मरकुस 15 - जीवन को च्यानणो (सेकावाटी नया नियम की पोथ्या)पीळातुस क सामै ईसु की पेसी। ( मत्ती 27:1 , 2 , 11–14 ; लूका 23:1–5 ; यहून्ना 18:28–38 ) 1 दिन उगताई परधान याजक अर यहूदि नेता, सास्तरी अर सगळा महासभा का पंच ईसुनै बांदके पीळातुस कनै लेज्यार हाजिर कर्यो। 2 पीळातुस ईसुऊँ बुज्यो, “तू यहूदिआ को राजा ह के?” ईसु बिनै खयो, “तू खुदई तो बोलै ह।” 3 परधान याजक ईसु प बोळी बाता को दोस लगार्या हा। 4 पीळातुस ईसुनै ओज्यु बोल्यो, “तू बोल-बाल्यो कंय्यां खड़्यो ह अ सगळा तो तेर प दोस लगाबा लागर्या हीं।” 5 पण ईसु बिनै जुबाब कोनी दिओ ईसुनै बोल-बाल्यो देखर पीळातुसनै ताजूब होयो। ईसुनै मोत की सजा देणो ( मत्ती 27:15–26 ; लूका 23:13–25 ; यहून्ना 18:39—19:16 ) 6 फसै हाळा त्युंहार प पीळातुस रीत गेल एक केदिनै जिनै लोग चाता बिनै बा ताँई छोड देतो हो। 7 बि टेम बरअबा नाम को एक मिनख बगावत्या क सागै केद म हो क्युं क बो एक बगावत म एक मिनखनै मार गेर्यो हो। 8 जद लोग पीळातुस क कनै जार बिऊँ कह्या जंय्यां तू म्हारै ताँई करतो आयो ह बंय्यांई कर। 9 जणा पीळातुस बाऊँ खयो, “के थे चाओ हो के म थारै ताँई यहूदिआ का राजानै छोड द्युँ?” 10 पीळातुस अंय्यां इ बजेऊँ बोल्यो क्युं क बो जाणतो हो क अ परधान याजक जळता-बळता इनै पकड़ाया हीं। 11 पण परधान याजक बरअबानै पीळातुसऊँ छुटाबा ताँई भीड़नै पेल्याऊँ उकसा राख्यो हो। 12 पीळातुस बाऊँ ओज्यु बुज्यो, “थे जिनै यहूदिआ को राजा खेओ हो बिको म काँई करूं थे बताओ थे काँई चाओ हो?” 13 बे कू'कर बोल्या, “इनै सुळी प चढा द्यो!” 14 पीळातुस बाऊँ बोल्यो, “म इनै क्युं सुळी प चढाऊँ ओ लाई कूणसी बुराई करी ह।” पण बे मिनख बुर्यां करबा लाग्या, “इनै सुळी प चढा द्यो।” 15 पीळातुस भीड़नै राजी करबा ताँई बरअबानै छोड दिओ अर ईसु क कोड़ा मरवाया जिकै पाछै सुळी प चढाबा को हुकम दिओ। सिपाईड़ा क हाता ईसु की बेजती ( मत्ती 27:27–31 ; यहून्ना 19:2 , 3 ) 16 सिपाईड़ा ईसुनै राजपाल क गड का आँगणा म लेग्या। अर बे सगळी पलटणनै भेळी करली। 17 बे ईसुनै बैंगणी रंग को गाबो पिरार बिकाळा सीर प काटा को मुकट गूंथर धर दिओ। 18 बे ईसु को तमासो बणाबा ताँई जे-जैकार करबा लाग्या अर बे बोल्या, “ओ यहूदिआ का राजा तेरी जे हो।” 19 बे ईसु क सीर प डंडा मार'र, बिपै थूकर, गोडा टे'कर बिनै नमस्कार कर्या। 20 बे ईसु को मजाक उडार बिको बैंगणी गाबो तो लिआ काड, अर पाछा बिकाई गाबा पिरार, बिनै सुळी प चढाबा ताँई बारनै लेग्या। ईसुनै सुळी चढाबो ( मत्ती 27:32–44 ; लूका 23:26–43 ; यहून्ना 19:17–27 ) 21 सिकन्दर अर रूफुस को बाप जिको नाम समोन हो, ओ कुरेन गाँव को हो इनै गाँवऊँ आतो देख बे सिपाईड़ा बिनै जोरामादी ईसु की सुळीनै लेज्याबा ताँई बोल्या 22 बे ईसुनै गुलगुता नाम की झघा प लेग्या जिको मतबल खोपड़ी की झघा ह। 23 बे ईसुनै मिर नाम की दवाई मिलेड़ी अँगूरी पिलाबा लाग्या पण ईसु कोनी पीओ। 24 इकै पाछै बे ईसुनै सुळी प चढा दिओ, ईसु का गाबा लेबा ताँई बे परची गेरी अर आपसरी म बानै बाट लिआ। 25 जद बे ईसुनै सुळी प चढाया जणा दिनग्या का नो बजर्या हा। 26 अर बठै बिको दोस पतर हो जिपै मंडर्यो हो, “यहूदिआ को राजा।” 