1 Conitio 3 - Ese Ejja New Testament

Jesosaja epeejji Corinto meshijo ba'eca queaca'a tiijjima poa esohuijo

¹ Ecue dohuecuana jjo'icuana bacue, yahuajo eyaya quiana sohuihuohuinaje joya ecua dejjacuana eponacuana Eyacuiñajjija esohuijo etiica'a jama pojjeama. Joya ecua dejja eponacuana pea-ai ojayanei ejjashahuabaquijjijo ba'yani jama sohuihuohuinaje quiana. Miquiana Quitoja'yo poani joya ecua esho'iquiana jama pea-ai ebionei sohuihuohuinaje quiana.

² Eyaya ebionei esohui ma camaja-ama ebajji huohuicoonaje quiana jiquio ecua ebacuasho'iya enaeseja tojjona' oopana ishicani jama. Pea esohuicuana queacamaja ebajji ca ecuea quiana huohuijjima poanaje so'o jiquio ecua noe ebacuasho'i quiajjima acani jama. Maya ecuea huohuijjima poanaje so'o. Ecuea jama huohuime yahuajo eajojjemo quianaja queaquehuaneetii poquiae, jjeyanei pea-aiya queaquehuaneetii pome.

³ Miquianaya jjeyanei pea-ai ca'a-amatii poani esohuijo tiijjima. Miquianajaya ejjashahuabaquijjineijotii ba'epoquiani. Miquiananijje ba'e Jesosaja epeejjicuana botiama aña quiaa. Majoya quiana mimijajimajamajapoquiani oya jayojja jjashahuabaquime po-ajjajjejojo. Jama ba'eme pomajje quiana joya ecua dejjacuana Jesosaja epeejji pojjeama jjashahuabaquiani jama pea-aiya quiana po'yani.

⁴ Miquianaya jama mimijajime poani ba'a: “Eya ca iña Pabloja sohuihuohui.” Pea quiana ca jama poani ba'a: “Eya ca iña Apolosja sohuihuohui.” Jamaya quiana queaquehuanee ba'epoquiani miquianajayanei ejjashahuabaquijjijo.

⁵ Bacue, eya Pablo, Apolos pea-ai dejja poani, mahuisotii. Ecuana ca Jesosa Quitojo chacochacopoquiani. Ecuaa sohuihuohuiajje quiana jjashahuabaqui'yonaje Quitojo. Jamaya Emeshimeseneiya ecuana huohuimeecanaje.

⁶ Eyaya pea meshijo ba'eca Eyacuiñajjija esohui huohuicoonaje jiquio ecua dejjaa oja quejo eso' banacani jama. Oya Eyacuiñajjija esohuiya Apoloshua huohuipea-aicanaje jiquio ecua ebanacuana shacani epohua'yojji jama pea-aiya. Majoya Eyacuiñajji oeneiya oya oja esohuijo queaja'a ba'emeesahuacapoquiani. Jiquio ecua ebanacuana eso' Eyacuiñajjiya pohuameeca'yani, jama pea-aiya oya ba'emeesahuacapoquiani queaja'a.

⁷ Jamajjeya joya eso'banajji poani, pea o shajji poani pea-ai o pohuamee'yojji pojjeama poani. Eyacuiñajji oeneiya ca oe eso' ebanacuana pohuameeca'yani.

⁸ Joya eso'banajji poani jayojja, ebanacuana shajji poani jayojja pea-ai Eyacuiñajjiya oya jayojja bacani ojo chacochacopoquiani. Achajja oya chacochacoani bamajje Eyacuiñajjiya oya sosequiacaje Eyajo nequiya quijje ma oya chacochacopoquinaje sosejje.

⁹ Ecuaa, eyaya Apoloshua pea-ai ojee oya echacojji apoquiaña Eyacuiñajjijo. Miquianaya jiquio ecua meshijo eso' banacani queajjajjahuiso epojji jama pea-aiya quiana poani. Miquianaya ojee ani jiquio ecua equi queaquemo quea-ao Eyacuiñajjija epojji iyacani jama pea-aiya poani.

¹⁰ Eyacuiñajjiya ojayanei ejjashahuabaquijji queapamejo eya miquiana sohuihuohuicoojji epojji huoojeacanaje. Jiquio ecua equi iyajji poani dejjaa equi yamajjana acuica'a nequiacoocani jama pea-aiya eya chacochacocoonaje miquianajo. Jjeya peaa ecuea ejjocojo quiana sohuihuohuipea-aicani jiquio ecua peaa equi iyajji acuicuana ejjasa huanacani eyamajjanabiajje jama pea-aiya chacochacoani. Jamajjeya ojjaña joya esohuihuohuijji poanicuana jjabaneiquicajji achajja oya chacochacopoquiani Eyacuiñajjija esohuijo.

¹¹ Jamajjeya esohui ebionei Jesosa Quito oeneijo huohuicajji equi yamajjana nequiacoocani jama. Jiquio ecua pea eyamajjana ojee nequiaca-ajja jama pea-aiya pea esohui ebionei huohuica-ajja. Jesosa Quito oeneijo esohui huohuicoocajji.

