1 Conitio 1 - Ese Ejja New Testament

Esohui ebacoojji

^1-2 Eya Pablo Eyacuiñajjija babaca ona sohuihuohuiquinequijji poani Jesosa Quitoja huoojea. Eyaya eseja dohue Sóstenes bajjaninijje aniya jiquio esohui tehueaña miquianaya Jesosaja epeejjicuana Corinto meshijo ba'eca Eyacuiñajji bihuiajji jjachichaquipoquianicuanaja ebajji. Eyacuiñajjiya quiana iyaacanaje ojaya epo'yojji. Ohuaya quiana Jesosa Quitonijje ojee queapame bacapoquianitii ojo echacochacopoquijji. Pea meshicuanajo ba'eca joya Jesosa Quito bihuiajji poanicuana pea-ai iyaacanaje ojaya epo'yojji, Jesosa Quito macuanaja Emeshimesenei pea-aiya poani.

³ Eyacuiñajji eseja Chii-aiya, Emeshimesenei Jesosa Quitohua pea-ai miquianaya queapamenee ca-acapoquiahuatii ojayanei ejjashahuabaquijjijo, queaquijijjijajinee capomeecahua quiana pea-ai ohuaya.

⁴ Ojjaña pojjajo eya Eyacuiñajjinijje mimipoquianiya gracias aña miquianajo ohua miquiana Jesosa Quitojo queapamenee acapoquianijojoya ojayanei ejjashahuabaquijjijo.

⁵ Miquianaya Jesosaja epeejjicuana poanijojoya Eyacuiñajjiya quiana queahuiso quiacanaje ojo queapame echacochacopoquijji. Ohuaya quiana queajjashahuabaquija'a pomeecani Eyacuiñajjija esohui queaja'a peacuana huohuipoquiajji.

⁶ Miquianaya esohui queapame Quitojo jjashahuabaqui'yonaje, jamajjeya miquianaja esapajo nequipoquianitii, jjachamaqui'yoajja.

⁷ Eyacuiñajjiya queaca'a pomeecanaje quiana ojjaña oja echacojjicuana eapoquiajji, che oema'nei queaca'a epomeejji quiajjima'ya. Emeshimesenei Jesosa Quito poeo'oyajjijo jjaishoaquipoquianitii quiana jamatii queapame chacochacopoquiani ojo.

⁸ Eyacuiñajjiya quiana queaca'a ba'emeecapoquijetii Jesosa Quito poeo'oyajjimahuajo. Jamajjeya chama'nei poaje quijje peaja ehuohui'yojji miquiana queamimishi quea-ohuesha enequimee'yojji eseja Emeshimesenei Jesosa Quito poeo'oyajo.

⁹ Eyacuiñajjiya oja huohui esohuicuana ajeyocaje'yo. Ohuaya quiana iyaacanaje queaja'a eba'epoquijji oja Bacuaejjanijje jjapeequiani. Oja Bacuaejja Jesosa Quito eseja Emeshimesenei poani, e-esemese.

Jesosaja epeejjicuana majo ba'eca oya jayojja pea-ai jjashahuabaquime pojjeama poa oja esohuijo

¹⁰ Jesosaja epeejji ecue dohuecuana jjo'icuana pea-ai, Jesosa Quito eseja Emeshimesenei poanijojoya eyaya quiana huohuiajjaneiaña oya jayojja pea-ai jjashahuabaquime miquiana epojjijo, beca pojjeama. Queabei queneama ba'epoquicue quiana ojee oya jjashahuabaquime pea-ai epo oja esohuijo, mimijajijjima.

¹¹ Ecue dohuecuana jjo'icuana bacue, miquianaya queapame pojjeama ba'e. Beca quiana mimijajiani, botiama aña cuana pea-ai, oya jayojja pea-ai jjashahuabaquime pojjeama poani esohuijo eyaya shajja-ajjanaje Cloeja huapa pojjeamacuanaja huohuijo.

