दरसाव 13 - जीवन को च्यानणो (सेकावाटी नया नियम की पोथ्या)

समदर मऊँ डरावना जानबर को निकळबो

¹ जणा म समदर क मांयनैऊँ एक खुखार ज्यानबरनै बारनै निकळता देख्यो। बिकै दस तो सींग अर सात सीर हा। अर बिकै सींगा प दस ताज हा। बिका हरेक माथा प परमेसर की बुराई करबाळा नाम मंडर्या हा।

² म जखा खुखार ज्यानबरनै देख्यो हो बो दिखबा म तो चीता की जंय्यां को हो पण बिका पग रीछ की जंय्यां का अर मुंडो नार की जंय्यां को हो। बो अजगर बिनै आपको सिंघासन आपको सगळो अधिकार, अर सक्‍ति सूप दिनी।

³ बि खुखार ज्यानबर क सीरामऊँ एक सीर म अंय्यां को घाव हो जिऊँ अंय्यां लगार्यो हो बो इबारई मरज्यासी। पण बिको ओ घाव भरगो, जिऊँ सगळी धरती का मिनख ताजूब कर बिकै गेल होलिआ।

⁴ मिनख बि अजगरनै धोकबा लाग्या क्युं क बो आपको सगळो अधिकार बि खुखार ज्यानबरनै दे दिओ हो। अर बे बि डरावना जानबरनै बी धोकर खेबा लाग्या, “इ जानबर जत्तो सक्‍तिसाली कोई कोनी। अर इऊँ लड़बा की हिमत कोईकी इ कोनी।”

⁵ बि खुखार ज्यानबरनै बयाळिस म्हेना ताँई परमेसर की बुराई करबानै, गुमानऊँ बोलबा ताँई अर मिनखा प अधिकार राखबा ताँई खुलो छोड्यो गयो हो।

⁶ जणा बो परमेसर की बुराई करबानै आपको मुंडो खोल्यो अर बो परमेसर का नाम, बाकी रेह्बाळी झघा अर ईस्बर नगरी म रेह्बाळा मिनखा की बेजती करबा लाग्यो।

⁷ बिनै ओ अधिकार दिओ गयो क बो परमेसर का मिनखाऊँ लड़र जीतै। अर बिनै धरती का सगळा कूणबा प, मिनखा प, सगळी बोली बोलबाळा प, अर सगळा देसा प अधिकार दिओ गयो हो।

⁸ जखा मिनखा को नाम बि उन्या की जीवन हाळी पोथी म कोनी मांडेड़ो बे सगळा मिनख इ डरावना जानबरनै धोकसी। ओ उन्यो जखो इ सरस्टि की सरूआतऊँई बलि होबा ताँई ते कर्यो गयो हो।

⁹ जिकै कान ह, बे बानै खोल ले।

¹⁰ “जिनै केद म जाणो ह, बो केद म ज्यासी, जिनै तलवारऊँ मार्यो ज्यासी, बो तलवारऊँ मरसी।” इमई परमेसर का मिनखानै थ्यावस अर बिस्वास राखबा की जुर्त ह।

¹¹ इकै पाछै म धरतीऊँ एक ओर डरावना जानबरनै बारनै निकळता देख्यो। जंय्यां उन्या क सींग होवै ह बंय्यां बिकै दो सींग हा, पण बिकी उवाज अजगर जंय्यां की ही।

¹² ओ बि पेलड़ा खुखार ज्यानबर को सगळो अधिकार काम म लेर्यो हो अर धरती प रेह्बाळा सगळा मिनखाऊँ बि जानबरनै जिको घाव भरगो हो बिनै पूजावै हो।

¹³ अर ओ बडा-बडा सेलाणी-चमत्कार दिखातो हो, अठै ताँई क ओ मिनखा क सामै आसमानऊँ धरती प आग बरसा देतो हो।

¹⁴ पेलड़ा डरावना जानबर का अधिकारऊँ बो चमत्कार दिखातो हो। अंय्यां कर बो धरती का परमेसर प बिस्वास नइ करबाळा मिनखानै भंगरा दिओ जिऊँ बानै ओ बिस्वास होज्यावै क बानै पेलड़ा डरावना जानबरनै धोकणो चाए। बो मिनखानै पेलड़ा डरावना जानबर की मूरती बणाबा ताँई बोल्यो जिकै तलवारऊँ घाव होयो अर बो हाल जीवै हो। जिऊँ बिनै मान मिलै।

¹⁵ बि दुसरा डरावना जानबरनै बि मूरती म पिराण गेरबा की सक्‍ति दि गई ही। जिऊँ बा बोल सकै। अर जत्ता बी मिनख बि मूरतीनै नइ धोकै बानै मार दिओ ज्यासी।

¹⁶ अर बो सगळा मिनखानै चाए बो छोटो हो नहिस बडो हो, पिसाळो हो नहिस गरीब हो, मालिक हो नहिस नोकर हो बो सगळानै माथा अर दाया हात प एक छाप लेबा ताँई मजबुर कर्यो।

¹⁷ अर जिकै बी बा छाप कोनी होती बे नइ तो क्युं मोल ले सका हा अर नइ बेच सका हा। आ छाप बि डरावना जानबर को नाम अर बिको आंक ह।

¹⁸ जिमै बुदी ह बो बि डरावना जानबर का आंकनै जोड़ले, क्युं क ओ एक मिनख को आंक ह। अर बो आंक छ सो छियासठ (666) ह।