¹² Acuica'a eyamajjana nequiajeyocajo peacuana chacochaconequijetii equijo jiquio ecua pea Eyacuiñajjija esohuicuana huohuicapoquije quijje jamaya. Ojjaña oya jayojja pea-ai pojjeama chacochacopoquiani Jesosajo. Becacuana queaja'anee chacochacopoquiani Jesosajo jiquio ecua equi queanahue iyacani cuaa orojo, meioshejo, pea mei queanahuecuanajo pea-ai jama. Peacuana ca queaquehua, queahueya chacochacoani jiquio ecua equi peajja acuitonajo, bequiobojo iyacuajicani cuaa jama pea-aiya chacochacoani cuana Jesosajo.

¹³ Jamajjeya ojjaña joya ojo chacochacopoquianinajecuana Quitohua bacaje oja chaco a'a oya queapame a'a oya queapame pojjeama chacochacopoquinaje esosequiajji. Majoya o cojjaneijo nequimeeca'yajo ma queapame pojjeama poanaje oja chaco cuaquijijiya dahuajeajeyocaje'yo, chama'yotii pomeecaje oja chaco peajja poanajejojoya. Pea oja chaco ca ma queapame poanaje cuaquijijija edahuajea'yojji pojjeamatii poaje.

¹⁴ Joya queapame chacochacopoquianinajecuana Jesosa Quitojo eyamajjana queaca'ajo, aquiana queanahuejo pea-ai equi iyacani jama, oja chaco cuaquijijiya dahuajea'yojjima acaje. Coma queapame chacochacopoquianinajecuaaya Eyacuiñajjija quia o queapame chacochaconaje sosejje jjeshecañaquije quijje.

¹⁵ Joya queapame pojjeama chacochacopoquianinajecuanaja ca ejjeshejji pojjeamatii poaje Eyacuiñajjija quia oja chaco cuaquijijija edahuajeajeyo'yojojoya. Oya majo queayeno poaje, jamatii Eyacuiñajjiya oya nahuecaje'yo oja quiacuana o queapame chacochaconaje sosejje jjeshepojjima'tii nequi. Jiquio ecua dejja equi quiyo'yajo oya jamatii cuayananaquiani aema'tii quiyo'yo yajjajo, jama pea-aiya oya queayeno poaje jamatii oya quiyo'yojjima.

¹⁶ Miquianaya ojee esohuijo jjachichaquipoquianijo Eyacuiñajji anijji poani quiana. E'e, oja Edojjoshahuapame ojjaña miquianajo nequi'yani esohuijo jjachichaquipoquianijo.

¹⁷ Jamajjeya ojjaña joya Eyacuiñajji anijji poani Jesosaja epeejjicuana queamimishi pomee'yojji poanicuana oja esohui queaquehuajo, Eyacuiñajjiya comacuanaya queaneenee pomeecaje'yo. Jamaya ohuaya esohuihuohuijjinishocuana acaje'yo oja epeejjicuana jjachichaquipoquiani o bihuiajji ojaya queanahuejojoya. Jesosaja epeejjicuana queamimishi pomeeca'yoajja. Miquianaya caca oe Eyacuiñajji anijji poani, equi ejjachichaquipoquijji o bihuiajji jayojja.

¹⁸ ¡A'a queaquehua jjashahuabaquijji! A'a jama pojji ba'a: “Eya ca iña queasapaja'anee poani jiquio meshijo nequica dejjacuanaja sohuihuohui.” Jama pocajji ba'a: “Ecuea ca esohuicuana bajeyoajjajjima, jamajje eya basapoani.” Jama poajoya Eyacuiñajjiya quiana queasapaja'a pomeecaje oja esohuijo.

¹⁹ Jiquio meshijo ba'ecacuanaja esohui ejjashahuabaquijjicuana Eyacuiñajjiya bacani ojaya jama pojjeama, peajja. E'ejojonei Eyacuiñajjija esohui yahuajonei etehue jaa jama poani ba'a: “Joya oyanei queasapaja'anee jjabaquianicuana Eyacuiñajjiya comacuanaya acuichaa jayojja acaje.” Macuaa ebionei ojayanei ejjashahuabaquijji queapame poani poso acaje, majoya oya queabicho pomeecaje Eyacuiñajjiya.

²⁰ Oja esohui yahuajonei etehue jaa jama poani pea-ai ba'a: “Emeshimeseneiya jiquio meshijo ba'eca joya oyanei queasapaja'anee poani jjabaquianicuanaja ejjashahuabaquijjicuana bajeyojeyocani queapame pojjeama, peajja.”

²¹ Jamajjeya a'a jjabihuiaquijji oe dejjaja sohuihuohui poanijjejojoya. Eyacuiñajjiya ojjaña quiacani miquiana queaja'a ba'epoquijji jjabaquicue.

^22-23 Eyacuiñajjiya ecuana eya Pablo, Apolos, Pedro pea-ai huoojeacanaje miquiana sohuihuohuiya. Ojjaña jiquio meshijo ani aquianacuana Eyacuiñajjiya quiacapoquiani miquiana queapame ba'epoquijji. Jiquio ese eshe eba'ejji, emano'yojji pea-ai oja quia. Jjeya ca quiana ca eshe ba'e so'o Eyacuiñajjiya ojjaña quiacapoquiani. Quijje pea-aiya quiacapoquijetii Eyacuiñajjiya miquiana Quitoja poanijojoya. Oya Quito Eyacuiñajjija pea-aiya poani.