मरकुस 7 - जीवन को च्यानणो (सेकावाटी नया नियम की पोथ्या)

रिती-रिवाजनै निभाबो

¹ फरिसी अर सास्तरानै सीखाबाळा जखा यरूसलेमऊँ आया हा अर बे ईसु कनै भेळा होया

² अर बे ईसु का चेलानै हात धोया बिना रोटी खाता देख्या।

³ (फरिसी अर सगळा यहूदि आपका बूडा बडका की लीक पिट्या करता हा, अर बे बिना हात धोया रोटी कोनी खाता हा।

⁴ अर बे बजार म जार आता जणा बी बिना न्हाई-धोई कर्या रोटी-टुक कोनी खाता। अर आ बातानै छोडर ओर बी बोळी बाता ही जिनै बे निभाता हा, जंय्यां लोटा, घड़ा अर तामा का भांढानै धोबो अर मांजबो )

⁵ इ बजेऊँ बे फरिसी अर सास्तरानै सीखाबाळा ईसुनै बुज्या, “थारा चेला बूडा बडका का रिती-रिवाज प क्युं कोनी चालै, अर सूल हात धोया बिनाई रोटी खावै ह?”

⁶ ईसु बाऊँ बोल्यो, “यसाया परमेसर की खेबाळो थारा जंय्यां का दोगला मिनखा ताँई परमेसर कानिऊँ ठिकई बोल्यो हो। जंय्यां पबितर सास्तर म मंडर्यो ह: ‘अ लोग होठाऊँ तो मेरो मान करीं हीं पण आको हियो मेरूँ दूर ह।

⁷ अ बेकामई मेरी भगती करीं हीं। अर मिनखा का बणाएड़ा आदेसानै मेरा कर सीखावीं हीं।’

⁸ “थे परमेसर का हुकमानै टाळर मिनखा का रिती-रिवाजानै मानो हो।

⁹ थे बोळा चतर हो जखा परमेसर का हुकमानै टाळर थाकाळा रिती-रिवाजानै मनवाबाळा हो।

¹⁰ जंय्यां मूसा ओडायो ह, ‘थे थारी माँ अर बाप की ईज्जत करो, अर कोईबी मिनख आपकी माँ अर बाप को बुरो करै बिनै मार देणो चाए।’

¹¹ “पण थे मिनखानै अंय्यां सीखार्या हो क जद थारा माँ-बाप थारै कनैऊँ कोई चिज माँगै जणा थे बानै बोलो हो क बा तो कोर्बान ह। (जिको मतबल परमेसरनै चढाईड़ी ह) अंय्यां बोलर थे थारा माँ-बापा की सेवा करबाऊँ बरी होज्यास्यो।

¹² अर थे अंय्यां सीखार मिनखानै बाका माँ-बापा की सेवा कोनी करबा द्‍यो

¹³ अर थे अंय्यां का रिती-रिवाजाऊँ जखा थारा बणाएड़ा हीं आनै निभाबा ताँई परमेसर का बचननै टाळ द्‍यो हो। अर अंय्यां-अंय्यां का ओर बी घणासारा काम ह जखा थे करो हो।”

मिनखनै सूगलो करबाळी बाता

¹⁴ ईसु ओज्यु भीड़नै बुलायो अर बो बोल्यो, “थे सगळा मेरी सुणो अर समजो।

¹⁵ अंय्यां की कोईबी चिज कोनी ह जखी मिनखनै बारनैऊँ बिकै मांय जार बिनै सूगलो करै।”

¹⁶ (पण जखी चिजा मिनखा क मांयनैऊँ निकळै ह बे बिनै सूगलो करै ह। जिकै कान ह बो बानै खोलल्यो।)

¹⁷ अर ईसु भीड़नै बठैई छोडर घर क मांयनै गयो अर बिका चेला बिनै इ मिसाल क बार म बुजबा लाग्या।

¹⁸ ईसु बाऊँ बोल्यो, “के थारै बी कोनी पलै पड़ी? के थे कोनी जाणो क जखी चिज बारनैऊँ मिनख क मांयनै जावै ह बा बिनै सूगलो कोनी करै।

