रोमीयो 16 - जीवन को च्यानणो (सेकावाटी नया नियम की पोथ्या)

पोलुस को नमस्कार

¹ किंखिरीआ की बिस्वासी मंडळी की सेवा करबाळी आपणी बिस्वासी भाण फिबे की थारूँ सिपारीस करूं हूँ।

² क थे परबु म बिकी आवभगत अंय्यां करो जंय्यां एक परमेसर का मिनख की करी जाणी चाए। बिनै थारूँ जखी बी मदद चाए बा मदद बिनै दिज्यो, क्युं क बा बोळा मिनखा की मदद करी अर मेरी बी मदद करी।

³ मसी ईसु म मेरा साती परसकीला अर अकविलानै मेरो नमस्कार खिज्यो।

⁴ मेरी ज्यान बचाबा ताँई बे आपकी ज्याननै बी दाव प लगादि ही, मई नइ पण गैर-यहूदि मिनखा की सगळी बिस्वासी मंडळ्या बी बाको एसान मानै।

⁵ बिकै घरा भेळी होबाळी बिस्वासी मंडळीनै बी मेरो नमस्कार। मेरा लाडला इपनितुसनै जखो एसिया म मसीनै मानबाळा म पेलो मिनख ह मेरो नमस्कार खिज्यो।

⁶ मरीयमनै, जखी थारै ताँई बोळी मेनत करी ह, नमस्कार।

⁷ मेरा देसवासी अंडरोनीकुस अर यूनिया जखा मेरै सागै जेळ म हा, भेजेड़ा चेला म नामी ह अर जखा मेरूँ पेल्याई मसी म आगा हा, बानै मेरो नमस्कार।

⁸ परबु म मेरा लाडला अम्पलिआतुसनै मेरो नमस्कार।

⁹ मसी म मेरै सागै काम करबाळा उरबानुस अर मेरा लाडला इस्तुखुसनै मेरो नमस्कार।

¹⁰ मसी म सचा अर खरा अपिलेसनै मेरो नमस्कार। अरिस्तोबुलुस का परवारनै नमस्कार।

¹¹ मेरा देसवासी हेरोदिओननै नमस्कार। नरकीसुस का परवार का बा मिनखानै नमस्कार जखा परबु म हीं।

¹² तरेफेना अर तरेफोसानै जखी परबु म कड़ी मेनत करबाळी हीं, मेरो नमस्कार। मेरी लाडली परसिसनै जखी परबु म बोळी मेनत करी ह, मेरो नमस्कार।

¹³ परबु म टाळेड़ा रूफुसनै अर बिकी माँ जखी मेरी बी माँ स्यारकी ह, मेरो नमस्कार।

¹⁴ असंकरीतुस, फिलगोन, हरमेस, पतरोबास, हरमास अर बाकी का बिस्वासी भायानै नमस्कार।

¹⁵ फिलगुस, जुलिआ, नेरिऊस अर बिकी भाणनै, ओलमपास अर बिका सगळा परमेसर का मिनखानै मेरो नमस्कार।

¹⁶ थे हात जोड़र एक दुसरानै नमस्कार कर्या करो। थानै सगळी मसी बिस्वासी मंडळ्या कानिऊँ नमस्कार।

आखरी हिदायता

¹⁷ मेरा लाडला बिस्वास्यो, म थारूँ खेऊँ हूँ क, थानै जखी सीख मिली, बिकै खिलाप थारै म फूट गेरबाळा अर दुसरा का बिस्वासनै बिगाड़बाळाऊँ दूर रेह्ओ।

¹⁸ क्युं क अंय्यां का मिनख आपणा परबु मसी की नइ पण आपकी इंछ्या की सेवा करीं हीं। अर अ आपकी मिठी-मिठी अर चापलुसी की बाताऊँ भोळा-भाळा मिनखा को हियो छळी हीं।

¹⁹ हुकमानै मानबा की थारी चरचा, च्यारूमेर होरी ह। इ ताँई म थारूँ खुस हूँ पण म चाऊँ हूँ क थे भलाई ताँई स्याणा बणो अर बुराई ताँई अणभोळ।

²⁰ स्यांती देबाळो परमेसर तावळोई सेताननै थारा पगा तळै चिथवा देसी। आपणा परबु ईसु मसी की दया थार प बणी रेह्‍वै।

²¹ मेरै सागै काम करबाळो तिमूतियूस, लूकियुस, यासोन अर सोसिपतरुस अर मेरा देसवासी कानिऊँ थानै नमस्कार।

²² म तरतियुस, जिका हातऊँ ओ कागद मंडवायो गयो ह, परबु म थानै नमस्कार बोलुँ हूँ।

²³ मेरी अर सगळी बिस्वासी मंडळी की मिजमानी करबाळा गयुस को थानै नमस्कार। इरास्तुस जखो नगरी को भंडारी ह अर आपणा बिस्वासी भाईड़ा कुआरतुस को थानै नमस्कार।

²⁴

²⁵ बिकी बडाई होवै जखो थानै, ईसु मसी का संदेस, जि चोखा समचार को म हेलो पाड़ूँ हूँ अर परमेसर का परगट होयड़ा बि भेदभर्या सच गेल जखो जुगादऊँ लुखेड़ो हो, मजबूत बणाबा की सक्‍ति राखै ह।

²⁶ जिनै जुग-जुग बण्या रेह्बाळा परमेसर का हुकमाऊँ परमेसर की खेबाळा का लेखा क जरिए सगळा गैर-यहूदि मिनखा प परगट कर बता दिओ गयो ह, जिऊँ बामै बिस्वासऊँ पैदा होबाळी कह्यो मानबा की मनस्या पैदा होवै।

²⁷ ईसु मसी क जरिए खाली बि एकई ज्ञान का सागर परमेसर की कदैई नइ मिटबाळा जुग ताँई मेमा हो। अंय्यांई होज्यावै!