1 Peno 2 - Ese Ejja New Testament

¹ Jamajjeya quiaa miquianaja ejjashahuabaquijji queamimishi epojji cajaa acue, jeajeacue. A'a oe peacuanajo siajje pojji. A'a oe Eyacuiñajjija epeejji jayojja pojji peacuanaja miquiana ebajji, e'ejojonei oe ba'epoquicue. A'a peaja aquianacuana jeabajji, a'a majotii jjashahuabaquijji. A'a oe peajo jjaniñebaquijji. Jama ca ba'eca-ajja Jesosaja epeejji.

² Joya ecua ebacuasho'i jjeyanei cuayaa oja naeja tojjona' ishineineisa-acani jama saneineimeya Eyacuiñajjija esohui acue. Oja esohui bobicuana jama queaca'a etiipoquijji Eyacuiñajjijo. Majoya quiana queaja'a ba'epoquije oja esohuijo apoa epo etiica'ajji.

³ Emeshimeseneijo e'ejojonei jjashahuabaqui'yomajje oya queapameneetii nequipoquiani miquiananijje jjabaquinaje.

Quito mei queaquemo nequi jamaya ojjañacuana eshe pomeejji poani

⁴ Emeshimesenei nequiyasijje quiana oe jjanequichipiquicue. Oya mei queaquemo nequi jama, ojjañacuana eshe pomeejji poani. Ma ecua yahuajonei dejjacuaa equi iyajji oe mei queaquemo cajaa acapoa, jama pea-aiya Emeshimesenei acapoa cuaa o sapo-ajjaajjejojo. Jamatiiya oya Eyacuiñajjiya babacacapoa, queanahuenee bacapoa.

⁵ Miquianaya oya jayojja pea-aiya meicuana eshe jayojja poani Eyacuiñajjija equi-aijo eiya ani. Ma equiya oja Edojjoshahuapameya iyacapoquiani. Eseya Eyacuiñajjija equi-ai jayojja pea-ai poani o anipoquijji. Eyacuiñajjiya quiana bapea-aicani ojo echacochacopoquijji. Ma ecua yahuajo oja equi-aijo chacochacopoquiani dejjacuaa ehuonecuana enaa jehui'yo quiacapoquiapoa jama pea-ai epojjiya ohuaya quiana bacani. Miquianajaya ca jjeya ehuonecuana quia'yoajja. Miquianaja eyami ca quiaa ca oe quiaña ojo queaja'a eba'epoquijji. Miquianaya e'ejojonei o bihuiajji sohuicuayani, onijje mimipea-aiani. Majoya Eyacuiñajji esejo queabihuinee poani Jesosa Quitoja bajjanijo ese jama sohuicuayame poani, onijje mimiani pea-ai shajja-ajjamajje.

⁶ Jamajjeya Eyacuiñajjija esohui yahuajonei etehue jaa jama poani ba'a: “Eyaya oe mei-ai babacanaje joya equi iyajji ebionei enequiajji queapamenee. Comaya queanahueneenee poani. Eyaya comaya ciudad Jerusalén meshijo nequiaje. Ojjaña joya ojo ma mei-ai enequiacoo jamajo jjashahuabaqui'yanicuana quijje queayeno epo'yojji pojjeamatii poaje” jamaya oja esohui etehue jaa.

⁷ Joya miquiaa e'ejojonei ojo jjashahuabaqui'yaniya coma mei-ai queanahuenee baña quiaa. Peacuaa ca oya cajaa acanaje, sapo-ajjanei poanaje cuana. Jamajjeya oja esohui yahuajonei tehuecapoa majoya jama ba'a: “Equi-ai iyajji poanicuaa oe mei-ai queapamenee cajaa acanaje. Jamatii ma mei-aiya oyaya nequiacoocanaje pea equi-ai iyajji poaniya.”

