1 Conitio 10 - Ese Ejja New Testament

¡A'a eyacuiñajjinishocuananijje mimijji!

¹ Ecue dohuecuana jjo'icuana, eseja etiiquianacuana shahuabacuetii ma yahuajonei Egipto meshijo queashequiajahuiso ba'e ojjañatii cuayaquica'yapoajo. Eseja etiiquiana ojjaña Eyacuiñajjija nequia bohua huidojocapoquiapoa se-ejjama' meshijje. Bae-aihuo'o ena anijje ojjañatiicuana jjayejjemeequicapoa Eyacuiñajjiya bae-ai aniyiyesamaneijje meshi ca'acameemajje.

² Ojjañacuana ma Eyacuiñajjija nequia boquishishijji poquiacapoa, ma bae-ai anijje jjayejjequica'yapoa cuanaya, o huohuijji poaja Moisesja esohuijo jjashajja-ajjaquicapoquiapoa. Macuanaya Moisesnijjetii pocapoquiapoa ojee. Jamajjeya Eyacuiñajjiya ojjaña ma Moisés shajja-ajjajji poacuana Moisesnijjetii ojee nequi bacapoa.

³ Eyacuiñajjija Edojjoshahuapameja quia macuaaya ojjañaa oya bobiya ijjiacapoquiapoa.

⁴ Ena mei-aiquipajje cuayaje ishipea-aicapoa ojjañacuaa Eyacuiñajjija Edojjoshahuapameja cuayamee. Maya mei-ai Quito jayojja pea-ai poa. Quito nequipoquiapoa eseja etiiquianacuana asahuapoquiajji se-ejjama' meshijabojo.

⁵ Jamatiiya Eyacuiñajjiya eseja etiiquiana beshahuanei ojjañatii queapame pojjeama ba'e bacapoquiapoa. Jamajjeya beshahuanei ojjañatii se-ejjama' meshijo nequitii manocapoqui'yapoa. Ojjaña ma meshijabojotii onajaya yami mojeacapoquiapoa cuaa.

⁶ Ojjaña ma eseja etiiquiana yahuajonei ba'ecapoquiapoajo eseya jjeya jjabahuejjaquicajji queamimishi posapojjima' epojji ma ecua yahuajonei queahuisocuana queamimishi ba'ecapoquiapoa jama pea-ai epo poanijje.

⁷ Jamajjeya quiaa oe jjeya eyacuiñajjinishocuana ¡a'a bihuiajji! Ma ecua yahuajonei bihuiacapoa cuaa jama, ¡a'a bihuiajji! Eyacuiñajjija esohui yahuajonei etehue jaa jama poani ba'a: “Eyacuiñajjinisho bihuiajji fiesta queaquemo acapoa cuaa ojee eijjiaijjiajji, eishi-ishijji, emajamajajji. Queamimishinee pocapoa cuana jama pomajje” jamaya tehuecapoa.

⁸ ¡A'a peacojjojji pojji! Ma ecua yahuajonei eseja etiiquianacuana peacojjojji epojji ba'epoquiapoa jama pea-ai a'a posapea-aipojji. Jamajojoya aje queahuisoneecuana Eyacuiñajjiya yahuajonei 23.000 huisome manomeecuajica'yapoa oya pojjajotii ma oja mimishijoya.

⁹ A'a Quitohua eseya jaahuanacaje, a'a oja esohui ajeyocaje'yo ejjabaquijji, ¡a'a jama pojji! Ma ecua yahuajonei queahuisocuaa a'a oja esohui ajeyocaje'yo ejjabaquijji acapoa jama a'a popea-aijji. Majoya queahuisocuana manoca'yapoa Eyacuiñajjija huoojea peyoja ijjia ese'neejo.

¹⁰ A'a Eyacuiñajjijo jjaniñebaquijji peacuananijje. Ma ecua yahuajonei Eyacuiñajjijo jjaniñebaquicapoa cuana jama pea-aiya a'a pojji. Majoya Eyacuiñajjija huoojea angelya eseja etiiquiana queahuisocuana manomeeca'yapoa jama poajoya.

