मरकुस 9 - जीवन को च्यानणो (सेकावाटी नया नियम की पोथ्या)

¹ ईसु बाऊँ बोल्यो, “म थानै सची खेऊँ हूँ, अठै खड़्या मिनखा मऊँ कई-कई तो अंय्यां का ह क बे जद ताँई परमेसर का राजनै बिकी सक्‍ति क सागै नइ देखले जद ताँई बानै मोत कोनी आसी।”

ईसु को रूप चमकबा लाग्यो

² छ दिना क पाछै ईसु आपका चेला मऊँ पतरस, याकूब अर यहून्नानै सागै लेर एकला म बो बानै उचासा डूँगर प लेगो। बठै बाकै सामै ईसु को रूप बदल्यो गयो

³ अर ईसु का गाबा चमकबा लाग्या अर अंय्यां का धोळा होया जंय्यां का इ धरती को कोई धोबी कोनी धो सकै।

⁴ ईसु क सागै एलिआ अर मूसा बी परगट होया। अर बे ईसुऊँ बतळार्या हा।

⁵ पतरस बानै बतळातो देखर ईसुनै बोलबा लाग्यो, “ओ गरूजी ओ कतो चोखो ह क, आपा अठै हां। म्हानै अठै तीन पंडाळ बणाबा दे एक तेरो, एक मूसा को अर एक एलिआ को।”

⁶ बे डरग्या हा इ ताँई पतरस आ बात बोली।

⁷ जदई एक बादळ आयो अर बानै ढक लिओ अर बादळा मऊँ हेलो आयो, “ओ मेरो लाडलो बेटो ह। थे इकी सुणो।”

⁸ अर बे तावळासा च्यारूमेर देखबा लाग्या बे आपकै सागै ईसुनै देख्या अर बानै बठै ओर कोईबी कोनी दिख्यो।

⁹ जद बे डूँगरऊँ निचै आर्या हा ईसु बा तीन्यानै चेतार ओडायो क, थे जोक्यु बठै देख्यो हो बिकै बारां म जद ताँई मना खिज्यो जद ताँई मिनख को बेटो मरेड़ा मऊँ ओज्यु नइ जीज्या।

¹⁰ अर बे इ बातनै आपका हिया क मांयनैई राखी पण बे सोचबा लाग्या क मरबा क पाछै जीबा को काँई मतबल ह?

¹¹ इ ताँई पाछै बे ईसुनै बुज्या, “यहूदि धरमसास्तरी क्याले बोलै ह क एलिआ को पेल्या आबो पक्को ह?”

¹² ईसु बाऊँ बोल्यो, “सगळी बातानै सई करबा ताँई पक्कोई एलिआ पेल्या आसी। पण मिनख का बेटा क बारां म पबितर सास्तर म ओ क्युं मंडर्यो ह क बिनै बोळो दुख भोगणो पड़सी। अर लोग बिनै ठुकरासी?

¹³ म थानै बताऊँ हूँ, एलिआ तो पेल्याई आलिओ अर लोग जखो चावा हा बो बिकै सागै कर करालिओ जंय्यां की बिकै बारां म पबितर सास्तर म मंडर्यो ह।”

ईसु छोरा मऊँ ओपरी बलाय काडी

¹⁴ जद बे बाकी का चेला कनै आया जणा बे देख्या क चेला क च्यारूमेर घणीसारी भीड़ भेळी होरी ह अर कई सास्तरानै सीखाबाळा बाकै सागै जिदर्या हीं।

¹⁵ अर बे ईसुनै बठै देखर ताजूब करताई भागर बिकन गया, अर बिऊँ नमस्कार कर्यो।

¹⁶ ईसु बाऊँ बोल्यो, “थे आऊँ क्युं जिदर्या हो।”

¹⁷ भीड़ क मांयनैऊँ एक जणो बोल्यो, “ओ गरूजी म मेरो छोरो जिकै मांयनै गुँगी ओपरी बलाय ह बिनै तेरै कनै ल्यायो हो।