⁸ Pea esohui yahuajonei tehue jama pea-ai poani ba'a: “Ma mei-ai enequiaa jjaquecuasajameequicaje cuana, oquemeecaje meshiyasijje” jamaya poa. Eyacuiñajjija esohuijo jjashahuabaqui'yoajjatii poanicuana, ma mei-aijo jjaquecuasajaquiani, meshiyasijje oquequiani. Yahuajoneitii macuana jama epojjiya Eyacuiñajjiya acapoa oja mimishijo.

⁹ Miquianaya caca Eyacuiñajjija babaca poani. Onijje emimipoquijji ohuaya quiana bacani Emeshimeseneija'yo ojo queapame echacochacopoquijji. Ojaya'yo poani quiana ohuaya bacapoquiani pea-ai. Jama epojjiya Eyacuiñajjiya quiana nequiashiñacanaje. Majoya ohuaya quiana iyaacanaje peacuana sohuihuohuiya epoquijji achepamenee, acheca'anee Eyacuiñajji nequi ona huohuiquiya. Miquianaya yahuajo meca jayojjatii queaquehua ba'epoquiapoa. Jjeya quiana ca queaja'a eba'epoquijji epojjatii jama ohuaya pomeecanaje.

¹⁰ Yahuajo quiana Eyacuiñajjija pojjeama ba'epoquiapoa. Jjeya ca quiana ca ojaya'yo poani. Yahuajo quiana queayenonee ba'epoquiapoa ojaya asahuajjima. Jjeya quiana ca ohuaya ba'emeesahuacapoquiani, queapame acapoquiani quiana ojayanei ejjashahuabaquijjijo.

Eyacuiñajjijo queabihui echacochacojji ba'ecapoquijji

¹¹ Ecue dohuecuana jjo'icuana, ecuea quiana queajeanee poani, jamajjeya jiquio esohui huohuiaña. Eseya jiquio meshijotii eba'etiipoquijji pojjeama poaje. Jiquio ecua jaajji pea queahuesha nequi iyehuiso cahuime aniya poeani, jamaya oe jjabaquicue. Cua miquianaja eyamiya saneineicani queamimishi epojji cajaa acue. A'a majoya queamimishi jjapomeequijji. Comaaya miquianaja esapadojjo queaquehua pomeecaje.

¹² Jesosaja epeejji pojjeamacuananijje pea-ai oe queapame ba'epoquicue. Jjeya pojja'a miquianajo queatainee mimiani cuana, jjaniñebaquiani queahuiso miquianaya queamimishi poani poso bamajje. Majoya miquianaya quenequenejjima ani queapametii ba'epoquiani bamajje Eyacuiñajji bihuiapea-aicaje cuaa quijje Eyacuiñajjija ojjañacuanaja mimishi huohui'yojji epojja apoa poajo.

¹³ Emeshimeseneija esohuijo jjashajja-ajjaquipoquianijjejojoya quiana ojjaña joya etii poanicuanaja esohuijo jjashajja-ajjapea-aiquicajji. Ebionei emeshimeseja esohuijo jjashajja-ajjaquicajji oya ebionei etii queaca'a poanijojoya.

¹⁴ Pea dejjacuana etii poanija esohuijo jjashajja-ajjapea-aiquicajji oya emeshimese dejjaja nequimeejojoya ojjaña joya shajjama' jayojja poajecuana napameejji. Coma etii poanicuaaya joya emeshimeseja esohuijo jjashajja-ajjaquijji poanicuana ca esohui o queabihui pojji acaje ojjañaja o queapame poani ebajji.

¹⁵ Eyacuiñajjiya quiana ojo queaja'anee ba'emeesa-acani. Majoya miquianaya jama poani bamajje joya o sapo-ajjanei poanicuanaja quiana queatai eniñebajji pojjeama poaje.

¹⁶ Queapame quiana oe ba'epoquicue Eyacuiñajjija'yo. Mimishi emiquianamesetii pojjeama po'yonaje, jamajjeya queabihui ba'epoquicue. A'a jama jjashahuabaquime pojji ba'a: “Bacue, eya Eyacuiñajjija'yo poani oja nahue'yo, jamajje eyaya cua eya asa-aña jamatii queamimishi epojji apoquiaje.” Chojja, eseya jama poca-ajja. Eyacuiñajjijo queapame echacochacopoquijji caca oe jama jjabaquicajji.

