jjasoseaquijji, a'a mimijajipea-aijji onijje. Chojja, jama se poca-ajja esosejje. Jamatiiya esohui queapame oya acue Eyacuiñajjija oya eba'emeesahuajji. Jamaya Eyacuiñajjiya quiana mimimeesa-acani comanijje ojaya quiana quijje queabihui eba'emeesahuajji.

¹⁰ Eyacuiñajjija esohui yahuajonei etehue jaa jama poani ba'a: “Ojjaña cua queabihui ba'epoquisapoanicuanaja oja yana nahuecajji, esohui jjochicajji queatai peajo esohui ejeacuaya poanijje, siajje epo poanijje pea-ai.

¹¹ Ojaya oja mimishicuana cajaa aneica'yojji, queaja'a mimishiama ba'ecapoquijji. Oya queabei peacuananijje eba'epoquijji jjabaneiquicajji.

¹² Emeshimeseneiya ojjaña joya queaja'a mimishiama ba'epoquianicuana asahuacapoquiani, jaahuanacani pea-ai. Oja mimi shajja-ajjacani ohuaya. Joya queamimishitii ajji poanicuana ca Eyacuiñajji o asahua-ajja, oya jama sapo-ajjanei” jamaya tehuecapoa.

¹³ Miquianaya queaja'a ba'ecapoquijji. ¿Ache dejjaa shai quiana queayenoneetii pomeecaje miquianaya queaja'atii ba'esapoajo? Acheyapishana.

¹⁴ Miquianaya queaja'a ba'e jamatii onaa queacamajanee acajje queabihuitii pocue quiana. A'a joya miquiana queanee pomeejji poajecuanajo metejji, a'a oya yajja bajji, a'a queayenotii jjashahuabaquijji majoya.

¹⁵ Quito caca queapameneenee emiquianamese poani bacajji quianaja. Jamajjeya oya e'ejojonei bihuiapoquiacue. Apoa epotii quiana oe nequipoquicue peacuana queaja'a saja-ajji ohua huohuiajjacajje yajja pomajje Eyahuasijje poquica'yojji. Queaja'a oe saja-acue Quitojonei poquije'yo Eyahuasijje.

¹⁶ Onaa jama huohuiajjame acajje jjapashineijje saja-acue, janobajjimanei pojjeama. Miquianayanei queapame poani pojjeamaa oya esohui huohuicue. Queaja'atii ba'epoquicue miquianaja ejjashahuabaquijji queamimishi ehuanaquehua poanijje esapadojjojo. Jama quiana queapame Quitojo ba'yani bamajje joya miquiana siajje ajji poanicuana queabicho jjabaquije oja esohui siajje miquianajo. Ohuaya quiana bacaje e'ejojonei Quitoja esohui jayojja ba'epoquiani, siajje pojjeama.

¹⁷ Eyacuiñajjiya eseya queacamajanee ameesa-amajje jamatii se queaja'a ba'e jamaya ca-ameecahua dejjamasecuanajo. Jama poajo Eyacuiñajjiya eseya queapame poani bacaje majoya. Eseya ca shajjama' jayojja poani, majoya queanee acaje cuaa bamajje Eyacuiñajji queayeno poani esejo.

¹⁸ Bacue, oya Quitoya eseja mimishicuanajo mano'yapoa. Oya oenei mano'yome poa, emanobeca'yojjitii pojjeama poa. Quito mimishima'neinei jamatiiya oya queaneenee jjapomeequi'yapoa ese Eyacuiñajjinijje eani'yojji ojaya'yo epojji. Quito eba'ehuanasohua ba'e quecuacajje oja yami mano'yapoa oya dejjapojji epojjejojo. Majoya Eyacuiñajjiya oya shequimeeca'yajje oja dojjoshahua oja yamijo nequi ejjasejjabecaqui'yojji pojjeamatii poa.

¹⁹ Majoya Quito yamima' so'o oja dojjoshahua poquiapoa dejjaja eponaja edojjoshahuacuana ejeanobia ani sohuihuohuiya.

²⁰ Ma dejjacuana eponacuana pea-ai yahuajonei shajjama'nei jayojja pocapoa ma Noeya bishe'ai quecuacapoa shequiajajo. Eyacuiñajjiya queashequiajahuiso macuanaya ishoa-ajjacapoquiapoa a'a oja esohuijo jjashajja-ajjaquije ebajji. Jamatii onaya shajjama' jayojjatii ba'ecapoquiapoa. Che oepojjinei ocho oja huapa pojjeamaneicuana oja quecua bishe'aijo jjanahuemeequiapoa ena queaquemojo hui'i'yojjima epojji.

²¹ Ma yahuajonei Eyacuiñajjiya Noé nahuecapoa ena queaquemo oqueajo jiquio ecua jjeya cuana enaojjojo jjaiñajeanobiameequiani Quitoja'yo poani ojjañaja ebajji, jamaya poa. Enaojjojo jjaiñajeanobiameequica-ajja ebiajjejje queaboejea epojji. Chojja, jama epojji pojjeama. Ese queajjashahuabaquija'a mimishiama ba'epoquisapoani Eyacuiñajji huohuimajje ca jjaiñajeanobiameequicajji. Eyacuiñajjiya Jesosa Quito shequimeeca'yapoajojoya eseya oja nahue'yo poani.

²² Yahuajo Quito eshequi'yo nequi Eyahuasijje poqui'yapoa. Jjeya Eyacuiñajji oja Chiija ebañeimijijje ani'yo. Majo ani'yohuaya ojjaña emeshimese etii poanicuana, ojjaña angelcuana, eshahuamasecuana queaca'a pea-ai ohuaya huoojeacapoquiani.