¹⁸ आ गुँगी बलाय मेरा छोरा क हर कठैई फेट मार दे, अर इको मुंडो झागऊँ भरज्या अर ओ दांत पिसबा लागज्या अर ओ दिन-दिन सूक्यो जार्यो ह। म थाकाळा चेलानै खियो हो क बे इ बलायनै इकै मांयनैऊँ काड दे, पण बे इ बलायनै इमैऊँ कोनी काड सक्या।”

¹⁹ ईसु बिकी बात सुणर बोल्यो, “अरै भेम करबाळो मिनखो, म कद ताँई थारै सागै रेहस्युं? अर थानै भोगस्युं? बि छोरानै मेरै कनै ल्याओ।”

²⁰ अर ओपरी बलाय जद ईसुनै देखी जणा बा छोरा क मरोड़ी देर बिनै जमीन प आडो पटक दिओ अर बिकै मुंडाऊँ झाग आबा लाग्या।

²¹ ईसु बि छोरा का बापऊँ बुज्यो, “इकी आ दसा कदऊँ ह?” बो बोल्यो, “टाबरपुणाऊँई इकी दसा अंय्यां की ह।

²² अर आ गुँगी बलाय इको नास करबा ताँई कदै तो इनै पाणी म अर कदै आग म पटकै ह पण म तेरूँ अरदास करूं हूँ क ज तू इको जापतो कर सकै ह तो जापतो करदे अर म्हारै प तरस खार म्हारो भलो कर दे।”

²³ ईसु बिनै बोल्यो, “तू अंय्यां क्युं खेवै ह कर सकै ह तो, बिस्वास करबाळा ताँई तो सक्यु हो सकै ह।”

²⁴ बि छोरा को बाप रोयो अर ईसुऊँ बोल्यो, “ओ परबु म बिस्वास राखूँ हूँ, पण मेरा भेमनै दूर करदे।”

²⁵ अर ईसु देखबा लाग्यो क बठै मिनखा की भीड़ लागबा लागी ह बो बि गुँगी-बेरी सूगली ओपरी बलायनै दकालर बोल्यो, “ए गुँगी-बेरी बलाय म तनै हुकम द्‍युँ हूँ इकै मांयनैऊँ निकळज्या अर इकै मांयनै कदैई मना आजे।”

²⁶ अर बा गुँगी बलाय बार घालर बि छोरा क मरोड़ी देर बिकै मांयनैऊँ निकळगी अर बो छोरो मरबाळोसो होगो कई मिनख तो खेबा लाग्या क ओ छोरो तो मरग्यो।

²⁷ पण ईसु बि छोरा को बावळ्यो पकड़र बिनै खड़्यो कर्यो अर बो छोरो खड़्यो होगो।

²⁸ अर जद ईसु घरा आयो जणा बिकाळा चेला एकला म बिनै बुज्या, “म्हें बि बलायनै क्युं कोनी काड सक्या?”

²⁹ ईसु बाऊँ बोल्यो, “अरदासनै छोडर अंय्यां की कुजातनै काडबा को कोई उपाय कोनी।”

ईसु ओज्यु आपकी मोत क बारां म बतायो

³⁰ इकै पाछै बे बठैऊँ चलेग्या अर बे गलिल क मांयनैऊँ होर जार्या हा अर ईसु कोनी चावै हो क बिनै कोई पिछाणै,

³¹ क्युं क ईसु आपका चेलानै सीखार्यो हो क, “मिनख को बेटो मिनखा क हाता धोकाऊँ पकड़ायो ज्यासी अर बे बिनै मार देसी पण बो तीन दिना क पाछै मोतऊँ जी उठ खड़्यो होसी।”

³² पण आ बात बाकै पलै कोनी पड़ी अर बे बिऊँ ओज्यु बुजबा ताँई डरै हा।

सगळा मऊँ बडो कूण ह?

