1 Conitio 6 - Ese Ejja New Testament

Jesosaja epeejjicuanaja pea onijje Jesosaja epeejji dejja Eyacuiñajjima' jayojja etii poani aniyasijje napameeca-ajja

¹ Miquiananijje Jesosaja epeejji poaniya quiana queacamajanee acajje, ¿apiojji acuae quiana poquiani dejja etii Jesosaja epeejji pojjeama aniyasijje o napameeya? Chojja de, jama poca-ajja. Jesosaja epeejji dejja etii poani anicahuasijje caca oe oya dojocajji a'a queaquehua poani etiija ehuohuiajjajji o queapame pomee'yojji.

² ¿A'a quianaja bajjima achajja ojjañajaajjicuana ba'ecapoquianinaje huohui'yojji epojja poeajo eseyaya Jesosaja epeejjicuaaya ojjaña jiquio meshijo ba'eca Jesosaja epeejji pojjeamacuana queamimishi ba'ecapoquianinaje huohuije'yo? E'ejojonei miquiaaya ojjaña jiquio meshijo ba'eca Jesosaja epeejji pojjeamacuana queamimishi ba'epoquianinaje huohuije. Jamajjeya ¿yajjajo shai jjeyanei miquiaaya a'a queapame a'a queamimishi ba'epoquiani jiquio meshijo miquiananijje Jesosaja epeejjicuana mihuohuiaña?

³ ¿A'a quianaja bajjima pea-ai eseyaya angelcuana pea-ai a'a queapame a'a queamimishi poanaje huohuije quijje? Jamajjeya jiquio jjeya Jesosaja epeejjiya queacamaja acanijo ache queaja'a poani, ache queaquehua poani miquianaja huohuicapoquijji.

⁴ Jamajjeya Jesosaja epeejji poaniya quiana queacamajanee acajje ojee ba'eya oya meshijo nequiya, ¿a'a queapame o dojomeejji Jesosaja epeejji pojjeama dejja etii poani aniyasijje oja o napameejji? Chojja. ¿Apiojji cuama edojojji?

⁵ Eyaya quiana jama huohuiajjame aje miquiana queabicho pojji. ¿A'a acuae che oe Jesosaja epeejji enequi queasapaja'a poaniya pea queaquehua poajo ojaya queaja'a ehuohuiajjajji o queapame pomee'yojji? Enequi pojja'a.

⁶ Miquianaya ca jama sapo-ajja. Jesosaja epeejji pojjeama dejja etii poani aniyasijje ca quiaa ca oe minijje Jesosaja epeejji dojoaña oya napameeya, ma etii poanija queaja'a ehuohuijji.

⁷ Miquianaya Jesosaja epeejjicuana ojee queacamajanee ba'epoquiani queamimishi popoquianijjejojoya. Jesosaja epeejji poaniya queacamajanee acajje, a'a oya dojojji Jesosaja epeejji pojjeama etii poani aniyasijje. Ohua miquianaja aquianacuana siicajo, miquiaaya oya dejja etii poani Jesosaja epeejji pojjeama aniyasijje dojosa-aña. Chojja, ¡a'a dejjaja nequimee etii poani aniyasijje oya dojojji! Jamatii miquiaayatii oya queaja'a huohuicue. Miquiana shajja-ajjasapo-ajjajo ca oe pajea'yocue.

⁸ Pea quiana ca queaquehuanee ba'epoquianitii. Miquiananijje ba'e Jesosaja epeejjija aquianacuana siiaña, jamajjeya miquiana pea-ai queaquehuatii ba'epoquiani.

⁹ A'a quianaja bajjima poani joya queamimishitii ba'epoquianicuana epoqui'yojji pojjeamatii poaje ma Eyacuiñajjiya ojjaña huoojeacapoquianitii meshi Eyahuasijje. Jamajjeya quiana oe ¡a'a miquianatii jjadasiaquijji! Bacue, joya peacojjojjitii ba'epoquianicuana, joya dejjaja ne bihuiapoquiajjitii poanicuana, joya onijje dejjanijje jaapoquianitiicuana pea-ai Eyacuiñajjiya ojjaña huoojeacapoquianitii meshi Eyahuasijje epoqui'yojji pojjeamatii poaje comacuanaya.

