रोमीयो 3 - जीवन को च्यानणो (सेकावाटी नया नियम की पोथ्या)

¹ जणा यहूदि होबा को काँई फाईदो अर सुन्नत को काँई मोल?

² हरतर्याऊँ बाको घणोई फाईदो ह, सऊँ पेली बात तो परमेसर का बचन बानै दिआ गया हीं।

³ के होयो ज बामैऊँ क्युंक बिस्वास जोगा कोनी रिह्या? जणा के परमेसर बिस्वास जोगो कोनी रेह्सी?

⁴ नइ, अंय्यां कोनी, ज सगळा मिनख झूठा होवै जणा बी परमेसर सचोई ह। जंय्यां क मंडर्यो ह: “जिऊँ तू तेरी बाता म धरमी होवै, अर जद न्याय करै जणा तेरी जे हो।”

⁵ पण ज आपणा बुरा करम परमेसर की धारमिक्‍तानै ओरबी साप तरिकाऊँ परगट करै अर बा ताँई बो आपानै सजा देवै जणा के आपा आ बोल सकां हां क परमेसर आपानै सजा देर आपणै सागै अन्याय करर्यो ह? अंय्यां म एक मिनख होबा क नातै बोलर्यो हूँ।

⁶ नइ, अंय्यां कोनी, ज अंय्यां की बात ह जणा परमेसर जगत का मिनखा को न्याय कंय्यां कर सकै ह?

⁷ कोई अंय्यां बी बोल सकै ह, ज मेरो झूठ परमेसर का सच अर बिकी मेमानै बढावै, जणा मनै पापी की जंय्यां नइ दंड्यो जाणो चाए।

⁸ जणा “आओ ल्यो बुराई करां” जिऊँ भलाई होवै। जंय्यां क क्युंक म्हारी बुराई कर म्हारै प दोस लगावीं हीं क म्हें अंय्यां बोलां हां। अंय्यां का मिनख दंड का भागी हीं।

कोई धरमी कोनी

⁹ जणा काँई बात ह? आपा यहूदि गैर-यहूदि मिनखाऊँ चोखा हां के? नइ, क्याका चोखा हां। जंय्यां क म्हें पेलीई बोल दिआ हा क यहूदि अर यूनानी दोन्युई पाप क बस म हां।

¹⁰ जंय्यां की पबितर सास्तर म मंडेड़ो ह, “कोई धरमी कोनी, एकई कोनी!”

¹¹ कोई स्याणो कोनी। “परमेसरनै ढुंढबाळो कोई कोनी!”

¹² “सगळा का सगळा रूळगा, बे सगळा बिगड़गा, कोई भलाई करबाळो कोनी, एक जणो बी कोनी!”

¹³ “बाको गळो खुली कबर ह, बे आपकी जबानऊँ छळ करै।” “बाका होठा प साँप को झेर रेह्‍वै ह।”

¹⁴ “बाका मुंडा सराप अर कड़वाटऊँ भर्या पड़्या हीं।”

¹⁵ “लोय बहाबा ताँई बे आपका पग तावळाई उठावीं।

¹⁶ बाका गेला म नास अर कळेस होवै,

¹⁷ बानै स्यांती का गेला को ज्ञान कोनी।”

¹⁸ “बाकी आँख्या म परमेसर को डर कोनी।”

¹⁹ आपा जाणा हां क नेम-कायदा म मंडेड़ो बि ताँई ह जखो बिकै बस म ह। जिऊँ हरेक मुंडानै बंद कर्यो जा सकै अर सगळा को सगळो जगत परमेसर का दंड को भागी होवै।

²⁰ नेम-कायदा का काम करबाऊँ कोईबी मिनख परमेसर क सामै धरमी कोनी हो सकै। क्युं क नेम-कायदाऊँ तो पाप की पिछाण होवै।

धारमिक्‍ता बिस्वासऊँ आवै

²¹ पण इब परमेसर बिना नेम-कायदा क मिनखानै कंय्यां धरमी बणावै आ परगट करी गई ह, जिकी गुवाई नेम-कायदा अर परमेसर की खेबाळा दि ह।

²² सगळा बिस्वास्या ताँई ईसु मसी प बिस्वास करबा क जरिए बिना कोई भेद कर्या परमेसर कानिऊँ मिलबाळी धारमिक्‍ता परगट करी गई ह।

²³ क्युं क सगळा पाप कर्या अर परमेसर की मेमाऊँ दूर होगा।

²⁴ पण मसी ईसु म जखो छुटकारो ह बिकै जरिए परमेसर की दयाऊँ बे सितमित म धरमी बणाया गया हीं।

²⁵ ईसु की मोत प बिस्वास करबाळा मिनखा का छुटकारा ताँई परमेसर ईसुनै एक कुरबानी जंय्यां भेज्यो। आ बात परमेसर की धारमिक्‍तानै दिखावै ह, क्युंक परमेसर मिनखा का पेलड़ा पापनै ईस्बरीय सेनसिलताऊँ अनदेख्यो कर्यो।

²⁶ बो अंय्यां इ टेम म आपका न्यायनै परगट करबा ताँई कर्यो, जिऊँ बो खुद धरमी अर ईसु म बिस्वास करबाळानै बी धरमी बताबाळो होवै।

²⁷ जणा पाछै गुमान काँई बात को? बि ताँई तो झघाई कोनी। कूणसा नेम-कायदा की बजेऊँ? करमाऊँ? नइ, आऊँ नइ पण बिस्वासऊँ।

²⁸ क्युं क म्हें इ नतिजा प पुग्या हां क मिनख नेम-कायदा का करमाऊँ नइ पण बिस्वास की बजेऊँ धरमी बणै ह।

²⁹ के परमेसर खाली यहूदि मिनखा कोई ह? के गैर-यहूदि मिनखा को परमेसर कोनी? नइ, परमेसर गैर-यहूदि मिनखा को बी ह,

³⁰ क्युं क खाली एकई परमेसर ह जखो यहूदि मिनखा का बिस्वास क जरिए बानै धरमी बणावै ह अर बि बिस्वास क जरिए बो गैर-यहूदि मिनखानै बी धरमी बणावै ह।

³¹ जणा के म्हें बिस्वास क जरिए नेम-कायदानै मानबो बंद कर दिओ? नइ, अंय्यां कोनी! पण नेम-कायदानै थाम राख्या हां।