मरकुस 13 - जीवन को च्यानणो (सेकावाटी नया नियम की पोथ्या)

मनदर ढेह्बा की भबिस्वाणी

¹ जद ईसु यरूसलेम का मनदर क मांयनैऊँ बारनै जार्यो हो जणा बि टेम बिकाळा चेला मऊँ एक चेलो ईसुनै बोल्यो, “ओ गरूजी देख अ भाठा अर आ हेली कत्ती सोवणी ह।”

² ईसु बिकी इ बातनै सुणर बिनै बोल्यो, “के तू इ बडीसारी हेलीनै देखै ह? अठै एक बी भाठो कोनी रेह्सी सगळा भाठा ढा दिआ जासी।”

विपदा अर सताव

³ जद ईसु जेतून का डूँगर प मनदर क सामै बेठ्यो हो जणा बिऊँ पतरस, याकूब, अर अंदरिआस एकला म बुज्या

⁴ बे ईसुनै बुज्या, “अ बाता कद घटसी? अर आ बाता क होबा की सेलाणी काँई होसी?” बाकी बाता सुणर

⁵ ईसु बानै बोल्यो, “थे समळर रेहज्यो थारै सागै कोई छळ नइ करज्या।

⁶ मेरा नामऊँ बोळासारा आसी अर खेसी ‘म मसी हूँ’ अंय्यां बोलर बे बोळासारा मिनखानै भंगरासी।

⁷ अर जद थे राड़ अर लड़ायां की खबरा सुणो जणा मना डरज्यो, क्युं क आ बाता को होबो ते ह पण बा घड़ी नास की कोनी होसी।

⁸ अर जात्या-जात्या प अर देस-देस प चढाई करसी। अर कठै-कठै तो भूचाळ आसी अर काळ पड़सी अर अ सगळी बाता हाल तो जच्चा क सरूका उठबाळा दरद जंय्यां की ह।

⁹ पण थे समळर रेहज्यो, थानै पकड़र कचेरी म सूप्यो ज्यासी अर थानै अरदास करबाळी झघा म पिट्यो जासी अर थानै मेरा नाम अर चोखा समचार की बजेऊँ पंचा, राजा अर हाकीमा क सामै खड़्यो कर दिओ जासी जिऊँ थे बानै चोखो समचार बता सको।

¹⁰ पण आ पक्की ह क आऊँ पेल्या धरती का सगळा कूणबानै चोखो समचार सुणायो जासी।

¹¹ अर जद थानै पकड़र लोग कचेरी क हवालै करीं जणा थे इ बात की जमाई चिंत्या मना करज्यो क थानै काँई खेणो ह? बी घड़ी पबितर आत्मा जखा सबद दे बेई बोलज्यो क्युं क बोलबाळा थे कोनी पण पबितर आत्मा होसी।

¹² भाई-भाईनै पकड़ा'र मरवासी अर अंय्यांई बाप आपका टाबरा क सागै करसी अर टाबर आपका माँ-बाप क खिलाप होर बानै मरवासी।

¹³ अर मेरा नाम की बजेऊँ सगळा मिनख थारूँ बेर राखसी, पण जखो आखीर ताँई सबर करसी बोई बचायो जासी।”

बिनास की घड़ी

¹⁴ जद थे उजाड़बाळी सूगली चिजानै जठै नइ होणी चाए ही बठै देखो (बाचबाळो खुदई जाणले इको मतबल काँई ह?) जणा जखो यहूदिआ म होवै, बानै डूँगरा म भाग जाणो चाए।

¹⁵ अर जखा मिनख आपकी छात प होवै बे आपका घरा म क्युंई चिज ल्याबा ताँई नइ उतरै।

¹⁶ अर जखो खेत म होवै बो आपका गाबा लेबा ताँई नइ मुड़ै।

¹⁷ अ दिन बा लूगाया ताँई जखी आसऊँ होसी अर दुद प्याबाळी टाबरा की माँ ताँई बोळी पिड़ा का होसी।