³³ बे कफरनूम म आया अर ईसु आपहाळा चेलानै बुज्यो, “थे गेला क मांयनै काँई बतळार्या हा?”

³⁴ बे चुपचाला होगा क्युं क बे गेला क मांयनै आपसरी म बतळार्या हा क आपणा मऊँ कूणसो बडो ह।

³⁵ ईसु बेठ्यो होर बा बारानै आपकै कनै बुलायो अर बाऊँ बोल्यो, “थारै मऊँ ज कोई बडो बणबो चावै ह जणा बिनै सगळाऊँ छोटो अर सगळा को दास बणबो चाए।”

³⁶ अर ईसु बाकै सामै एक टाबरियानै खड़्यो कर्यो अर बिकै कांधा प हात धर बाऊँ बोल्यो,

³⁷ “जखो बी मेरा नामऊँ टाबरा को मान करै ह बो मेरो बी मान करै ह अर मनै भेजबाळा को बी मान करै ह।”

जखो आपणै सामै कोनी बो आपणोई ह

³⁸ यहून्ना ईसुनै बोल्यो, “ओ गरूजी म्हें एक मिनखनै तेरै नामऊँ ओपरी बलाय निकाळता देख्या अर म्हें बिनै इ बजेऊँ रोक्या क बो मिनख आपणा मऊँ कोनी हो।”

³⁹ पण ईसु बानै ओडायो, “थे बिनै रोको मना जखो बी मेरै नामऊँ चमत्कार करै ह बो मेरै बारां म तावळोसो बुरी बाता कोनी करै।

⁴⁰ अर जखो आपणै सामै कोनी बो आपणोई ह।

⁴¹ अर सचमई जखा बी मिनख थानै मसी को जा'णर एक गिलास पाणी प्यावै ह जणा आ कोनी हो सकै क इको फळ कोनी मिलै।

आखळी मना बणो

⁴² “मेर प बिस्वास करबाळा आ नान्या मऊँ कोई एकनै बी पाप म गेरबा ताँई आखळी बणै ह बि ताँई ओई चोखो ह क बिकै नाड़ म घरट घालर बिनै समदर क मांय फेक दिओ जावै।

⁴³ ज तेरो हात तनै ठोकर खुवावै बिनै काट फेक। क्युं क तेरै दो हात होतो सोता बी तू नरक का दरिआव म गेर्यो जावै जिकी आग कदैई कोनी बुजै इऊँ तो तेरो टुंडोई ईस्बर नगरी म बड़बो चोखो ह।

⁴⁴ [अर बठै को किड़ो मरै कोनी अर बठै की आग बूझै कोनी।]

⁴⁵ अर तेरो पग तनै ठोकर खुवावै जणा बिनै काट दे अर लंगड़ोई ईस्बर नगरी म बड़बो चोखो ह, इऊँ ओ भलो ह क दो पग होतासोता बी नरक का दरिआव क मांयनै गेर्यो जावै।

⁴⁶ [बठै को किड़ो ना तो मरै अर ना बठै की आग बूझै]

⁴⁷ ज तेरी आँख तनै पाप म गेरै जणा बिनै फोड़ दे। काणो होर परमेसर का राज म बड़बो तेरै ताँई चोखो ह। इऊँ क तेरै दो आँख होतासोता तू नरक म गेर्यो जावै।

⁴⁸ बठै मिनखानै खाबाळो किड़ो कोनी मरै अर मिनखनै जळाबाळी आग कोनी बूझै।

⁴⁹ जंय्यां लुण बलिनै पबितर करै ह बंय्यांई सगळा मिनखानै आगऊँ सुद कर्यो ज्यासी।

⁵⁰ लुण चोखो ह पण लुण मऊँ सुवाद चल्योजा जणा बिनै कंय्यां चरचरो कर सकां हां? थे थारै म लुण जंय्यां को सुवाद राखो अर आपसरी म स्यांतीऊँ रिह्यो।”