¹¹ Ojjaña ma eseja etiiquiana yahuajonei ba'ecapoquiapoajo eseya jjeya jjabahuejjaquicajji ojaya eba'ejjijo. Eyacuiñajjija esohuijo macuanaja mimishi etehue jaa ese eseja etiiquiana jama queamimishi pea-ai eba'epoqui poanijje. Jamaya Eyacuiñajjiya tehuemeecapoa jjeya eseya eshe nequi oe-ejjenei epojja poechipianijo queaja'atii eba'epoquijji.

¹² Jamajjeya joya oyanei queaca'a nequipoquiani jjabaquijjicuana jjajaahuananeiquicajji. Comaya pojja'a oquequije'yo huacuaya mimishiyasijje.

¹³ Ese queacamajanee pojji Eyacuiñajjijo ejjapajeacuajiquijji poenequijetii jiquio ecua cuana ojjaña poani jamaya. Ese queamimishi pomeejji poenequijetii pea-ai. Jamatii Eyacuiñajji queaca'aneetii nequiani, ojjaña oja esohuicuana jayojja ajeyocaje'yo. Ohuaya quiana queaca'a ba'emeesahuacapoquije ojo ejjashahuabapajeaqui'yo poanijje, queamimishi epo-o'oya poanijje pea-ai. Miquiana queacamajanee pojji, queamimishi pomeejji pea-ai poeajo ohuaya quiana queaca'a ba'emeecaje. Jamajjeya ohuaya quiana nahuecapoquije ma miquiana queacamajanee pojji poeajo ejjapajeacuajiqui'yo poanijje ojo.

¹⁴ Ecue dohuecuana jjo'icuana ecuea quiana queajeanee, jamajjeya ¡a'a eyacuiñajjinishocuana bihuiajji!

¹⁵ Ecuea quiana eba queasapaja'anee poani, jamajjeya jiquio eyaya huohuiaña esohui aneineicue quiaa a'a queaja'a, a'a queaja'a pojjeama ebajji.

¹⁶ Jiquio Quitoja bobi o mano'yapoa shahuabapoquiajji eijjiajji jjachichaquimajje ebionei seya Eyacuiñajji bihuiaje. Majoya jiquio seya ishiaña enaa huohuicani Jesosaa oja na' cuayameequica'yapoa ojjaña ese nahue'yojjijo. Jiquio seya ijjiaña pahuiya huohuicani Jesosaa oja yami quiacapoa ojjaña esejo.

¹⁷ Jamatii eseya queahuiso poani oe eyami jayojja se jjabameequiani oe oya pahui Jesosaja eyami jayojja eseya ijjiamajje o shahuabapoquiajji.

¹⁸ Bacue, israelitacuana achajja yahuajo ba'epoquiapoa. Oja ehuone yemajje enaa jehuimeeca'yapoa Eyacuiñajji quiajji. Majoya oja quia o bihuiajji noe yami dahuameemajje ijjiaca'yapoa oepojji. Jamajjeya equia noe yami oepojji ijjia'yomajje Eyacuiñajjinijje jjapeequiapoa ma dejjaya.

¹⁹ Jiquio eya huohuiaña esohui ¿a'a jama poanijje ba'a: Eyacuiñajjinishocuana queaca'a poani, noe yami equia o bihuiajji queaca'a pea-ai?

²⁰ Chojja, jama poanijje pojjeama. Jiquio eya huohuiaña jama poanijje ba'a: Dejja esohui bapojjima'cuaa noe yami oja eyacuiñajjinisho quiacajo eshahuamasecuana ca ohuaya quiacani, Eyacuiñajji pojjeama. Jamajjeya miquiana eshahuacuananijje jjapeequiani basapo-ajja.

²¹ Jiquio Jesosaja ena' jayojja ishijji o shahuabapoquiajji poanicuanaja ena eyacuiñajjinisho bihuiajji poani ishica-ajja fiesta acajo. Jama pomajjeya seya eshahuamasecuana bihuiaña. Oya jayojjaya joya pahui o mano'yapoa shahuabapoquiajji ijjiajji poanicuaa noe yami eyacuiñajjinisho bihuiajji oja iya ijjiaca-ajja fiesta acajo. Jama pomajjeya seya eshahuamasecuana bihuiaña. Jiquio ecua eshahuamasecuananijje Eyacuiñajjinijje pea-ai ojee jjapeequica-ajja jama pea-aiya pocue.