¹⁰ Oya jayojja pea-ai joya siipojjitii poanicuana, joya queabejjojeaneetii poanicuana, joya huoomajamajajjitii poanicuana, joya esohui queatainee apoquiajjitii poanicuana pea-ai, ojjaña comacuanaya queamimishitii ba'epoquiani Eyacuiñajjiya ojjaña huoojeacapoquianitii meshi Eyahuasijje epoqui'yojji pojjeamatii poaje.

¹¹ Iyehuiso quiana yahuajo jamaya ba'epoquiapoa queamimishihuiso. Jjeya quiana ca jama pojjeama'yo, Eyacuiñajjija po'yonaje. Ohuaya miquiana mimishima'yo bacani oja cuijeajeyo'yo. Jamaya quiana Eyacuiñajjiya queapamenee acanaje Edojjoshahuapamejo Emeshimesenei Jesosa Quito mano'yapoajojoya miquiana nahue'yojji.

¹² Jama poani becacuana ba'a: “Jjeya cua eya asa-aña huisotiiya eyaya aje.” E'e jama pocajji, jamatii ojjañatii queapame pojjeama eajji. E'ejojonei cua eya asa-aje huisotii ecuea acajji. Jamatii eya queamimishi majo ejjapomeequi'yojji pojjeama ba'epoquije.

¹³ Peacuana ca jama poani ba'a: “Esejaya ojjaña bobicuana ijjiacapoquijji queashoe pomajje eseja see-aijo eba'ejji” jamaya poani. Majoya ca quijje bobicuana, eseja see-ai pea-ai chama'yo pomeecaje Eyacuiñajjiya. Oya jama pea-ai poani ba'a: “Esejaya eyami ejjacojjoquijji cua eseya cojjosa-aje cuana cojjojji jamatiiya” jamaya poanicuana. Chojja, esejaya eyamijo ca jama poca-ajja. Esejaya eyami caca oe Eyacuiñajjijo echacochacojji poani. Ohuaya eseya eshe pomeecani, jaahuanacapoquiani pea-ai.

¹⁴ Eyacuiñajjiyanei esejaya eyami emano'yo jaa quijje shequimeecaje'yo oya queaca'aneetii poaniyajjejojo. Ma ecua eseja Emeshimesenei Jesosa shequimeeca'yapoa jama pea-aiya eseya ohuaya shequimeepea-aicaje'yo.

¹⁵ ¿A'a quianaja bajjima poani miquianaya Quitojo jjashahuabaqui'yomajje Quitoja eyamijo ojee onijje nequiani ojaya'yo? Jamajjeya quiana oe ¡a'a peacojjojji poani eponanijje jaajji! Jama pomajje quiaa Quitoja eyami ojee jaameeaña peacojjojji poani epona queamimishinijje. Jama poca-ajja onijje.

¹⁶ ¿A'a quianaja bajjima dejja peacojjojji poani eponanijje jaamajje oya oe eyami jayojja poani onijje? Eyacuiñajjija esohui yahuajonei etehue jaa jama poani ba'a: “Dejja eponanijje jaamajje oe eyami jayojja poani onijje.” Jamaya Eyacuiñajjiya oya bacani.

¹⁷ Oya jayojja pea-aiya poani Emeshimesenei Jesosa Quitoja epeejjicuana ojo jjashahuabaqui'yomajje. Oya oe jayojja poani Quitonijje oja dojjoshahuajo.

¹⁸ Jamajjeya oe ¡a'a peaja yahuenijje peaja huanasenijje jaajji! Pea mimishicuana oja yamijo oepojji acani. Joya peacojjojji poanicuana ca oja eyamijo queamimishihuisonee jjapomeequiani.

¹⁹ ¿A'a quianaja bajjima poani miquianaja eyami Edojjoshahuapame nequijji poani Eyacuiñajjija quia? Oya miquianaja eyamijo nequipoquianitii, emiquianamese poani. Jamajjeya quiana jjeya emiquianajayamimesetii pojjeama po'yani.

²⁰ Eyacuiñajjiya quiana jjesheca'yonaje sosejje, ojaya po'yonaje. Jamajjeya se oe eseja eyamijo queapame queaja'a ba'epoquiani bamajje Eyacuiñajji bihuiacaje cuaa.