रोमीयो 11 - जीवन को च्यानणो (सेकावाटी नया नियम की पोथ्या)

इजरायल प परमेसर की दया

¹ जणा म बुजूँ हूँ, “के परमेसर आपका मिनखानै तज दिओ?” नइ, अंय्यां कोनी। क्युं क म बी अब्राहम का बंस अर बिन्यामीन का गोत को इजरायली हूँ।

² परमेसर आपका मिनखाऊँ जानै बो पेल्याऊँ जाणतो हो मुंडो कोनी मोड़्यो। के थे कोनी जाणो क एलिआ क बारां म सास्तर काँई बोलै ह, जद एलिआ परमेसरऊँ इजरायल का मिनखा क खिलाप कंय्यां अरदास करी ही?

³ “ओ परबु, बे थारी खेबाळा का पिराण ले लिआ। तेरी बेदीयानै तोड़ गेर्या। अर मनै छोडर तेरी खेबाळा म कोई कोनी बच्यो अर बे मनै बी मारबा की तक म हीं।”

⁴ पण जणा परमेसर बिनै काँई जुबाब दिओ? “म मेर ताँई सात हझार मिनखानै बचा राख्यो हूँ जखा झूठा देवता बाल क आगै नाक कोनी रगड़ी।”

⁵ अंय्यांई आज बी क्युंक इजरायली हीं, जखा परमेसर की दयाऊँ टाळेड़ा हीं।

⁶ ज ओ परमेसर की दया को नतिजो ह, जणा ओ मिनखा का करमा को नतिजो कोनी ह। नहिस तो दया को काँई मतबल।

⁷ जणा इऊँ काँई? इजरायल का मिनखानै बो कोनी मिल्यो जिनै बे टोवै हा, पण बो टाळेड़ानै मिलगो। जदकी बाक्या का मनानै काठो कर दिओ गयो।

⁸ जंय्यां क पबितर सास्तर म मंडेड़ो ह, “परमेसर बानै बेचेत मिनखा कोसो मन दिओ।” “अंय्यां की आँख्या दि जानै सुजै कोनी अर अंय्यां का कान दिआ जखा सुण कोनी सकै हा। अर आ दसा आज ताँई बणेड़ी ह।”

⁹ दाऊद बोलै ह, “बाकी दावत बा ताँई फंदो, जाळ, ठोकर अर सजा की बजे बणज्यावै।

¹⁰ बाकी आँख्या धुँधळी होज्या जिऊँ बे देख कोनी सकीं। अर बाकी कड़त्यु सदाई झुकी रेह्‍वै।”

गैर-यहूदि मिनखा को छुटकारो

¹¹ जणा म बुजूँ हूँ, के बे इ ताँई ठोकर खाया क बे नास होज्यावीं? नइ, पण बाकै गळती करबाऊँ गैर-यहूदि मिनखानै छुटकारो मिल्यो। जिऊँ यहूदि मिनखा क मना म होड पैदा होवै।

¹² अंय्यां ज बाकै गळती करबा को मतबल जगत भर्योपूरो होवै अर बाकी नाकामीऊँ गैर-यहूदि मिनख भर्यापूरा होवै, इ ताँई ज बे सगळा एक सागै जुड़ज्यावै, जणा कत्ती भरपूरी होसी।

¹³ आ इब म थारूँ, जखा यहूदि कोनी बोलर्यो हूँ, क्युं क जंय्यां खास तोर प तो म गैर-यहूदि मिनखा ताँई भेजेड़ो चेलो हूँ अर मनै मेरा काम प गुमान ह क्युं क इनै पूरी जीज्यानऊँ करूँ हूँ ,

¹⁴ बंय्यांई म चाऊँ हूँ क कंय्यां बी कर म मेरा मिनखा म होड पैदा कर सकूँ अर बामैऊँ क्युंकनै बचा सकूँ।

¹⁵ क्युं क बानै नकार्यो जाबो जगत का बाकी मिनखा को परमेसरऊँ मेळमिलाप करवावै ह, जणा बानै अपणायो जाबो मरेड़ा मऊँ ओज्यु जीलाबो कोनी होसी के?