¹⁸ थे अरदास कर्या करो क अ बाता स्याळा म नइ हो।

¹⁹ बा दिना म अंय्यां को कळेस आसी जखो जुगाद म जद परमेसर इ दुनियानै रची जदऊँ लेर नइ तो हाल ताँई आयो अर नइ इकै पाछै कदै आसी।

²⁰ ज परमेसर बा दिनानै कम नइ करतो जणा कोईबी कोनी बचतो। पण बिका टाळेड़ा मिनखा की बजेऊँ परमेसर बा दिनानै कम कर दिओ ह।

²¹ बा दिना म थानै कोई खेवै, “देखो अठै ह मसी नहिस बठै ह मसी।” जद थे बिको बिस्वास मना करज्यो।

²² थानै बा दिना म झूठा मसी अर झूठा परमेसर की खेबाळा दिखबा म आसी। अर बे सेलाणी-चमत्कार दिखार टाळेड़ा मिनखानै बी भेकाबा की कोसिस करसी।

²³ पण थे समळर रिह्यो म थानै अ सगळी बाता पेल्याऊँई बता दिनी ह।

मिनख का बेटा को ओज्यु आबो

²⁴ बा दिना म, बि कळेस क पाछै सूरज उजाळानै खो देसी अर चाँद बी कोनी चमकसी।

²⁵ अर अकास मऊँ तारा बी तळै पड़ मरसी। अर अकास की सक्‍तिया हलाई जासी जिऊँ बे आपकी झघा छोड देसी।

²⁶ जणा लोग मिनख का बेटानै महासक्‍ति अर मेमा क सागै बादळा प आतो देखसी।

²⁷ “अर बो आपका ईस्बर नगरी दुतानै भेजसी क बे धरती अर अकास प जार च्यारूमेरूँ बिका टाळेड़ा मिनखानै भेळा करीं।”

अंजीर का दरख्तऊँ सीख देबो

²⁸ “थे अंजीर का दरख्तऊँ सीखो जद बिकी डाळ्यां नरम होवै अर बिकै कुपळ फूटबा लागै जणा थे बिनै देखर जाणज्याओ हो क उंदयाळो आबाळो ह।

²⁹ अंय्यांई जद थे आ बातानै होता देखो जणा जाणज्याज्यो क बा घड़ी सांकड़ैई ह, अर थळी पई ह।

³⁰ म थानै सची खेऊँ हूँ, जद ताँई अ बाता कोनी बितसी इ पिडी को नास कोनी होसी।

³¹ अकास अर धरती टळ ज्यासी पण मेरी बाता कोनी टळै।

जागता रिह्यो

³² “बि दिन अर बि घड़ी क बारां म कोईबी कोनी जाणै, नइ तो ईस्बर नगरी दुत अर नइ बेटो पण परम-पिताई बिकै बारां म जाणै ह।

³³ इ बजेऊँ थे समळर जागता रेहज्यो थानै कोनी बेरो क बो दिन कद आसी अर नइ थे बि दिन क बारां म जाणो।

³⁴ ओ अंय्यां होसी जंय्यां कोई मिनख दिसावर जाबाऊँ पेल्या आपका घरनै आपका दास क हवालै कर बानै न्यारो-न्यारो काम बाटर चल्यो जावै अर चोकीदारनै पेरो लगाबा को हुकम देर अंय्यां बोलर क जद ताँई म कोनी आऊँ तू घर की समाळ करजे।

³⁵ इ ताँई थे चेता म रेह्ओ क्युं क थे कोनी जाणो क घर को मालिक कद आसी। आथण्या आसी क मज रात म आसी क भागपाट्या आसी नहिस दिन चढ्या आसी।

³⁶ अर अंय्यां नइ होज्या कदै बो चाणचुक्यो आर थानै सोतो देखै।

³⁷ अर जखी बाता म थानै खेऊँ हूँ बेई बात म सगळानै खेऊँ हूँ क थे सगळा जागता रेहज्यो।”