²² ¿A'a ese jama poajo Eyacuiñajji queaquene pome? E'e, queaquene poaje ojaya ese queanahuejojoya. Jiquio ecua yahue oja huanase pea dejjajo bamajje queaquenenee poani jama pea-aiya Eyacuiñajji poani esejo. ¿A'a eseya queaca'anee poani Eyacuiñajji queaca'apishana? Cheje, chojja, jama pojjeama.

A'a pea minijje Jesosaja epeejji queaquehua jjashahuabameequijji

²³ Jama poani cuana ba'a: “Cua eya asa-aña huisotiiya eyaya aje.” E'e jama pocajji, jamatii ojjañatii queapame pojjeama eajji. E'ejojonei ojjaña cua eseya asa-aje huisotii esejaya acajji. Jamatii cua eseya asa-aña apoquiaña bamajje pea Jesosaja epeejjicuana queaca'a etiipoquijji pojjeama poaje esejo.

²⁴ ¡A'a esejayanei eba'ejjijo jjashahuabaquipoquijji! Pea minijje Jesosaja epeejjicuanajo jjashahuabapea-aiquicue o queaca'a tiimeesahuajjijo.

²⁵ Ojjaña joya noecuana quiacani bejjo sosejje comaya queapame, ijjiacajji. A'a noe quiajji poanicuana huohuiajjajji jama ba'a: “¿A'a jiquio noe yami ani eyacuiñajjinishoque quia?” Chojja, jama aca-ajja. Jamatii coma noecuana queabihuiya ijjiacue. A'a ma noejo queamimishi poaje, mimishiama poaje pojja'a jjabaquijji ijjiamajje.

²⁶ Bacue, ojjañatii aquianacuana jiquio meshijo anica Eyacuiñajjija poani.

²⁷ Jama ba'a: Oe Jesosaja epeejji pojjeamaa miquiana iyaacajje onijje eijjiaijjiajji, poquicue onijje ijjiaijjiasapomajje. Cua ohua miquiana quiacaje bobi noecuana queabihuiya ijjiacue. A'a huohuiajjajji jama ba'a: “¿A'a jiquio noecuana eyacuiñajjinisho onaja quia?” Chojja, jama huohuiajjame aca-ajja.

²⁸ Pea miquiana bobiajji poaje ca ja'anei jama poajo ba'a: “Jiquio noe yami eyacuiñajjinisho quia,” a'a ijjia'yojji o queayeno epomee poanijje ma equia noe yamijo. Ohuaya ijjiaca'yoajja poso acani, queamimishi epoaje poso majoya.

²⁹ E'e pojja'a miquiaaya jamatii ijjiasa-aña yenoamaa. Pea Jesosaja epeejji ca'a-ama poani ca ma noe yami eyacuiñajjinisho quia ijjia'yomajje comajoya queamimishi epoaje poso jjabaquiani. Miquianaya jjashahuabaquiani ma noe yami ijjiaca'yojji yenoamaa. Jamatii a'a ma noe yami ijjia'yojji onijje joya miquiana queamimishi poani poso ajjinijje.

³⁰ Eyaya Pablohua ma noe yami ojjaña queabihuiya ijjia'yaña Eyacuiñajji bobijo gracias amajje. Peaa ca ma noe yami ijjiacajo queamimishi poani bacani. Jamajjeya eya queamimishi poani poso acaje noe yami eya ijjia'yaña bamajje. Majoya oya queayenonee poani.

³¹ Jamajjeya cua miquiaaya ijjiaje, ishije, chacoje pea-ai queapamenee acue quiaa. Queapamenee poani bamajje Eyacuiñajji bihuiacaje queahuisocuaa.

³² Queaja'a quiana oe ba'epoquicue miquiananijje ba'e judiocuana queamimishi epomee poanijje. Judío pojjeamacuana, Jesosaja epeejjicuana pea-ai queamimishi epomee poanijje miquianaja eba'ejjijo queaja'a oe ba'epoquicue.

³³ Eya jama pea-ai quiana oe ba'epoquicue. Eya queabihui ba'epoquiani ojjañacuananijje. Ecueanei eba'ejjijo pojjeama eya jjashahuabaquipoquiani, peacuanajoya ca eya jjashahuabapea-aiquipoquiani o queaca'a esohuijo tiimeesahuajji. Jamaya eya jjashahuabaquianitii peacuana sohuihuohuiquijji epojjijo o Jesosajo ejjanahuemeequi'yojji.