¹⁹ बे चिजा हिया म कोनी जावै पण पेट क मांयनै जावै अर निकळ जावै ह।” अर बो अंय्यां बोलर खाबाळी सगळी चिजानै सुद बतायो।

²⁰ पाछै ईसु बोल्यो, “मिनख हियाऊँ जखो बिचारै ह बो बिनै सूगलो करै ह।

²¹ मिनख क हियाऊँ बुरा-बुरा बिचार, कुकरम, चोरी, हत्या,

²² व्यबिचार, लोभ, कमिणोपुणो, दोगलोपुणो, ठगणो, बेहूदोपुणो, बळोकड़ोपूणो, कोईकी बुराई करबो, गुमान अर गोबुपुणो (मोथोपुणो) बारनै निकळ ह।

²³ अ सगळी बुरी-बुरी बाता मिनख क मांयनैऊँ निकळर बिनै सूगलो करै ह।”

सूरफनिकी जात की लूगाई को बिस्वास

²⁴ ईसु बि झघानै छोडर सूर नाम की नगरी म एक घर क मांयनै गयो। अर बो चावै हो क बिकै आबा को बेरो कोईनैई नइ पड़ै, पण बो कोनी छापळ सक्यो।

²⁵ ईसु क बारां म सुणर एक लूगाई जिकी छोरी म सूगली ओपरी बलाय ही बठै बेगीसी आर ईसु का पगा म पड़गी।

²⁶ आ लूगाई यूनानी ही अर इको जलम सिरीया क फनिकी परदेस म होयो हो, आनै यहूदि अछूत मानता हा। बा लूगाई ईसुऊँ अरदास करती बोली मेरी छोरी मऊँ ओपरी बलाय काड दे।

²⁷ ईसु बी लूगाईऊँ बोल्यो, “पेल्या टाबरानै धापबादे, टाबरा की रोट्यानै गंडक्ड़ा क आगै बगाबो चोखो कोनी।”

²⁸ बा लूगाई ईसुऊँ बोली, “परबु थाकाळी बी सची ह पण टाबर की रोटी का बिखरेड़ा माखणा गंडक्ड़ाई तो खावीं हीं।”

²⁹ ईसु बिकी बातनै सुणर बिऊँ बोल्यो, “तेरी इ बात की बजेऊँ थाकाळी छोरी क मांयनैऊँ ओपरी बलाय भागगी ह, इब तू राजी-खुसी जा।”

³⁰ अर बा लूगाई घरा जार आपहाळी छोरीनै देखी क, बिमैऊँ ओपरी बलाय भागगी अर बा खाट म आडी होरी ही।

बोळा अर काबा को निरोगो होबो

³¹ ईसु सूर नाम की नगरीऊँ बिदा होर, सैदाऊँ दस नगरी होतो होयो गलिल दरिआव क कनै पुग्यो।

³² जणा लोग एक बोळानै जखो काबो बी हो ईसु कनै ल्याया। अर ईसुऊँ अरदास कर बोल्या, “ईसु थे थारो हात इपै धरद्‍यो।”

³³ ईसु बी बोळानै भीड़ऊँ नाकै लेगो अर आपकी आँगळ्या बिकै काना म घाल्यो अर थूकर बिकी जीब क हात अड़ायो।

³⁴ अर ईसु ईस्बर नगरी कानि देखर दयाऊँ भर'र सांस खिंची अर बिऊँ बोल्यो, “इप्फथा!” इको मतबल ह, खुलज्या।

³⁵ अंय्यां बोलताई बिका कान खुलगा अर जीब की आटी बी खुलगी अर बो चोखा ढंगऊँ बोलबा लाग्यो।

³⁶ अर ईसु बानै चेतार ओडायो क, “थे इ बात क बारां म कोईनैई मना खिज्यो।” पण बो बानै जत्तो नइ बताबा ताँई बोल्यो हो, बे बिऊँ बी घणी बी बातनै फिलाई।

³⁷ लोग ताजूब कर बोलबा लाग्या, “ईसु भलो-भलोई करै, अठै ताँई क बो बोळानै सुणबा अर गुँगानै बोलबा की सक्‍ति देवै ह।”