¹² Miquianaya pea pea jjashahuabaquime poani. Beca quiana jama poani ba'a: “Eya ca iña Pabloja sohuihuohui.” Pea mi ca jama poani ba'a: “Eya ca Apolosja sohuihuohui.” Pea mi ca jama poani ba'a: “Eya ca Pedroja sohuihuohui.” Pea mi ca jama poani ba'a: “Eya ca Quitoja.”

¹³ ¿A'a Quitoja esohui pea po'yani? ¿A'a Pablo acui ecuiata'apeejo mano'yapoa miquianajo? Chojja. ¿A'a quiana oja bajjanijo jjaiñajeanobiameequinaje? Chojja.

¹⁴ Eya queabihui poani mahuisonei eyaya iñajeanobianajejo enaojjohuasijje ba'a: Gayo bajjani, Crispo pea-ai. Ecuea ca pea quiana iñajeanobiajjima.

¹⁵ Jamajjeya chama'nei pea ecue iñajeanobia esohui jama yajji ejo.

¹⁶ Eyaya Estefanasja familiacuana iñajeanobiapea-ainaje. Peacuana ca ecuea shahuabajjima poanaje ecuea iñajeanobia.

¹⁷ Bacue, majo pojjeama Quitohua eya huoojeacanaje, ona iñajeanobiajjijo pojjeama. Eya caca oe ohuaya huoojeacanaje oja esohui queapame huohuiquiya. Eyaya joya ecua dejja queasapaja'a ojayanei ejjashahuabaquijjijo sohuinequiñaquiajja jama pojjeamaa huohuiaña. Eya jama huohuime añajojjemo Quito acui ecuiata'apeejo mano'yapoa esohui peajja jayojja shajja-ajjacame cuaa.

Eyacuiñajji queasapaja'anee, ebajeyojeyo

¹⁸ Bacue, esohui queapame Quitojo oya acui ecuiata'apeejo mano'yapoa peajja jayojja bacani joya o sapo-ajjanei poanicuaa. Comacuanaya quea-ohueshatii nequicaje'yo Cuaqui-aiyasijje. Eseyaya joya Jesosajo jjashahuabaqui'yocuaa ca jiquio Eyacuiñajjija esohui queaca'anee poani ese nahue'yojji epojjijo baña.

¹⁹ Eyacuiñajjija esohui yahuajonei etehue jaa jama poani ba'a: “Eyaya Eyacuiñajjiya joya oyanei queasapaja'a jjabaquiani dejjacuana queasapaquehua pomeeje'yo. Ma oja sapadojjojo jaa esohui ma ohua huohuicani quijje chacocaje esohuiya eyaya ojaya jjachamaquimeeje'yo.”

²⁰ ¿Ajeo huohuicaje cuaa joya oyanei queasapaja'a poaniya? Ajeopishana. ¿Achacua nequije joya Moisesja tehuehuohuijji poanicuana? Achacuapishana. Jiquio meshijotii nequicacuana joya pea sohuicuiajeanobiajji poaniya Eyacuiñajjiya comaya queaquehua sohuima' pomeecaje'yo.

²¹ Eyacuiñajji queasapaja'aneetii nequipoquiani. Joya oyaneitii queasapaja'a poani ojayanei ejjashahuabaquijjijo ca bajjimatii poanaje achajja Eyacuiñajji nequi. Eyacuiñajjiya nahueca'yonaje ojjaña joya oja esohui queapame Quitojo jjashahuabaqui'yani huisotiicuana, jamatii queahuisocuaa oja esohui peajja poso acapoquiani ojayanei ejjashahuabaquijjijo.

²² Judío dejjacuaa ma dejjaja ajjima'neineicuana ebionei basa-acani ejjashahuabaqui'yojji Jesosajo. Griego dejjacuana ca jama pojjeama. Oya queasapaja'anee posapoani peacuanaja esohui ehuohuijo.