¹⁶ ज चढावा मऊँ चढायो जाबाळो भोग पबितर ह जणा बाकी को चढावो बी तो पबितर ह। ज दरख्त की जड़ पबितर ह जणा पाछै बिकी डाळ्यां बी पबितर ह।

¹⁷ पण ज पाळेड़ा जेतून का दरख्त की क्युंक डाळ्यां तोड़र फेक दि जावै, अर एक जंगली जेतून की डाळीनै बिपै कलम चढा दिओ जावै, जणा थे गैर-यहूदि जखा पाळेड़ा दरख्त प कलम चढाईड़ी डाळ्यां की जंय्यां हो जेतून की जड़्या का पोसण का साती हो।

¹⁸ जणा तनै बा डाळ्यां क सामै जखी तोड़र फेकी गई गुमान नइ करबो चाए। अर ज गुमान करै जणा ध्यान राख ओ तू कोनी जखो जड़्यानै पाळर्यो ह, आ तो बा जड़ ह जखी तनै पाळरी ह।

¹⁹ इब तू बोलसी, “डाळ्यां इ ताँई तोड़ी गई क मेरी कलम चढै।”

²⁰ आ बात सची ह क बे बाका भेम की बजेऊँ तोड़ी गई पण थे थारा बिस्वास का बूता प टिकर्या हो। जणा इको गुमान मना करो पण डरता रेह्‍वो।

²¹ ज परमेसर असल डाळ्यांनैई कोनी छोडी जणा थानै बी कोनी छोडै।

²² जणा तू परमेसर की नरमाईनै देख अर बिकी कल्ड प ध्यान दे। आ कल्ड बा ताँई ह जखा पड़ग्या पण ज थे बिकी दया म बण्या रेह्‍वो जणा बिकी दया थारै ताँई ह। नहिस थानै बी का'टर फेक दिओ जासी।

²³ अर ज बे आपका भेमनै छोड दे जणा बानै बी दरख्त म जोड़ दिओ जासी। क्युं क परमेसर बानै ओज्यु जोड़बा की सक्‍ति राखै ह।

²⁴ जद तनै जलमजात जंगली जेतून का दरख्तऊँ एक डाळी की जंय्यां का'टर बिधी क खिलाप एक चोखा जेतून का दरख्तऊँ जोड़ दिओ गयो, जणा अ जखी बि दरख्त की खुदकी डाळ्यां हीं खुदका दरख्त म पाछी क्युं कोनी जोड़ी जासी।

सगळा प परमेसर की दया

²⁵ मेरा लाडला बिस्वास्यो! म थानै इ लुखेड़ा सचऊँ अणजाण कोनी राखबो चाऊँ, क थे खुदनै घणा चतर नइ समजबा लागो। क्युं क इजरायल का मिनखा को ढिटपुणो सदाई कोनी बण्यो रेह्सी। ओ तो जद ताँई ह जद ताँई गैर-यहूदि मिनखा मऊँ जत्ता टाळेड़ा हीं, बे सगळा परमेसर कनै नइ आज्यावै।

²⁶ अर अंय्यां सगळा इजरायली बचाया ज्यासी। जंय्यां की पबितर सास्तर म मंडेड़ो ह, “छुटकारो देबाळो सिओनऊँ आसी; बो याकूब का कूणबाऊँ सगळो अधरम दूर करसी।

²⁷ अर बाकै सागै मेरो ओ नयो करार ह, क म बाका पापनै दूर कर देस्युँ।”

²⁸ जठै ताँई चोखा समचार को सुवाल ह, बे थारा हित म परमेसर का बेरी हीं। पण जठै ताँई परमेसर क हाता टाळ्या जाबा की बात ह, जणा बे बाका बडका की बजेऊँ परमेसर का लाडला हीं।

²⁹ क्युं क परमेसर का बरदान अर बिको बुलाया जाबानै कोनी बदल्यो जा सकै।

³⁰ जंय्यां क थे गैर-यहूदि पेल्या परमेसर का कह्या म कोनी चालता हा। पण इब यहूदि परमेसर का कह्या म नइ चालबा की बजेऊँ परमेसर की दया थार प होई ह।

³¹ बंय्यांई बे इब कह्या म कोनी चालै जिऊँ जखी दया थार प होई ह बा इब बापै होवै।

³² क्युं क परमेसर सगळा मिनखानै कह्यो नइ मानबा की केद म इ ताँई गेर राख्यो ह क बो बापै दया करै।

परमेसर धने ह

³³ परमेसर की भरपूरी, बुदी अर ज्ञान कत्तो अपरम्पार ह। बिको न्याय कत्तो उंडो अर बिका गेला कत्ता भेदभर्या हीं।

³⁴ “परबु का मननै कूण जाणै ह? अर बिनै राय देबाळो कूण ह?”

³⁵ “परमेसरनै कूण काँई दिओ? क बो कोईनै पाछो दे।”

³⁶ क्युं क सगळा को रचबाळो बोई ह। बिऊँ सगळा हीं अर बे बी ताँई हीं। बिकी सदाई मेमा हो! अंय्यांई होवै।