फिलेमोन 1 - जीवन को च्यानणो (सेकावाटी नया नियम की पोथ्या)

राजी-खुसी का समचार

¹ म पोलुस, जखो मसी ईसु को समचार सुणाबा की बजेऊँ जेळ म बंदि हूँ। म अर बिस्वासी भाईड़ो तिमूतियूस आ चिठी, म्हारा लाडला संगी फिलेमोन,

² म्हारी भाण अफिया, म्हारो सिरी अरखिप्पुस जखो सिपाई ह अर थारा घरा भेळी होबाळी मसी बिस्वासी मंडळीनै मांडां हां।

³ आपणा परम-पिता परमेसर अर परबु ईसु मसी की दया अर स्यांती थार प बणी रेह्‍वै।

फिलेमोन का प्यार-परेम की बडाई

⁴ फिलेमोन, म जद बी अरदास करूं हूँ, जणा म मेरी अरदास म तनै याद राखूँ हूँ, अर तेरै ताँई सदाई परमेसर को धनेवाद देऊँ हूँ।

⁵ क्युं क तू जखो परेम परमेसर का मिनखा ताँई राखै ह, अर जखो बिस्वास तू ईसु मसी म राखै बिकै बारां म, म सुणतो रेह्‍वूं हूँ।

⁶ म आ अरदास करूं हूँ क, तू मिनखानै तेरै बिस्वास क बारां म बतावै जणा बिकै जरिए बे मसी का सगळा आसिरबादा क बारां म जाणै जखा आपानै दियड़ा ह।

⁷ क्युं क मेरा बिस्वासी भाईड़ा, म तेरा प्यार-परेमऊँ बोळो राजी हूँ, अर बिऊँ मनै हिमत मिलै ह। तेरी बजेऊँ परमेसर का मिनखा का हिया राजी हीं।

उनेसिमुस ताँई फिलेमोनऊँ पोलुस की अरदास

⁸ मसी म मनै ओ हक क, म जखो सई ह बिनै करबा ताँई ओडाऊँ।

⁹ अर म उमर म बी बडो हूँ अर अठै ताँई क म मसी ईसु का चोखा समचारनै सुणाबा की बजेऊँ जेळ म बंदि हूँ। पण आ सगळी बाता क वावजुद बी म तेरूँ परेमऊँ अरदास करूं हूँ,

¹⁰ म चाऊँ हूँ क तू मसी म मेरा बेटा उनेसिमुस की मदद करै। क्युं क ओ जेळ म मेरै जरिए मसी म आयो।

¹¹ पेल्या ओ तेरै क्युंई काम को कोनी हो, पण इब ओ तेरै अर मेरै दोन्या क काम को ह।

¹² जणा इब म मेरा काळज्या का टुकड़ा उनेसिमुसनै तेरै कनै पाछो भेजूँ हूँ।

¹³ मेरी तो आ इंछ्या ही क बो अठै रेह्‍र तेरै कानिऊँ मेरी सेवा करै, क्युं क म तो चोखा समचारनै सुणाबा की बजेऊँ जेळ म बंदि हूँ।

¹⁴ पण फिलेमोन तेरी हामी बिना म क्युंई कोनी करबो चाऊँ, जिऊँ तेरूँ होबाळी भलाई कोई दबाब म नइ होवै पण तेरी इंछ्याऊँ होवै।

¹⁵ कूण जाणतो हो क बो तेरूँ इ ताँई न्यारो होयो क बो सदाई तेरै कनै रेह्‍वै।

¹⁶ पण बो एक दास की जंय्यां नइ पण एक भाई की जंय्यां मेरो लाडलो ह अर मेरूँ बेत्ती बो परबु क गेल चालबा की बजेऊँ अर एक सागी भाई क रूप म तनै बोळो प्यारो होसी।

¹⁷ ज तू मनै तेरो साती समजै जणा तू बिकी बंय्यांई आवभगत करजे जंय्यां मेरी करै ह।

¹⁸ अर बिकी बजेऊँ तेरो क्युं बुरो होयो नहिस तेरी बिपै माँगत ह जणा बिनै मेरै नाम मांड लिए।

¹⁹ म पोलुस मेरै हातऊँ मांडर्यो हूँ क, म तेरो सक्यु चुका देस्युँ। अर आ बात मनै बताबा की जुर्त कोनी क तेरो जीवन मेरो करजदार ह।

²⁰ मेरा लाडला बिस्वासी भाई, ज तू मेरै ताँई आ बात करदे, जणा परबु ईसु मसी क नामऊँ मेरा काळज्या म ठंड पड़ज्या।

²¹ तेर प मनै भरोसो ह जणाई म तनै मांडूँ हूँ, क्युं क म जाणू हूँ क, तू जखो म तेरूँ चाऊँ हूँ बिऊँ बढर करसी।

²² मेरै ताँई एक कोठो त्यार राखजे, क्युं क मनै आस ह की थारी अरदास की बजेऊँ थारूँ मिलस्युं।

चिठी की आखरी बाता

^23-24 मसी ईसु क पिछै चालबा की बजेऊँ मेरै सागै जेळ म बंद इफरास मेरा साती-संगी मरकुस, अरिस्तखुस, देमास अर लूका थानै नमस्कार बोली ह।

²⁵ आपणा परबु ईसु मसी की दया थारै सगळा की आत्मा क सागै रेह्‍वै। अंय्यांई होवै!