रोमीयो 14 - जीवन को च्यानणो (सेकावाटी नया नियम की पोथ्या)

दुसरा की गळती मना काडो

¹ जखा बिस्वास म कमजोर हीं बानै बी सागै राखो, पण बाका मतापै बहस मना करो।

² क्युंक मिनखा को बिस्वास बानै सक्यु खाबा की इजाजत देवै ह, पण जखो बिस्वास म कमजोर ह बो साग-पातई खावै।

³ जखा सक्यु खावीं हीं बे बाको तिरस्कार नइ करै जखा साग-पात खावीं हीं। अर साग-पात खाबाला बानै गळत नइ बतावै जखा सक्यु खावीं हीं। क्युं क परमेसर बानै अपणायो ह।

⁴ दुसरा का दासा को न्याय करबाळा थे कूण होवो हो? बे सफल होसी क कोनी इ बात को फेसलो करबाळो बाको खुदको मालिक ह। अर बे सफल होसी, क्युं क परबु बानै सफल बणाबा को बूतो राखै ह।

⁵ क्युंक मिनख एक खास दिननै बेत्ती मानी हीं, अर कोई सगळा दिनानै एक स्यारकाई मानी हीं। इ ताँई हरेकनै खुदका मन मई हरतर्याऊँ ते करबो चाए।

⁶ जखो मिनख कोई दिननै खास दिन मानै ह बो अंय्यां परबुनै आदर देबा ताँई करै ह। अर जखो सक्यु खावै ह बो बी परबुनै मान देबा ताँई खावै ह, क्युं क बे रोटी ताँई परमेसरनै धनेवाद देवीं हीं। जखा क्युंक चिजा कोनी खावीं बे बी अंय्यां परबुनै मान देबा ताँई करीं हीं। अर परमेसरनै धनेवाद देवीं हीं।

⁷ आपणामै कोईसो बी खुद ताँई कोनी जीवै अर नइ खुद ताँई मरै।

⁸ ज आपा जीवां हां बो परबु ताँई अर ज मरा हां जणा बो बी परबु ताँई। जणा चाए आपा जीवां नहिस मरा, आपा परबु का हां।

⁹ क्युं क मसी इ ताँई मर्यो अर ओज्यु जिंदो होयो जिऊँ बो मरेड़ा अर जीवता दोन्या को परबु होवै।

¹⁰ जणा थे दुसरा को क्युं न्याय करो हो? अर दुसरा बिस्वासी भायानै निचो क्युं जाणो हो? क्युं क आपा सगळा परमेसर का न्याय सिंघासन क सामै खड़्या होस्यां।

¹¹ जंय्यां क पबितर सास्तर म मंडेड़ो ह: “परबु खेवै ह, म जीवतो परमेसर हूँ, सगळा मेरै आगै गोडा टेकसी, अर हरेक जबान खेसी क म परमेसर हूँ।”

¹² आपणा मऊँ हरेकनै परमेसर क सामै खुदको हिसाब देणो पड़सी।

ठोकर मना बणो

¹³ जणा आपा एक दुसराकी गळती निकाळबो बंद करां। इकी झघा इ बात म पक्का होवां क दुसरा भायानै पाप म गिरबा ताँई नइ उकसावां।

¹⁴ परबु ईसु क सागै एका म, म सचमई मानू हूँ क खाबाळी कोई चिज असुद कोनी। बा खाली बि ताँई असुद ह जखो बिनै असुद मानै ह।

¹⁵ ज थारा खाबाऊँ कोई बिस्वासी भाई क ठेस लागै ह जणा थे सचमई प्यार-परेम को भेवार कोनी करो। जणा थारा खाबाऊँ बिको नास नइ होवै, क्युं क मसी बि ताँई मर्यो ह।

¹⁶ जणा जखो तेरै ताँई चोखो ह बि ताँई तेरा नामनै मना खराब कर।

¹⁷ क्युं क परमेसर को राज खाबो-पीबो कोनी पण बो तो धारमिक्‍ता, स्यांती अर पबितर आत्माऊँ मिलबाळो सुक ह।

¹⁸ जखो इ तरिकाऊँ मसी की सेवा करै ह, बिऊँ परमेसर राजी रेह्‍वै ह। अर मिनख बिकी ईज्जत करै ह।

¹⁹ जणा, बा बाता म लाग्या रेह्ओ जखी स्यांतीनै बढावै ह अर एक दुसरा की आत्मिक बढोतरी म मदद करै ह।

²⁰ खाबा ताँई परमेसर का कामनै मना बिगाड़ो। हर जंय्यां को खाणो सुद ह पण ज क्युं खाबाऊँ कोई मिनख पाप म गिरै जणा बिनै खाबो गळत ह।

²¹ मास नइ खाबो चोखो ह, दारू नइ पीबो चोखो ह अर क्युं बी अंय्यां को काम जखो तेरा बिस्वासी भाईनै ठोकर खुवावै नइ करबो चोखो ह।

²² इ ताँई आ बाता क बारां म थारो जखो बी बिस्वास ह बिनै तेरै अर परमेसर क बिच राख। भागहाळा हीं बे मिनख जखा जि बातनै चोखी समजीं हीं बामै खुदनै दोसी कोनी मानी।

²³ पण जि चिजनै खाबा को मन कोनी माँगै ज बो अंय्यां की चिज खावै ह, जणा बो दोसी होवै ह। क्युं क बिको खाबो बिका बिस्वास गेल कोनी ह अर बो सक्यु जखो बिस्वासऊँ कोनी बो पाप ह।