रोमीयो 5 - जीवन को च्यानणो (सेकावाटी नया नियम की पोथ्या)

परमेसरऊँ मेळमिलाप

¹ आपा बिस्वास की बजेऊँ धरमी होगा हां, इ ताँई परबु ईसु मसी क जरिए आपणो मेळमिलाप परमेसरऊँ ह।

² बिस्वास की बजेऊँ बो आपानै परमेसर की दया म ल्यायो जिमै आपा इब जिर्या हां अर परमेसर की मेमा की आस प गुमान करां हां।

³ खाली ओई नइ, म्हें तो म्हारा दुख म बी गुमान करां हां क्युं क म्हें जाणा हां क दुख थ्यावसनै जलम देवै ह।

⁴ थ्यावसऊँ खराई अर खराईऊँ आस जलम लेवै ह।

⁵ अर आ आस आपणो निरादर कोनी होबा दे, क्युं क पबितर आत्मा क जरिए जखी आपानै दि गई ह परमेसर को परेम आपणा हिया म उंदकायो गयो ह।

⁶ क्युं क जद आपा माड़ी दसा म हा ठिक बि टेमई मसी अधरम्या ताँई मर्यो।

⁷ जदकी कोई धरमी ताँई बी पिराण देबानै त्यार कोनी होवै। पण काँई बेरो कोई धरमी मिनख ताँई मरबा की हिमत कर बी जा।

⁸ पण परमेसर आपणाऊँ अंय्यां को परेम कर्यो क जद आपा पापीई हा बि टेम का बो मसीनै आपणै ताँई मरबा भेज्यो।

⁹ इब जद आपा बिका लोयऊँ धरमी होगा हां जणा परमेसर की झाळऊँ क्युं कोनी बचाया ज्यास्यां।

¹⁰ क्युं क बि टेम का जद आपा परमेसर का बेरी हा, जणा परमेसर आपका बेटा की मोत क जरिए आपणो मेळमिलाप खुदऊँ कर्यो। अर इब जद आपणो मेळमिलाप होगो जणा मसी क जिबाऊँ पक्काई बचाया ज्यास्यां।

¹¹ ओई नइ, पण इब परबु ईसु मसी क जरिए जिकी बजेऊँ आपणो मेळमिलाप परमेसरऊँ होयो ह, परमेसर म गुमान करां हां।

आदम अर ईसु

¹² जंय्यां एक मिनख आदम क जरिए धरती प पाप अर पापऊँ मोत आई। बंय्यांई सगळा मिनख पाप कर्या अर सगळा प मोत आई।

¹³ नेम-कायदा का नियमा क आबाऊँ पेली धरती प पाप हो, पण जठै नेम-कायदा कोनी बठै पाप की गिणती बी कोनी होवै।

¹⁴ पण आदमऊँ लेर मूसा का टेमताई मोत सगळा प राज करती री। मोत बापै बी ही जखा आदम की जंय्यां को पाप कोनी कर्या। आदम आबाळा जंय्यां कोई हो।

¹⁵ पण दोन्यु इकसार कोनी क्युं क परमेसर को सितमित को बरदान आदम का पाप की जंय्यां को कोनी। आ बात सची ह क एक मिनख आदम का पाप की बजेऊँ बोळा मिनखा प मोत आई। पण परमेसर की दया इऊँ बोळी म्हान ह अर एक मिनख ईसु मसी की दया क जरिए बिको सितमित को बरदान बोळा मिनखा ताँई खूब ह।

¹⁶ अर ओ बरदान आदम का पापऊँ आया फळ की जंय्यां को कोनी ह। क्युं क दंड ताँई न्याय को आबो एक पाप क पाछै होयो हो। पण ओ बरदान जखो पाप की माफी कानि लेज्यावै ह, बोळा पाप क पाछै आयो हो।

¹⁷ ज बि एक मिनख आदम का पाप की बजेऊँ मोत को राज आयो। जणा परमेसर की दया अर बरदाननै मुकळाईऊँ लेबाळा बि एक मिनख ईसु मसी क जरिए जीवन प ओर बी बेसी राज करसी।

¹⁸ जंय्यां एक पाप सगळा मिनखा ताँई दंड ल्याओ, बंय्यांई एक धरम को काम सगळा मिनखानै जीवन देबाळी धारमिक्‍ता म लेज्यावै ह।

¹⁹ जंय्यां बि एक मिनख क कह्यो नइ मानबा की बजेऊँ सगळा मिनख पापी होया ठिक बंय्यांई बि एक मिनख क कह्यो मानबा की बजेऊँ बोळा मिनखानै परमेसर सई बतासी।

²⁰ नेम-कायदा इ ताँई आया क पाप बढ सकीं। पण जठै पाप बढ्यो बठै परमेसर की दया इऊँ ओर बी ज्यादा बढी।

²¹ जिऊँ जंय्यां मोत की बजेऊँ पाप राज कर्यो ठिक बंय्यांई आपणा परबु ईसु मसी क जरिए अजर-अमर जीवन ल्याबा ताँई परमेसर की दया धरमऊँ राज करै।