¹⁷ Ojjaña dejjacuana eponacuana pea-ai Eyacuiñajjija pana, jamajjeya oya queapame poani bacajji quianaja. Jesosaja epeejjicuana miquiananijje ba'eca queajeanee apoquiacue. Eyacuiñajji queaca'aneetii nequipoquiani eojjañacuanamese shahuabapoquiacue quiaa. Roma emeshimese dejja queapame poani bapea-aicajji quianaja.

¹⁸ Miquiaaya joya ejjesheya peajo chacochacoaniya, miquiana chacomeejji poanicuana queapame bapoquiacue oja esohuijo ejjashajja-ajjaquipoquijji. Joya oenei echacomeejji queapame maseama poanija esohuinei pojjeama shajja-ajjacajji. Joya queatecue poanija esohui pea-ai shajja-ajjacajji.

¹⁹ Bacue, miquiana chacomeejji poani queamaseya napameecajje jamatii nequi mimishiama Eyacuiñajjijo oe jjashahuabatiiquicue. Jama poajoya quiana Eyacuiñajjiya queabihuineeya bacaje.

²⁰ Miquiana shajjama' jayojja poajo etiiya queanee napameecaje jjabaquimajje quenequeneani. ¿A'a jamaya queapame? ¡Chojja de! Shajjama' jayojja pomajje, ¿ajeo quenequeneani? Bacue, miquianaya pojja'a queanee napameecaje jamatii shajjama' jayojja pojjeama nequi. Majoya onijje quenequeneajja poani bamajje Eyacuiñajjiya quiana queapame poani bacaje.

²¹ Jamaya Eyacuiñajjiya quiana pomeesa-acani onaa jamatii queanee pomeecajo. Jesosa Quitoja ejjashahuabaquijji jayojja pea-aiya ohuaya quiana pomeesa-acani. Quito mimishima'nei nequi ese nahue'yojji onaa queacamajanee queaneenee acajje quenequenejjimanei poa. Jamajjeya eseya o jayojja pea-ai queaca'a pocajji quenequeneca-ajja onaa queanee acajje.

²² Quito mimishima'neitii nequiapoa, esohui siajje a-ajjaneinei oya poa.

²³ Onaa oya mata-acajje peajja acajje, Quito ca jjasohuisaja-aquiajjanei poa onaja esohuijo esosejje. Oya onaa queaneenee cuiame acajje Quito ejjasoseaquiajji mimijjimanei nequiapoa. Quito caca oe Eyacuiñajjijoneitii jjashahuabaquiapoa oja o nahuepoquiajjijo. Eyacuiñajjiya ca quijje ojjañacuanaja mimishi ja'anei huohuicaje'yo ohuaya mimishima'neitii nequiya.

²⁴ E'ejojonei ohuaya Quitohuanei ojjaña esejaya mimishicuana dojocapoa oja yamijo nequi. Acui ecuiata'apeejo ba'e oya manomeeca'yapoa cuaa mimishi eseja yamijo nequi queaca'atii epo poanijje, e-esemesetii enequitiipoqui poanijje. Ese queaja'a eyacua eba'epoqui'yojji Eyacuiñajjijo oya mano'yapoa. Jamajjeya oya queaneenee ba'yapoa ese mimishima'yo Eyacuiñajjija ebajjijo.

²⁵ Yahuajo miquianaya ovejacuana ecuaquisho jama ebionei ba'epoquiapoa sohuima'nei queaquehua. Jjeya quiana ca Quitoque poeyanaje ojo jjashahuabaqui'yomajje. Ohuaya quiana jaahuanacapoquiani, nahuecapoquiani pea-ai joya ecua ovejajaahuanajji poanicuaa ovejacuana acani jamaya.