दरसाव 20 - जीवन को च्यानणो (सेकावाटी नया नियम की पोथ्या)

एक हझार बरस

¹ इकै पाछै मनै ईस्बर नगरीऊँ एक ईस्बर नगरी दुत तळै उतरता दिख्यो। बिकै हात म पताळ की चाबी अर एक बडीसारी साँकळ ही।

² बो बि अजगरनै जखो पुराणो साँप, दुस्ट अर सेतान खुवावै ह बिनै पकड़र एक हझार बरस ताँई साँकळऊँ बांद दिओ।

³ बो बिनै पताळ म गेर'र बिकै ताळो लगा दिओ। अर बिकै उपर म्होर लगादि जिऊँ बो एक हझार बरसा ताँई मिनखानै कोनी भंगरा सकै। पण एक हझार बरसा क पाछै बिनै क्युंक टेम ताँई छोड्यो ज्यासी।

⁴ जणा म क्युंक सिंघासन देख्या बापै क्युंक मिनख बेठ्या हा। बानै न्याय करबा को अधिकार दिओ गयो हो। अर म बा मिनखा की आत्मानै जाका सीर ईसु मसी की गुवाई देबा की बजेऊँ अर परमेसर को बचन सुणाबा की बजेऊँ काट्या गया ह, अर बा मिनखानै जखा बि खुखार ज्यानबर अर बिकी मूरतीनै कोनी धोक्या अर नइ बिका आंकनै आपकै माथा अर हात प लगाया हा देख्यो। बे ओज्यु जिंदा होगा अर एक हझार बरस ताँई मसी क सागै राज कर्या।

⁵ बाकी का मिनख जद ताँई एक हझार बरस कोनी बितगा बे जिंदा कोनी होया। ओ पेलो मर्या पाछै ओज्यु जिंदो होबो ह

⁶ बे मिनख भागहाळा अर पबितर ह जखा पेला मर्या पाछै ओज्यु जिंदा होबा का भागी होसी। आ मिनखा प दुसरी मोत को कोई बस कोनी। पण अ मिनख परमेसर अर मसी का याजक होसी अर बिकै सागै एक हझार बरस ताँई राज करसी।

सेतान की हार

⁷ पण जद एक हझार बरस पूरा होज्यासी जणा सेताननै केद मऊँ छोड्यो ज्यासी।

⁸ अर बो धरती का सगळा देसा का मिनखानै भंगराबा ताँई जासी अ गोग अर मागोग का नामऊँ जाण्या जावै ह। बो बानै युद करबा ताँई भेळा करसी। अर बे समदर की रेत की जंय्यां अणगीणत होसी।

⁹ सेतान की सेना सगळी धरती प फेल ज्यासी। अर बे परमेसर का मिनखा का डेरा अर बिकी लाडली नगरीनै घेर लेसी पण बापै आग बरससी अर बानै बाळ गेरसी।

¹⁰ अर बि सेताननै जखो बानै भंगरातो हो बि तिजाब हाळा नरक का भबकता आग का कूंड म जिकै मांयनै बि खुखार ज्यानबर अर झूठा परमेसर की खेबाळानै गेर्यो गयो हो बिकै मांयनै गेर दिओ ज्यासी। अर बानै सदा-सदाई दिन-रात बिकै मांयनै तड़पायो जासी।

दुनिया को न्याय

¹¹ इकै पाछै म बडोसारो धोळो सिंघासन अर बिकै उपर जखो बेठ्यो हो बिनै देख्यो। बिकै सामैऊँ आसमान अर धरती भाग छुट्या अर बाको नामो निसानई कोनी रिह्यो।

¹² इकै पाछै म छोटाऊँ लेर बडा ताँई का सगळा मरेड़ा मिनखानै देख्यो। बे बि सिंघासन क सामै खड़्या हा , जणा क्युंक पोथ्या खोली गई। आकै पाछै एक ओर पोथी खोली गई, जखी जीवन की पोथी ह। अर बाका करमा गेल जखा इ पोथी म मांड्या गया हा, मरेड़ा को न्याय कर्यो गयो।

¹³ जखा मिनख समदर म मरगा हा, बानै समदर दे दिओ अर मोत अर पताळ बी मरेड़ा मिनखानै दे दिआ। अर बा हरेक को न्याय बाका करमा गेल कर्यो गयो।

¹⁴ इकै पाछै मोतनै अर पताळनै आग का कूंड म गेर दिओ गयो। ओ आग को कूंडई दुसरी मोत ह।

¹⁵ अर जिको बी नाम जीवन की पोथी म मांडेड़ो कोनी मिल्यो बिनै बी इ आग का कूंड म गेर दिओ गयो।