²³ Ecuaa ca Eyacuiñajjija huoojea ese nahue'yojji poanijo ja'anei sohuihuohuiaña ma o acui ecuiata'apeejo mano'yapoajo. Judiocuana queaquenenee poani jiquio esohui ecuaa majo huohuiañajo. Peajaajjicuaa judío pojjeamacuaa jiquio esohui peajja poso acani shajja-ajjamajje.

²⁴ Joya Eyacuiñajjiya iyaacani cuana ojaya epo'yojji, judiocuana judío pojjeamacuana pea-ai, ojjañaa eseyaya oja huoojea ese nahue'yojji queaca'aneetii poani bapoquiaña. Eyacuiñajjiya oja huoojea ese nahue'yojji poani queasapaja'anee pomeecani bapea-aiaña eseyaya.

²⁵ Bacue, joya Eyacuiñajjija bajjima poso ajji poanicuanaja bajjimanei Eyacuiñajji jama pojjeama. Eyacuiñajjija ca ma quijje ohua acaje ebatii poani ojjaña. Joya Eyacuiñajji ca'a-ama poso ajji poanicuana ca'a-amaneinei poani oya Eyacuiñajji jama pea-ai pojjeamajjejojoya.

²⁶ Ecue dohuecuana jjo'icuana, jjabaquicue quiana oe queaja'a. E'ejojonei Eyacuiñajjiya quiana iyaacanaje jamatii peacuaa quiana queasapaja'a pojjeama bacani. Queaca'a pea huoojeajji etii epojji pojjeama quiana bacani pea-ai. Miquiana iyehuisonei cuayapoa jamatii quea-aquianahuiso epojji miquianaja huapa pojjeama quea-aquianahuisojojoya.

²⁷ Eyacuiñajjiya dejjacuana eponacuana jamajo pojjeama babacacapoa. Ohuaya babacacapoa cuana jiquio meshijo ba'ecacuaa bacani sapadojjoma' jayojja ojaya epeejji epojji. Jamaya ohuaya babacacapoa cuana joya oyanei queasapaja'anee jjabaquijji poanicuana queabicho pomee'yojji quijje. Oya jayojjaya ohuaya babacacapoa cuana jiquio meshijo ba'ecacuaa bacani ca'a-amanei poani ojaya epeejji epojji. Eyacuiñajjiya jamaya babacacapoa cuana joya oyanei queaca'a poso jjabaquianicuana queabicho pomee'yojji quijje.

²⁸ Jiquio meshijo ba'ecacuaa bacani peajja jayojjacuana maya Eyacuiñajjiya babacacapoa ojaya epeejji epojji. Joya onaja saca-ajja, botiama acani cuana maya ohuaya babacacapoa. Jamaya ohuaya babacacapoa cuana ojjaña joya oyanei queaca'a poso queasapaja'a poanicuana jjabaqui'yojji Eyacuiñajjiya oya queapame pojjeama bacani.

²⁹ Jamajjeya chama'nei dejja, epona pea-ai oyanei queaca'a poani ejjabihuiaquijji Eyacuiñajji ani cojjaneijo nequimajje.

³⁰ Eyacuiñajji oeneiya quiana Jesosa Quitonijje nequimeecapoquianitii ojee ojaya'yo onijje ejjapeequipoquijji. Quitohua eseya queasapaja'a pomeecani queaja'a eba'epoquijji. Ohuaya eseya eseja mimishima'yo pomeecani Eyacuiñajjija eseya queaneenee pomee'yojjima yajji. Jjeya mimishi eseja yamijo nequi queaca'a epojjitii pojjeama aca'yonaje Quitohua ese queamimishitii eba'epoqui poanijje.

³¹ Eyacuiñajjija esohui yahuajonei etehue jaa jama poani ba'a: “Joya miquiana queaca'a jjabaquisapoanicuana queaca'anee poani Emeshimeseneijo jjabaquicue oe, miquea eyamijonei pojjeama.”