दरसाव 16 - जीवन को च्यानणो (सेकावाटी नया नियम की पोथ्या)परमेसर का परकोपऊँ भरेड़ा सात प्याला 1 जणा म सुण्यो क बा सात्यु ईस्बर नगरी दुतानै मनदर मऊँ कोई जोरको हेलो देर बोल्यो, “जाओ, अर परमेसर का परकोपऊँ भरेड़ा आ सात्यु प्यालानै धरती प उंदकाद्यो।” 2 जणा पेलो ईस्बर नगरी दुत गयो अर धरती प आपको प्यालो उंदका दिओ, जिऊँ जखा मिनख बि डरावना जानबरनै अर बिकी मूरतीनै धोक्या हा अर बिको आंक लिआ हा बाकै राद हाळा सूगला गुमड़ा निकळ्याया। 3 बिकै पाछै दुसरो ईस्बर नगरी दुत आपको प्यालो समदर प उंदका दिओ, जिऊँ समदर को पाणी मरेड़ा मिनखा का लोय की जंय्यां होगो अर समदर क मांयनै जत्ता बी जीवता जानबर हा बे सगळा मरगा। 4 तीसरो ईस्बर नगरी दुत आपको प्यालो नद्या अर झरना प उंदका दिओ जिऊँ बाको पाणी बी लोय होगो। 5 जणा म पाणी प अधिकार राखबाळा ईस्बर नगरी दुतनै ओ बोलता सुण्यो, “ओ पबितर, थे सई न्याय करो हो। थे हा अर हो, 6 क्युं क अ मिनख थारा मिनखा अर परमेसर की खेबाळा को लोय भुआया हीं। थे बानै पीबानै लोय दिओ ह बे इ जोगाई ह।” 7 बिकै पाछै म बेदीऊँ उवाज सुण्यो, “ओ परबु परमेसर थे सऊँ सक्तिसाली हो। थारो न्याय सचो अर सई ह।” 8 चोथो ईस्बर नगरी दुत आपको प्यालो सूरज प उंदका दिओ, अर मिनखानै गरमीऊँ बाळबा ताँई सूरजनै सक्ति दे दि। 9 जिऊँ बे मिनख भेंकर गरमीऊँ तपगा अर परमेसर का नाम की बुराई करबा लाग्या जिकै बस म आ म्हामारी ही , पण बे तौबा कोनी कर्या अर नइ परमेसर की मेमा करी। 10 बिकै पाछै पाचवो ईस्बर नगरी दुत आपको प्यालो बी डरावना जानबर का सिंघासन प उंदका दिओ, जिऊँ बिका राजपाट म अँधकार छागो। पिड़ा क मार्या मिनख आपका दांताऊँ आपकी जीब काट ली। 11 बे मिनख दरद अर गुमड़ा की बजेऊँ ईस्बर नगरी का परमेसर की बुराई करर्या हा, पण बे आपका कामाऊँ तौबा कोनी कर्या। 12 छठो ईस्बर नगरी दुत आपको प्यालो बडोड़ी नदि फरात प उंदका दिओ, जिऊँ बिको पाणी सूकग्यो। अर बिको पाणी सूकबाऊँ अगुणी दिसा का देसा का राजा ताँई गेलो बणगो। 13 इकै पाछै म काँई देख्यो क बी बडासारका अजगर क मुंडाऊँ, अर बी डरावना जानबर क मुंडाऊँ अर बाका झूठा परमेसर की खेबाळा का मुंडाऊँ मिंडका सारकी तीन सूगली आत्मा निकळी। 14 अ सेतानी ओपरी बलाय ही आकै मांयनै चमत्कार करबा की सक्ति ही। अ सगळा जगत का राजानै भेळा करबा ताँई चाल पड़ी जिऊँ अ सऊँ सक्तिसाली परमेसर का न्याय का दिन लड़ाई लड़ै। 15 “चेता म रेह्वो, क्युं क म चोर की जंय्यां चाणचुक आऊँ हूँ! भागहाळा हीं बे जखा जागता रेह्वै ह, अर आपका गाबानै समाळै ह, जिऊँ बे सरमा नइ मरै।” 16 बे ओपरी बलाय बा सगळा राजानै भेळा कर बि झघा लिआई जिनै इबरानी भासा म हरमगिदोन बोलै ह। 17 इकै पाछै सातुओ ईस्बर नगरी दुत आपको प्यालो भाळ प उंदका दिओ, अर मनदर का सिंघासनऊँ जोरको हेलो सुणाई दिओ, “सक्यु पूरो होगो!” 18 जणा बिजळी कड़कर चमकबा लागी, बादळ गरजबा लाग्या अर जोरको भूचाळ आयो। अंय्यां को भूचाळ इऊँ पेल्या धरती प कदैई कोनी आयो। ओ भूचाळ बोळो भेंकर हो। 19 अर बडी नगरी का तीन टुकड़ा होगा, अर पापी मिनखा की सगळी नगर्या नास होगी। परमेसर बाबुल नगरीनै सजा देबा ताँई याद कर्यो जिऊँ क बो बिनै आपका परकोपऊँ भरेड़ो अँगूरी को प्यालो पिलावै। 20 सगळा टापू लापता होगा। एक डूँगर बी नजर कोनी आर्यो हो। 21 आसमानऊँ मण-मण का ओळा मिनखा प पड़र्या हा। अर इ म्हामारी की बजेऊँ मिनख परमेसर की बुराई करर्या हा। क्युं क आ म्हामारी बोळी भेंकर ही। |
(c) 2010-2017, New Life Computer Institute. All rights reserved