27 ईसु क सागै दो डाकू बी सुळी चढाया गया एक ईसु क दाया नाकै अर दुसरो बाया नाकै लटकायो गयो। 28 [अर पबितर सास्तर क मांयनै जखा बचन मंडेड़ा हा बे पूरा होया क, ईसु अपराद्या क सागै लटकायो जासी।] 29 अर गेला मऊँ जाबाळा आपका सीरानै हला-हलार ईसु की बुराई कर ईसुनै खेर्या हा, “मनदरनै तोड़बाळा अर तीन दिन म ओज्यु बणाबाळा 30 सुळी पऊँ तळै उतर्या अर खुदनै बचाले ” 31 अर अंय्यांई परधान याजक अर सास्तरानै सीखाबाळा बी ईसु को मजाक उड़ार्या हा। अर बे आपसरी म बतळाबा लाग्या, “ओ दुसरा मिनखानै बचायो पण खुदनै कोनी बचा सक्यो।” 32 अर बे ईसुनै खेवै हा, “ओ इजरायल का राजा मसी सुळीऊँ तळै उतर क दिखा जणा म्हें बिस्वास कर लेस्यां” अर जखा डाकू ईसु क सागै सुळी चढाया गया हा बे बी ईसु को मजाक उड़ार्या अर बिकी बेजती करर्या हा। ईसु पिराण तज्या। ( मत्ती 27:45–56 ; लूका 23:44–49 ; यहून्ना 19:28–30 ) 33 दोपारा बारा बजताई सगळा देस क मांयनै अँधेरो छायो अर करीब तीन बजै ताँई अँधकार छायो रिह्यो। 34 ईसु तीन बजै जोरऊँ बार घालर खयो “इलोई, इलोई, लमा सबकतनी।” जिको मतबल ह, “ओ मेरा परमेसर ओ मेरा परमेसर तू मनै क्याले छोड दिओ?” 35 अर जखा मिनख बठै खड़्या हा बे ईसुनै अंय्यां बोलता सुण्या जणा बे खया, “सुणो, ओ एलिआनै बुलार्यो ह।” 36 एक मिनख भागर चुखानै खाटो उठायड़ा अँगूरा का रस म डूबार लाठी प टां'गर ल्याओ अर ईसुनै पीबा ताँई दिओ अर खयो, “आपा देखस्यां इनै उतारबा ताँई एलिआ आवै क कोनी।” 37 जणा ईसु जोरऊँ बार घालर पिराण तज दिआ। 38 अर मनदर को परदो उपरऊँ लेर तळै ताँई पा'टर दो टुकड़ा होगो। 39 एक सुबेदार ईसु क सामै खड़्यो हो, ओ ईसु की बातानै सुण्यो अर देख्यो क ईसु कंय्यां आपका पिराण तज्या। अर बो बोलबा लाग्यो, “ओ मिनख सचमई परमेसर को बेटो हो।” 40 बठै लूगाया बी ही बे ईसुनै दूरऊँ खड़ी-खड़ी देखै ही बा लूगाया म मरीयम मगदलिनी, छोटक्यो याकूब अर युसूफ की माँ मरीयम अर सलोमी ही। 41 ईसु जद गलिल क मांयनै हो जणा बि बठै अ लूगाया ईसु क गेल चालबाळी ही अर अ ईसु की सेवा करती ही। अर बठै ओर बी कई लूगाया ही जखी ईसु क सागै यरूसलेम ताँई आई ही। ईसुनै कबर म धरनो ( मत्ती 27:57–61 ; लूका 23:50–56 ; यहून्ना 19:38–42 ) 42 दिन आथगो हो अर ओ अरामहाळा दिनऊँ पेलड़ो दिन हो जिनै त्यारी करबाळो दिन बी बोलै ह। 43 इ बजेऊँ अरमतिया को युसूफ आयो। ओ मिनख यहूदि म्हापंचायत को मान्यो-थान्यो हो अर परमेसर का राजनै उडिकै हो। ओ ठाडी छाती कर पीळातुस कनै गयो अर बिऊँ ईसु की लास माँगी। 44 पीळातुसनै ताजूब होयो क ईसु अत्तो तावळो कंय्यां मरग्यो। अर बो सुबेदारनै आपकै कनै बुलायो अर बिऊँ बुज्यो, “बिनै मर्या बोळी देर होगी के?” 45 अर पीळातुस सुबेदारऊँ समचार लेर ईसु की लासनै युसूफनै लेज्याबा को हुकम दे दिओ। 46 युसूफ मखमल को चादरो खरीद्यो अर लासनै सुळीऊँ उतार बि चादरा म बिनै लपेटर ढाड क मांय खोदेड़ी कबर म धर दिओ। अर कबर का मुंडा प बडोसारो भाठो लगा दिओ। 47 मरीयम मगदलिनी अर युसूफ की माँ मरीयम देखै ही क बो ईसु की लासनै कठै धरर्यो ह। |
(c) 2010-2017, New Life Computer Institute. All rights reserved